DI LIBI FUU KUMA KEESITU SËMBË
Seeka soni nöunöu ee a ko pasa taa i abi data heepi fanöudu
Faandi mbei u musu du ën? U di wan soni sa pasa di sa mbei taa u abi data heepi wantewante fanöudu. Fëën mbei u musu seeka soni nöunöu kaa, sö taa u sa feni di data heepi di u abi fanöudu ee wan soni ko pasa. Te u ta du sö, nöö u ta lei taa u abi lesipeki da di libi, söseei da dee wëti u Jehovah dee nama ku buuu.—Tja 15:28, 29.
Andi da dee soni dee u musu seeka?
Begi, nöö tei di ten u fuu di pampia di ta lei taa wa ta tei buuu (Geneeskundige wilsverklaring en machtiging).a Peleikima di dopu kaa sa hakisi di dinai di ta seeka buku soni di pampia aki, söseei de sa hakisi di pampia da dee möön njönku mii u de, u lei taa deseei an ta tei buuu (Identiteitskaart)
Ee i dë ku bëë, nöö hakisi dee gaanwomi di pampia di dee peleikima dee dë ku bëë ta fuu (Informatie voor zwangere zusters) (S-401). Di pampia aki o heepi i fii sa du soni a wan bunu fasi te a nama ku data heepi di i musu kisi ee a ko pasa taa wan soni pasa ku i a di pisiten di i dë ku bëë nasö a di pisiten di joo pai.
Ee i abi wan data heepi fanöudu di nama ku buuu soni nasö di mbei taa i musu go kandi a hatiwosu, nöö be dee gaanwomi sabi a fesi, söseei piki dee sëmbë u di hatiwosu taa i kë wan sëmbë u Jehovah Kotoigi ko luku i
Ku andi dee gaanwomi o heepi i? De sa heepi i fuu di pampia di ta lei taa ja ta tei buuu. Ma dee gaanwomi an o piki i andi i musu du nasö andi de bi o du te a nama a soni di hiniwan fuu musu taki da useei andi woo du (Lo 14:12; Ga 6:5). Te i piki dee gaanwomi fii taa i musu du wan data soni ka de sa kë da i buuu, nöö wantewante de o bëli dee baaa u di Hatiwosu Komite (di komite di ta heepi baaa ku sisa di abi heepi fanöudu te de dë a hatiwosu) u de heepi i.
Ku andi dee baaa u di Hatiwosu Komite o heepi i? Dee baaa dee dë a di Hatiwosu Komite kisi lei u fan ku data ku kuutuma u heepi de u ko fusutan faandi mbei wa ta tei buuu. De sa fan ku di data di musu kula i u luku un woto fasi dë fa a sa heepi i söndö buuu. Ee a dë fanöudu, nöö de sa heepi i suku wan woto data di sa kula i söndö buuu.
LUKU DI FËLÖN UNFA MI SA DU SONI A WAN KÖNI FASI TE A NAMA KU BUUU, NÖÖ BAKA DI DË, PIKI DEE HAKISI AKI:
Andi i lei a di fëlön aki di sa heepi i fii sa dë seekaseeka ee a ko pasa taa i abi data heepi fanöudu di nama ku buuu?
a Woto 39 u di buku I sa dë waiwai u teego! sa heepi i u du soni a wan köni fasi te i abi data heepi fanöudu, di nama ku buuu.