WOTO U WAN SËMBË
Soni waka bunu da mi u di mi futoou Jehovah
TE SËMBË hakisi mi ee andi ku andi mi du da Jehovah, nöö mi lo’ u piki de taa: „Mi dë kuma wan valisi a Jehovah maun!” Mi ta piki de sö u lei de taa leti kumafa mi ta tja di valisi u mi go te ka mi kë, sö nöö mi kë u Jehovah ku di ölganisaasi fëën tja mi go te ka de kë, a di ten di de kë. So u dee wooko dee mi bi du da Jehovah bi taanga u du, nöö so juu hogi bi sa miti mi di mi bi ta du de. Ma mi bi ko fusutan taa te mi ta futoou Jehovah, nöö nëën soni o ta waka bunu da mi tuutuu.
MI BI KO SABI JEHOVAH, SÖSEEI MI BI KO TA FUTOOU ËN
De pai mi a di jaa 1948, a wan pisiwata u di köndë Nigelia. A di pisiten dë, wan piki baaa u mi tata de kai Moustapha, ku di möön gaan baaa u mi de kai Wahabi, dopu ko dë Jehovah Kotoigi. Di mi bi abi nëigi jaa, hën mi tata ko lasi libi. Di soni dë bi hati mi gaanfa seei. Wahabi bi piki mi taa u bi o sa toona si u tata te Gadu weki ën ko a libi baka. Di soni dë bi da mi kötöhati, söseei a bi da mi taanga u mi lei soni u Bëibel. Mi dopu a di jaa 1963. Dee dii woto baaa u mi seei bi dopu tu.
A di jaa 1965, hën mi foloisi go ta dë ku di gaan baaa u mi de kai Wilson a di foto de kai Lagos. Nöö sö mi bi ko dë mati ku woto dinima u Jehovah u di Igbobi kemeente, di bi ta du di kowoonu pioniliwooko. U di de bi ta dë waiwai, söseei u di de bi ta wooko taanga da Jehovah, mbei miseei bigi du di kowoonu pioniliwooko a jailiba u di jaa 1968.
Wan baaa de kai Albert Olugbebi, di bi ta wooko a Bëtëli, bi hoi wan apaiti komakandi ku u dee njönkuwan. A bi konda da u unfa a dë fanöudu tjika u sëmbë go ta du di apaiti pioniliwooko a wan pisiwata u Nigelia. Mi ta mëni jeti fa Baaa Olugbebi bi da u taanga. A bi taki taa: „Un njönku, nöö un sa tei di ten ku di kaakiti fuunu u wooko da Jehovah. Te a hia wooko dë seei di un sa du ala!” Mi bi kë du soni kuma di tjabukama u Gadu de kai Jesaaja. Mi bi kë go ka Jehovah bi kë manda mi go. Fëën mbei mi bi fuu wan pampia u mi bi sa go du di apaiti pioniliwooko.—Jes. 6:8.
A sebitaa-liba u di jaa 1968, de bi manda mi u mi go du di apaiti pioniliwooko a di foto Kano, a wan pisiwata u Nigelia. Mi bi go ala a di pisiten u di gaan feti de kai Biafran. De bi feti di feti aki a di jaa 1967 te go miti di jaa 1970. Di feti aki bi mbei taa sömëni sëmbë bi ta pena, söseei sömëni sëmbë bi lasi libi a di pisiwata u Nigelia dë. Te u kaba fëën, di feti aki bi dou te a wan woto pisi u Nigelia. Wan baaa bi da mi taanga u ma go, u di an bi kë u hogi miti mi. Ma mi bi piki ën taa: „Gaantangi fii taa i ta booko i hedi ku mi. Ee Jehovah kë taa mi musu go wooko dëën ala, nöö mi dë seiki taa a o dë ku mi.”
MI BI TA FUTOOU JEHOVAH A WAN KAMIAN KA FETI BI POI SONI KABA A SÖSÖ
A bi tjali seei u si fa di feti bi poi soni a di foto Kano. A bi poi di gaan foto aki kaba a sösö. Te u bi dë a peleiki, nöö so juu u bi ta si dee dëdë sinkii u dee sëmbë dee de bi kii a di feti. Hii fa sömëni kemeente bi dë a Kano, tökuseei gaansë u dee baaa ku dee sisa bi lowe kumutu dë. Dee baaa ku dee sisa dee bi fika dë an bi dou 15, nöö de bi ta fëëë, söseei de bi ta fii bookosaka. De bi wai gaanfa seei di de si taa mi ku feifi wotowan di bi ta du di apaiti pioniliwooko bi ko a de. De bi fii möön bunu di u da de taanga. U bi heepi de seeka soni u de toona ta hoi komakandi hiniwan wiki, ta du di peleikiwooko, ta manda dee peleikiwooko pampia u de da di bëikantoo, söseei u de toona ta manda tei buku.
U dee sëmbë dee bi ta du di apaiti pioniliwooko bi bigi lei Hausatöngö. U di dee sëmbë u di pisiwata dë bi ta jei di bosikopu u di Könuköndë a de mamabëë töngö, mbei sömëni u de bi ta haika u. Ma dee sëmbë dee bi dë a di möön nëbai keiki u di foto an bi lo’ fa u ta peleiki, nöö u bi musu ta köni. Wan daka, wan womi bi kule a mi ku wan woto baaa baka ku faka. Ma u di u bi kule go disëën, mbei an bi kisi u. Hii fa hogi bi sa miti u, tökuseei Jehovah bi ta heepi u, nöö möönmöön sëmbë bi ta toon peleikima (Ps. 4:8). Nöunöu 500 peleikima ku 11 kemeente dë a Kano.
SONI BI MITI U A DI KÖNDË DE KAI NIGER
Mi ta du di apaiti pioniliwooko a di foto Niamey, Niger
A tanvuuwata-liba u di jaa 1968, hën de manda mi ku tu woto baaa di bi ta du di apaiti pioniliwooko go a di mama foto u Niger, de kai Niamey. Wantu liba nöö u bi dë a Kano. An bi tei longi fuu ko fusutan taa Niger bi dë wan u dee möön kendi kamian u goonliba. U bi musu ko sa’ u libi a di köndë, hii fa di wei bi ta kendi sö. Ma u bi musu ko sa’ u fan Faansitöngö tu, u di di töngö dë sëmbë bi ta möön fan a di köndë. Dee soni dë bi taanga u du, ma u bi futoou Jehovah, hën u bigi du di peleikiwooko makandi ku dee peleikima dee bi sai dë kaa. De an bi hia. An bi tei longi seei, hën bëina hii dee sëmbë u Niamey bi ko abi di buku De waarheid die tot eeuwig leven leidt. So sëmbë bi ta ko hakisi fa fuu seei, u de bi sa feni wan u di buku!
Bakaten, u bi ko fusutan taa lanti u di köndë an bi lobi dee Jehovah Kotoigi. A baimatu-liba u di jaa 1969, u bi hoi di fosu keling-komakandi a di köndë. Söwan 20 sëmbë bi dë a di komakandi. U bi ta wakiti seei fuu si fa tu peleikima bi o dopu. Ma a di fosu daka u di komakandi, hën siköutu ko tapa di komakandi. De bi tja di keling gaanwomi ku dee baaa dee bi ta du di apaiti pioniliwooko, go a siköutu pösu. De bi hakisi u soni te de kaba, hën de piki u fuu sikifi wan biifi tja ko da de di debooko fëën. U di u bi fusutan taa de bi o sa kë du ku u, mbei u bi seeka soni u wan dopu-taki bi sa hoi a wan sëmbë pisi. Hën baka di dë, hën u dopu dee sëmbë tjubitjubi a wan lio.
Wantu wiki baka di dë, hën lanti piki mi ku feifi woto baaa di bi ta du di apaiti pioniliwooko fuu kumutu a di köndë. De bi da u tu daka fuu kumutu a di köndë, nöö useei hën bi musu feni wan fasi u kumutu a di köndë. U bi haika, hën u go wantewante a di bëikantoo u Nigelia, hën dee baaa da u woto wooko fuu du.
De bi manda mi go a wan kamian u Nigelia de kai Orisunbare, ka mi bi dë makandi ku wantu peleikima. Nöö a bi ta suti seei te u bi ta peleiki a di kamian dë. Ma sikisi liba baka di dë, hën di bëikantoo hakisi mi u mi toona go a Niger. Di soni dë bi bigi da mi bigibigi, söseei mi bi ta fëëë pikisö. Ma mi bi kë toona go miti dee baaa ku dee sisa u Niger seei!
Mi bi toona go a Niamey. Di daka di mi dou, hën wan womi u Nigelia di bi ta bai soni ta sei bi si mi sabi, taa mi bi dë wan Kotoigi, hën a bigi hakisi mi soni u Bëibel. Mi bi bigi lei ën soni u Bëibel, hën baka di a disa sumuku, ku di bebe di a bi ta bebe daan pasa maaka, hën a dopu. Baka di dë, mi bi ta wai seei taa mi ku dee woto baaa ku sisa bi sa ta peleiki a dee kamiankamian u Niger, u heepi sëmbë u de ko a di lei pikipiki. Di mi bi dou, nöö 31 Kotoigi bi dë a di köndë. Ma de bi dë 69 di mi kumutu ala.
„WA SABI SONI U DI KÖNUKÖNDË WOOKO A GINEA WAN BËTË”
A tuwalufumu-liba u di jaa 1977, hën mi toona go a Nigelia u de lei mi soni. De bi lei mi soni dii wiki longi. Baka di dë, hën Baaa Malcolm Vigo, di bi dë di fesima u dee baaa u di Bëikantoo Komite, bi mbei mi lesi wan biifi di di bëikantoo u Siela Leonu bi manda ko. Dee baaa bi ta suku wan baaa di dë gösöntu, di an tööu, söseei di ta fan Ingisitöngö ku Faansitöngö, sö taa a bi sa du di keling wooko a di köndë Ginea. Baaa Vigo bi mbei mi ko sabi taa de bi ta lei mi soni u mi bi sa du di wooko dë. A bi mbei mi ko sabi tu taa di wooko bi taanga. Hën a piki mi taa: „Kai pakisei luku ufö i tei di wooko.” Hën mi piki ën wantewante dë taa: „Mi o go, u di Jehovah hën ta manda mi go.”
Mi bi tei opalani buwa go a Siela Leonu, go miti dee baaa a di bëikantoo. Wan u dee baaa u di bëikantoo komite bi piki taa: „Wa sabi soni u di Könuköndë wooko a Ginea wan bëtë.” Dee baaa u di bëikantoo u Siela Leonu de bi abi di faantiwöutu u luku fa di peleikiwooko nango a Ginea, ma di fasi fa politiki soni bi dë a di köndë, bi ta mbei taa de an bi sa ta fan ku dee peleikima dee bi dë ala. De bi pooba sömëni pasi u manda wan baaa go a di köndë u go luku dee peleikima fu ala, ma de an bi sa. Fëën mbei de bi hakisi mi u mi go a Conakry, a di mama foto u Ginea, nöö mi mbei möiti u mi sa feni pampia u mi sa dë ala.
„Mi o go, u di Jehovah hën ta manda mi go”
Di mi go dou a Conakry, hën mi go a di ambassade u Nigelia di bi dë ala. Mi bi go miti di sëmbë di bi ta wooko dë. Mi bi piki ën taa mi kë peleiki a Ginea. Hën a piki mi taa ma musu fika dë ee nasö siköutu sa söötö mi nasö sëmbë sa du hogi ku mi. A bi taki taa: „Toona go a Nigelia, nöö i go peleiki ala.” Hën mi piki ën taa: „Mi dë kabakaba u fika aki.” Hën a sikifi wan biifi manda da lanti u Ginea u de heepi mi, hën de heepi mi.
Kölö sö baka di dë, hën mi toona go a di bëikantoo u Siela Leonu, u mbei dee baaa ko sabi unfa soni bi waka. Dee baaa bi wai seei te na soni, di de jei fa Jehovah bi mbei soni waka bunu da mi. Lanti bi da mi pasi u mi bi sa dë a Ginea!
Mi ta du di keling wooko a Siela Leonu
Mi bi du di keling wooko a Ginea ku Siela Leonu a di jaa 1978 te go miti di jaa 1989, söseei mi bi ta hoi kamian da woto keling gaanwomi a di köndë Libelia. Mi bi lo’ u dë ku suwaki bigibigi. So juu di soni aki bi ta pasa te mi bi go a dee kamian ka sëmbë an bi nango hesihesi. Ma dee baaa bi ta mbei hii möiti u tja mi go a hatiwosu.
Wan daka, malalia bi kisi mi gaanfa seei, söseei wolon bi dë a mi bëë. Di mi ko bëtë, hën mi ko jei taa dee baaa bi bigi ta hakisi deseei kaa ee naasë de bi o bei mi! Hii fa dee lö soni aki bi ta miti mi, tökuseei nöiti ma bi ta mëni u disa dee wooko dee Jehovah bi ta da mi. Mi bi dë seiki taa di Gadu di sa weki u ko a libi baka, sa mbei soni waka bunu da u.
MI KU MI MUJËË BI FUTOOU JEHOVAH
Di daka di u tööu a di jaa 1988
A di jaa 1988, hën mi miti wan sisa de kai Dorcas. A bi abi sakafasi tuutuu, a bi abi wan taanga biibi, söseei a bi ta du di kowoonu pioniliwooko. Mi ku ën bi tööu, hën a bigi du di keling wooko makandi ku mi. Dorcas lo’ sëmbë, söseei a wooko taanga da Jehovah makandi ku mi. Mi ku ën bi ta waka söwan 25 kilomëti ku dee valisi fuu, kumutu a wan kemeente, go a wan wotowan. Te u bi musu go a dee möön longi kemeente, nöö u bi nango ku hiniwan fasi di u bi feni. U bi ta pasa a pasi di bi abi baaku, söseei di bi dë ku pötöpötö.
Dorcas abi degihati tuutuu. So juu u bi musu haba wata ka sömëni kaima bi lo’ u dë. Wan daka u bi tei feifi daka longi fuu dou ka u bi kë go, nöö u bi abi u haba wan lio ku boto, u di di pau booki di bi ta haba di lio bi booko. Ma di Dorcas bi ta hopo kumutu a di boto, hën a kai go a wata. Na wan fuu bi sa’ u sun, söseei kaima bi dë a di lio dë. Ma u wai seei taa wantu njönku kijoo, bi sun go puu ën a di wata. Di soni dë bi mbei u ko ta fëëë u wan pisiten, ma u bi du di wooko fuu go dou.
Dee mii fuu. Jahgift ku Eric da kado di Jehovah da u tuutuu
A bigi u di jaa 1992, hën u bi ko jei taa Dorcas dë ku bëë. Di soni dë bi bigi da u seei. U bi musu luku ee u bi o du di hii-ten diniwooko go dou. U bi taki ku useei taa: „Jehovah bi da u wan kado!” Fëën mbei u bi kai di mujëë mii fuu Jahgift. Fö jaa baka di u pai Jahgift, hën u pai wan womi mii. Hën u kai ën Eric. Dee tu mii fuu tuu dë kado di Jehovah da u tuutuu. Jahgift bi wooko u wan pisiten a Conakry, a di kantoo ka de ta puu buku ko a woto töngö. Nöö Eric dë wan dinai a kemeente.
Hii fa Dorcas an bi sa du di apaiti pioniliwooko möön, tökuseei a bi ta du di kowoonu pioniliwooko, ta luku dee mii fuu. Jehovah bi heepi mi u mi bi sa du di apaiti hii-ten diniwooko go dou. Di dee mii fuu ko bigi, hën Dorcas bi ko ta du di apaiti pioniliwooko baka. Nöunöu mi ku ën tuu taa du di sëndëlengiwooko a Conakry.
DI SËMBË DI TA MBEI SONI WAKA BUNU DA SËMBË TUUTUU
Hii juu mi bi nango ka Jehovah bi kë u mi go. Mi ku mi mujëë bi ta fii fa a bi ta heepi u, söseei fa a bi ta mbei soni waka bunu da u. U di u bi ta futoou ën ka fuu biinga a gudu baka, mbei wa bi abi sömëni u dee bookohedi dee sëmbë ta abi te de ta biinga a gudu baka. Mi ku Dorcas bi si tuutuu taa di Sëmbë di ta mbei soni waka bunu da sëmbë tuutuu, da Jehovah, ’di Gadu fuu di ta heepi u’ (1 Klon. 16:35). Mi dë seiki taa Jehovah o tjubi di libi u dee sëmbë dee ta futoou ën, „kumafa wan sëmbë ta tjubi wan gudu a wan saku dendu”.