Faandi mbei Gadu an ta haika hii begi?

Jehovah Gadu di Tata fuu di dë a liba ala, lobi seei te u ta begi ën ku hii u hati. Ma soni dë di sa mbei an haika dee begi fuu. Andi sa mbei an haika dee begi fuu, söseei andi u musu hoi a pakisei te u ta begi ën? Boo luku wantu soni dee sikifi a di Bëibel.

Wanlö sëmbë dë a wan keikiwosu ta lesi wan begi di sikifi a buku.

„Te joo begi, nöö ja musu ta taki dee seei soni hiniwan juu.”—Mateosi 6:7, NW.

Jehovah an kë taa te u ta begi ën, nöö u ta taki begi di u hoi a hedi nasö te woo begi ën nöö u ta lesi begi di sikifi a buku. Ma a kë taa u ta taki soni dee dë a u hati. Pakisei fa i bi o fii ee wan mati fii ta taki dee seei soni da i hiniwan daka. Te tu sëmbë dë mati, nöö de ta taki fa soni dë tuutuu. De an ta tjubi soni da deseei. Te u ta taki soni dee u seei bi o kë taki te u ta begi di Tata fuu di dë a liba ala, nöö u ta lei taa u ta si ën kuma wan mati fuu.

Wan womi ta lafu ta luku nango a liba, nöö a ta kaabu wan lötu.

„Ee un ta begi ën wan soni seei, ma wan ta feni ën u di wan ta begi kumafa a fiti.”—Jakobosi 4:3.

Ee u bi o ta begi Gadu u du soni dee u sabi taa an kë fuu du, nasö fuu ko abi soni dee u sabi taa an bi o kë fuu abi, nöö a o dë taa u ta begi ën, ma wa musu dë ku di pakisei taa a o piki di begi fuu. Boo taa wan sëmbë di ta pëë möni pëë ta hakisi Gadu faa mbei a wini möni, Jehovah bi o piki sö wan begi ö? Jehovah ta piki u taa u musu köni ku giii, söseei a ta bai u a di kë di sëmbë ta kë feni soni di de sabi taa de an o feni, kuma di biibi sëmbë ta biibi taa de ta abi kölöku (Jesaaja 65:11; Lukasi 12:15). Wa sa pakisei taa Gadu o piki sö wan begi! Ee u kë taa Gadu piki dee begi fuu, nöö dee soni dee u ta taki a dee begi fuu, musu ta kai ku dee soni a ta piki u a di Bëibel.

Wan fesima u keiki ta begi da wanlö sodati.

„Gadu ta buuse dee begi u wan sëmbë di ta niinga u hoi di wëti fëën.”—Nöngö 28:9.

Na awooten, Gadu an bi ta haika dee begi u dee sëmbë dee an bi ta du andi dee wëti fëën ta taki (Jesaaja 1:15, 16). Gadu an tooka (Maleaki 3:6). Ee u kë taa Gadu musu haika u te u ta begi ën, nöö u musu mbei hii möiti u hoi dee wëti fëën. Ma, unfa a dë ee a di ten di pasa u bi du soni di an bunu? Hën da nöiti Gadu o haika dee begi fuu ö? Wë, na sö a dë! Gadu o da u paadon ku hii hën hati, ee u lei taa u tjali u dee soni dee u bi du, nöö u bia ko ta libi kumafa a kë.—Tjabukama 3:19.

„Te wan sëmbë joo ko [a Gadu], nöö i musu biibi taa a dë. Nöö söseei tu i musu biibi taa a ta paka dee sëmbë dee ta suku ën ku wan hati.”—Hebelejën 11:6.

Na te u ta fii bookosaka nëën nöö u ta begi faa heepi u fuu fii bunu baka. Ma u ta begi Gadu u lei ën taa u ta biibi nëën, taa u ta lesipeki ën, söseei taa u lobi ën. Di bakama u Jesosi de kai Jakobosi, bi taki taa “te joo begi, nöö i musu a’ di biibi a Gadu taa a o da i di soni i ta begi ën naandë nöömö. Ma ee i ta panta kuma an sa da i ën,” . . nöö „ja musu a di mëni taa ee i begi Gadu soni nöö a o da i ën” (Jakobosi 1:6, 7). Ee u kë abi wan möön taanga biibi a Gadu, nöö u musu tei ten u ko sabi ën bumbuu. U sa ko sabi Gadu bumbuu te u ta öndösuku soni a di Bëibel. Di soni dë o heepi u fuu ko sabi andi Gadu kë, söseei dee begi fuu o ta kai ku di kë fëën.