Soni di dee lesima hakisi

Faandi mbei Malia ku Josëfu bi fika a Betelehem ka u de toona go a de pisi a Nazalëti, baka di de pai Jesosi?

Wë di Bëibel an ta taki faandi mbei. Ma a ta taki u so soni di sa heepi u fuu ko fusutan faandi mbei de an bi toona go a Nazalëti baka a di ten dë.

Wan ëngëli bi piki Malia taa a bi o dë ku bëë, nöö a bi o pai wan womi mii. Malia ku Josëfu bi ta libi a Nazalëti di di ëngëli bi tja di bosikopu dë go da Malia, nöö Nazalëti bi dë di foto ka Josëfu bi ta libi a di pisiwata de kai Galilea (Luk. 1:26-31; 2:4). Bakaten, di de kumutu a Egepiti, hën de bi toona go a Nazalëti. Nöö a di foto dë Jesosi göö ko bigi, sö a ko dë sëmbë u Nazalëti. Fëën mbei te u ta taki soni u Jesosi, Josëfu ku Malia, nöö u ta pakisei di köndë Nazalëti.

Wan famii u Malia de kai Elizabëti bi ta libi a di pisiwata de kai Judea. Elizabëti bi dë di mujëë u di mindima de kai Sakaliasi, söseei a bi dë di mama u Johanisi di Dopuma (Luk. 1:5, 9, 13, 36). Malia bi go luku Elizabëti, nöö a bi fika dii liba nëën pisi. Baka di dë, hën Malia toona go a Nazalëti baka (Luk. 1:39, 40, 56). Hën da Malia bi sabi di pisiwata u Judea pikisö.

Bakaten, Josëfu bi kumutu a Nazalëti go a Betelehem u di dee Loomë sëmbë bi taki taa hiniwan sëmbë musu go „sikifi de në buta a lanti buku” a „di kamian ka de bi pai hën avo”. Betelehem bi dë di kamian ka di tjabukama woto bi taki taa de bi o pai di Mësiasi (Luk. 2:3, 4; 1 Sam. 17:15; 20:6; Mik. 5:2). Baka di Malia pai Jesosi a Betelehem, nöö Josëfu an bi mbei a toona go a Nazalëti baka ku di njunjun pai mii, u di di pasi bi longi. De bi fika a Betelehem, nöö Betelehem bi dë söwan nëigi kilomëti longi ku di foto Jelusalen. A bi o möön dë wan kösökösö soni da de u de tja di mii go a di Wosu u Gadu, söseei u de tja soni go tjuma da Gadu kumafa di Wëti bi ta taki.​—Leif. 12:2, 6-8; Luk. 2:22-24.

Di ëngëli u Gadu bi piki Malia taa di womi mii fëën bi o ko „könu nëën gaan avo Dafiti kamian”. Kandë Josëfu ku Malia bi pakisei taa a dë wan fanöudu soni taa de pai Jesosi a di foto u Dafiti (Luk. 1:32, 33; 2:11, 17). Kandë de bi pakisei taa a bi o bunu u de fika dë, nöö de wakiti u Gadu piki de andi de musu du.

Wa sabi un longi de bi dë a Betelehem ufö dee könima bi ko miti de. Ma a di ten dë, de bi abi wan wosu ta dë a Betelehem, nöö Jesosi an bi dë wan beibi möön (Mat. 2:11). A djei kuma de an bi toona go a Nazalëti, ma de bi fika ta libi a Betelehem.

Helodi bi manda dee sodati fëën u de go a Betelehem ’go kii hii dee womi mii tuu, kumutu a dee mii dee bi abi tu jaa tja go basu’ (Mat. 2:16). Wan ëngëli bi ko konda di soni dë da Josëfu, fëën mbei Josëfu ku Malia bi fusi go a Egepiti ku Jesosi, hën de dë ala u te fa Helodi dëdë. Bakaten, Josëfu bi tja dee sëmbë fëën go a Nazalëti. Faandi mbei de an bi toona go a Betelehem möön? Wë u di a di ten dë, di womi mii u Helodi de kai Akelausi bi ko dë tiima u Judea, nöö a bi dë wan hogihati womi. Boiti di dë, wan ëngëli bi piki Josëfu taa hogi bi sa miti de ee de go a Betelehem a di ten dë. Nazalëti bi dë wan kamian ka Josëfu ku Malia bi sa kiija Jesosi söndö u de fëëë taa hogi bi sa miti de, söseei ka de bi sa heepi ën faa ko dë wan dinima u Jehovah.​—Mat. 2:19-22; 13:55; Luk. 2:39, 52.

A djei kuma Josëfu lasi libi ufö Jesosi jabi di pasi da sëmbë u de sa go a liba ala. Hën da Josëfu o weki ko a libi baka a goonliba aki, nöö sömëni sëmbë o sa hakisi ën faandi mbei hën ku Malia bi fika a Betelehem baka di Malia pai Jesosi.