Lei sëmbë soni u di tuutuu lei

Bigi u wajamaka-liba wan pisi o ta ko a Di libi ku di diniwooko fuu komakandi-buku. Di pisi aki woo ta kai „Lei sëmbë soni u di tuutuu lei.” Woo mbei möiti u buta wan hakisi da wan sëmbë, nöö u piki di hakisi dë ku wan Bëibel tëkisi, u di u kë konda wan soni u Bëibel kölö sö dëën.

Ee u si taa di sëmbë kë sabi möön soni, nöö u sa seeka soni fuu toona go luku ën. U sa disa wan buku nasö wan woto soni dëën nasö u sa pëë wan fëlön u jw.org dëën. U musu mbei möiti fuu toona go luku di sëmbë a di seei wiki dë fuu taki u di woto go dou. Dee soni u di njunjun pisi aki, ku dee taki di dee peleikima o ta hoi, o ta tei puu a dee woto dee dë a di Bëibel lei-buku. A kaba u wan woto, woto tëkisi dë di u sa taki u de ku di sëmbë te woo toona go luku ën nasö di u sa tei u bigi lei ën soni u Bëibel ku di Bëibel wanwan.

Wan kodo pasi nöö dë di ta tja sëmbë go a teego libi (Mt 7:13, 14). U di u ta peleiki da hii pei sëmbë di kiija a peipei fasi nasö di nango a peipei keiki, mbei u musu ta konda soni u Bëibel da de a sö wan fasi taa a sa hai de pakisei (1Ti 2:4). Te u ko sabi dee woto u Bëibel bunu, söseei te u sa’ u peleiki da sëmbë ku di „Wöutu u Gadu”, ku te u ta lei de soni ku ën „kumafa a dë”, nöö möönmöön woo ta dë waiwai, söseei soni o ta waka bunu da u te u ta lei sëmbë soni u di tuutuu lei.​—2Ti 2:15.