Dee sëmbë u Jehovah lobi letilibi

1. Un tesi bi miti Josëfu, nöö unfa a bi du soni?

WAN gaan tesi bi miti di womi mii u Jakopu de kai Josëfu. Wan mujëë bi piki ën taa: „Ko duumi ku mi.” Di mujëë aki bi dë di mujëë u di basi fëën de kai Potifali. Ma Josëfu an bi kë du di soni aki seei. Kandë so sëmbë sa ta hakisi deseei taa: ’Faandi mbei Josëfu an bi du di soni di di mujëë bi kë faa du?’ Potifali an bi sai dë. Boiti di dë, Josëfu bi dë wan saafu u de, nöö di mujëë aki bi sa mbei di libi ko taanga dëën, u di an bi kë du di soni di a bi hakisi ën. Tökuseei Josëfu bi ta piki ën hii juu taa an kë duumi ku ën. Wë faandi mbei? Josëfu bi taki taa: „Unfa mi sa du sö wan gaan hogi faa ko dë taa mi du zöndu a Gadu wojo?”​—Ken. 39:7-12.

2. Unfa Josëfu bi du sabi taa di duumi di sëmbë ta duumi ko woto sëmbë manu nasö mujëë, da wan zöndu a Gadu wojo?

² Unfa Josëfu bi du sabi taa di Gadu fëën bi ta si di duumi di sëmbë ta duumi ko woto sëmbë mujëë kuma wan „gaan hogi”? Baka tu höndö jaa ufö Gadu bi mbei Mosesi da dee Isaëli sëmbë di Wëti, di ta taki gbelingbelin taa: „Ja musu duumi ku wan mujëë di na dë mujëë fii, nasö ku wan womi di na dë manu fii” (Ëki. 20:14). Tökuseei Josëfu bi sabi Jehovah tjika u fusutan taa Jehovah an lobi fanafiti libi a di së u manu ku mujëë soni. Josëfu bi sabi taa Jehovah seti di tööu libi da wan womi ku wan mujëë. Nöö a bi musu u jei fa Jehovah bi ko heepi hën gaan avo Sala tu pasi, sö taa wan woto womi an duumi ku ën ku taanga. Sö nöö Gadu bi du u tjubi di mujëë u Isaki de kai Lebeka (Ken. 2:24; 12:14-20; 20:2-7; 26:6-11). U di Josëfu bi kai pakisei a dee soni aki, mbei a bi ko sabi andi bunu ku andi hogi a Gadu wojo. U di Josëfu bi lobi Jehovah, mbei a bi dë kabakaba u du di soni di Jehovah bi o kë faa du.

3. Andi woo luku a di woto aki?

³ I lobi letilibi ö? Wë u dë seiki taa i lobi ën. Ma u di u da zöndu libisëmbë, mbei ee wa ta köni, nöö a sa pasa taa u ko ta si letilibi kumafa dee sëmbë u di goonliba aki ta si ën (Jes. 5:20; Lom. 12:2). Fëën mbei woo luku andi da letilibi, söseei woo luku un wini woo feni te u lobi letilibi. Te u kaba fëën, woo taki u dii soni di sa heepi u fuu ko möön lobi dee wëti u Jehovah.

ANDI DA LETILIBI?

4. Un föutu pakisei sëmbë abi te a nama ku letilibi?

⁴ Te u ta taki u wan sëmbë di ta libi a wan leti fasi, nöö kandë sömëni sëmbë ta pakisei taa di sëmbë dë abi gaanfasi, a lo’ u kuutu wotowan, nasö a ta mëni taa a bunu möön wotowan. Ma Gadu an lobi dee lö fasi dë seepiseepi. Di Jesosi bi dë a goonliba aki, a bi kuutu dee fesima u keiki u di ten fëën, u di de bi ta buta u deseei wëti u taki da deseei andi da letilibi (Peleik. 7:16; Luk. 16:15). Wan sëmbë di ta libi a wan leti fasi tuutuu, an o ta pakisei taa a bunu möön wotowan.

5. Te u luku andi di Bëibel ta taki, nöö andi da letilibi?

⁵ Te wan sëmbë ta libi a wan leti fasi, nöö hën da a ta du soni di bunu a Jehovah Gadu wojo. Te di Bëibel ta taki u letilibi, nöö di dë kë taki taa wan sëmbë ta libi ku dee wëti u Jehovah. Jehovah bi taki taa dee seisonima musu ta wooko ku bumbuu wegi (Deto. 25:15). Fëën mbei wan Keesitu sëmbë di kë libi bunu a Gadu wojo, musu ta du soni a wan leti fasi te a nama ku möni soni. Wan sëmbë di lo’ u du soni a wan leti fasi an ta lobi te sëmbë an ta libi bunu ku wotowan. Wan sëmbë di ta libi a wan leti fasi tuutuu, ta luku bunu ee dee soni a ta du ta kai ku Jehovah, u di a kë libi bunu nëën wojo.​—Kol. 1:10.

6. Faandi mbei u sa futoou dee wëti u Jehovah dee ta lei u andi da bunu ku hogi? (Jesaaja 55:8, 9)

⁶ Di Bëibel ta taki taa a Jehovah letilibi ta kumutu. Fëën mbei a ta kai ën „di kamian ka letilibi ta dë” (Jel. 50:7). U di Jehovah an abi zöndu, söseei u di hën mbei hii soni, mbei hën abi leti u piki u andi bunu ku andi an bunu. Ma u di u da zöndu libisëmbë, mbei so juu wa ta sabi andi da bunu ku andi da hogi. (Nöng. 14:12; lesi Jesaaja 55:8, 9.) U di Gadu mbei u kumafa hënseei dë, mbei u sa du dee bunu soni dee a ta lei u (Ken. 1:27). Nöö u lo’ u du dee soni dë tu. U di u lobi di Tata fuu, mbei u ta kë djeesi ën ka u sa djeesi ën dou.​—Ef. 5:1.

7. Konda faandi mbei u abi wëti fanöudu.

⁷ U ta feni wini te u ta libi ku dee wëti u Jehovah dee ta lei u andi bunu ku andi an bunu. I ta fusutan faandi mbei ö? Pakisei luku andi bi o pasa ee hiniwan masikapei di ta mbei wosu, bi ta wooko ku di u deseei fasi u maaka soni. Wë an dë u taki taa soni bi o waka fanjanfanjan. Nasö ee dee data ku dee sösutu an bi ta hoi deseei a so wëti te de ta kula sëmbë, nöö so sëmbë bi o dëdë. Wë te sëmbë ta wooko ku wëti, nöö a ta tja wini ko da dë. Sö nöö dee wëti u Gadu ta tja wini ko da u tu.

8. Un gaan bunu dee sëmbë dee lobi letilibi o feni?

⁸ Jehovah ta mbei dee sëmbë dee ta mbei möiti u libi ku dee wëti fëën, feni gaan bunu. A ta paamusi u taa: „Dee sëmbë dee ta libi a wan leti fasi, de o feni di goonliba, nöö naandë de o ta libi u teego” (Ps 37:29). Pakisei luku unfa hii sëmbë o ta dë waiwai, söseei fa de o ta libi fiifii makandi, te de tuu o ta hoi dee wëti u Jehovah. Di libi aki Jehovah kë da i. Awa, dee soni aki mbei hiniwan fuu musu lobi letilibi! Unfa u sa ko möön lobi di fasi aki? Boo luku dii soni di u musu du.

I MUSU KO MÖÖN LOBI DEE WËTI U JEHOVAH

9. Andi o heepi u fuu lobi letilibi?

⁹ Di fosu soni: U musu lobi di sëmbë di da u dee wëti. Ee u kë lobi letilibi, nöö u musu ko möön lobi Jehovah, di Sëmbë di ta piki u andi bunu ku andi an bunu. Möön u lobi Jehovah, möön woo kë hoi dee wëti fëën. Ee Adam ku Eva bi lobi Jehovah, nöö nöiti de bi o pasa hën buka.​—Ken. 3:1-6, 16-19.

10. Unfa Abahamu du ko sabi Jehovah möön bunu?

¹⁰ Wa kë mbei di seei föutu kuma Adam ku Eva. Ee u ta lei soni u Jehovah go dou, ee u ta lobi dee fasi fëën, söseei ee u ta mbei möiti u fusutan di fasi fa a ta pakisei, nöö wa o du soni kuma Adam ku Eva, ma woo ko möön lobi Jehovah. Buta pakisei a Abahamu. A bi lobi Jehovah tuutuu. An bi ta hopo fia ku Jehovah, aluwasi an bi ta fusutan faandi mbei Jehovah buta taa a o du wan soni. Ma a bi ta mbei möiti faa bi ko sabi Jehovah möön bunu. Di a bi jei taa Jehovah o poi Sodom ku Gomola kaba a sösö, hën bigibigi a bi ta fëëë taa di „Sëmbë di ta kuutu hii goonliba” bi o kii dee hogihati sëmbë ku dee sëmbë dee ta libi a wan leti fasi tuu. Abahamu an bi ta biibi taa Jehovah bi o sa du sö wan soni. Fëën mbei a bi hakisi ën wantu soni. Jehovah bi tei ten piki ën ku pasensi. Te u kaba fëën, Abahamu bi ko fusutan taa Jehovah ta öndösuku hii sëmbë hati, nöö nöiti a ta sitaafu dee bunuhati sëmbë makandi ku dee hogihati sëmbë.​—Ken. 18:20-32.

11. Unfa Abahamu bi lei taa a bi lobi Jehovah, söseei taa a bi ta futoou ën?

¹¹ Abahamu bi feni wini u di taki di hën ku Jehovah bi taki soni u dee foto Sodom ku Gomola. A bi ko möön lobi hën Tata, söseei a bi ko ta lesipeki ën möön gaanfa. Ma sömëni jaa baka di dë, hën wan gaan soni bi miti Abahamu ka a bi musu lei taa a ta futoou Jehovah tuutuu. Jehovah bi hakisi ën faa tjuma Isaki dëën, di wan kodo womi mii fëën. Ma u di Abahamu bi ko sabi Jehovah möön bunu, mbei an bi hakisi ën na wan soni di pasi aki möön, ma a bi du andi Jehovah bi hakisi ën. Ma pakisei luku unfa a bi ta taanga dëën, di a bi ta seeka u du di soni di Jehovah bi hakisi ën. Abahamu bi musu u ta kai pakisei a dee soni dee a bi lei u Jehovah. A bi sabi taa nöiti Jehovah bi o kuutu soni a wan fasi di an bunu, nasö taa a du wan soni di ta lei taa an abi lobi. Apösutu Paulosu bi taki taa Abahamu bi fusutan taa Jehovah bi o sa weki Isaki ko a libi baka (Heb. 11:17-19). Boiti di dë, Jehovah bi paamusi de taa Isaki bi o toon tata u wan nasiön, nöö a di ten dë, Isaki an bi abi miii jeti. Abahamu bi lobi Jehovah. Fëën mbei a bi ta biibi taa hën Tata bi o du soni a wan leti fasi. Hii fa a bi taanga dëën, tökuseei a bi du andi Jehovah bi piki ën, u di a bi abi biibi.​—Ken. 22:1-12.

12. Unfa u sa djeesi Abahamu? (Psalöm 73:28)

¹² Unfa u sa djeesi Abahamu? U musu ta lei soni u Jehovah go dou, leti kuma hën. Te u du sö, nöö u ku Jehovah o ko dë möön gaan mati, söseei woo ko möön lobi ën. (Lesi Psalöm 73:28.) Boiti di dë, woo seeka di háti fuu, fuu sa ta si soni kumafa Jehovah ta si soni (Heb. 5:14). Nöö te wan sëmbë ta pooba u mbei u du wan soni di an bunu, nöö wa o haikëën. Wa o pakisei u du soni di o hati Jehovah, nasö di o poi u ku ën. Na un woto fasi u sa lei taa u lobi letilibi?

13. Un möiti u musu mbei fuu sa libi a wan leti fasi? (Nöngö 15:9)

¹³ Di u tu soni: Hiniwan daka u musu ta mbei möiti fuu ko lobi letilibi. Leti kumafa u ta sport hiniwan daka fuu ko möön taanga, sö nöö u musu ta mbei möiti fuu sa ko lobi dee soni dee Jehovah ta piki u taa bunu. Di soni aki an taanga da u poi u du. Nöiti Jehovah o hakisi u fuu du wan soni di a sabi taa wa sa du (Ps. 103:14). A ta piki u taa „a lobi di sëmbë di ta mbei möiti u du soni a wan leti fasi”. (Lesi Nöngö 15:9.) Ee u kë dou wan maaka a di dini di u ta dini Jehovah, nöö u musu ta mbei möiti go dou fuu dou ën. Di wan seei soni u musu du ee u kë ta libi a wan leti fasi. Nöö Jehovah o heepi u fuu go a fesi pikipiki.​—Ps. 84:5, 7.

14. Andi da di felu soni di apösutu Paulosu bi taki fëën, nöö faandi mbei u abi ën fanöudu?

¹⁴ Jehovah ta mëni u taa an musu dë wan hebi da u fuu ta du dee soni dee a ta piki u (1 Joh. 5:3). Dee soni aki ta tjubi u, nöö u ta abi de fanöudu hii daka. I sabi dee fetilai dee apösutu Paulosu bi taki soni u de jeti ö? (Ef. 6:14-18) Undi u dee soni dë ta tjubi wan sodati hati? Wë a dë di felu soni di a ta bisi tapëën hatimindi. Di felu soni aki da dee soni dee Jehovah ta taki taa bunu. Leti kumafa di felu soni aki ta tjubi wan sëmbë hati, sö nöö dee wëti u Jehovah sa tjubi di fasi fa u ta pakisei, di fasi fa u ta fii ku dee soni dee hati fuu ta kë. Fëën mbei a dë fanöudu fuu ta bisi di felu soni aki tapa di hatimindi fuu!​—Nöng. 4:23.

15. Unfa i sa bisi di felu soni di apösutu Paulosu bi taki soni fëën?

¹⁵ Unfa i sa bisi di felu soni di apösutu Paulosu bi taki soni fëën? Di fasi fa i sa bisi ën, da te i ta hoi dee wëti u Gadu a pakisei te i ta du soni hiniwan daka. Ufö i da wan woto, ufö i haika wan poku, ufö i lesi wan buku, nasö ufö i luku wan soni, nöö hakisi iseei dee soni aki: ’Un soni mi o buta go a mi hati dendu? Jehovah o lobi di soni di mi o du aki ö? Di soni aki sa mbei mi ko lobi soni di Jehovah an lobi ö? A sa mbei mi ko lobi fanafiti libi, hogidu, di pakisei di sëmbë ta pakisei deseei nöö, nasö a sa mbei mi ko abi langawojo u?’ (Fil. 4:8) Ee dee soni dee i ta buta taa joo du ta kai ku Jehovah, nöö joo ta mbei dee wëti fëën tjubi i hati.

16-17. Unfa Jesaaja 48:18 ta mbei u dë seiki taa u sa ta libi ku dee wëti u Jehovah u nöömö?

¹⁶ I hakisi iseei wan daka ee joo sa ta libi ku dee wëti u Jehovah u nöömö u? Buta pakisei a di soni di Jehovah bi taki a Jesaaja 48:18. (Lesi ën.) Jehovah bi paamusi u taa di letilibi fuu sa „hia kuma seki wata a ze”. Boo taa i dë taanputaanpu a wan ze bandja ta luku fa di wata ta seki nango ta ko nöömö. I bi o dë ta booko i hedi ta hakisi iseei ee wan daka o ko ka di wata an o ta seki möön u? Wë nönö! U di i sabi taa dusudusu jaa kaa di wata ta seki nango ta ko, nöö an o tapa möönsö.

¹⁷ Di letilibi fii sa dë leti kuma dee seki wata a ze! Unfa sö? Wë te i kë du wan soni, nöö hoi a pakisei andi Jehovah bi o kë fii du, nöö i du ën. Hii juu di lobihati Tata fii o dë ku i u da i taanga, söseei u heepi i fii sa ta libi a wan leti fasi hiniwan daka, aluwasi unfa di soni di i buta taa i kë du taanga tjika.​—Jes. 40:29-31.

18. Faandi mbei wa musu ta kuutu wotowan?

¹⁸ Di u dii soni: Be Jehovah hën kuutu soni. Te u ta mbei möiti fuu libi ku dee wëti u Jehovah, nöö wa musu kuutu wotowan, söseei wa musu si kuma u bunu möön de. Wa abi leti u taki ee di soni di wotowan ta du da di soni di Jehovah kë u de du. U musu hoi a pakisei taa Jehovah hën da di „Sëmbë di ta kuutu hii goonliba” (Ken. 18:25). Jehovah an da u di wooko u kuutu sëmbë. Boiti di dë, Jesosi bi taki taa: „Na kuutu sëmbë e, nöö sëmbë an o kuutu i tu.”​—Mat. 7:1.b

19. Unfa Josëfu bi lei taa a bi ta futoou Jehovah a di fasi fa a ta kuutu soni?

¹⁹ Boo toona buta pakisei a di woto u di bunuhati womi de kai Josëfu. An bi ta kuutu wotowan, seei dee sëmbë dee bi ta libi hogi ku ën. Dee baaa fëën seei bi du hogi ku ën, de bi sei ën kuma saafu, söseei de bi piki de tata taa a dëdë. Baka wantu jaa, hën Josëfu bi toona miti dee sëmbë fëën baka. A di pisiten dë, Josëfu bi dë wan tiima di bi abi makiti seei, nöö a bi sa kuutu dee baaa fëën a wan hogihati fasi, nasö a bi sa suku u du hogi ku de baka. Dee baaa fëën bi ta si kuma a bi o du dee soni dë ku de, hii fa de bi lei taa de bi ta tjali u dee soni di de bi du. Ma Josëfu bi piki de taa: „Wan fëëë e. Mi na Gadu” (Kenesesi 37:18-20, 27, 28, 31-35; 50:15-21). Josëfu bi sabi taa Jehovah wanwan bi abi leti u kuutu dee baaa fëën.

20-21. Andi u sa du sö taa wa dë sëmbë di ta si kuma de bunu möön wotowan?

²⁰ Leti kuma Josëfu, u ta disa Jehovah be hën kuutu sëmbë. Wa ta pakisei taa u sabi faandi mbei dee baaa ku dee sisa fuu ta du soni kumafa de ta du ën. Wa sa si go a wan sëmbë hati, „Jehovah hën ta öndösuku sëmbë hati” (Nöng. 16:2). Jehovah lobi hii pei sëmbë, sëmbë u tookatooka lö ku sëmbë di kiija a tookatooka fasi. Nöö a ta da u taanga fuu ’jabi u hati’ da wotowan (2 Kol. 6:13). Boo mbei möiti fuu lobi hii dee baaa ku dee sisa fuu, ma wa musu suku u kuutu de.

²¹ Di soni aki kë taki tu taa, wa musu ta kuutu dee sëmbë dee an ta dini Jehovah (1 Tim. 2:3, 4). I bi o kuutu wan famii fii taa nöiti a o ko a di tuutuu lei ö? Wë di soni dë an bi o bunu seepiseepi. A bi o dë taa i ta fii kuma i bunu möön wotowan. Jehovah ta da „hii sëmbë a hii kamian” di okasi jeti, u de bia de libi (Tjab. 17:30). Hoi a pakisei taa Jehovah ta si dee sëmbë dee ta si kuma de bunu möön wotowan, kuma sëmbë di an ta libi a wan leti fasi.

22. Faandi mbei i dë kabakaba u mbei möiti u lobi letilibi?

²² Di lobi di u lobi dee wëti u Jehovah o mbei u dë waiwai, söseei a o mbei wotowan kë waka a u baka. De o möön lobi u, söseei de o möön lobi Jehovah. Be hii juu seei u „ta kë fu hii soni musu ta waka tololoo a Gadu wojo” (Mat. 5:6). I sa dë seiki taa Jehovah ta si dee möiti dee i ta mbei, söseei taa a ta wai te a ta si taa i ta mbei möiti u du soni a wan leti fasi. Aluwasi fa sëmbë u di goonliba aki ta libi hogi nango möönmöön, tökuseei ja musu lasi hati! Hoi a pakisei taa „Jehovah lobi dee sëmbë dee ta libi a wan leti fasi”.​—Ps. 146:8.