Andi di Bëibel ta lei u u di Sëmbë di sikifi ën?

1. Faandi mbei i ta kai di Bëibel gaan soni?

U TA wai seei taa Jehovah Gadu da u di Bëibel! A di Bëibel Jehovah ta da u köni lai di ta heepi u ku dee bookohedi dee u abi a di ten aki. A paamusi u tu taa soni o waka bunu da u a di ten di ta ko. Ma di möön fanöudu soni, hën da Jehovah ta wooko ku di Bëibel u lei u unfa a dë tuutuu. Te u ta kai pakisei a dee fasi fëën, nöö woo ko ta möön lobi ën, söseei woo kë ko dë gaan mati fëën.​—Ps. 25:14.

2. Na un fasi Jehovah mbei sëmbë ko sabi soni fëën?

² Jehovah kë taa sëmbë musu ko sabi ën. A di ten di pasa, a bi ta mbei sëmbë sunjan, a bi ta mbei de si wojolimbo sunjan, söseei a bi ta manda ëngëli u mbei sëmbë ko sabi soni fëën (Nöb. 12:6; Tjab. 10:3, 4). Ma wa bi o sa ko sabi soni u dee sunjan, dee wojolimbo sunjan, ku dee bosikopu di dee ëngëli bi tja ko, ee sëmbë an bi sikifi de buta a soni. Fëën mbei Jehovah mbei sëmbë „sikifi” dee soni dee a bi kë fuu ko sabi buta a buku (Jel. 30:2). U di „di pasi u di tuutuu Gadu bunu te dou”, mbei u sa dë seiki taa di fasi fa a ta fan ku u bunu seei, söseei taa woo feni wini fëën.​—Ps. 18:30.

3. Unfa Jehovah bi mbei di Wöutu fëën an poi kaba a sösö? (Jesaaja 40:8)

³ Lesi Jesaaja 40:8. Dusudusu jaa kaa womi ku mujëë di ta dini Gadu ta feni köni lai a di Wöutu u Gadu. Unfa a waka? U di de bi sikifi di Wöutu u Gadu gaanduwe buta a soni di bi sa poi hesi, mbei na wan u dee fosufosu pampia lolu ka de bi sikifi di Wöutu u Gadu dë u feni a di ten aki. Ma Jehovah bi mbei sëmbë toona sikifi di Wöutu fëën buta a woto soni. Dee sëmbë dee bi du di wooko aki bi dë zöndu libisëmbë, ma de bi ta köni gaanfa seei u de an mbei föutu. Wan könima bi taki soni u dee Hebelejën buku u Bëibel. A bi taki taa: „U sa taki taa woto awooten buku an dë di sëmbë bi toona sikifi a sö wan soifi fasi kuma di Bëibel.” Wë hii fa sëmbë bi sikifi di Bëibel gaanduwe kaa, hii fa de bi sikifi ën a soni di bi sa poi hesi, söseei hii fa dee sëmbë dee bi toona sikifi ën bi dë zöndu libisëmbë, tökuseei u sa dë seiki taa a Jehovah dee soni dee u ta lesi a di Bëibel kumutu.

4. Fuun soni woo taki a di woto aki?

⁴ A Jehovah „hiniwan bunu soni ku hiniwan kado di bunu te dou ta kumutu” (Jak. 1:17). Di Bëibel da wan u dee möön bunu kado di Jehovah da u. Te wan sëmbë da u wan kado, nöö di kado di a da u ta lei u unfa di sëmbë dë sabi u tjika, söseei unfa a sabi dee soni dee u abi fanöudu tjika. Sö nöö a dë ku di Sëmbë di da u di Bëibel. Te u ta buta pakisei a di kado aki, nöö u ta ko sabi gaan hia soni u Jehovah. U ta ko si unfa a sabi u tjika, söseei u ta ko si unfa a sabi andi u abi fanöudu tjika. A di woto aki, woo luku unfa di Bëibel ta heepi u fuu ko sabi dee fasi dee Jehovah abi möön gaanfa. Dee fasi aki da köni, letilibi, ku lobi. Boo luku fosu unfa di Bëibel ta lei u unfa Gadu köni tjika.

DI BËIBEL TA LEI U TAA GADU KÖNI

5. Andi da wan u dee fasi fa di Bëibel ta lei fa Gadu köni tjika?

⁵ Jehovah sabi taa u abi di tii fëën fanöudu. Nöö di Bëibel di a da u kuma wan kado ta lei u fa a köni tjika. Dee lei u Bëibel ta mbei sëmbë feni wini, söseei de ta tooka sëmbë libi. Di de bi sikifi dee fosu pisi u di Bëibel, hën Mosesi bi piki dee Isaëli sëmbë taa: „Wan musu si dee soni dee mi taki kuma sösö soni e. Biga de o mbei un feni libi” (Deto. 32:47). Dee Isaëli sëmbë dee bi ta libi ku dee soni dee sikifi a di Wöutu u Gadu bi sa abi wan bunu libi, söseei de bi sa dë waiwai (Ps. 1:2, 3). Hii fa de sikifi di Wöutu u Gadu wan longi pisiten kaa, tökuseei a abi di kaakiti u tooka sëmbë libi jeti. Te u luku di pisi „Bijbel e kenki sma libi” a jw.org, nöö u sa si woto u möön leki 50 sëmbë di di Bëibel heepi u de bi sa tooka sömëni soni a de libi, u di de bi wooko ku dee lei u Bëibel.​—1 Tes. 2:13.

6. Faandi mbei u sa taki taa di Bëibel an dë kuma dee woto buku?

⁶ Na wan woto buku dë kuma di Wöutu u Gadu. Faandi mbei? Wë u di di Sëmbë di mbei sëmbë sikifi di buku aki da Jehovah Gadu, di makiti Gadu u mundu. A ta libi u teego, nöö sëmbë an dë di köni kuma ën. Sömëni buku ta dë u lesi jeti, hii fa dee sëmbë dee sikifi de an dë a libi möön. Ma a lo’ u pasa taa baka wantu jaa, sëmbë an sa ta wooko ku dee lai dee dë a dee buku dë möön. Ma nöiti dee mama wëti u Bëibel ta gaandi. De bi heepi sëmbë fu awooten ku sëmbë u di ten aki tuu. Te u ta lesi di santa buku aki, söseei te u ta kai pakisei a dee soni dee u ta lei nëën, nöö di Sëmbë di mbei sëmbë sikifi ën, ta wooko ku di santa jeje fëën u heepi u fuu ko fusutan unfa u sa libi ku dee soni dee u ta lei (Ps. 119:27; Mal. 3:16; Heb. 4:12). Awa, di Sëmbë di mbei sëmbë sikifi di Bëibel dë a libi, nöö a dë kabakaba u heepi i. Di soni aki musu mbei u ta kë lesi di Bëibel hiniwan daka!

7. Unfa di Bëibel bi heepi dee sëmbë u Gadu u de libi fiifii ku deseei a di ten di pasa?

⁷ Wan woto soni di ta lei u taa Gadu köni tuutuu, hën da u di di Bëibel ta heepi dee sëmbë u Gadu u de ta libi fiifii ku deseei. Dee Isaëli sëmbë an bi ta libi a di wan seei kamian di de go a di paamusi köndë. So u de bi ta kisi fisi, wotowan bi ta kiija mbeti, söseei so u de bi ta paandi soni. A bi sa pasa taa dee Isaëli sëmbë dee bi ta libi a wan kamian bi sa fëëkëtë dee wotowan dee bi ta libi a dee woto së u di köndë. Ma Jehovah bi seeka soni da dee Isaëli sëmbë sö taa de bi sa ta ko makandi u haika fa de ta lesi di Wöutu fëën, söseei u de bi ko fusutan andi dee soni dë bi kë taki (Deto. 31:10-13; Neh. 8:2, 8, 18). Pakisei luku unfa wan Isaëli sëmbë di bi abi wan taanga biibi bi ta fii te a bi dou a Jelusalen, te a bi si milionmilion woto dinima u Jehovah dee ta libi a hii së u di köndë! A di lö fasi aki Jehovah bi ta heepi dee sëmbë fëën u de libi makandi. Bakaten, womi ku mujëë tuu di bi ta fan peipei töngö bi ko dë Keesitu sëmbë. So u de bi dë heihei sëmbë, wotowan an bi dë në bai sëmbë. So u de bi gudu, nöö so u de bi pooti. Ma u di de bi lobi di Wöutu u Gadu, mbei de bi sa dini di tuutuu Gadu makandi. Dee sëmbë dee bi ko dë biibima bi sa fusutan di Wöutu u Gadu, u di dee woto dinima bi ta heepi de, söseei u di de bi nango a dee komakandi ku de.​—Tjab. 2:42; 8:30, 31.

8. Unfa di Bëibel ta mbei dee sëmbë u Jehovah ta libi fiifii ku deseei a di ten aki?

⁸ Di Gadu fuu di abi hii köni ta tei di Bëibel u lei dee sëmbë fëën soni go dou, söseei a ta lei de unfa de musu ta libi fiifii ku deseei. A di Bëibel u ta feni dee lei dee ta heepi u fuu ko sabi Jehovah. U lo’ u ko makandi a dee komakandi, a dee keling-komakandi, ku dee könklësi, sö taa u sa jei fa de ta lesi di Wöutu u Gadu, söseei fuu sa jei fa de ta heepi sëmbë u de fusutan andi dee soni de lesi dë kë taki. Di Bëibel da wan gaan fanöudu soni di Jehovah ta tei u heepi dee sëmbë fëën sö taa de „sa dini ën makandi”.​—Sef. 3:9.

9. Un fasi u musu abi fuu sa fusutan dee soni dee sikifi a di Bëibel? (Lukasi 10:21)

⁹ Boo luku wan woto soni di u sa lei u di köni u Jehovah. Sömëni pisi u Bëibel sikifi a sö wan fasi taa dee sëmbë dee abi sakafasi nöö sa fusutan de. (Lesi Lukasi 10:21.) A hii së u goonliba sëmbë ta lesi di Bëibel. Wan öndösukuma bi taki taa di Bëibel „an dë di buku di sëmbë ta lesi möön hia nöö a kaba, ma a dë di buku di sëmbë ta tei de ten ta lesi möön leki hiniwan woto buku”. Ma dee sëmbë dee abi sakafasi nöö ta fusutëën, söseei de nöö ta du dee soni dee a ta taki.​—2 Kol. 3:15, 16.

10. Andi da wan woto fasi fa u ta si a di Bëibel taa Jehovah köni?

¹⁰ Wan woto fasi dë fa u ta si a di Bëibel taa Jehovah köni tuutuu. Jehovah an ta tei di Bëibel u lei hii dee sëmbë fëën soni a kulupu nöö a kaba, ma a tei ën u lei hiniwan fuu soni apaiti, söseei u da hiniwan fuu kötöhati. Te u ta lesi di Wöutu u Jehovah, nöö u sa si taa a ta booko hën hedi ku hiniwan fuu apaiti (Jes. 30:21). A kan taa a pasa sömëni pasi kaa taa te i jabi di Bëibel lesi te i dë ku wan bookohedi, nöö i ta feni wan vers lesi di ta mbei i fii kuma ju seei vö Jehovah sikifi ën da. Wë di Bëibel sikifi a sö wan fasi taa milionmilion sëmbë sa fusutëën. Ma unfa a du waka taa i sa ta feni di soifi soni di i abi fanöudu a di Bëibel, hii fa de sikifi ën dusudusu jaa pasa kaa? Wë a dë sö u di di möön köni Sëmbë u mundu hën sikifi ën.​—2 Tim. 3:16, 17.

DI BËIBEL TA LEI U TAA GADU TA DU SONI A WAN LETI FASI

11. Unfa Gadu lei taa an lobi wan nasiön sëmbë möön wan wotowan, di a bi mbei sëmbë sikifi di Bëibel?

¹¹ Di du di Jehovah ta du soni a wan leti fasi da wan u dee fasi dee a abi möön gaanfa tu (Deto. 32:4). Wan sëmbë di ta du soni a wan leti fasi an ta lobi wan nasiön sëmbë möön wan wotowan (Tjab. 10:34, 35; Lom. 2:11). Di mbei di Jehovah mbei sëmbë sikifi di Bëibel a di töngö di gaansë sëmbë bi ta fan a di ten dë, ta lei taa a lobi hii pei köndë sëmbë. Dee fosu 39 buku u di Bëibel bi sikifi möön gaanfa a Hebelejëntöngö. Di töngö dë dee sëmbë u Gadu bi ta möön fusutan a di ten dë. Ma a di ten u dee fesiten Keesitu sëmbë, sëmbë bi ta fan Giikitöngö möön gaanfa, nöö fëën mbei de bi möön sikifi dee lasiti 27 buku u di Bëibel a Giikitöngö. Jehovah an bi buta taa de bi musu sikifi di Wöutu fëën a wan kodo töngö nöö. A di ten aki bëina 8000 milion sëmbë ta libi a goonliba, nöö de ta fan sömëni tookatooka töngö. Unfa hii dee sëmbë aki o sa ko sabi soni u Jehovah?

12. Unfa di tjabukama woto di sikifi a Daniëli 12:4 ta pasa a dee lasiti daka aki?

¹² Jehovah bi mbei di tjabukama Daniëli sikifi wan soni ka a bi paamusi u taa sëmbë o „ko sabi di tuutuu lei gaanfa” a dee lasiti daka. Sömëni sëmbë bi o ko sabi di tuutuu lei aki. (Lesi Daniëli 12:4.) Sëmbë ko sabi di tuutuu lei, u di u ta puu di Bëibel ku woto buku di ta taki soni u Bëibel ko a woto töngö, söseei u di u ta doloki de ta paati da sëmbë. Buku an dë di de puu ko a woto töngö kuma di Bëibel, söseei di Bëibel da di buku di de paati möön hia a hii di goonliba. So juu dee Bëibel dee sëmbë puu ko a woto töngö ta dii gaanfa seei. Ma dee sëmbë u Jehovah puu hii di Bëibel, nasö pisipisi fëën a möön leki 240 töngö, nöö hiniwan sëmbë sa feni wan Bëibel söndö u paka. Di soni aki mbei taa hii nasiön sëmbë sa ko sabi soni u di „bunu buka u di Könuköndë” ufö di kaba dou (Mat. 24:14). Di Gadu fuu di ta du soni a wan leti fasi kë taa hii sëmbë feni di okasi u de ko sabi ën, te de ta lesi di Wöutu fëën. A ta du di soni aki, u di a lobi hii u tuu gaanfa seei.

DI BËIBEL TA LEI U TAA GADU LOBI U

13. Faandi mbei u sa taki taa di Bëibel ta lei u taa Jehovah lobi u? (Johanisi 21:25)

¹³ Di Bëibel ta heepi u fuu fusutan taa lobi da di fasi di Jehovah abi möön gaanfa (1 Joh. 4:8). Boo luku andi ku andi Jehovah sikifi buta a di Bëibel da u, söseei andi ku andi an sikifi. A mbei de sikifi dee soni dee u abi fanöudu fuu ku ën sa ko dë mati, fuu sa abi wan suti libi nöunöu, söseei fuu sa feni di libi u teego. U di Jehovah lobi u, mbei a sikifi dee möön fanöudu soni buta a di Wöutu fëën.​—Lesi Johanisi 21:25.

14. Andi da wan woto fasi fa dee soni dee sikifi a di Bëibel ta lei u taa Gadu lobi u?

¹⁴ Jehovah ta lei u taa a lobi u, u di a ta fan ku u a wan fasi di ta lei u taa a kai u gaan soni. Jehovah an da u gaan hia wëti, söseei an ta piki u andi u musu du ku andi wa musu du a hiniwan pikipiki soni u di libi fuu. Ma a ta konda da u unfa soni bi waka da sëmbë a di ten di pasa, a ta konda tjabukama woto, söseei a piki u finifini unfa u musu du soni, sö taa u sa du soni a wan köni fasi. A dee fasi aki, di Wöutu u Gadu ta mbei u ko lobi di Gadu fuu, söseei a ta heepi u fuu ta piki hën buka a soni ku hii u hati.

15. (a) Unfa Jehovah lei taa a kai dee sëmbë dee ta lesi di Wöutu fëën gaan soni? (b) Te u luku di peentje, nöö na un woto u sëmbë di sikifi a Bëibel di mujëë mii, di njönku baaa ku di sisa ta kai pakisei? (Ken. 39:1, 10-12; 2 Kön. 5:1-3; Luk. 2:25-38)

¹⁵ Di Bëibel ta lei u taa Jehovah kai u gaan soni. Unfa sö? A di Wöutu fëën sömëni woto dë di ta lei fa libisëmbë ta fii. U ta fusutan di fasi faa dee sëmbë dee Bëibel ta taki soni u de bi ta fii, u di de bi dë sëmbë di bi abi „dee seei fii kuma u nöö” (Jak. 5:17). Di möön fanöudu soni, hën da te u ta luku di fasi fa Jehovah bi ta libi ku sëmbë kuma u. Di soni aki ta mbei u möön fusutan taa Jehovah ’abi tjalihati u sëmbë’.​—Jak. 5:11.

16. Andi u ta lei u Jehovah te u ta lesi woto u sëmbë di bi du zöndu? (Jesaaja 55:7)

¹⁶ Woto fasi dë jeti fa di Bëibel ta lei u taa Jehovah lobi u. Di Bëibel ta lei u taa u sa dë seiki taa di Gadu fuu an o go disa u te u mbei wan föutu. Dee Isaëli sëmbë bi du zöndu sömëni pasi a Jehovah wojo, ma tökuseei te de bi lei taa de bi ta tjali u dee zöndu u de, nöö a bi ta da de paadon. (Lesi Jesaaja 55:7.) Dee fesiten Keesitu sëmbë seei bi sabi taa Jehovah bi lobi de gaanfa seei. Gadu bi mbei apösutu Paulosu piki dee baaa ku dee sisa taa de bi musu ’puu di womi a bëë’ di bi du wan gaan zöndu, nöö de fan ku ën be hati fëën kötö, u di a bi lei taa a ta tjali u di zöndu di a bi du (2 Kol. 2:6, 7; 1 Kol. 5:1-5). U ta tei ën u bigi seei taa Jehovah an ta bia baka da dee dinima fëën te de mbei wan föutu! Ma a wan lobihati fasi a ta heepi de, ta leti de buta a pasi, söseei a ta kai de u de ku ën ko dë mati baka. Nöö di seei soni aki a ta paamusi taa a o du da dee sëmbë dee ta lei taa de ta tjali u dee zöndu u de a di ten aki.​—Jak. 4:8-10.

KAI DI WÖUTU U GADU GAAN SONI

17. Faandi mbei di Bëibel dë wan gaan kado?

¹⁷ Jehovah da u wan gaan kado. Faandi mbei di Wöutu fëën dë gaan soni sö? Wë kumafa u si, di Bëibel ta lei unfa Gadu köni tjika, unfa a ta du soni a wan leti fasi tjika, söseei unfa a ta lei taa a lobi u tjika. Di buku aki ta lei u taa Jehovah kë fuu ko sabi ën. A kë fuu ku ën ko dë mati.

18. Unfa u sa lei taa u ta kai di „kado” di Jehovah da u gaan soni?

¹⁸ Wa kë fëëkëtë taa di Wöutu u Gadu da wan bumbuu „kado” (Jak. 1:17). Fëën mbei boo ta mbei möiti go dou u lei taa u ta kai di kado aki gaan soni. Woo ta lei taa u ta kai ën gaan soni te u ta lesi ën, söseei te u ta kai pakisei a dee soni dee u ta lesi. Te u ta du sö, nöö u sa dë seiki taa di Sëmbë di mbei sëmbë sikifi di santa buku aki, o mbei u feni gaan bunu u di u ta mbei möiti, söseei woo „ko sabi Gadu”.​—Nöng. 2:5.