Unfa hii sëmbë a di kemeente sa heepi wan sëmbë di ta lei soni u Bëibel faa sa go a fesi u te a dopu?

1-2. Ambë sa heepi wan sëmbë di ta lei soni u Bëibel faa sa go a fesi u te a dopu?

WAN sisa de kai Amy, di ta libi a di köndë Fiji, bi taki taa: „Mi bi lobi di lei di mi bi ta lei soni u Bëibel. Mi bi sabi taa tuutuu soni mi bi ta lei. Ma di mi bi bigi ta nama ku dee baaa ku dee sisa, hën mi bigi tooka soni a mi libi, söseei mi bi go a fesi u te mi dopu.” Di woto u Amy aki ta lei u wan fanöudu soni. A ta lei u taa wan sëmbë di ta lei soni u Bëibel sa möön go a fesi ee wotowan u di kemeente ta heepi ën.

² Hiniwan peleikima sa heepi wan sëmbë di ta lei soni u Bëibel, faa ko dë wan sëmbë u di kemeente (Ef. 4:16). Wan sisa di ta du di pioniliwooko de ta kai Leilani, di ta libi a di paati de kai Vanuatu, bi taki taa: „Sëmbë a’ wan taki ta taki taa: ’Tu maun panjan wan boto, a subi dan!’ Mi si kuma sö di soni aki dë tu te i kë heepi wan sëmbë faa ko dë wan bakama u Keesitu. Wan hii kemeente ta heepi wan sëmbë faa sa ko a di tuutuu lei.” Mama ku tata, famii, mati, ku sëmbë di ta lei wan mii soni a siköö, de tuu dë fanöudu u heepi wan mii faa ko dë wan gaangaan sëmbë, di ta tja hënseei a wan bunu fasi. De ta du di soni aki te de ta da di mii taanga faa du bunu soni, söseei te de ta lei ën fanöudu soni. Wë sö nöö baaa ku sisa a di kemeente sa heepi wan sëmbë di ta lei soni u Bëibel, faa sa go a fesi u te a dopu.​—Nöng. 15:22.

3. Andi u sa lei a di soni di Ana, Dorin, ku Leilani bi taki?

³ Faandi mbei wan peleikima di ta lei wan sëmbë soni u Bëibel, musu ta wai te wotowan kë heepi di sëmbë di a ta lei soni u Bëibel? Wan sisa de kai Ana, di ta du di apaiti pioniliwooko a di köndë Moldova, bi taki taa: „Wan sëmbë di ta lei soni u Bëibel abi heepi fanöudu a peipei fasi. Fëën mbei a sa taanga da wan peleikima fu hën wanwan heepi wan sëmbë a dee peipei fasi dë.” Wan baaa de kai Dorin, di ta du di apaiti pioniliwooko a di köndë Moldova, bi taki taa: „Sömëni pasi woto peleikima ta taki wan soni di ta dou di hati u di sëmbë di mi ta lei soni u Bëibel. So juu a ta dë soni di ma bi pena pakisei u taki seei.” Leilani bi taki wan woto soni tu. A bi taki taa: „Di lei di dee baaa ku dee sisa ta lei taa de lobi wan sëmbë di ta lei soni u Bëibel, ta heepi ën faa ko sabi ambë da dee tuutuu dinima u Jehovah.”​—Joh. 13:35.

4. Andi woo luku a di woto aki?

⁴ Wë kandë i sa ta pakisei taa: ’Unfa mi sa heepi wan sëmbë di ta lei soni u Bëibel ee na mi da di sëmbë di ta lei ën soni u Bëibel?’ Boo luku andi ku andi u sa du, te wan peleikima kai u fuu go sindo makandi ku ën te a o lei wan sëmbë soni u Bëibel, söseei andi ku andi woo du te wan sëmbë di ta lei soni u Bëibel bigi ta ko a dee komakandi. Boiti di dë, woo luku tu unfa dee gaanwomi sa heepi wan sëmbë di ta lei soni u Bëibel faa go a fesi u te a dopu.

ANDI JOO DU TE JOO SINDO MAKANDI KU WAN WOTO PELEIKIMA, TE A O LEI WAN SËMBË SONI U BËIBEL?

5. Andi i musu du te wan peleikima kai i fii ko ku ën te a o lei wan sëmbë soni u Bëibel?

⁵ Di peleikima di ta lei wan sëmbë soni u Bëibel, hën fosu abi di faantiwöutu u heepi di sëmbë di a ta lei soni, faa ko fusutan di Wöutu u Gadu. Fëën mbei te wan peleikima kai i fii ko ku ën, nöö i musu heepi ën faa sa dou di maaka dë (Peleik. 4:9, 10). Ma nöö andi i sa du u heepi di peleikima faa sa dou di maaka fëën?

6. Unfa u sa wooko ku di mama wëti di sikifi a Nöngö 20:18, te woo go ku wan woto peleikima u go lei wan sëmbë soni u Bëibel?

⁶ Seeka iseei a fesi. Di fosu soni di i sa du, hën da i sa hakisi di peleikima faa konda wantu soni da i u di sëmbë di a ta lei soni u Bëibel. (Lesi Nöngö 20:18.) Wë i sa hakisi ën dee soni aki: „Andi ku andi i sabi u di sëmbë? Un woto un ta luku? Un maaka i kë dou ku di woto di woon luku? Soni dë di ma musu taki nasö di ma musu du te woo lei ën soni ö? Andi mi sa du u heepi di sëmbë faa sa go a fesi a di biibi?” Ma an dë u taki taa di peleikima an musu konda soni u di sëmbë di wotowan an musu sabi. Wan sisa de kai Joy di ta du di sëndëlengiwooko, lo’ u piki woto peleikima wantu soni u di sëmbë di a o lei soni u Bëibel. A bi taki taa: „Dee soni dee mi ta piki di sëmbë di mi ku ën o peleiki, ta heepi ën faa sabi andi a musu taki u heepi di sëmbë di woo go lei soni u Bëibel.”

7. Faandi mbei a ta bunu u seeka iseei a fesi, te joo go ku wan woto peleikima u lei wan sëmbë soni u Bëibel?

⁷ Te wan peleikima kai i fii ko ku ën te a o lei wan sëmbë soni u Bëibel, nöö a bunu fii seeka iseei a fesi (Ësl. 7:10). Baaa Dorin di u bi taki soni fëën a fesi, bi taki taa: „Mi ta tei ën u bigi te di peleikima di mi kai faa ko ku mi seeka hënseei a fesi. A sö wan fasi a sa taki wan soni di sa heepi di sëmbë di u ta lei soni u Bëibel.” Boiti di dë, di sëmbë di u ta lei soni u Bëibel o si taa u seeka useei bunu a fesi. Nöö woo dë sëmbë di a sa djeesi. Aluwasi ee ja abi sö hia ten u seeka iseei bunu a fesi, tökuseei a bunu fii tei pikisö ten fii ko sabi wantu soni u di soni di joo lei di sëmbë.

8. Andi i musu du fii sa sabi andi i musu taki a di begi fii, te joo lei wan sëmbë soni u Bëibel?

⁸ Begi da wan fanöudu soni di u musu ta du, te woo lei wan sëmbë soni u Bëibel. Fëën mbei a dë fanöudu fii seeka a fesi fii sabi andi joo taki a di begi. A sö wan fasi di begi fii o sa möön dou sëmbë hati (Ps. 141:2). Wan mujëë de kai Hanae, di ta libi a di köndë Japan, ta mëni fa wan sisa di bi ko ku di sëmbë di ta lei ën soni u Bëibel, bi begi. A bi taki taa: „Mi bi si taa hën ku Jehovah dë gaan mati, nöö mi bi kë dë kuma hën. Mi bi lobi tu fa a bi kai mi në a di begi.”

9. Andi i sa du te i go ku wan sëmbë te a o lei wan sëmbë soni u Bëibel, te u luku di soni di sikifi a Jakobosi 1:19?

⁹ Heepi di peleikima te i go makandi ku ën u lei wan sëmbë soni u Bëibel. Wan sisa de kai Omamuyovbi, di ta du di apaiti pioniliwooko a di köndë Nigelia, bi taki taa: „A ta dë wan bunu soni te di peleikima di ko ku i te joo lei di sëmbë soni u Bëibel, ta haika bunu te i ta lei di sëmbë soni. Di peleikima dë an musu ta fan hia poi te de go lei di sëmbë soni u Bëibel, u di di peleikima di ta lei di sëmbë seei hën abi di faantiwöutu u lei di sëmbë möön gaanfa.” Ma nöö unfa i sa sabi na un ten i musu taki wan soni, nasö unfa i musu taki ën? (Nöng. 25:11) Wë i musu ta haika bunu te di peleikima ta fan ku di sëmbë di a ta lei soni u Bëibel. (Lesi Jakobosi 1:19.) Di soni dë wanwan o sa heepi i fii sa sabi na un ten i musu taki wan soni, söseei ee a fiti u taki wan soni. Wë a dë sö tuu taa i musu wegi soni luku tu. Wë an dë u taki taa ja musu fan hia poi, söseei ja musu koti di fan te di peleikima kë konda wan soni da di sëmbë di a ta lei soni u Bëibel, nasö ja musu taki u wan woto soni. Ma i sa taki wan soni kölö sö, i sa konda wan woto, nasö i sa hakisi wan soni di o mbei di sëmbë ko fusutan di soni di di peleikima bi kë lei ën möön bunu. A kan taa so juu ja o abi soni u taki. Ma te i ta gafa di sëmbë di ta lei soni u Bëibel, nasö i ta lei taa i ta buta pakisei nëën, nöö di soni dë sa heepi ën faa go a fesi.

10. Unfa di konda di u ta konda unfa soni bi dë da u da wan sëmbë di ta lei soni u Bëibel, sa heepi ën?

¹⁰ Konda da de unfa soni bi dë da i. Ee a fiti, nöö i sa konda da di sëmbë di ta lei soni u Bëibel unfa i du ko a di tuutuu lei, unfa i du hoi dou di fuka bi miti i, nasö unfa Jehovah bi heepi i (Ps. 78:4, 7). Wë kandë dee soni dee joo taki aki di sëmbë bi musu jei faa sa go a fesi. Kandë dee soni aki o mbei di biibi fëën ko möön taanga, nasö de o heepi ën faa go a fesi u te a dopu. A sa heepi ën faa ko sabi unfa a sa hoi dou, hii fa fuka ta miti ën (1 Pet. 5:9). Gabriel da wan baaa di ta libi a Balaziliköndë, nöö a ta du di pioniliwooko nöunöu. A ta taki unfa a ta mëni dee wini dee a bi ta feni di a bi ta lei soni u Bëibel. A bi taki taa: „Te mi bi ta jei unfa dee baaa bi ta taki unfa soni bi ta waka da de, nöö mi bi ta ko si taa Jehovah sabi un fuka ta miti mi. Nöö ee de bi sa hoi dou, hii fa dee fuka dë bi ta miti de, nöö miseei sa du ën tu.”

TE WAN SËMBË DI TA LEI SONI U BËIBEL TA KO A DEE KOMAKANDI

11-12. Faandi mbei u musu ta tei wan sëmbë di ta lei soni u Bëibel ku wai, te a ko a dee komakandi?

¹¹ Ee wan sëmbë di ta lei soni u Bëibel kë go a fesi faa sa dopu, nöö a musu ta ko a dee komakandi hii juu, faa sa feni wini u dee soni dee a ta lei (Heb. 10:24, 25). Wë an dë u taki taa di peleikima di ta lei wan sëmbë soni u Bëibel, musu kai ën faa bigi ko a dee komakandi. Te a ko a dee komakandi, nöö hii u tuu musu ta dëën taanga faa ta ko a dee komakandi go dou. Ma unfa u sa du di soni aki?

¹² Tei di sëmbë ku wai (Lom. 15:7). Ee u ta tei dee sëmbë dee ta lei soni u Bëibel ku wai te de ko a dee komakandi, nöö de o ta kë ko a dee komakandi hii juu. Dëën odi te a ko a dee komakandi, nöö tjëën go fan ku wotowan. Ma du ën a sö wan fasi taa an sa fii sen. So juu a sa pasa taa di peleikima di ta lei di sëmbë soni u Bëibel an dou jeti, nasö kandë a abi sömëni soni u du. I sa go fan ku di sëmbë. Buta pakisei a dee soni dee a ta taki. Unfa di tei di i ta tei di sëmbë di ta lei soni u Bëibel ku wai, sa heepi ën? Boo luku di woto u wan baaa de kai Dmitrii. A bi dopu wantu jaa pasa kaa, nöö nöunöu a dë wan dinai a di kemeente. Di baaa aki ta mëni jeti fa soni bi dë, di a bi go a komakandi di fosu pasi. A bi taki taa: „Mi bi taanpu a di Könuköndë zali fesi, ma mi bi ta fëëë u waka go a dendu. Hën di wan baaa si mi, hën a ko tja mi go a dendu. Sömëni sëmbë bi waka ko fan ku mi. A bi bigi da mi seei. Mi bi lobi ën sö tee taa mi bi kë taa hiniwan daka de bi ta hoi komakandi. Fosu toon a mi libi mi bi fii sö wan fasi.”

13. Unfa di fasi fa i ta tja iseei sa heepi wan sëmbë di ta lei soni u Bëibel?

¹³ Tja iseei a wan fasi di fiti. Di fasi fa i ta tja iseei, sa heepi di sëmbë di ta lei soni u Bëibel faa ko si taa u da tuutuu bakama u Keesitu (Mat. 5:16). Wan baaa de kai Vitalii, di ta du di pioniliwooko a di köndë Moldova, bi taki taa: „Mi bi ko si fa wotowan a di kemeente ta libi, unfa de ta pakisei u soni, söseei unfa de ta tja deseei. Di soni aki mbei mi bi ko si taa dee Jehovah Kotoigi de ta dini Gadu a di soifi fasi.”

14. Unfa di fasi fa i ta tja iseei sa heepi wan sëmbë faa go a fesi a di biibi?

¹⁴ Wan sëmbë di ta lei soni u Bëibel musu ta du dee soni dee a ta lei ufö a sa dopu. U sabi taa a sa ta taanga dëën faa ta du dee soni dee a ta lei. Ma te di sëmbë di ta lei soni u Bëibel si dee wini dee i ta feni u di i ta libi ku dee mama wëti u Bëibel, nöö di soni dë sa mbei a kë djeesi i tu (1 Kol. 11:1). Boo luku andi di sisa de kai Hanae, di u bi taki soni fëën a fesi kaa, bi taki. A bi taki taa: „Dee soni dee mi bi ta lei tuu dee baaa ku dee sisa bi ta du kaa. Mi bi ta si unfa miseei sa ta da wotowan taanga, unfa mi bi sa ta da wotowan paadon, söseei unfa mi bi sa ta lei taa mi lobi wotowan. Dee baaa ku dee sisa an bi ta taki hogi u wotowan, nöö mi bi kë ta djeesi de a di soni dë.”

15. Unfa Nöngö 27:17 ta heepi u fuu ko si faandi mbei u musu ko dë mati u wan sëmbë di ta lei soni u Bëibel, te a ta ko a dee komakandi?

¹⁵ Ko dë wan mati u di sëmbë di ta lei soni u Bëibel. Möön di sëmbë di ta lei soni u Bëibel ta ko a dee komakandi, möön u musu ta buta pakisei nëën (Fil. 2:4). Wë i sa mbei möiti fii ko sabi ën möön bunu. I sa gafëën u di möiti di a ta mbei faa go a fesi a di biibi. I sa hakisi ën unfa a nango ku di lei di a ta lei soni u Bëibel, unfa a nango ku dee sëmbë fëën wosudendu, söseei unfa a nango ku di wooko di a ta du. Dee woto dee i ku ën ta da, sa mbei i ku ën ko dë möön gaan mati. Te i ku ën ko dë mati, nöö i sa heepi ën faa go a fesi u te a dopu. (Lesi Nöngö 27:17.) Hanae ta du di kowoonu pioniliwooko nöunöu. A ta mëni jeti unfa soni bi dë di a bi go a komakandi di fosu pasi. A bi taki taa: „Di mi ku wanlö sëmbë u di kemeente bi ko dë mati, nöö ku wai seei mi bi ta kë nango a dee komakandi. Aluwasi mi bi wei, tökuseei mi bi nango a dee komakandi. Mi bi lobi dee njunjun mati dee mi bi ko abi, nöö di soni aki bi heepi mi u mi disa dee mati dee mi bi abi dee an bi ta dini Jehovah. U di mi bi kë taa mi ku Jehovah ko dë möön gaan mati, söseei u di mi bi kë taa mi ku dee baaa ku dee sisa u mi ko dë möön gaan mati tu, mbei mi bi mbei möiti u mi dopu.”

16. Andi da wan woto soni di i sa du, u mbei wan sëmbë di ta lei soni u Bëibel fii bunu te a dë a di kemeente?

¹⁶ Ee wan sëmbë di ta lei soni u Bëibel nango a fesi a di biibi, nöö mbei a fii taa a dë sëmbë u di kemeente tu. I sa du di soni aki u di joo ta tei ën ku wai a i pisi tu (Heb. 13:2). Wan baaa de kai Denis, di ta libi a Moldova, ta mëni unfa soni bi dë dëën di a bi ta lei soni u Bëibel. A bi taki taa: „Sömëni pasi dee baaa ku dee sisa bi ta kai mi ku mi mujëë fuu du wan soni makandi ku de. Te u bi dë makandi ku de, nöö u bi ta jei fa de bi ta konda unfa Jehovah bi heepi de. Di soni dë bi ta da u taanga seei. Di soni aki bi heepi u fuu ko möön dë seiki taa u bi kë dini Jehovah, söseei taa u bi o abi wan bunu libi bakaten.” Te di sëmbë di i ta lei soni u Bëibel ko toon wan peleikima, nöö i sa hakisi ën faa ko makandi ku i a di peleikiwooko. Wan baaa u Balaziliköndë de kai Diego, bi taki taa: „Sömëni baaa ku sisa bi ta kai mi u go makandi ku de a di peleikiwooko. Di soni aki bi dë wan bunu soni, u di a bi ta heepi mi u mi ko sabi de möön bunu. Mi bi ko lei sömëni soni, nöö mi ku Jehovah ku Jesosi bi ko dë möön gaan mati.”

UNFA DEE GAANWOMI SA HEEPI WAN SËMBË DI TA LEI SONI U BËIBEL?

17. Unfa dee gaanwomi sa heepi dee sëmbë dee ta lei soni u Bëibel?

¹⁷ Buta ten a wan së fii sa ta dë makandi ku dee sëmbë dee ta lei soni u Bëibel. Te un dee gaanwomi ta lei taa un lobi dee sëmbë dee ta lei soni u Bëibel, nöö a sa heepi de u de go a fesi u te de dopu. I ta mbei möiti u fan ku dee sëmbë dee ta lei soni u Bëibel te de ko a dee komakandi ö? De o fii taa i ta booko i hedi ku de te i ta kai de a de në, möönmöön te de kë da piki. I si kuma i sa seeka soni sö taa i ku wan peleikima sa go luku di sëmbë di a ta lei soni u Bëibel ö? Kandë di soni aki sa heepi wan sëmbë di ta lei soni u Bëibel möön fa i bi mëni seei. Wan sisa de kai Jackie, di ta du di pioniliwooko a di köndë Nigelia, bi taki taa: „A ta bigi da sömëni u dee sëmbë dee mi ta lei soni u Bëibel, te de ko fusutan taa di baaa di ko ku mi u lei de soni u Bëibel da wan gaanwomi. Wan sëmbë di bi ta lei soni u Bëibel bi taki taa: ’Nöiti di paiti u mi bi o du di soni aki. A dee guduma pisi wanwan a nango ee de pakëën!’” Wë di sëmbë di bi ta lei soni u Bëibel aki, ta ko a dee komakandi nöunöu.

18. Unfa dee gaanwomi sa du di soni di sikifi a Tjabukama 20:28?

¹⁸ Unfa dee gaanwomi sa heepi dee peleikima, söseei unfa de sa da de taanga. Un dee gaanwomi, un abi di faantiwöutu u heepi dee peleikima u de ko sa’ u du di peleikiwooko a wan möön bunu fasi, söseei u de ko sa’ u lei sëmbë soni u Bëibel a wan möön bunu fasi. (Lesi Tjabukama 20:28.) Ee wan peleikima ta sen u lei wan sëmbë soni u Bëibel te i ku ën dë makandi, nöö hakisi ën ee a kë fii lei di sëmbë soni u Bëibel di daka dë. Di sisa de kai Jackie di u bi taki soni fëën a fesi kaa, bi taki taa: „Dee gaanwomi lo’ u hakisi mi ee unfa a nango ku dee sëmbë dee mi ta lei soni u Bëibel. Te a ta taanga da mi te mi ta lei wan sëmbë soni u Bëibel, nöö de ta piki mi andi ku andi mi sa du.” Wë dee gaanwomi sa du sömëni soni u heepi dee peleikima (1 Tes. 5:11). Sisa Jackie bi taki tu taa: „Mi lo’ te dee gaanwomi ta da mi taanga, söseei mi lo’ te de ta piki mi taa de ta tei dee wooko dee mi ta du u bigi. Dee soni di de bi ta piki mi bi ta mbei mi fii bunu seei. De bi ta mbei mi fii ta mi ta du di peleikiwooko a wan bunu fasi, söseei de bi ta mbei mi ta möön ta dë waiwai.”​—Nöng. 25:25.

19. Andi sa mbei hiniwan fuu ta dë waiwai?

¹⁹ Aluwasi ee wa abi wan sëmbë di u ta lei soni u Bëibel, tökuseei u sa heepi wan sëmbë faa go a fesi u te a dopu. U sa taki wanlö soni te u ku wan peleikima go makandi te a o lei wan sëmbë soni u Bëibel, ma wa musu fan hia poi. U sa ko dë mati u dee sëmbë dee ta lei soni u Bëibel, te de bigi ko a dee komakandi. Nöö u musu du soni a wan fasi di sa mbei de ta djeesi u. Dee gaanwomi sa ta da dee sëmbë dee ta lei soni u Bëibel taanga, te de ta seeka soni u de sa dë makandi ku de. De sa ta da dee peleikima taanga tu, te de ta heepi de u de ko dë wan möön bunu peleikima, söseei te de ta gafa de. U ta wai seei u heepi wan sëmbë faa ko lobi Jehovah, söseei faa ko ta dini ën, aluwasi ee wan piki soni seei u bi du u heepi ën.