WOTO 31
Tei ën u bigi taa i sa begi
„Mbei dee begi u mi ko dë kuma sumëësuti soni di sëmbë ta tjuma a di wosu fii da i.”—PS. 141:2.
KANDA 47 Begi Jehovah hiniwan daka
WANTU SONI U DI WOTOa
1. Unfa u musu si di gaandi di Jehovah da u fuu fan ku ën?
DI SËMBE di mbei hii soni a liba ala ku goonliba aki, da u wan gaan kado. Di kado aki da di fan di u sa fan ku ën te u ta begi. Pakisei di soni aki: hiniwan ten di u kë, u sa konda andi dë a u hati da Jehovah, aluwasi un pei töngö u ta fan, söseei an dë fuu mbei buka ku ën ufö u begi ën. U dë seiki taa di lobihati Tata fuu o haika u, aluwasi ee u ta begi ën te u dë a hatiwosu, nasö te u dë a dunguwosu. U ta tei di soni aki u bigi seei.
2. Unfa Könu Dafiti bi lei taa a bi ta tei ën u bigi taa a bi sa begi Jehovah?
2 Könu Dafiti bi ta tei ën u bigi taa a bi sa ta begi Jehovah. Fëën mbei a kanda da Jehovah taa: „Mbei dee begi u mi ko dë kuma sumëësuti soni di sëmbë ta tjuma a di wosu fii da i” (Ps. 141:1, 2). A di ten u Dafiti, dee mindima bi ta seeka dee sumëësuti fatu di de bi ta tja go tjuma da Jehovah (Ëki. 30:34, 35). Leti kumafa dee mindima bi ta seeka dee sumëësuti fatu di de bi o tjuma da Jehovah, sö nöö Dafiti bi ta pakisei bunu u dee soni dee a bi o taki te a bi o begi Jehovah. Di seei soni aki u kë du tu. U di u kë taa Jehovah feni dee begi fuu bunu.
3. Unfa u musu ta begi Jehovah, nöö faandi mbei?
3 Te u ta begi Jehovah, nöö u musu ta du ën ku gaan lesipeki. Pakisei dee gaan foombo wojolimbo sunjan dee Jesaaja, Ezekiëli, Daniëli, ku Johanisi bi si. Hii fa dee wojolimbo sunjan aki bi tooka ku deseei, tökuseei hii de tuu bi abi wan soni a dendu di bi ta mbei taa de ta kai ku deseei. Hii de tuu bi lei taa Jehovah da wan gaan makiti Könu. Jesaaja ’bi si Jehovah sindosindo a wan hei könubangi di dë a wan hei kamian’ (Jes. 6:1-3). Ezekiëli bi si Jehovah ka a bi dë sindosindo a wan könubangi, nöö „wan faja ta sëndë ta koti faja njënnjëin. . . ta djei wan mutjama” (Eze. 1:26-28). Daniëli bi si „di sëmbë di bi dë sensi awooten”, nöö dee koosu fëën bi weti faan, söseei faja bi ta kumutu a di könubangi fëën (Dan. 7:9, 10). Nöö Johanisi bi si Jehovah sindosindo a wan könubangi, nöö wan mutjama bi lontu di könubangi fëën. A bi waiti möön hii soni. A bi dë kuma wan djamati sitonu (Ako. 4:2-4). Te u luku di makiti di Jehovah abi, nöö di soni aki ta mbei u dë ku tangi a hati taa u sa begi ën. Ma unfa u musu ta begi?
„TE WOON BEGI, NÖÖ A DI FASI AKI UN MUSU BEGI E”
4. Andi u ta lei u dee soni dee Jesosi bi taki a bigi u di begi di sikifi a Mateosi 6:9, 10?
4 Lesi Mateosi 6:9, 10. A di taki di Jesosi bi hoi a di kuun liba, a bi lei dee bakama fëën u de begi a wan fasi di ta kai ku Gadu. Baka di Jesosi bi piki de taa „te woon begi, nöö a di fasi aki un musu begi,” hën a bi kai soni di nama ku di kë u Jehovah fosu. A bi taki taa di në u Gadu musu ko santa, taa di Könuköndë u Gadu musu ko u puu dee felantima fëën a pasi, söseei taa a musu tja dee gaan bunu ko a goonliba aki. Te u ta taki u dee soni aki a dee begi fuu, nöö u ta lei taa di kë u Gadu dë wan fanöudu soni da u.
5. Jehovah ta haika u te u ta begi ën faa da u dee soni dee u abi fanöudu ö?
5 A di woto pisi u di begi, Jesosi bi lei u taa a bunu fuu begi u dee soni dee u abi fanöudu. U sa hakisi Jehovah faa da u di bëëë di u abi fanöudu fuu pasa di daka, faa da u paadon u dee zöndu fuu, faa puu u a Didibi maun, söseei fu an disa u be soni pooba u (Mat. 6:11-13). Te u ta hakisi Jehovah dee soni aki, nöö u ta lei ën taa u abi di heepi fëën fanöudu, söseei taa u kë du soni faa feni u u bunu.
Fuun soni wan baaa sa begi te hën ku hën mujëë ta begi? (Luku palaklafu 6)b
6. Dee soni dee Jesosi bi taki a di begi di a bi lei dee bakama fëën nöö u sa taki te u ta begi ö?
6 Di Jesosi bi lei dee bakama fëën fa de bi musu ta begi, nöö an bi kë taa de bi musu ta taki dee seei soni hiniwan juu baka. A dee woto begi u Jesosi a bi ta taki u woto soni di bi dë fanöudu dëën a di pisiten dë (Mat. 26:39, 42; Joh. 17:1-26). Sö nöö useei sa begi u hiniwan soni di ta da u booko hedi. Te u musu du wan soni, nöö u sa begi fuu feni köni sö taa u sa ko sabi andi u musu du (Ps. 119:33, 34). Te u feni wan gaan faantiwöutu, nöö u sa begi Jehovah fa heepi u fuu sabi unfa u musu du soni (Nöng. 2:6). Mama ku tata sa begi da dee mii u de, dee mii sa begi da de mama ku de tata, söseei hii u tuu sa ta begi da dee sëmbë dee u ta lei soni u Bëibel, ku dee sëmbë dee u ta peleiki da. Ma na dee soni dee u abi fanöudu nöö u musu ta hakisi Jehovah te u ta begi.
Fuun soni u sa gafa Jehovah, söseei fuun soni u sa dëën tangi te u ta begi? (Luku palaklafu 7-9)c
7. Faandi mbei u musu ta gafa Jehovah a dee begi fuu?
7 Wa musu ta fëëkëtë u gafa Jehovah a dee begi fuu. Na wan sëmbë waiti tjika u kisi gafa kuma di Gadu fuu. Hën ’da wan bunu Gadu, nöö a dë kabakaba u da sëmbë paadon’. A dë wan Gadu tu ’di abi tjalihati ku sutifasi. Hati fëën an ta boonu hesi, a abi bunuhati pasa maaka, söseei hii juu a ta taki soni di dë tuu’ (Ps. 86:5, 15). Fëën mbei u sa gafa Jehovah u di fasi fa a dë, söseei da dee soni dee a ta du.
8. Fuun soni u sa ta da Jehovah tangi? (Psalöm 104:12-15, 24)
8 Boiti di gafa di u musu gafa Jehovah a dee begi fuu, u musu ta dëën tangi tu u dee waitiwaiti soni dee a da u. U sa dëën tangi u dee waiti folo, dee peipei sutisuti soni u njan, söseei u sa dëën tangi u dee bunu mati dee u abi. Di lobihati Tata fuu aki da u dee soni aki, ku sömëni woto soni jeti fuu sa ta dë waiwai. (Lesi Psalöm 104:12-15, 24.) Ma di möön fanöudu soni di u sa ta da Jehovah tangi fëën, da hii dee lei dee a ta da u sö taa di biibi fuu sa ko möön taanga, söseei u sa dëën tangi da dee soni dee a paamusi u da di ten di ta ko.
9. Andi sa heepi u fu wa ta fëëkëtë u da Jehovah tangi? (1 Tesalonika 5:17, 18)
9 A sa pasa taa u ta fëëkëtë u da Jehovah tangi da hii dee soni dee a ta du da u. Ma andi sa heepi i fu ja ta fëëkëtë? I sa sikifi hii dee soni dee i begi Jehovah u de, nöö i sa toona luku de bakaten u si unfa a piki dee begi fii. Nöö begi ën, nöö i dëën tangi u di fasi fa a heepi i. (Lesi 1 Tesalonika 5:17, 18.) Pakisei di soni aki: U ta wai seei, söseei u ta fii taa wotowan lobi u te de ta lei taa de dë ku tangi da wan soni di u du. Wë sö nöö Jehovah ta wai te u ta dëën tangi u di a piki dee begi fuu (Kol. 3:15). Ma wan woto fanöudu soni dë jeti di mbei u musu ta da di Gadu fuu tangi.
DA JEHOVAH TANGI U DI WAN KODO WOMI MII FËËN
10. Faandi mbei u musu dë ku tangi a hati taa Jehovah manda Jesosi ko a goonliba, te u luku 1 Petuisi 2:21?
10 Lesi 1 Petuisi 2:21. A bunu fuu da Jehovah tangi u di a manda di wan kodo Womi Mii fëën ko u lei u soni. Te u ta lei soni u Jesosi, nöö u ta lei sömëni soni u Jehovah tu, söseei u ta lei unfa u sa du soni u mbei a piizii. Te u ta lei taa u ta biibi di lusupaima u Keesitu, nöö u ku Jehovah sa ko dë möön gaan mati.—Lom. 5:1.
11. Faandi mbei u ta begi a di në u Jesosi?
11 U ta da Jehovah tangi taa u sa begi ën a di në u di Womi Mii fëën. Jehovah ta wooko ku Jesosi u da u dee soni dee u ta hakisi ën. Jehovah ta haika u, söseei a ta piki dee begi fuu dee u ta begi a di në u Jesosi. Jesosi bi taki taa: „Hiniwan soni di un ta hakisi mi Tata a mi në, nöö mi o ta du ën da unu. Nöö a di fasi dë mi, di Mii fëën aki, o tja nëbai ko da mi Tata.”—Joh. 14:13, 14.
12. Andi da wan woto soni di mbei u musu ta da Jehovah tangi taa a manda di Womi Mii fëën da u?
12 Jehovah ta da u paadon u dee zöndu fuu, u di Jesosi paka paima da u. Di Bëibel ta kai Jesosi „di Gaan Mindima di sindo a letimaun së u Masa Gaangadu ka a dë nëën könubangi” (Heb. 8:1). Jesosi da di ’Sëmbë di dë a Masa Gadu bandja ta begi ën da u’ (1 Joh. 2:1). U dë ku tangi a hati taa Jehovah da u wan Gaan Mindima di ta fusutan dee zöndu fii fuu, söseei di „ta begi da u” (Lom. 8:34; Heb. 4:15). U di u da zöndu libisëmbë, mbei wa bi o sa begi Jehovah ee Jesosi an bi paka di paima da u. Fëën mbei u sa taki taa wa o sa da Jehovah tangi tjika u di gaan kado di a da u.
BEGI DA DEE BAAA KU DEE SISA FII
13. Unfa Jesosi bi lei taa a lobi dee bakama fëën, di ndeti ufö a dëdë?
13 Jesosi bi begi wan longi begi da dee bakama fëën di ndeti ufö a bi dëdë. A bi hakisi hën Tata faa tjubi de u Didibi an wini de (Joh. 17:15). Di soni aki ta lei taa Jesosi bi lobi de gaanfa seei! Hii fa a bi sabi taa wan gaan soni bi o miti ën, tökuseei a bi ta booko hën hedi ku dee apösutu fëën.
Fuun soni u sa begi te u ta begi da dee baaa ku dee sisa fuu? (Luku palaklafu 14-16)d
14. Unfa u sa lei taa u lobi dee baaa ku dee sisa fuu?
14 Te u ta djeesi Jesosi, nöö wa o ta buta pakisei a useei nöö. Ma woo ta begi da dee baaa ku dee sisa fuu. Te u ta du di soni aki, nöö u ta lei taa u ta du di soni di Jesosi bi piki u fuu du, di a bi taki taa u musu lobi u na u. Söseei u ta lei Jehovah fa u lobi dee baaa ku dee sisa fuu tjika (Joh. 13:34). Na lasi u ta lasi u ten te u ta begi da dee baaa ku dee sisa fuu. Di Wöutu u Gadu ta piki u taa „te wan sëmbë ta libi bunu kumafa Gadu kë, nöö di begi fëën a ta begi Masa Gadu nöö a ta wooko gaan wooko e.”—Jak. 5:16.
15. Faandi mbei u musu ta begi da dee baaa ku dee sisa fuu?
15 U musu ta begi da dee baaa ku dee sisa fuu, u di sömëni fuka ta miti de. U sa hakisi Jehovah fa heepi de u de hoi dou te de dë ku suwaki, te wan gaan hogi pasa, te feti dë, te sëmbë ta du ku de, nasö te woto hogi soni ta miti de. U sa begi söseei tu da dee baaa ku dee sisa fuu dee ta wooko taanga u heepi wotowan. A kan taa i sabi sëmbë di abi dee lö fuka aki. Nöö a bi o bunu fii ta kai de a de në te i ta begi. U ta lei taa u lobi de tuutuu te u ta hakisi Jehovah faa heepi de u de hoi dou.
16. Faandi mbei u musu begi da dee sëmbë dee ta tei fesi a di kemeente?
16 Dee baaa dee ta tei fesi a di kemeente, ta tei ën u bigi taa u ta begi da de, nöö de ta feni wini fëën tu. Apösutu Paulosu bi sabi taa dee begi u dee wotowan bi o heepi ën. A bi taki taa: „Un musu begi da mi tu, dee sëmbë, be Gadu heepi mi u mi konda di buka fëën waiwai söndö fëëë, fu sëmbë sa ko sabi di pakisei fëën di a bi abi a fesi tjubitjubi nëën hati kumafa a bi kë heepi sëmbë tjika” (Ef. 6:19). A di ten aki seei u abi sömëni baaa di ta wooko taanga ta tei fesi a di kemeente. U ta lei taa u lobi de, te u ta hakisi Jehovah faa dë ku de.
TE U TA BEGI DA WOTOWAN
17-18. Un ten de sa hakisi u fuu begi da wotowan, nöö andi u musu hoi a pakisei?
17 So juu de sa hakisi u fuu begi da wotowan. Kandë wan sisa di ta lei wan sëmbë soni u Bëibel sa hakisi wan woto sisa di go ku ën u lei wan sëmbë soni u Bëibel, faa begi. Te a dë sö, nöö kandë di sisa di go ku ën, o kë tapa ku begi, u di an kaba sabi di sëmbë sö bunu. A sö wan fasi a o möön sabi andi a musu taki te a o begi da di sëmbë.
18 De sa hakisi wan baaa faa begi a wan peleikiwooko komakandi, nasö a wan kemeente komakandi. Dee baaa dee abi dee lö gaandi aki musu hoi a pakisei un pei soni woo du. Te de ta begi, nöö de an musu tei di okasi dë u bë wojo da sëmbë, u leti sëmbë buta a pasi nasö u piki di kemeente soni di de musu sabi. A gaansë u dee kemeente komakandi u ta abi feifi miniti fuu sa kanda, söseei fuu begi. Nöö fëën mbei di baaa di o begi, an musu „begi longi”, möönmöön te di komakandi o bigi.—Mat. 6:7.
MBEI BEGI DË WAN FANÖUDU SONI A DI LIBI FII
19. Andi o heepi u fuu dë kabakaba a di daka di Jehovah o kuutu libisëmbë?
19 U musu mbei begi ko dë wan gaan fanöudu soni a di libi fuu, u di di daka ka Jehovah o kuutu sëmbë zuntu. Fëën mbei Jesosi bi taki taa: „Hën mbei un musu dë ku wojo ta begi Gadu nöömö fuun sa pasa dee soni u ta taki aki söndö un lasi di biibi di un abi a mi liba” (Luk. 21:36). Te u ta begi hii juu, nöö woo abi wan taanga biibi go dou, söseei woo dë kabakaba te di daka u Gadu dou.
20. Unfa dee begi fuu sa dë kuma sumëësuti soni?
20 Andi u lei a di woto aki? U ta tei di begi di u sa begi Jehovah u bigi. Dee möön fanöudu soni dee u musu ta begi u de, da soni di nama ku di kë u Jehovah. U ta da Jehovah tangi tu da di Womi Mii fëën, ku di Könuköndë fëën. Söseei u ta begi da dee baaa ku dee sisa fuu. Jehovah kë taa u musu hakisi ën dee soni dee u abi fanöudu a di libi fuu, söseei faa heepi u fuu ko abi wan möön taanga biibi. Te u ta buta pakisei a dee soni dee u ta taki te u ta begi, nöö u ta lei taa u ta tei di begi di u ta begi Jehovah u bigi. Dee wöutu fuu o dë kuma sumëësuti soni da Jehovah. Awa, de o „ta dëën piizii”.—Nöng. 15:8.
KANDA 45 Dee soni dee mi ta pakisei fundu a mi hati
a U dë ku tangi a hati seei taa u sa ta begi Jehovah. U kë taa dee begi fuu musu ta dë kuma sumëësuti soni dëën. A di woto aki, woo taki u dee soni dee u sa taki u de te u ta begi. Söseei woo luku wantu soni di u musu hoi a pakisei te de hakisi u fuu begi da wotowan.
b DEE SONI DI DEE PEENTJE KË TAKI: Wan baaa ku hën mujëë ta begi da di mii u de u soni waka bunu dëën a siköö, de ta begi da wan gaansëmbë u de di dë ku suwaki, söseei de ta begi da wan sëmbë di ta lei soni u Bëibel faa go a fesi a di biibi.
c DEE SONI DI DEE PEENTJE KË TAKI: Wan njönku baaa ta da Jehovah tangi da di lusupaima, di goonliba, söseei a ta dëën tangi da dee soni dee a da u fuu njan.
d DEE SONI DI DEE PEENTJE KË TAKI: Wan sisa ta begi Jehovah faa mbei di jeje fëën dë ku di Tii Kulupu, söseei faa heepi dee sëmbë dee dë ku fuka.