Andi di buku Akoalimbo ta taki taa o pasa ku dee felantima u Gadu?

1. Andi di buku Akoalimbo ta taki u dee sëmbë u Gadu?

DI BUKU Akoalimbo ta konda da u taa di Könuköndë u Gadu seti kaa, söseei taa de vinde Saatan puu a liba ala (Ako. 12:1-9). Di soni dë bi mbei taa bööböö libi ko dë a liba ala, ma a tja sömëni fuka ko da u. Faandi mbei? U di Saatan dë ku gaan hatiboonu, nöö a ta du ku dee sëmbë dee ta dini Jehovah ku hii de hati.​—Ako. 12:12, 15, 17.

2. Andi o heepi u fuu hoi useei a Jehovah go dou?

² Unfa u sa hoi useei a Jehovah go dou, hii fa Saatan ta du ku u? (Ako. 13:10) Wë wan soni di o heepi u, hën da te u ko sabi andi o pasa a di ten di ta ko. Apösutu Johanisi bi taki na Akoalimbo u so u dee gaan bunu dee woo feni abiti möön. Wan u dee gaan bunu dë, hën da Gadu o poi dee felantima fëën kaba a sösö. Boo luku unfa Akoalimbo ta taki u dee felantima aki, söseei andi o pasa ku de.

DEE „MAAKA” DEE TA MBEI U KO SABI DEE FELANTIMA U GADU

3. Fuun maaka di buku Akoalimbo ta taki?

³ Di fosu vers u di buku Akoalimbo ta piki u wante taa dee soni dee woo lesi a di buku dë, taki a nöngö fasi (Ako. 1:1). A di buku dë, de ta tei dee felantima u Gadu maaka ku wantu taku mbeti. Di buku ta konda soni u wan ’mbeti di kumutu a ze’, di „dë ku sëbën hedi ku teni tutu” (Ako. 13:1). A ta taki tu taa baka di mbeti dë, nöö wan woto taku mbeti ta kumutu a „goonbasu” ta ko, nöö a ta fan leti kuma wan hogi kaima, söseei a „ta kai faja kumutu a liba” (Ako. 13:11-13). Baka di dë, wan woto mbeti hopo ko tu. A dë wan mbeti di sinkii fëën dë bë hëii sö, nöö wan jajo mujëë dë sindosindo nëën liba. Dee dii hogi mbeti aki da dee felantima u Jehovah Gadu, dee ta feti ku ën ku di Könuköndë fëën wan longi pisiten kaa. Fëën mbei a dë fanöudu fuu ko sabi ambë da de.​—Ako. 17:1, 3.

4-5. Unfa dee soni dee sikifi a Daniëli 7:15-17 ta heepi u fuu fusutan andi dee maaka kë taki?

⁴ Ufö u ko sabi ambë da dee felantima aki, u musu ko fusutan andi da dee taku mbeti ku ambë da di jajo mujëë. Di möön bunu fasi fa u sa fusutan dee soni aki, da te u ta mbei di Bëibel seei puu di woto aki da u. Woto buku a di Bëibel ta puu sömëni u dee soni di Akoalimbo ta taki soni u de. Di tjabukama Daniëli bi sunjan wan sunjan, nöö a di sunjan dë a bi si „fö gaan mbeti hopo kumutu a di ze” (Dan. 7:1-3). Daniëli ta konda da u andi da dee mbeti aki. Dee gaan mbeti aki da fö „könu”, nasö fö tii. (Lesi Daniëli 7:15-17.) Di soni aki ta heepi u fuu ko fusutan taa dee taku mbeti di Akoalimbo ta taki soni u de, da wanlö tii.

⁵ Boo buta pakisei a so u dee maaka di Akoalimbo ta taki soni u de. Te woo du di soni aki, nöö woo si unfa di Bëibel o heepi u fuu ko sabi andi dee maaka aki kë taki. Woo buta pakisei a dee taku mbeti fosu. Woo si ambë da de. Baka di dë, nöö woo si andi o pasa ku de. Te u kaba fëën, nöö woo si unfa u musu fusutan dee soni aki.

U KO SABI AMBË DA DEE FELANTIMA U GADU

6. Andi di taku mbeti di abi seibi hedi, di Akoalimbo 13:1-4 ta taki soni fëën, kë taki?

⁶ Andi da di taku mbeti ku dee seibi hedi? (Lesi Akoalimbo 13:1-4.) Di mbeti ta djei wan pëndëmbeti, ma futu fëën dë kuma di u di hogi mbeti de kai beer. Di buka fëën dë kuma di u wan lëun, nöö a abi teni tutu. Dee fö mbeti di Daniëli kapitë 7 taki soni u de, bi dë kuma di mbeti aki tu. Ma a di buku Akoalimbo de an ta taki u fö tookatooka mbeti, ma u wan kodo mbeti di abi hii dee soni di dee woto fö mbeti bi abi. Di taku mbeti aki an kë taki wan kodo tii nöö. Johanisi bi taki taa „hii pei nasiön, ku hii pei lö, ku hii pei föluku dee ta fan dee peipei töngö u goonliba” tuu dë nëën basu. Fëën mbei u sa taki taa an sa dë wan kodo tii nöö (Ako. 13:7). Ma u sa taki taa di taku mbeti aki da hii dee tii dee bi tii libisëmbë te dou di ten fuu aki.b​—Peleik. 8:9.

7. Andi da dee seibi hedi u di hogi mbeti?

⁷ Andi da dee seibi hedi u di hogi mbeti? Akoalimbo kapitë 17 ta heepi u fuu ko sabi di piki, u di a ta konda soni u wan pindi u di taku mbeti di Akoalimbo kapitë 13 ta taki soni fëën. Akoalimbo 17:10 ta taki taa: „Feifi u dee könu tii pasa go kaa e, nöö di u mbei sikisi nöö hën dë ta tii eti. Nöö di u mbei sëbën nöö hën an dou eti e. Nöö fa i si a o hopo ko dë, nöö a musu u ko ma fu wan sati ten sö nöö, nöö soni fëën o kaba.” U hii dee tii di Saatan bi wooko ku de, seibi u de nöö bi abi gaan makiti. De dë kuma dee seibi „hedi” u di mbeti. Dee tii aki bi dë dee möön makiti tii u goonliba, nöö de bi ta du ku dee sëmbë u Gadu gaanfa seei. A di pisiten di apösutu Johanisi bi dë a libi, nöö feifi u de bi tii pasa kaa. Dee tii aki, bi dë dee tii u dee köndë aki: Egepiti, Asilia, Babilon, Medo-Pëlsia, ku Giikiköndë. Loomë hën bi dë di u sikisi tii di bi abi möön makiti a goonliba, nöö a bi ta tii jeti, di Gadu bi mbei Johanisi ko sabi dee soni aki. Un tii bi o dë di u seibi hedi, nasö di lasitiwan di bi o abi möön makiti a goonliba?

8. Ambë da di u seibi hedi u di taku mbeti?

⁸ Nöunöu woo luku unfa di tjabukama woto u Daniëli ta heepi u fuu ko sabi ambë da di u seibi hedi u di taku mbeti. Undi u dee tii ta tii goonliba a di pisiten u di kaba aki, nasö a „di daka u Masa”? (Ako. 1:10) Wë a dë Ingisiköndë ku Amëëkanköndë makandi. U sa taki taa dee tu köndë aki makandi, da di u seibi hedi u di taku mbeti di Akoalimbo 13:1-4 ta taki soni fëën.

9. Andi da di taku mbeti di „abi tu tutu kuma wan sikafu mii”?

⁹ Akoalimbo kapitë 13 ta piki u tu taa di u seibi hedi, nasö Ingisiköndë ku Amëëkanköndë, ta du soni kuma wan taku mbeti di ’abi tu tutu kuma wan sikafu mii, ma a ta fan leti kuma wan hogi kaima’. Di mbeti aki „ta du sömëni foondofoondo soni. A ta kai faja kumutu a liba ta puu ta kai a goon a hii lanti fesi” (Ako. 13:11-15). Akoalimbo kapitë 16 ku 19 ta kai di taku mbeti aki „di ganjan tjabukama” (Ako. 16:13; 19:20). Daniëli bi taki sö wan soni tu. A bi taki taa di tii u Ingisiköndë ku Amëëkanköndë bi o poi soni kaba a sösö (Dan. 8:19, 23, 24). Di soni aki hën pasa a di u Tu Goonliba Feti. Dee könima u Ingisiköndë ku Amëëkanköndë bi wooko makandi u mbei tu gaan bömu, nöö de bi tuwë dee tu gaan bömu dë a di pisiwata u Asia. Di soni aki da wan u dee soni di mbei di gaan feti aki kaba. Di mbei di Ingisiköndë ku Amëëkanköndë bi mbei dee gaan bömu aki tuwë a di pisiwata u Asia, bi dë kuma de mbei ’faja kumutu a liba puu kai a goon a hii lanti fesi’.

10. Andi da di pindi u di taku mbeti? (Akoalimbo 13:14, 15; 17:3, 8, 11)

¹⁰ Boo taki soni u wan woto taku mbeti. Di mbeti aki ta djei di mbeti di abi seibi hedi, ma sinkii fëën bë hëii sö. De ta kai ën „di pindi”u di taku mbeti, nöö hën da di u aiti könu.c (Lesi Akoalimbo 13:14, 15; 17:3, 8, 11.) Johanisi bi ko fusutan taa di könu aki bi hopo ko, hën a go, hën bakaten a toona hopo ko baka. Di soni aki fiti di ölganisaasi de ta kai De Verenigde Naties di ta mbei möiti u hii dee politiki soni a goonliba waka bunu. Fosufosu de bi ta kai ën Volkenbond. Hën a di pisiten u di u Tu Goonliba Feti, hën a go. Ma bakaten, hën a hopo ko baka kuma di Verenigde Naties.

11. Andi dee taku mbeti ta du, nöö faandi mbei wa abi fu fëëë de?

¹¹ Dee taku mbeti, nasö dee tiima, ta wooko ku popokanda u mbei sëmbë hopo fia ku Jehovah, söseei u de du ku dee sëmbë fëën. Johanisi bi taki taa a dë kuma de „ta waka a dee köndëköndë u goonliba tuu te dou nango ta hai dee könu tja ko makandi”, u de feti di feti u Amagedon, „di Daka di di Gadu di abi hii makiti u mundu buta” (Ako. 16:13, 14, 16). Ma wa abi fu fëëë seei. Di Gadu fuu Jehovah o hopo du soni wantewante u tjubi hii dee sëmbë dee dë a di tii fëën basu.​—Eze. 38:21-23.

12. Andi o pasa ku hii dee taku mbeti tuu?

¹² Andi ta pasa ku hii dee taku mbeti tuu? Akoalimbo 19:20 ta taki taa: „De kisi di mbeti gbolo, ku di ganjan tjabukama fëën di bi ta du dee foondofoondo wooko da di mbeti. Di ganjan tjabukama dë, hën bi ganjan hii dee sëmbë dee dë ku di nöbu u di mbeti a de mindifesi tuu, dee ta begi di pindi fëën. Hën ku di mbeti seei tuu de kisi ku libi vinde vioo tuwë go a di gaan faja kuma ze di ta kisi ku zuwalufu fu nöömö.” Di soni aki ta lei u taa Gadu o poi dee tiima kaba a sösö, hii fa de o dë ta tii jeti.

13. Andi so tiima ta kë u dee Keesitu sëmbë musu du?

¹³ Unfa u musu fusutan di soni aki? U di u da Keesitu sëmbë, mbei u musu ta hoi useei a Gadu, ku di Könuköndë fëën (Joh. 18:36). Fuu sa du di soni aki, nöö wa musu nama ku politiki soni u di goonliba aki. Di soni aki sa dë wan taanga soni u du, u di dee tiima u di goonliba aki ta kë fuu taki soni, nasö fuu du soni di ta lei taa u ku de dë a wan së. Dee sëmbë dee ta du andi dee tiima aki kë, ta kisi di sitampu u di taku mbeti (Ako. 13:16, 17). Ma Jehovah an o wai ku dee sëmbë dee ta kisi di sitampu dë, söseei de an o feni di libi u teego (Ako. 14:9, 10; 20:4). A dë fanöudu fu wa nama ku politiki soni u di goonliba aki, aluwasi ee dee tiima ta duwengi u fuu tei di së u de!

DI GAAN JAJO MUJËË O KABA A SÖSÖ

14. Andi apösutu Johanisi bi si di bi bigi dëën, te u luku Akoalimbo 17:3-5?

¹⁴ Apösutu Johanisi bi taki taa a bi si wan woto soni di bi bigi dëën seei. Andi a bi si? A bi si wan mujëë sindosindo a wan u dee hogi mbeti aki liba (Ako. 17:1, 2, 6). Di mujëë dë ta djei wan „gaan mötjö mujëë”, nöö de ta kai ën „di Gaan Babilon”. A ta libi fanafiti a di së u manu ku mujëë soni ku „dee könu u goonliba”.​—Lesi Akoalimbo 17:3-5.

15-16. Ambë da „di Gaan Babilon”, nöö unfa u du sabi di soni dë?

¹⁵ Ambë da „di Gaan Babilon”? Di mujëë aki an sa dë wan politiki ölganisaasi, u di di Bëibel ta taki taa a ta libi fanafiti a di së u manu ku mujëë soni ku dee politikima u di goonliba aki (Ako. 18:9). Di dë di a dë a di taku mbeti liba, ta lei taa a ta pooba u tii dee tiima aki. Boiti di dë, an sa dë dee langahati seisonima u di goonliba u Saatan aki. Dee seisonima aki, di buku Akoalimbo ta kai „dee sëmbë dee bi ta bai soni a dee kamiankamian u goonliba ta tja go ta sei”.​—Ako. 18:11, 15, 16.

¹⁶ Te di Bëibel ta taki u wan „mötjö mujëë”, nöö so juu a ta taki u sëmbë di ta taki taa de ta dini Gadu, hii fa de ta dini poipoi gadu, nasö de ta lobi dee soni u di goonliba aki, di Gadu an lobi (1 Klon. 5:25; Jak. 4:4). Ma di Bëibel ta taki taa dee sëmbë dee ta dini Gadu ku hii de hati „an poi dee wëti u Gadu möönsö a di së u manu ku mujëë” soni. „De dë u de limbolimbo gbelingbelin a Masa Gadu wojo” (2 Kol. 11:2; Ako. 14:4). Di foto Babilon fu awooten, bi dë wan u dee kamian ka sëmbë bi ta möön dini poipoi gadu. Fëën mbei u sa taki taa di Gaan Babilon da hii dee poipoi biibi. Fuu taki ën kumafa a dë, hën da hii dee poipoi keiki u goonliba tuu.​—Ako. 17:5, 18; I sa go a jw.org nöö i luku di woto „Wat is Babylon de Grote?”

17. Andi o pasa ku di Gaan Babilon?

¹⁷ Andi o pasa ku di Gaan Babilon? Akoalimbo 17:16, 17 ta piki di hakisi aki. A ta taki taa: ’Di mbeti ku dee teni tutu fëën, o ta buuse di mötjö mujëë te de an sa si ën a wojo seei. Nöö de o puu hii soni nëën di a abi, te a fika pënëpënë ku maun tjululuu. De o njan mën te de kaba, nöö di fëën di o fika de o tjuma a faja fiaa puu dë. Ma nöö fa i si de o ta du ën dë, nöö Masa Gadu wë butëën a de hati u de du sö e.’ Awa, Jehovah o mbei dee nasiönnasiön sëmbë wooko ku di taku mbeti di dë bë hëii sö, faa poi hii dee poipoi keiki dee dë a goonliba aki kaba a sösö. Di taku mbeti dë, hën da di Verenigde Naties.​—Ako. 18:21-24.

18. Unfa u sa köni fu wa nama na wan tësitësi seei ku di Gaan Babilon?

¹⁸ Unfa u musu fusutan di soni aki? Wë u musu ta „dini Gadu a wan gbelingbelin fasi” (Jak. 1:27). Wa musu biibi dee poipoi soni di dee poipoi keiki ta lei sëmbë, wa musu ta hoi dee piizii daka dee nama ku poipoi biibi, wa musu libi a wan fanafiti fasi, söseei wa musu du soni di nama ku taku jeje! U musu ta piki sëmbë nömö u de „kumutu a di köndë naandë”, sö taa de an kisi di sitaafu di Gadu o dëën.​—Ako. 18:4.

DI KUUTU DI DE O KUUTU DI GAAN FELANTIMA U GADU

19. Ambë da di „gaan gindi kaima [di] bë hëii sö”?

¹⁹ Di buku Akoalimbo ta taki tu u wan „gaan gindi kaima [di] bë hëii sö” (Ako. 12:3). Di kaima aki ta feti ku Jesosi ku dee ëngëli fëën (Ako. 12:7-9). A ta feti ku dee sëmbë u Gadu, söseei a ta da dee taku mbeti nasö tiima makiti (Ako. 12:17; 13:4). Ambë da di kaima aki? Wë hën da di „awoo sindeki, hën da di didibi Saatan” (Ako. 12:9; 20:2). Hën ta tii hii dee woto felantima u Jehovah.

20. Andi o pasa ku di kaima?

²⁰ Andi ta pasa ku di kaima? Akoalimbo 20:1-3 ta konda da u taa wan ëngëli o vinde Saatan go a wan baaku di na abi goon. Di kamian aki o dë kuma wan pei dunguwosu dëën. Wan dusu jaa longi Saatan an o sa ganjan dee nasiönnasiön sëmbë u goonliba möön. Te u kaba fëën, de o vinde Saatan ku dee taku jeje fëën go a di „gaan faja di ta kisi u nöömö ta tingi zuwalufu”. Di soni aki kë taki taa de o poi de kaba a sösö fiaa (Ako. 20:10). Pakisei unfa di goonliba o dë söndö Saatan ku dee taku jeje fëën. Di ten dë o suti seei!

21. Faandi u sa wai ku dee soni dee u lesi a di buku Akoalimbo?

²¹ A ta da u taanga seei te u ta fusutan andi dee soni dee sikifi a di buku Akoalimbo kë taki! U ko fusutan ambë da dee felantima u Jehovah, söseei u si unfa soni o waka da de. Awa, „Gadu o mbei di sëmbë di ta lesi dee soni u di tjabukama woto aki feni gaan bunu”! (Ako. 1:3) Ma un gaan bunu dee sëmbë dee ta hoi deseei a Gadu o feni, te de poi dee felantima u Gadu kaba a sösö? Woo taki u di soni aki a di lasiti woto di ta taki soni u di buku Akoalimbo.