Gadu ta booko hën hedi ku i
DI Bëibel hën ta piki u andi da di möön bunu fasi u du soni, u di a dë di Wöutu u Gadu. An dë wan buku di ta taki data soni, ma a sa heepi u fuu sabi andi u musu du te soni ta da u bookohedi, te u ta pakisei soni di an bunu, te soni ta hebi da u u tja, söseei te u abi wan siki di ta mbei soni ta taanga da u gaanfa seei.
Di Bëibel ta piki u taa Jehovah,a di Gadu di mbei u, ta fusutan u bunu möön hii woto sëmbë. A ta fusutan unfa u ta pakisei, söseei a ta fusutan unfa u ta fii. A dë kabakaba u heepi u ku hii dee fuka fuu. Luku tu soni di di Bëibel ta taki di sa da u taanga:
„Jehovah dë zuntu u dee sëmbë dee lasi hati. A ta heepi dee sëmbë dee ta fii bookosaka.”—PSALÖM 34:18.
„Mi, Jehovah da di Gadu fii, di ta panjan i a i letisë maun hoi. Mi da di sëmbë di ta piki i taa: ’Na fëëë. Miseei o heepi i.’”—JESAAJA 41:13.
Ma unfa Jehovah ta heepi u te u abi wan hedi dendu siki? A di woto di ta ko baka disi, woo si taa Jehovah ta lei u a peipei fasi, taa a ta booko hën hedi ku u tuutuu.
a Jehovah da di në u Gadu.—Psalöm 83:18.