Joo ta feni wini nöömö te i abi gaan lesipeki da Gadu

1-2. Un bookohedi Lotu bi abi, di Keesitu sëmbë seei abi a di ten aki?

TE U luku fa sëmbë ta libi a di ten aki, nöö u ta fii kuma di bunuhati womi de kai Lotu. U di Lotu bi sabi taa di Tata fuu di dë a liba ala an lobi hogilibi, mbei a bi ta „dë fukafuka a hati seei” fu di sëmbë bi ta „libi söndö wëti”, söseei de bi ta libi „gaan hogi sensen libi” (2 Pet. 2:7, 8). U di Lotu bi lobi Gadu, söseei u di a bi abi gaan lesipeki dëën, mbei an bi ta libi kuma dee sëmbë u di kamian ka a bi ta dë. Useei ta libi ku sëmbë di an ta lesipeki dee wëti u Jehovah. Ma u sa hoi useei limbolimbo da Gadu ee u lobi ën, söseei ee u abi gaan lesipeki dëën.​—Nöng. 14:2.

² Jehovah da u di buku Nöngö u heepi u fuu ko abi gaan lesipeki dëën, söseei fuu sa ta hoi useei nëën. Hii Keesitu sëmbë sa feni wini u dee soni dee sikifi a di buku dë. U sa feni wini u de aluwasi u dë wan womi nasö wan mujëë, aluwasi u njönku nasö aluwasi u ko gaandi kaa.

DI GAAN LESIPEKI DI U ABI DA GADU TA TJUBI U

3. Andi da wan soni di mbei u musu ta tjubi di hati fuu, kumafa Nöngö 17:3 ta taki? (Luku di peentje tu.)

³ Wan soni di mbei u musu ta tjubi di hati fuu, hën da u di Jehovah ta öndösuku di hati fuu. Di soni aki kë taki taa an ta si u kumafa dee woto sëmbë ta si u, ma a ta si un pei sëmbë u dë tuutuu. (Lesi Nöngö 17:3.) A o lobi u ee u ta buta pakisei a dee köni dee a ta da u. Di soni dë o heepi u fuu sa libi u teego (Joh. 4:14). Di soni dë o heepi u u Saatan ku di hogi goonliba fëën aki an poi u ku di fasi fa de ta si soni, söseei ku dee mindimindi soni u de (1 Joh. 5:18, 19). Möön u ku Jehovah ta ko dë gaan mati, möön u ta ko lobi ën, söseei möön u ta ko abi lesipeki dëën. U di u lobi di Tata fuu, mbei wa kë pena mëni u du zöndu seei. Te u ta fii u du soni di an bunu, nöö woo hakisi useei taa: ’Faandi mbei seei mi musu libi hogi ku Jehovah, hii fa hën a ta lei mi hii juu taa a lobi mi?’​—1 Joh. 4:9, 10.

4. Unfa di lesipeki di wan sisa bi abi da Jehovah, bi heepi ën fu an du soni di an bunu?

⁴ Marta da wan sisa u di köndë Kolowaasia. Hati u di sisa aki bi ta mandëën faa libi fanafiti a di së u manu ku mujëë soni. A bi taki taa: „A bi taanga da mi u mi si soni a di soifi fasi, söseei a bi taanga da mi u mi duwengi miseei u ma du soni di an bunu. Ma di gaan lesipeki di mi bi abi da Jehovah bi heepi mi.”b Unfa di lesipeki di a bi abi da Jehovah bi sa heepi ën faa du di soni dë? Marta bi taki taa a bi ta pakisei luku andi bi sa pasa ee a bi du wan soni di an bunu. Useei sa du di soni dë tu. Di möön hogi soni di sa pasa, hën da woo mbei Jehovah fii tjali, söseei woo sa lasi di okasi di u abi u dini ën u nöömö.​—Ken. 6:5, 6.

5. Andi i sa lei a di woto u Baaa Leo?

⁵ Te u abi gaan lesipeki da Jehovah, nöö woo ta köni fu wa ko dë mati ku sëmbë di ta du soni di an bunu. Di soni dë wan baaa de kai Leo, di ta libi a di köndë Kongo, bi ko fusutan. Fö jaa baka di a dopu, hën a bigi ta nama ku sëmbë di bi ta du soni di an bunu. A bi ta si kuma solanga hën a bi ta du soni di an bunu, nöö soni an bi föutu. Ma te faa mëni, hën dee mati fëën mbei a ko ta bebe daan pasa maaka, ta libi fanafiti a di së u manu ku mujëë soni. U di hën mama ku hën tata ta dini Jehovah, söseei u di de bi lei ën soni u Jehovah, mbei a bi toona mëni dee soni di de bi lei ën. A bi mbei a ko ta mëni tu unfa a bi ta dë waiwai tjika di a bi ta dini Jehovah. Andi bi ko pasa? Leo bi toona ko ta du soni a wan bunu fasi baka. A bi toona ko a Jehovah, u di dee gaanwomi bi heepi ën. Nöunöu a dë wan gaanwomi tu, söseei a ta du di apaiti pioniliwooko.

6. Ambë da dee tu mujëë dee woo taki soni u de?

⁶ Boo buta pakisei a Nöngö kapitë 9. A ta taki soni u don ku köni, nöö a ta tei de maaka ku tu mujëë. (Luku Loomë 5:14; Galasia 4:24.) Te woo taki u de soni aki, nöö hoi a pakisei taa dee sëmbë u di goonliba u Saatan aki lobi fanafiti libi a di së u manu ku mujëë soni, söseei de lo’ u luku fanafiti soni tu (Ef. 4:19). Fëën mbei a dë fanöudu fuu ta mbei möiti nöömö fu wa ko lobi soni di an bunu (Nöng. 16:6). Sö wë mbei hiniwan fuu o sa feni wini u dee soni dee Nöngö kapitë 9 ta taki. Hiniwan u dee tu mujëë dee a ta taki, ta kai dee sëmbë ’dee na abi fusutan’. Hiniwan u de ta taki taa: ’Ko a mi pisi ko njan wan soni’ (Nöng. 9:1, 5, 6, 13, 16, 17). Ma soni an ta waka a di seei fasi da dee sëmbë dee nango a dee mujëë aki pisi.

NA HAIKA DI DON MUJËË

7. Andi ta pasa ku dee sëmbë de nango a di don mujëë pisi, te u luku Nöngö 9:13-18? (Luku di peentje tu.)

⁷ Luku andi „di don mujëë” ta taki. (Lesi Nöngö 9:13-18.) A ta bai ta kai dee sëmbë dee na abi fusutan, u de ko nëën pisi ko piizii ku ën. Nöö andi ta pasa ku de? „Dee sëmbë dee an sa du na wan soni u di de dëdë, dë nëën pisi ala.” Kandë i ta mëni jeti taa sö wan pei soni sikifi a bigi pisi u di buku Nöngö tu. Di Bëibel ta bai u fu wa nama ku „di fanafiti mujëë” nasö ku di „jajo mujëë”. A ta piki u taa: „Di wosu u di mujëë aki ta mbei sëmbë saka go a geebi” (Nöng. 2:11-19). Nöngö 5:3-10 ta taki soni u wan woto „fanafiti mujëë”, nöö a ta taki taa „dee futu fëën ta mbei a saka go miti dëdë”.

8. Andi u musu luku ee woo du?

⁸ Dee sëmbë dee ta jei dee soni dee „di don mujëë” ta taki, musu luku ee de o haikëën nasö ee de an o haikëën. A sa kan taa wan daka useei o abi u luku andi woo du tu. Andi woo du ee wan sëmbë ta pooba u mbei u libi a wan fanafiti fasi a di së u manu ku mujëë soni, nasö ee wan fanafiti soni djombo ko a di tëlëfön fuu te u dë a Internet?

9-10. Andi da wantu soni di mbei u musu ta köni fu wa libi fanafiti a di së u manu ku mujëë soni?

⁹ Soni dë di mbei u musu ta köni fu wa libi fanafiti a di së u manu ku mujëë soni. Di Bëibel ta piki u taa di „don mujëë” ta taki taa: „Fufuufufuu wata suti u bebe.” Andi da di „fufuufufuu wata” dë? Di Bëibel ta tei di duumi di wan womi ku wan mujëë di tööu ta duumi ku deseei, maaka ku wata (Nöng. 5:15-18). Wan womi ku wan mujëë di tööu sa duumi ku deseei. Ma na sö a dë ku di „fufuufufuu wata”, u di di soni dë sa kë taki taa wan womi ku wan mujëë duumi ku deseei, hii fa de an bi abi leti u du ën. Sëmbë lo’ u du di soni dë tjubitjubi, leti kumafa wan fufuuma seei ta fufuu soni tjubitjubi. Di „fufuufufuu wata” sa djei wan suti soni seei ee dee sëmbë dee libi fanafiti, ta si kuma sëmbë an o ko sabi andi de du. Ma de ta ganjan deseei, biga Jehovah ta si hii soni. Soni an dë di hogi möön di poi di u ku Jehovah sa poi. Di soni dë an „suti” seei (1 Kol. 6:9, 10). Boiti di dë, woto soni sa pasa ku dee sëmbë dee ta libi fanafiti a di së u manu ku mujëë soni.

¹⁰ Te sëmbë libi fanafiti a di së u manu ku mujëë soni, nöö di soni dë sa tja sen ko da de. De sa ta fii kuma de na bumbuu sëmbë, de sa ko dë ku bëë söndö u de kë, de sa da mujëë bëë söndö u de kë, söseei fanafiti libi sa poi di wosudendu libi u de. U ta si gbelingbelin taa a bunu fu wa go a di don mujëë pisi te a kai u. U si tu taa te sëmbë ta libi fanafiti libi, nöö de ku Gadu ta poi. Ma na di dë nöö. Sömëni u dee sëmbë aki ta kisi siki di ta tja dëdë kii de (Nöng. 7:23, 26). Vers 18 u kapitë 9 ta taki taa: „Dee sëmbë di di mujëë kai, dë nöunöu a geebi.” Wë nöö faandi mbei sëmbë nango nëën pisi te a kai de, hii fa hogi sa miti de?​—Nöng. 9:13-18.

11. Faandi mbei a dë wan gaan hogi soni seei u luku fanafiti soni u womi ku mujëë?

¹¹ Wan soni di u musu ta köni ku ën, da dee fanafiti soni dee sëmbë ta luku. So sëmbë ta si kuma soni an o du de ee de ta luku fanafiti soni u womi ku mujëë. Ma di soni dë ta du hogi ku sëmbë. A ta mbei de an ta lesipeki deseei möön, söseei a ta mbei de an ta lesipeki woto sëmbë möön tu. Boiti di dë, di soni dë taanga u disa. Te sëmbë si peentje ka de ta lei fanafiti soni, nöö a ta taanga faa fëëkëtë de. Ma na di dë nöö. Te sëmbë ta luku fanafiti soni, nöö an ta heepi de u de duwengi deseei, ma a ta mbei taa de ta kë möön du soni di an bunu (Kol. 3:5; Jak. 1:14, 15). Awa, sömëni sëmbë di ta luku fanafiti soni u womi ku mujëë, ta libi fanafiti nango nöömö.

12. Unfa u ta lei taa u ta koti pasi da footoo di sa mbei u pakisei fanafiti soni u womi ku mujëë?

¹² Andi u dee Keesitu sëmbë musu du ee wan fanafiti soni djombo ko a di tëlëfön fuu? U musu puu wojo nëën wantewante. Woo sa du di soni dë ee u hoi a pakisei taa di dë di u ku Jehovah dë mati, da di möön dii soni di u abi. Fuu taki ën, nöö so footoo di an ta lei fanafiti soni u womi ku mujëë, sa mbei u pakisei soni di an bunu tu. Faandi mbei u musu koti pasi da de? U di wa kë pakisei tjë sö seei taa u ta du fanafiti soni (Mat. 5:28, 29). Wan gaanwomi de ta kai David, di ta libi a di köndë Thailand, bi taki taa: „Mi ta hakisi miseei taa: ’Jehovah o wai ku mi ee mi ta luku dee footoo aki hii fa de an ta lei fanafiti soni u womi ku mujëë u?’ Te mi hakisi miseei dee lö soni dë, nöö de ta heepi mi u mi du soni a wan köni fasi.”

13. Andi ta heepi u fuu du soni a wan köni fasi?

¹³ Te u ta fëëë u du soni di an o kai ku Jehovah, nöö di soni dë o heepi fuu du soni ku köni. Te u abi gaan lesipeki da Jehovah Gadu, nöö u „ta ko köni” (Nöng. 9:10). Nöngö kapitë 9 ta heepi u fuu fusutan di soni dë. Bigi pisi u di kapitë dë ta taki soni u wan mujëë, di di Bëibel ta tei maaka ku „tuutuu köni”.

HAIKA DI KÖNI MUJËË

14. Faandi mbei Jehovah ta kai u, te u luku Nöngö 9:1-6?

¹⁴ Lesi Nöngö 9:1-6. A di tëkisi aki, u ta lesi fa Jehovah, di Sëmbë di mbei u, söseei di abi hii köni, ta kai u (Nöng. 2:6; Lom. 16:27). Di tëkisi ta taki soni u wan gaan wosu di abi seibi posu. Di soni aki ta lei taa Jehovah lo’ u da sëmbë soni, söseei taa a ta kai hii dee sëmbë dee kë, u de ko nëën be a lei de soni, sö taa de sa ko köni.

15. Andi Gadu ta kai u fuu ko du?

¹⁵ Jehovah da wan sëmbë di lo’ u da sëmbë soni seei te a hia. Dee fasi aki dë u si a di mujëë di Nöngö kapitë 9 ta tei maaka ku „tuutuu köni”. Di kapitë ta taki taa di mujëë aki ta kai sëmbë u de ko nëën pisi, u de ko njan wan suti soni di a boi da de. A boi gbamba, söseei a mbei win da de (Nöng. 9:2). Boiti di dë, vers 4 ku 5, ta taki taa: „Köni ta piki di sëmbë di na abi fusutan taa: ’Ko, nöö i njan di bëëë u mi.’” Faandi mbei u musu go njan a tuutuu köni pisi? Wë u di Jehovah kë u dee mii fëën musu dë köniköni sëmbë, söseei an kë u soni musu du de. An kë u soni miti u ufö u tei köni, söseei an kë fuu du soni di o hati u bakaten. Fëën mbei „a ta hoi köni buta dë da dee limbohati sëmbë” (Nöng. 2:7). Te u abi gaan lesipeki da Jehovah, nöö woo kë du soni di ta dëën piizii. U ta jei dee köni soni dee a ta piki u, nöö ku piizii seei u ta libi ku de.​—Jak. 1:25.

16. Unfa di gaan lesipeki di Baaa Alain bi abi da Gadu bi heepi ën faa du soni a wan köni fasi, nöö unfa soni bi waka dëën?

¹⁶ Luku unfa di gaan lesipeki di wan baaa de kai Alain bi abi da Gadu, bi heepi ën faa du soni ku köni. Alain da wan gaanwomi di ta lei miii soni a siköö, nöö a bi taki taa: „Sömëni u dee womi dee mi ku de ta wooko, bi ta si fanafiti fëlön u womi ku mujëë kuma wan soni di ta heepi sëmbë u de ko sabi soni u womi ku mujëë.” Ma Alain bi sabi taa na sö soni bi dë tuutuu. A bi taki taa: „U di mi abi gaan lesipeki da Gadu, mbei ma bi kë luku dee fëlön dë seepiseepi. Söseei mi bi konda da de, faandi mbei ma bi kë luku dee soni dë.” Alain bi du di soni di „tuutuu köni” ta taki. A bi ’waka a wan fasi di ta lei taa a abi fusutan’ (Nöng. 9:6). Di fasi fa a bi hoi hënseei gingin fu an luku dee fëlön dë, bi bigi da dee womi dee hën ku de ta wooko, nöö nöunöu so u de ta lei soni u Bëibel, söseei de nango a komakandi.

17-18. Un gaan bunu dee sëmbë dee ta haika „tuutuu köni” ta feni, nöö andi de sa dë ku di mëni taa de o feni bakaten? (Luku di peentje tu.)

¹⁷ Jehovah bi konda soni u tu mujëë da u, u heepi u u soni waka bunu da u. Dee sëmbë dee nango a di „don mujëë” pisi, ta suku u feni piizii a fanafiti libi. Ma fuu taki ën, nöö de an ta libi mëni amanjan. Biga di soni di de ta du dë o tja dëdë kii de.​—Nöng. 9:13, 17, 18.

¹⁸ Soni an dë sö da dee sëmbë dee nango a di köni mujëë pisi! Dee sëmbë dee nango a di mujëë dë pisi, ta feni te a hia soni u njan di bunu da de. Awa, de ta feni soni di ta heepi de u de ku Gadu dë mati go dou (Jes. 65:13). Jehovah bi mbei di tjabukama Jesaaja taki taa: „Un haika mi bunu, nöö un njan bumbuu soni. Un njan di möön bunu njanjan, nöö un piizii ku ën” (Jes. 55:1, 2). U ta mbei möiti fuu ko lobi dee soni dee Jehovah lobi, söseei u ta mbei möiti u buuse dee soni dee a ta buuse (Ps. 97:10). U ta wai, u di u sa kai woto sëmbë u de ko, u deseei sa feni „tuutuu köni”. U dë kuma dee futuboi dee ta „bai ta kai sëmbë. De ta taki taa: ’Be dee sëmbë dee na abi öndöfeni, ko aki.’” Dee bunu dee u ku dee sëmbë dee ta ko, ta feni, an o dë u wan kölö pisiten nöö. De o dë u nöömö. De ta jabi pasi da u fuu sa „libi” u nöömö, u di u ta ’waka a wan fasi di ta lei taa u abi fusutan’.​—Nöng. 9:3, 4, 6.

19. Andi u musu dë kabakaba u du, kumafa Peleikima 12:13, 14 ta taki? (Luku di pisi „U ta feni wini te u abi gaan lesipeki da Gadu”.)

¹⁹ Lesi Peleikima 12:13, 14. Be di gaan lesipeki di u abi da Gadu tjubi di hati fuu. Söseei be a heepi u fuu sa hoi useei limbolimbo dëën a dee lasiti daka aki. Di gaan lesipeki dë o da u taanga fuu sa kai sëmbë ka u sa kai dou, u de ko haika „tuutuu köni”, sö taa de sa feni wini fëën.