Hii dee tesi dee ta miti u o kaba wan daka

Te tesi ta miti u, nöö a sa mbei u fii bookosaka, möönmöön ee de ta fika longi. Dafiti bi sabi taa di tesi di bi ta miti ën u Könu Saulosu hedi, an bi o de u nöömö. Nöö a bi sabi tu taa a bi o ko toon könu kumafa Jehovah bi paamusi (1Sa 16:13). Di biibi di Dafiti bi abi bi heepi ën faa bi wakiti Jehovah ku pasensi.

Te u ta miti tesi, nöö u musu du soni ku köni, söseei u musu wooko ku di köni di Gadu da u fuu pakisei andi u sa du di sa heepi u (1Sa 21:12-14; Nön 1:4). Ma, aluwasi u du hii soni di u sa du di ta kai ku dee mama wëti u Bëibel, tökuseei so u dee fuka dee ta miti u o dë jeti. Wë te a ta miti u sö, nöö u musu lei u abi pasensi, söseei u musu wakiti Jehovah. Abiti möön Jehovah o puu hii dee fuka dee ta miti u, söseei „a o feki hiniwan wojo wata” puu a u wojo (Ako 21:4). Ma aluwasi a ko dë taa Jehovah hën heepi u ku wan bookohedi di u abi, nasö kandë wan soni u du di heepi u ku di bookohedi dë, tökuseei u sabi seiki taa: Hii dee tesi dee ta miti u o kaba wan daka. Di sabi di u sabi di soni aki sa da u kötöhati seei.

LUKU DI FËLÖN SËMBË DI TA LIBI KUMA WAN FAMII A WAN GOONLIBA DI TA PAATI SËMBË KU SËMBË, NÖÖ BAKA DI DË, PIKI DEE HAKISI AKI:

• Un tesi bi miti so u dee Keesitu sëmbë dee bi dë a libasë fu Amëëkanköndë?

• Unfa de bi lei taa de bi abi pasensi ku lobi?

• Andi de bi du di ta lei taa de an bi disa u buta pakisei a „dee möön fanöudu soni”?​—Fp 1:10