Unfa u sa du di diniwooko fuu möön bunu​—Heepi dee studie fii u de ko abi di guwenti u ta lei deseei soni u Bëibel

Faandi mbei a dë fanöudu: Ee dee studie fuu kë ko taanga a di biibi, nöö de musu ko sabi dee fundu lei dee dë a di Wöutu u Gadu, sö taa dee lei dë sa dou de hati ku de fusutan (Heb. 5:12–6:1). U musu mbei möiti u ko fusutan dee soni dee u ta lei. U musu ta pooba u si fa dee njunjun soni dee u ko sabi nama ku dee soni dee u sabi kaa, fuu si fa u sa fiti de a u libi (Nöng. 2:1-6). Te dee studie fuu lei u öndösuku soni u Bëibel deseei, nöö di soni dë o heepi de u ko sa’ u wooko ku dee buku fuu, u piki hakisi di nama ku soni u Bëibel. Di taanga möiti di de ta mbei u du dee soni di de ta lei, o heepi de u hoi dou te tesi miti de.​—Luk. 6:47, 48.