Wooko ku dee peipei soni u di Bëibel lei-buku

Te wan studie ko sabi andi di Bëibel ta lei tuutuu, söseei te a ta du dee soni di a ta lei, nöö a o go a fesi a di biibi (Ps. 1:1-3). U sa heepi di studie fuu faa go a fesi te u ta wooko ku dee peipei soni dee dë a di Bëibel lei-buku.

Dee hakisi dee dë a bigi u wan woto: Hiniwan woto a di buku abi hakisi a bigi fëën, nöö dee piki dë u feni a di woto. I sa lesi dee hakisi da di studie u heepi ën faa kë sabi dee soni dee a o lei. Nasö i sa buta dee hakisi dëën faa piki kölö sö. Ee di piki fëën an bunu, nöö an dë fanöudu fii lei ën taa di piki fëën an bunu. Dee piki fëën o heepi i fii ko sabi na andi i musu buta möön pakisei.​—Nöng. 16:23; 18:13.

Woto fanöudu soni: Ee di studie ta fusutan dee soni u di woto, söseei ee a ta biibi de, nöö i sa dëën di taanga u go lesi möön soni di nama ku di woto dë a di pisi, Woto fanöudu soni di dë a baka u di buku. Te joo toona go nëën, nöö i sa tei wantu miniti u luku ee a fusutan dee soni dee a lesi. Ee i si taa a dë fanöudu, nöö a bi o bunu u tei ten fuun taki makandi u dee soni dee a lesi. I sa lesi wantu u dee palaklafu, nöö i buta hakisi dëën di i bi seeka a fesi.

Dee piki dee dë a kaba u hiniwan woto: Dee piki dee dë a kaba u hiniwan woto, da dee piki u dee hakisi dee dë a bigi u di woto. I sa wooko ku di pisi aki u luku ee di studie fii fusutan di woto, söseei ee a sa konda da i andi a lei. Lesi hiniwan u dee piki ku dee tëkisi dëën, nöö hakisi ën unfa di tëkisi ta kai ku di soni di sikifi dë.​—Tjab. 17:2, 3.