„Joo dë ku mi a di Paladëisi”

1. Andi Jesosi bi piki wan hogiduma kölö sö ufö a dëdë? (Lukasi 23:39-43)

JESOSI ku dee tu hogiduma dee bi dë nëën bandja bi ta fii pen seei di de bi dë ta dëdë a dee posu (Luk. 23:32, 33). Dee tu hogiduma tuu bi ta mbei Jesosi fa. Fëën mbei u sa taki taa de an bi dë bakama fëën (Mat. 27:44; Maik. 15:32). Ma wan u de bi tooka pakisei. A bi taki taa: „Jesosi o, mëni mi te i dë a di könuköndë fii e.” Hën Jesosi piki ën taa: „Tuutuu mi ta piki i tide taa joo dë ku mi a di Paladëisi.” (Lesi Lukasi 23:39-43.) Na wan soni dë di ta lei taa di hogiduma dë bi tei di bunu buka di Jesosi bi ta paaja taa „di Könuköndë u Gadu dë zuntu”. Nöö Jesosi an bi taki taa di womi dë bi o go a di Könuköndë a liba ala tu (Mat. 4:17). Jesosi bi ta taki soni u di Paladëisi di bi o dë a goonliba aki a di ten di ta ko. Faandi mbei u sa taki di soni dë?

2. Faandi mbei u sa taki taa di hogiduma di bi tooka pakisei bi dë wan Dju?

² A musu u dë sö taa di hogiduma bi dë wan Dju. A bi piki di woto hogiduma taa: „Ja ta fëëë Gadu nö? Ja sabi taa u tuu o dëdë aki nö?” (Luk. 23:40) Dee Dju bi ta dini wan kodo Gadu nöö, ma dee woto nasiön sëmbë bi ta dini sömëni gadu (Ëki. 20:2, 3; 1 Kol. 8:5, 6). Ee dee hogiduma dë bi dë woto nasiön sëmbë, nöö di wotowan fëën bi o hakisi taa: „Ja ta fëëë dee gadu nö?” Boiti di dë, Gadu an bi manda Jesosi go a dee woto nasiön sëmbë, ma a bi mandëën go a dee Isaëli sëmbë dee bi „dë kuma wanlö hia lasilasi sikafu” (Mat. 15:24). Gadu bi lei dee Isaëli sëmbë taa a o weki dee sëmbë dee bi dëdë ko a libi baka. A kan taa di hogiduma di tooka pakisei bi sabi di soni aki, nöö dee soni dee a bi taki ta lei taa a bi sabi taa Jehovah bi o weki Jesosi ko a libi baka faa sa tii a di Könuköndë fëën. Kandë di womi bi ta biibi taa Gadu bi o weki ën ko a libi baka tu.

3. Andi di hogiduma bi sa fusutan di Jesosi bi taki soni u wan paladëisi? (Kenesesi 2:15)

³ U di a kan taa di hogiduma di bi tooka pakisei bi dë wan Dju, mbei a bi sa sabi soni u Adam ku Eva ku di Paladëisi ka Jehovah bi buta de. Fëën mbei u sa taki taa a kan taa di hogiduma aki bi fusutan taa di Paladëisi di Jesosi bi taki soni fëën, bi o dë wan gaan waiti djai a goonliba aki.​—Lesi Kenesesi 2:15.

4. Andi dee soni dee Jesosi konda da di hogiduma, musu mbei u pakisei?

⁴ Dee soni dee Jesosi bi piki di hogiduma, musu mbei u pakisei unfa di libi o dë a di Paladëisi. U sa fusutan unfa di Paladëisi o dë, te u buta pakisei a di pisiten di Salumon bi dë Könu ta tii. Di Bëibel ta taki taa Jesosi hei möön Salumon. Nöö u sa dë ku di mëni taa a o wooko makandi ku dee woto sëmbë dee o tii makandi ku ën, u mbei di goonliba ko toon wan waiti paladëisi (Mat. 12:42). Dee „woto sikapu” musu kë sabi andi de musu du sö taa de sa libi u teego a di Paladëisi.​—Joh. 10:16.

UNFA DI LIBI O DË A DI PALADËISI?

5. Unfa i mëni di libi o dë a di Paladëisi?

⁵ Unfa i si kuma di libi o dë a di Paladëisi? Kandë i ta pakisei taa di Paladëisi o dë wan gaan waiti djai, kuma di Djai u Eden (Ken. 2:7-9). Kandë i ta mëni di tjabukama woto di Mika bi sikifi, di ta taki taa dee sëmbë u Gadu o ’sindo a de doloifi pau basu, söseei a de figa pau basu’ (Mik. 4:3, 4). Boiti di dë, kandë i ta mëni dee vers dee dë a di Bëibel di ta taki taa te a hia soni o dë u njan (Ps. 72:16; Jes. 65:21, 22). Di soni aki sa mbei i pakisei unfa joo dë sindosindo a wan tafa a wan gaan waiti djai, ta njan suti soni. Kandë i ta pakisei unfa joo ta sumëë dee uwii ku dee folo te di ventu ta böö. Nöö kandë i ta pakisei tu unfa a o dë te joo ta jei famii ku mati, söseei dee sëmbë dee weki ko a libi baka, ta da woto ku deseei ta lafu. U sa dë seiki taa hii dee soni aki o pasa tuutuu a goonliba aki. Ma a di Paladëisi woo ta du wooko tu, ma wooko di o ta da u piizii.

6. Andi ku andi woo du a di Paladëisi? (Luku di peentje.)

⁶ Jehovah mbei u a sö wan fasi taa u sa piizii ku di wooko di u ta du (Peleik. 2:24). Möönmöön a di Dusu Jaa Tii u Keesitu, woo ta abi hia soni u du. Dee sëmbë dee o pasa di gaan fuka libilibi, söseei dee milionmilion sëmbë dee o weki ko a libi baka, o abi koosu u bisi, soni u njan, ku wan kamian u libi fanöudu. Woo abi fu wooko taanga fuu sa seeka hii dee soni aki. Leti kumafa Gadu bi piki Adam ku Eva u de mbei hii di goonliba ko toon wan paladëisi, sö nöö woo ko abi di gaandi u mbei di goonliba ko toon wan paladëisi. Pakisei unfa a o dë wan piizii soni tjika u lei dee milionmilion sëmbë dee o weki ko a libi baka soni u Jehovah, söseei u heepi dee sëmbë dee bi ta dini Gadu ufö Jesosi ko a goonliba, u de ko sabi andi ku andi bi pasa baka di de dëdë.

7. Fuun soni u sa dë seiki, nöö faandi mbei u sa dë seiki fëën?

⁷ U sa dë seiki taa te woo dë a di Paladëisi, nöö woo ta dë bööböö, woo ta abi hii soni di u abi fanöudu, söseei soni an o ta waka fanjanfanjan. Faandi mbei u taki sö? Wë u di Jehovah lei u kaa unfa di libi o dë te di Womi Mii fëën o tii. A lei u di soni aki a di woto di ta taki u di fasi fa soni bi dë di Könu Salumon bi ta tii.

DI TII U SALUMON TA LEI U UNFA DI LIBI O DË A DI PALADËISI

8. Unfa dee soni dee sikifi a Psalöm 37:10, 11, 29 bi pasa tuutuu baka di Könu Dafiti bi sikifi de? (Luku di pisi „Soni di dee lesima hakisi”, di dë a Di Hei Wakitimawosu aki.)

⁸ Gadu bi mbei Könu Dafiti sikifi unfa soni bi o dë te wan könu di köni, söseei di ta hoi hënseei a Gadu bi o tii. (Lesi Psalöm 37:10, 11, 29.) U lo’ u lesi Psalöm 37:11 da sëmbë, te u ta taki soni u di Paladëisi di ta ko. Di soni dë da wan bunu soni, u di di Jesosi bi hoi di taki fëën a di kuun liba, hën a bi taki taa di soni di sikifi a di tëkisi dë o pasa tuutuu a di ten di ta ko (Mat. 5:5). Ma dee soni dee Dafiti bi taki seei ta lei u unfa di libi bi o dë a di ten di Könu Salumon bi o tii. Di Salumon bi ta tii Isaëli, nöö dee sëmbë u Gadu bi ta libi fiifii ku deseei, söseei soni bi nango bunu a di köndë. Di köndë dë bi abi „te a hia mëiki ku höniwata”. Gadu bi taki taa: „Ee un ta hoi dee wëti u mi . . . , mi o mbei soni waka bunu da unu a di köndë, söseei woon duumi söndö panta” (Leif. 20:24; 26:3, 6). Di soni aki bi pasa a di pisiten di Salumon bi ta tii (1 Klon. 22:9; 29:26-28). Söseei Jehovah bi paamusi de taa dee hogihati sëmbë dee bi ta dini poipoi gadu, ’an bi o dë möön’ (Ps. 37:10). Dee soni dee sikifi a Psalöm 37:10, 11, 29 bi pasa tuutuu a di ten di pasa, söseei de o pasa tuutuu a di ten di ta ko.

9. Andi di mujëë könu u di köndë Seiba bi taki u di tii u Könu Salumon?

⁹ Di di mujëë könu u di köndë Seiba bi jei unfa dee Isaëli sëmbë bi ta libi bööböö, söseei unfa soni bi nango bunu a di köndë di Salumon bi dë könu, hën a kumutu a wan longi kamian go dou a Jelusalen, u di a bi kë si ku hënseei wojo unfa soni bi dë tuutuu (1 Kön. 10:1). Di a si hii di könuköndë u Salumon, hën a taki taa: „Sömëni soni dë di ma bi sabi. . . . Dee sëmbë fii musu wai. Söseei dee futuboi fii aki, dee ta taanpu a i fesi hii juu, ta haika dee köni soni dee i ta taki, musu wai tu!” (1 Kön. 10:6-8) Di fasi fa soni bi dë a di ten di Salumon bi ta tii, ta lei u andi Jehovah o du da libisëmbë te di Womi Mii fëën, Jesosi o tii.

10. Na un fasi Jesosi hei möön Salumon?

¹⁰ Jesosi hei möön Salumon a hii futu. Salumon bi dë wan zöndu libisëmbë di bi mbei gaangaan föutu, nöö dee föutu dë bi mbei soni an bi waka bunu da dee sëmbë u Gadu. Ma Jesosi da wan Tiima di an ta mbei föutu (Luk. 1:32; Heb. 4:14, 15). Jesosi bi ta hoi hënseei a Gadu, hii fa Saatan bi ta poobëën gaanfa seei. Jesosi bi du soni di ta lei taa nöiti a o du zöndu, söseei taa an o du soni di sa tja hogi ko da dee sëmbë dee a o tii. Hën da di möön bunu Könu di u sa abi.

11. Ambë o tii makandi ku Jesosi?

¹¹ Jesosi o tii makandi ku 144.000 sëmbë, nöö de o seeka soni da libisëmbë, söseei de o du dee soni dee Jehovah bi abi a pakisei u du da di goonliba (Ako. 14:1-3). Sömëni tesi bi miti dee 144.000 sëmbë aki di de bi dë a goonliba aki. Fëën mbei de o fusutan unfa soni dë da dee sëmbë dee ta libi a goonliba aki. Un wooko de o du?

UN WOOKO DEE SALUFUWAN O DU?

12. Un wooko Jehovah o da dee 144.000 sëmbë?

¹² Di wooko di Jesosi ku dee sëmbë dee o tii makandi ku ën musu du, hia gaanfa möön di wooko di Salumon bi musu du. Könu Salumon bi musu seeka soni da milionmilion sëmbë dee bi ta libi a wan köndë nöö. Ma dee sëmbë dee o tii a di Könuköndë u Gadu o seeka soni da hii sëmbë a hii di goonliba. Wan apaiti gaandi seei Jehovah da dee 144.000 sëmbë dë!

13. Un apaiti wooko dee sëmbë dee o tii makandi ku Jesosi o du?

¹³ Leti kuma Jesosi, dee 144.000 sëmbë o dë könu ku mindima tu (Ako. 5:10). A di pisiten di dee Isaëli sëmbë bi musu hoi di Wëti di Gadu bi da Mosesi, nöö dee mindima bi musu heepi dee sëmbë u de abi wan bunu gösöntu, söseei u de ku Jehovah dë mati go dou. Di Wëti bi ta lei taa möön bunu soni „bi o ko a bakaten”. Fëën mbei u sa taki taa dee sëmbë dee o tii makandi ku Jesosi o heepi sëmbë u de abi wan bunu gösöntu, söseei u de ku Jehovah dë mati go dou (Heb. 10:1). Wa sabi unfa dee könu ku dee mindima aki o fan ku dee sëmbë di de o tii a goonliba aki. Ma aluwasi unfa Jehovah o seeka soni, u sa dë seiki taa dee sëmbë dee o libi a di Paladëisi a goonliba aki, o feni di heepi di de abi fanöudu.​—Ako. 21:3, 4.

ANDI DEE WOTO SIKAPU MUSU DU U DE SA LIBI A DI PALADËISI?

14. Unfa dee „oto sikafu” ku dee baaa u Keesitu ta du soni?

¹⁴ Jesosi bi taki taa dee sëmbë dee o tii makandi ku ën „biti seei” (Luk. 12:32). A bi taki u wan woto kulupu sëmbë tu di a ta kai „oto sikafu”. Dee tu kulupu sëmbë aki tuu o ko dë wan kodo hipi sikapu (Joh. 10:16). Dee tu kulupu sëmbë aki ta wooko makandi a di ten aki. Nöö te di goonliba ko toon wan paladëisi, nöö de o wooko makandi go dou. A di ten dë, dee „biti” sëmbë o dë a liba ala, nöö dee „oto sikafu” o sa libi u teego a goonliba aki. Ma soni dë di dee „oto sikafu” musu du sö taa de sa libi a di Paladëisi.

15. (a) Unfa dee „oto sikafu” ta wooko makandi ku dee baaa u Keesitu? (b) Unfa i sa djeesi di baaa di dë a wan wënkë? (Luku di peentje.)

¹⁵ Di hogiduma an bi feni pasi u lei taa a bi tei dee soni dee Jesosi bi du u bigi, u di a bi ko lasi libi. Ma u dee „oto sikafu”, ta feni pasi u lei unfa u ta tei dee soni dee Jesosi du u bigi tjika. Di fasi fa u ta libi ku dee salufu baaa u Jesosi ta lei ee u lobi ën. Jesosi bi taki taa di soni dë a o luku te a o ko u kuutu dee sikapu (Mat. 25:31-40). U sa heepi dee baaa u Keesitu, te u ta du di peleikiwooko fajafaja (Mat. 28:18-20). Fëën mbei a bunu fuu wooko ku dee buku di de ta da u. Wan u dee buku aki da di buku I sa dë waiwai u teego! Ee ja ta lei sëmbë soni u Bëibel ku di buku aki jeti, nöö a bi o bunu fii mbei möiti fii suku sëmbë di bi o kë lei soni u Bëibel.

16. Andi u sa du nöunöu fuu sa dë a di ten ka di Könuköndë u Gadu o tii?

¹⁶ An dë fuu wakiti fuu dou a di Paladëisi ufö u ko dë sëmbë di Jehovah kë a di Paladëisi fëën. Nöunöu aki kaa u sa mbei möiti fu wa ta mindi soni, fuu ta libi a wan leti fasi, söseei fuu ta buta pakisei a di fasi fa u ta du soni. U sa ta mbei möiti tu fuu ta hoi useei a Jehovah, fuu ta hoi useei a di sëmbë di u ku ën tööu, söseei a dee baaa ku dee sisa fuu. Ee u ta mbei möiti u piki Jehovah buka nöunöu kaa, hii fa u dë a di hogi goonliba aki, nöö an o taanga da u möön fuu piki hën buka a di Paladëisi. U sa lei u du so soni möön bunu, söseei u sa mbei möiti fuu ko abi bunu fasi, u di dee soni dë o lei taa u ta seeka useei fuu libi a di Paladëisi. Luku di woto „I dë kabakaba u libi u teego a goonliba u?” di dë a Di Hei Wakitimawosu aki.

17. A dë fuu lasi hati u di u bi du wan gaan zöndu a di ten di pasa u?

¹⁷ U musu mbei möiti tu u háti fuu an ta fon u poi, u di u bi mbei föutu a di ten di pasa. An dë u taki taa na u di Jesosi paka paima da u, mbei woo „du hogi ku sabi nango nöömö” (Heb. 10:26-31). Ma u sa dë seiki taa ee u bi tjali tuutuu u wan gaan zöndu di u bi du, ee u bi suku heepi a Jehovah ku dee gaanwomi, söseei ee u tooka di fasi fa u bi ta tja useei, nöö Jehovah da u paadon ku hii hën hati (Jes. 55:7; Tjab. 3:19). Hoi di soni di Jesosi bi piki dee Faliseima a pakisei. A bi taki taa: „Fa mi ko a goonliba aki, nöö ma ko u kai sëmbë di ta du soni a wan leti fasi e. Ma mi ko u ko kai dee sëmbë dee ta du zöndu” (Mat. 9:13). Di lusupaima bigi tjika u tapa hii dee zöndu fuu.

I SA LIBI U TEEGO A DI PALADËISI

18. Un woto i bi o kë da ku di hogiduma di bi dë a Jesosi bandja?

¹⁸ Pakisei luku unfa a o dë te i ku di hogiduma di bi dë a Jesosi bandja, dë a di Paladëisi ta da woto. An dë u taki taa un tuu o ta taki unfa un ta tei di lusupaima u Jesosi u bigi tjika. Nöö joo sa hakisi ën faa konda da i finifini unfa soni bi dë kölö sö ufö Jesosi dëdë, söseei unfa a bi fii di Jesosi bi piki ën taa a o dë a di Paladëisi. Kandë hënseei o hakisi i tu unfa di libi bi dë a dee lasiti daka u di goonliba u Saatan. A o dë wan gaandi seei fuu lei dee lö sëmbë aki soni u Bëibel!​—Ef. 4:22-24.

19. Faandi mbei wa o ta fuufei a di Paladëisi? (Luku di peentje u di kafiti.)

¹⁹ Wa o ta fuufei a di Paladëisi. Woo ta miti sömëni apaiti sëmbë, söseei woo ta du wooko di ta da u piizii. Ma di möön gaan soni, hën da hiniwan daka woo ta ko sabi di Tata fuu möön bunu, söseei woo ta piizii ku dee soni dee a seeka da u. Hii juu woo ta lei njunjun soni fëën, söseei sömëni soni o dë u lei a dee soni dee a mbei. Möön u libi longi, möön woo lobi Jehovah. U ta tei ën u bigi seei taa Jehovah ku Jesosi paamusi u taa woo sa libi u teego a Paladëisi!