Di lafu di wan sëmbë lafu tja wan bunu ko!

TU NJÖNKU mujëë bi ta waka pasa a wan kamian ka sömëni gaangaan masikapei bi dë, a di foto Baguio, di dë a di köndë Filipijnen. De bi si wan bukuwagi fuu, ma de an bi go nëën. Wan sisa de ta kai Helen, di bi ta wooko ku di bukuwagi dë, bi lafu mukii da dee tu mujëë aki di de ta waka ta pasa. Dee mujëë aki bi waka pasa, ma tökuseei de bi ta mëni fa di sisa bi lafu da de jeti.

Bakaten dee mujëë aki tei besi nango a wosu, hën de si wan gaan böutu ka sikifi jw.org, a wan Könuköndë zali fesi. De bi ko mëni taa di seei soni dë de bi si sikifisikifi a di bukuwagi di de bi waka pasa. De ko saka kumutu a di besi, hën de go luku a wan soni di bi sikifi a di Könuköndë zali fesi, na un daka dee kemeente ta hoi dee komakandi u de.

Dee tu mujëë aki bi ko go a wan u dee komakandi di bi o hoi. Ambë i mëni taa de ko si di de waka denda go a di Könuköndë zali? De bi ko si Helen! De mëni wantewante taa hën da di mujëë di bi lafu da de a di bukuwagi. Helen taki taa: „Di de waka ko a mi, mi bi fëëë pikisö. Mi bi ko ta pakisei taa unfa dee mujëë aki ta ko a mi liba sö. A sa dë taa wan soni wë mi du ö?” Ma dee mujëë bi konda da Helen taa de bi si ën kaa ku di bukuwagi.

Dee mujëë aki bi lobi di komakandi seei, nöö de bi fii bunu fa de bi dë makandi ku dee baaa ku dee sisa. Di de si fa wotowan ta seeka di zali baka di komakandi, hën de hakisi ee de sa da wan maun tu. Wë wan u dee mujëë aki an ta libi a di köndë Filipijnen möön, ma wan u de ta ko a dee komakandi, nöö a bigi lei soni u Bëibel tu. Wë di lafu di wan sëmbë bi lafu, hën wë mbei soni ko waka sö!