Dee soni dee Gadu paamusi u o pasa tuutuu

1. Faandi mbei u sa taki taa a dë wan bunu soni taa Abahamu bi biibi Gadu go dou?

JEHOVAH bi paamusi hën mati Abahamu taa a bi o pai wan mii di bi o mbei hii nasiön a goonliba feni gaan bunu (Ken. 15:5; 22:18). U di Abahamu bi ta biibi Gadu ku hii hën hati, mbei a bi dë seiki taa di soni di Gadu bi paamusi ën bi o pasa tuutuu. Hii fa a bi dë sö, tökuseei Abahamu ku hën mujëë an bi pai na wan mii jeti. Abahamu bi abi 100 jaa, nöö hën mujëë bi abi 90 jaa (Ken. 21:1-7). Ma tökuseei di Bëibel ta taki taa: „Nöö fa Abahamu bi ta biibi Gadu dë, a bi ta pakisei di soni di Gadu bi paamusi ën taa a o ko di gaan sëmbë u hia föluku” (Lom. 4:18). Kumafa u sabi, nöö di soni di Abahamu bi ta biibi pasa tuutuu. A bi ko toon di tata u Isaki, di mii di a bi ta biibi taa a bi o pai. Faandi mbei Abahamu bi dë seiki taa Jehovah bi o du dee soni dee a bi paamusi ën?

2. Faandi mbei Abahamu bi dë seiki taa Jehovah bi o du di soni di a bi paamusi ën?

² U di Abahamu ku Jehovah bi dë gaan mati, mbei a bi dë seiki „taa Jehovah abi kaakiti tjika faa du leti kumafa a bi paamusi ën dë” (Lom. 4:21). Jehovah bi feni Abahamu u bunu, söseei a bi ta si ën kuma wan sëmbë di bi ta libi leti, u di a bi abi wan taanga biibi (Jak. 2:23). Abahamu bi ta biibi taa di soni di Gadu bi paamusi ën bi o pasa tuutuu, leti kumafa Loomë 4:18 ta taki. Boo luku Loomë kapitë 5 fuu si andi apösutu Paulosu bi taki u di biibi di u ta biibi taa dee soni dee Gadu paamusi u o pasa tuutuu.

3. Andi Paulosu bi taki u di biibi di u ta biibi taa woo feni dee soni dee Gadu paamusi u?

³ Paulosu bi taki faandi mbei ’an o dë fuu panta möönsö, taa di biibi di u ta biibi o dë u sösö’ (Lom. 5:5). A ta heepi u tu fuu ko fusutan unfa di biibi fuu sa ko möön taanga. Te woo luku dee soni dee Paulosu taki a Loomë 5:1-5, nöö buta pakisei a dee soni dee iseei ko sabi. Te i du di soni dë, nöö kandë iseei o ko si taa möön di ten ta pasa, möön di biibi fii ta ko taanga. Dee soni dee woo taki u de, o mbei i ko si unfa i sa mbei di biibi fii ko möön taanga möön leki fa a dë nöunöu. Boo buta pakisei a wan gaan bunu di Gadu paamusi u. Paulosu bi taki taa di biibi di u ta biibi taa woo feni ën, an o dë u sösö.

DI GAAN BUNU DI WOO FENI

4. Andi Paulosu bi taki a Loomë 5:1, 2?

⁴ Lesi Loomë 5:1, 2. Paulosu bi sikifi dee soni aki da dee baaa ku dee sisa u Loomë. Dee baaa ku dee sisa aki bi lei soni u Jehovah ku Jesosi, de bi ko abi wan taanga biibi, söseei de bi ko toon Keesitu sëmbë. Di biibi u de bi mbei de ’ko dë bumbuu sëmbë a Gadu wojo’, söseei Gadu bi salufu de ku di santa jeje fëën. Awa, de bi sa dë seiki taa Gadu bi o mbei de feni wan gaan bunu a di ten di ta ko.

5. Andi Gadu paamusi dee salufuwan taa de o feni?

⁵ Bakaten Paulosu bi sikifi wan biifi manda da dee salufuwan u Efeise, u taki u dee soni dee Gadu bi paamusi de. Wan u dee soni dë da di gudu di Gadu bi o da de, u di de dë sëmbë fëën hedi (Ef. 1:18). Paulosu bi piki dee sëmbë u Kolosën tu naasë de bi o feni di soni di Gadu bi paamusi de. A bi taki taa ’Gadu abi wan suti libi nëën köndë u da de’ (Kol. 1:4, 5). Gadu bi paamusi dee Keesitu sëmbë dee a bi salufu a di ten dë, taa a bi o weki de u de go libi nëën a liba ala, u de sa tii makandi ku Keesitu.​—1 Tes. 4:13-17; Ako. 20:6.

6. Andi wan baaa di dë salufuwan bi taki u di soni di Gadu paamusi ën?

⁶ Dee salufuwan ta tei ën u bigi seei taa Gadu paamusi de di soni dë. Baaa Frederick Franz, di bi dë wan salufuwan tu, bi taki taa: „Di soni di Gadu paamusi u da wan tuutuu soni, nöö hiniwan u dee 144.000 salufuwan o feni di soni di Gadu paamusi u. Boiti di dë, di bunu dë o bigi möön fa u bi mëni seei.” Baka di Baaa Franz bi dini Jehovah sömëni jaa longi, hën a bi taki a di jaa 1991, taa: „U ta tei ën u bigi jeti taa Jehovah paamusi u sö wan soni. . . . Möön dee jaa ta pasa, möön u ta tei ën u bigi. A fiti fuu wakiti fuu feni ën, aluwasi ee wan dusu jaa seei u musu wakiti. Mi ko ta möön tei di soni dë u bigi möön fosu seei.”

7-8. Un gaan bunu Gadu paamusi gaansë u dee dinima fëën taa a o da de? (Loomë 8:20, 21)

⁷ Gaansë u dee dinima u Jehovah u di ten aki o feni wan woto bunu. Di bunu dë Abahamu bi ta wakiti faa feni tu. Di bunu dë da di libi u teego a goonliba aki, a di tii u Gadu basu (Heb. 11:8-10, 13). Paulosu bi taki soni u di gaan bunu di dee dinima u Gadu aki o feni. (Lesi Loomë 8:20, 21.) Andi bi möön hai i pakisei di i ko sabi andi Gadu paamusi u taa a o da u? Di sabi di i bi ko sabi taa ja o abi zöndu möön, hën hai i pakisei ö? Naa di sabi di i bi ko sabi taa dee sëmbë fii dee dëdë o weki ko a libi baka a wan paladëisi a goonliba aki? U di Gadu paamusi u dee soni dë, mbei i ta wakiti seei fii si faa hii dee soni dë o pasa.

⁸ Aluwasi ee woo libi u teego a libi ala nasö a goonliba aki, tökuseei u ta wai u di di soni di Gadu paamusi u da wan tumisi gaan bunu. Nöö u sa ko möön dë seiki taa woo feni di gaan bunu dë. Di soni di Paulosu bi taki ta heepi fuu ko fusutan unfa a du waka. Boo luku andi a bi taki u di soni di Gadu paamusi u. Dee soni dee a taki o mbei u ko möön dë seiki taa di soni di Gadu paamusi u o pasa tuutuu.

UNFA U SA KO MÖÖN DË SEIKI TAA WOO FENI DI SONI DI GADU PAAMUSI U?

9-10. Un soni dee Keesitu sëmbë musu ta hoi a pakisei, te u luku di soni di Paulosu bi taki? (Loomë 5:3) (Luku dee peentje tu.)

⁹ Lesi Loomë 5:3. Paulosu bi taki taa te fuka ta miti u, nöö u sa ko möön dë seiki taa woo feni di soni di Gadu paamusi u. Unfa sö? Wë hii dee bakama u Keesitu sa dë ku di mëni taa sëmbë o du ku de. Luku andi Paulosu bi taki. A bi piki dee baaa ku dee sisa u Tesalonika taa: „Di u ku unu bi sai dë, nöö u bi ta taki ën da unu nöömö taa ee wan sëmbë ko biibi a Masa Jesosi nöö a o kisi sitaafu nöömö. . . . Nöö hën wë ta pasa ku unu fa u dë aki” (1 Tes. 3:4). Nöö a bi piki dee baaa ku dee sisa u Kolenti taa: ’Wë nöö dee sëmbë, u kë konda da unu taa dee sitaafu dee u tja, nöö de bi hebi da u tee. U bi fëëë seei tee u bi mëni taa de bi o kii u.’​—2 Kol. 1:8; 11:23-27.

¹⁰ Dee Keesitu sëmbë u di ten aki seei sa dë ku di mëni taa sëmbë o du ku de tu (2 Tim. 3:12). Unfa a dë ku i? Sëmbë du ku i u di i ko ta waka a Jesosi baka u? A kan taa dee famii fii ku dee mati fii bi mbei i fa. A kan taa de bi du ku i. Soni bi miti i a wookope u di i ta mbei möiti hii juu fu ja ta ganjan sëmbë u? (Heb. 13:18) Lanti bi du ku i u di i bi konda soni u di biibi fii da wotowan u? Paulosu bi taki taa u musu ta wai, aluwasi un pei soni sëmbë ta du ku u? Faandi mbei a bi taki sö?

11. Faandi mbei u musu dë kabakaba u hoi dou, aluwasi un fuka ta miti u?

¹¹ U sa dë ku wai te sëmbë ta du ku u, u di di soni aki sa heepi u fuu ko abi wan fasi di dë fanöudu seei. Loomë 5:3 ta taki taa „sitaafu ta heepi u fuu abi degihati”. Sëmbë o du ku hii Keesitu sëmbë. Fëën mbei hii Keesitu sëmbë musu abi degihati. U musu dë kabakaba u hoi dou, aluwasi un fuka ta miti u. Di soni dë hën mbei taa u sa feni di soni di Gadu paamusi u. Wa kë dë kuma dee sëmbë dee Jesosi bi taki a di woto fëën. A bi taki taa dee sëmbë dë bi dë kuma sii di kai a sitonu kamian. De bi tei di buka ku wai, ma ’di fuka bi miti de’, söseei ’di sëmbë bi du ku de’, hën de an hoi go dou (Mat. 13:5, 6, 20, 21). A dë sö tuu taa an ta dë wan suti soni te sëmbë ta du ku u, söseei an ta dë wan kösökösö soni tu, ma u ta feni gaan bunu te u hoi dou. Na un futu?

12. Un bunu u ta feni te u ta hoi dou te sëmbë ta du ku u?

¹² Di bakama u Jesosi de kai Jakobosi, bi taki un bunu u ta feni te u ta hoi dou te sëmbë ta du ku u. A bi taki taa: „Fa joo ta hoi pasensi ta tja dee sitaafu dë, nöö hën o puu föutu a i buta i ko wan gbelingbelin sëmbë a Gadu wojo” (Jak. 1:2-4). Jakobosi bi taki taa di hoi di u ta hoi dou ta du wan wooko a u. Un wooko a ta du a u? Wë a sa heepi u fuu ko möön abi so fasi, kuma pasensi ku biibi, söseei a sa heepi u fuu ko ta möön futoou Gadu. Ma u ta feni wan woto gaan bunu tu te u ta hoi dou.

13-14. Unfa di hoi di u ta hoi dou ta mbei u ko dë, nöö unfa di soni dë nama ku di soni di Gadu paamusi u? (Loomë 5:4)

¹³ Lesi Loomë 5:4. Paulosu bi taki taa te u ta hoi dou, nöö u ta ’ko dë möön bumbuu sëmbë a Gadu wojo’. Di hoi di i ta hoi dou ta mbei Gadu feni i u bunu. Di soni dë an kë taki taa Jehovah ta wai taa fuka ta miti i, nasö taa i abi bookohedi. Ma a ta wai ku i, u di i ta hoi dou. Di hoi di i ta hoi dou ta mbei i ko dë bumbuu sëmbë nëën wojo. Wan gaan soni seei wë di dë e!​—Ps. 5:12.

¹⁴ Hoi a pakisei taa Abahamu bi hoi dou di tesi bi miti ën, nöö di soni dë bi mbei Gadu feni ën u bunu. Jehovah bi si ën kuma mati fëën, söseei kuma wan sëmbë di ta libi leti (Ken. 15:6; Lom. 4:13, 22). Sö nöö Jehovah sa si u tu. Na dee gaandi dee u abi nasö di un mëni wooko di u ta du da Gadu, hën ta mbei a feni u u bunu. Ma a ta feni u u bunu, te u ta hoi dou. Nöö hii u tuu sa hoi dou, aluwasi un mëni jaa u abi, aluwasi fa soni dë da u, nasö aluwasi un pei köni u abi. I ta hoi dou nöunöu hii fa wan tesi ta miti ö? Wë ee sö soni dë, nöö i sa dë seiki taa Gadu ta feni i u bunu. Te u sabi taa Gadu ta feni u bunu, nöö di soni dë sa heepi u gaanfa seei. A sa mbei u ko dë seiki taa woo feni di soni di a paamusi u.

U KO TA MÖÖN BIIBI TAA WOO FENI DI SONI DI GADU PAAMUSI U

15. Un woto soni Paulosu bi taki, nöö faandi mbei di soni dë sa taanga u fusutan da so sëmbë?

¹⁵ Leti kumafa Paulosu bi taki, te u ta hoi dou te tesi ta miti u, nöö Jehovah ta feni u u bunu. Luku andi Paulosu bi taki baka di dë. A bi taki taa: „Te u abi degihati, nöö woo ko möön bumbuu sëmbë. Nöö te u dë bumbuu sëmbë kaa, nöö wa o dë pantapanta, biga woo ta biibi nöömö taa Gadu o du kumafa a bi taki. Nöö an o dë fuu panta möönsö e, dee sëmbë, taa di fa u ta biibi ën o dë u sösö” (Lom. 5:4, 5). Di soni aki sa taanga u fusutan da so sëmbë. Faandi mbei u taki sö? Wë u di Paulosu bi taki a fesi kaa taa dee Keesitu sëmbë u Loomë bi ta wakiti u de feni di soni di Gadu bi paamusi de, leti kumafa a sikifi a Loomë 5:2. Di soni dë da ’di waiti u Gadu di Gadu bi kë u de feni’. Fëën mbei so sëmbë sa hakisi deseei taa: ’Wë ee dee Keesitu sëmbë dë bi ta wakiti u de feni di soni di Gadu bi paamusi de kaa, nöö faandi mbei Paulosu bi toona taki soni fëën möön?”

16. Unfa wan sëmbë ta bigi ko dë seiki taa a o feni dee soni dee Gadu paamusi u? (Luku dee peentje tu.)

¹⁶ U sa fusutan di soni di Paulosu bi kë taki, te u hoi a pakisei taa u sa ko ta möön biibi dee soni dee Gadu paamusi u. Buta pakisei a di soni aki: I ta mëni jeti di i bi jei soni u di bunu buka u di fosu pasi ö? Wë kandë i bi wai seei di i ko sabi taa sëmbë o libi u teego a wan paladëisi a goonliba aki, ma kandë a di ten dë ja bi kaba dë seiki taa di soni dë bi o sa pasa. Ma di i bi bigi lei soni u Jehovah ku dee soni dee a paamusi u a di Bëibel, hën i bi ko dë möön seiki taa di soni dë o pasa tuutuu.

17. Unfa i ta ko möön dë seiki u dee soni dee Gadu paamusi i baka te i buta u libi a nëën maun, nöö i dopu?

¹⁷ Bakaten i bi buta i libi a Gadu maun, hën i dopu. Boiti di dë, i bi ta ko dë gaangaan sëmbë a di biibi, u di i bi ta lei soni u Bëibel go dou. Di soni dë bi mbei taa i bi ko ta möön dë seiki taa di soni di Gadu paamusi u o pasa tuutuu. (Heb. 5:13–6:1). A kan taa soni bi waka da i kumafa a sikifi a Loomë 5:2-4. Sömëni soni bi miti i, ma i bi hoi dou, nöö i bi si taa Gadu bi dë ku i. U di i dë seiki taa Gadu ta feni i u bunu, mbei nöunöu i ko ta möön biibi taa joo feni dee soni dee a paamusi u. I ko möön dë seiki fëën, nöö di soni dë ta dë u si a di fasi fa i ta libi. A ta dë u si a di fasi fa i ko ta libi ku dee sëmbë fii, a dee soni dee i ta du, söseei a di fasi fa i ta wooko ku di ten fii.

18. Andi Gadu bi mbei Paulosu taki u mbei u dë seiki taa woo feni dee soni dee a paamusi u?

¹⁸ Apösutu Paulosu bi taki wan woto fanöudu soni tu, di nama ku di soni di Gadu paamusi i, u di a ta feni i u bunu. A bi taki wan soni u mbei i dë seiki taa joo feni di soni di Gadu paamusi i. Faandi mbei i sa dë sö seiki fëën. Gadu bi mbei Paulosu taki taa: „An o dë fuu panta möönsö e, dee sëmbë, taa di fa u ta biibi ën o dë u sösö. Biga u sabi fa Gadu lobi u tjika. Di santa jeje fëën di i si a manda ko da u aki, hën ta mbei u ta fii di gaan lobi fëën taanga seei a u hati” (Lom. 5:5). Te a hia soni dë di mbei i sa dë seiki taa joo feni di soni di Jehovah paamusi i.

19. Fuun soni i sa dë seiki te a nama ku di soni di Gadu paamusi i?

¹⁹ Kai pakisei a di soni di Jehovah bi paamusi Abahamu, söseei a di fa Gadu bi feni ën u bunu, te a ko ta si ën kuma mati fëën. Abahamu an bi wakiti u sösö. Di Bëibel ta taki taa: „Abahamu hoi pasensi ta luku di soni nöömö di Gadu bi paamusi ën, teefa a ko feni ën” (Heb. 6:15; 11:9, 18; Lom. 4:20-22). U sa dë seiki taa an bi hati ën taa a wakiti. Wë sö nöö iseei sa dë seiki taa ee i hoi iseei a Jehovah, nöö joo feni di soni di a paamusi i nöömö. Joo feni ën tuutuu. Di soni dë musu mbei i ta wai, biga ja o wakiti u sösö! (Lom. 12:12) Paulosu bi taki taa: „Be di Gadu di ta buta sö wan gaan biibi a u hati fuu unu hati ku piizii, ku kötöhati, fa i si un ta futoou ën dë. Nöö di santa jeje fëën o heepi unu fuun fika ta mëni nöömö taa Gadu o du dee soni dee a bi paamusi.”​—Lom. 15:13.