I ta buta pakisei a dee soni dee Jesosi bi taki ö?

1. Andi Jesosi o du abiti möön?

U TA libi a wan apaiti pisiten! Abiti möön Jesosi o kuutu hii sëmbë a goonliba. Jesosi bi taki unfa soni bi o dë ufö di ten dou ka a bi o ko kuutu sëmbë. A bi da dee bakama fëën wan „maaka” di bi o heepi de u de sa sabi taa a ko, söseei taa „di kaba u di goonliba aki zuntu” (Mat. 24:3). Di tjabukama woto aki sikifi a Mateosi kapitë 24 ku 25, söseei a dë u feni a dee woto dee sikifi a Maikusi kapitë 13, ku Lukasi kapitë 21.

2. Andi woo luku a di woto aki, nöö unfa di soni aki o heepi u?

² Jesosi bi konda dii woto u heepi u fuu sa dë seekaseeka ta wakiti di ten di a o toona ko. Dee woto aki da di u dee sikapu ku dee kaabita, di u dee köni ku dee don wëndjë mujëë mii, ku di u dee talënti. Hiniwan u dee woto aki ta heepi u fuu ko fusutan taa de o kuutu wan sëmbë a di fasi fa a ta du soni. A di woto aki, woo taki u dee dii woto aki, nöö woo luku andi u sa lei a de. Di fosu woto di woo luku da di u dee sikapu ku dee kaabita.

DEE SIKAPU KU DEE KAABITA

3. Na un ten Jesosi o kuutu sëmbë?

³ Jesosi bi lei a di woto u dee sikapu ku dee kaabita unfa a o kuutu dee sëmbë dee bi feni di okasi u haika di bunu buka, söseei dee bi heepi dee salufu baaa fëën (Mat. 25:31-46). Kölö sö ufö Amagedon bigi, nöö a o taki ee de dë kuma sikapu, nasö kaabita a di pisiten u di „gaan fuka” (Mat. 24:21). Jesosi o paati dee sëmbë dee bi ta heepi dee salufu bakama fëën, ku dee sëmbë dee an bi ta heepi de, leti kumafa wan sikapuma ta paati dee sikapu ku dee kaabita fëën.

4. Faandi mbei u sa dë seiki taa Jesosi o kuutu sëmbë a wan leti fasi te u luku Jesaaja 11:3, 4? (Luku di peentje u tu.)

⁴ Di Bëibel ta taki taa te Jesosi ta kuutu da Jehovah, nöö hii juu a ta du ën a wan leti fasi. (Lesi Jesaaja 11:3, 4.) A o luku andi sëmbë ta du, unfa de ta pakisei, söseei andi de ta taki. Boiti di dë, a o luku unfa de ta libi ku dee salufu baaa ku sisa fëën (Mat. 12:36, 37; 25:40). Jesosi o sabi ambë bi ta heepi dee baaa fëën ku di wooko di de ta du.a Wan u dee möön bunu fasi fa dee sëmbë dee dë kuma sikapu sa heepi dee baaa fëën, da te de ta du di peleikiwooko. A o si dee sëmbë dee ta heepi a di fasi aki kuma sëmbë di „ta libi bunu a Gadu wojo”, söseei „de o feni di libi u teego” a goonliba aki (Mat. 25:46; Ako. 7:16, 17). Wan gaan bunu seei de o feni aki! Te i hoi dou a di pisiten u di gaan fuka, söseei baka di gaan fuka, nöö a sö wan fasi di në fii o fika sikifisikifi „a di Buku u Libi”.​—Ako. 20:15.

5. Andi woo lei a di woto u dee sikapu ku dee kaabita, nöö un sëmbë sa feni wini fëën?

⁵ Lei taa i abi biibi, söseei taa i ta hoi iseei a Jehovah go dou. Jesosi bi möön buta pakisei a dee sëmbë dee o libi u teego a goonliba aki, di a bi ta da di woto u dee sikapu ku dee kaabita. Dee sëmbë dë ta lei taa de abi biibi, u di de ta du di peleikiwooko. Ma na di dë nöö, de ta mbei dee salufuwan dee Jesosi buta a wooko tii de (Mat. 24:45). Ma dee salufuwan seei musu buta pakisei a di woto u dee sikapu ku dee kaabita tu. Faandi mbei? Wë u di Jesosi ta luku andi de ta du, unfa de ta pakisei, söseei andi de ta taki. De seei musu lei taa de abi biibi tu. Jesosi bi taki u tu woto tu di ta lei unfa dee salufuwan musu ta du soni ku köni tjika. Dee woto aki sikifi a Mateosi kapitë 25 tu. Wë nöunöu boo buta pakisei a di woto u dee köni ku dee don wëndjë mujëë mii.

DEE KÖNI KU DEE DON WËNDJË MUJËË MII

6. Unfa dee feifi wëndjë mujëë mii bi lei taa de köni? (Mateosi 25:6-10)

⁶ A di woto u dee köni ku dee don wëndjë mujëë mii, Jesosi bi taki u teni wëndjë mujëë mii di bi musu go miti wan tööu womi (Mat. 25:1-4). Hii de tuu bi kë dë makandi ku di tööu womi a di tööu wosu. Jesosi bi taki taa feifi u de bi „don”, nöö feifi u de bi „köni”. Dee köni wan bi dë seekaseeka, söseei de bi dë setiseti ta wakiti. De bi dë kabakaba u wakiti di tööu womi, aluwasi ee a bi ko dou a gaan ndeti. Fëën mbei de bi tja lampu u de bi sa si limbo a ndeti. De bi tja oli apaiti tu, ee a bi o ko dë taa di tööu womi bi ko möön lati. Awa, de bi seeka soni a fesi sö taa dee lampu u de an tapa. (Lesi Mateosi 25:6-10.) Di di tööu womi dou, hën dee köni wëndjë mujëë mii go ku ën a di tööu wosu. Wë sö nöö dee salufuwan dee dë setiseti ta wakiti, söseei dee ta hoi deseei a Jehovah u te Keesitu toona ko, o feni di paka u de. De o dë makandi ku Jesosi, di tööu womi, a di Könuköndë fëën a liba alab (Ako. 7:1-3). Wë nöö andi bi pasa ku dee feifi don wëndjë mujëë mii?

7. Andi pasa ku dee don wëndjë mujëë mii, nöö faandi mbei di soni dë bi pasa ku de?

⁷ Dee don wëndjë mujëë mii an bi dë seekaseeka di di tööu womi dou. Dee lampu u de bi dë u tapa, nöö de an bi tja oli. Di de jei taa an bi o tei longi möön ufö di tööu womi dou, hën a bi ko dë u de kule go a wënkë go bai oli. Fëën mbei de an bi sai dë di di tööu womi dou. A di pisiten dë, „hën di womi ko miti ku de feifi mujëë mii dee bi fika dë, nöö hën de tjëën go a di tööu wosu. Nöö di de go dou, hën de tapa döö gbalai söötö” (Mat. 25:10). Baka di dee don wëndjë mujëë ko dou u de denda go, hën di tööu womi piki de taa: „Un go kumutu dë e! Ma sabi unu seei!” (Mat. 25:11, 12) Dee wëndjë mujëë mii aki an bi waka seekaseeka tjika, u de bi sa wakiti u te di tööu womi ko dou. Andi dee salufuwan sa lei a di woto aki?

8-9. Andi dee salufuwan sa lei a di woto u dee wëndjë mujëë mii? (Luku di peentje tu.)

⁸ Lei taa i dë seekaseeka, söseei taa i dë setiseti ta wakiti. Jesosi an bi kë lei taa tu kulupu salufuwan bi o dë, söseei taa wan u dee kulupu bi o dë seekaseeka ta wakiti u te di kaba dou, nöö di wotowan an bi o dë seekaseeka. Ma a bi ta lei andi bi o pasa ku dee salufuwan ee de an dë seekaseeka ta wakiti u te di kaba dou. Ee de an dë seekaseeka, nöö de an o feni di paka u de (Joh. 14:3, 4). Di soni aki an dë wan pëëpëë soni! Aluwasi ee woo libi a liba ala nasö a goonliba aki, tökuseei hii u tuu musu buta pakisei a di woto u dee wëndjë mujëë mii. Hii u tuu musu ta du soni ku köni, söseei u musu dë kabakaba u hoi dou u te di kaba dou.​—Mat. 24:13.

⁹ Baka di Jesosi bi taki u dee wëndjë mujëë mii u lei u unfa a dë fanöudu tjika fuu ta du soni ku köni, söseei fuu ta dë seekaseeka, hën a bi da di woto u dee talënti. Di woto aki ta lei u unfa a dë fanöudu tjika fuu ta wooko taanga.

DEE TALËNTI

10. Unfa dee tu futuboi bi lei taa de bi hoi deseei a di masa u de? (Mateosi 25:19-23)

¹⁰ A di woto u dee talënti, Jesosi bi taki u tu futuboi di bi hoi deseei a di masa u de, ku wan woto futuboi di an bi hoi hënseei a di masa fëën (Mat. 25:14-18). Dee tu futuboi bi wooko taanga u mbei möön hia möni da di masa u de. Ufö di masa u de go a woto köndë, hën a bi da hiniwan u de talënti. A bi da de gaan hia möni seei. Dee tu futuboi dee bi hoi deseei a di masa u de bi wooko taanga, söseei de bi wooko ku di möni a wan köni fasi. Fëën mbei di di masa u de bi ko dou, de bi sa dëën tu toon möön hia u di möni di a bi da de. Di masa u de bi gafa de seei. Dee tu futuboi ’tuu bi sa wai makandi’ ku di masa u de. (Lesi Mateosi 25:19-23.) Ma andi di u dii futuboi bi du ku di möni di hën masa bi dëën?

11. Andi bi pasa ku di saafu di bi „malëngë”, nöö faandi mbei di soni dë bi pasa ku ën?

¹¹ Di u dii futuboi bi feni wan talënti, ma a bi „malëngë”. Di masa bi dë ku di mëni taa a bi wooko a wan köni fasi ku di talënti fëën. Ma a bi bei di talënti buta a goon basu. Di di masa toona ko, hën a dëën di seei talënti baka. Boiti di dë, di futuboi dë an bi abi bumbuu manii. Ka faa bi hakisi di masa fëën paadon u di an bi wooko ku di möni fëën u mbei a ko möön hia, hën a bi taki taa di masa fëën da wan sëmbë di „hogi”. Di masa fëën an bi wai ku ën seei. Fëën mbei a tei di talënti puu nëën maun da woto sëmbë, hën a jakëën puu nëën wosu.​—Mat. 25:24, 26-30.

12. Ku ambë u sa tei dee futuboi dee hoi deseei a di masa u de maaka a di ten aki?

¹² Dee tu futuboi dee bi hoi deseei a di masa u de, da dee salufuwan dee ta hoi dou. Jesosi, di Masa u de, ta kai de u de „wai makandi” ku ën. De feni di paka u de a liba ala. Di paka u de da di fosu wekibaka u dëdë sëmbë (Mat. 25:21, 23; Ako. 20:5). Boiti di dë, di fasi fa soni bi waka da di malëngë futuboi ta lei dee salufuwan wan soni. Unfa sö?

13-14. Andi dee salufuwan sa lei a di woto u dee talënti? (Luku di peentje tu.)

¹³ Lei taa i ta wooko taanga. Jesosi an bi kë lei taa dee salufuwan bi o ko malëngë, di a konda di woto u dee talënti, ku di u dee wëndjë mujëë mii. Ma a bi ta lei andi o pasa ku de, ee de an ta mbei möiti ta wooko fajafaja möön. De an o sa dë seiki möön taa Gadu kai de, söseei de an o da de pasi möön u go a di Könuköndë a liba ala.​—2 Pet. 1:10.

¹⁴ Di woto u Jesosi di ta taki u dee talënti, ku di u dee wëndjë mujëë mii ta lei u limbolimbo taa hii dee salufuwan musu dë seekaseeka ta wakiti, de musu ta du soni ku köni, söseei de musu ta wooko taanga. Ma Jesosi bi taki woto soni u lei dee salufuwan wan soni ö? Wë aai! Di soni di a bi taki sikifi a Mateosi 24:40, 41.

AMBË DE O TEI „TJA GO”?

15-16. Unfa Mateosi 24:40, 41 ta heepi dee salufuwan u si unfa a dë fanöudu tjika u de dë setiseti ta wakiti?

¹⁵ Ufö Jesosi konda dee dii woto dee u taki u de, nöö a bi taki u di lasiti kuutu di de o kuutu dee salufuwan. Di kuutu aki o lei ambë de o tei tja go a liba ala. A bi taki soni u tu womi di bi ta wooko a goon dendu, ku tu mujëë di bi ta puu fania. A bi ta djei kuma dee tu womi bi ta du di seei wooko, söseei taa dee tu mujëë bi ta du di seei wooko. Ma Jesosi bi taki taa „Gadu o tei wan u de tja go, nöö a disa di wotowan naandë”. (Lesi Mateosi 24:40, 41.) Baka di dë, hën a piki dee bakama fëën taa: ’Un dë setiseti ta mëni mi e. Biga wan o sabi na un juu di Masa fuunu aki o toona ko a unu’ (Mat. 24:42). Jesosi bi taki sö wan pei soni tu, baka di a bi konda di woto u dee wëndjë mujëë mii (Mat. 25:13). A dë sö taa dee woto aki nama ku deseei ö? Wë, a ta djei sö. Dee salufuwan dee hoi deseei a Jehovah, de Jesosi „o tei tja go” a di Könuköndë a liba ala.​—Joh. 14:3.

¹⁶ Lei taa i dë setiseti ta wakiti. Hiniwan salufuwan di na dë setiseti ta wakiti, an o dë a di kulupu u dee sëmbë u Gadu di a „hai tja ko buta a wan kamian” (Mat. 24:31). Di soni aki ta heepi u fuu fusutan taa hii dee sëmbë u Gadu tuu musu ta hoi dee soni dee Jesosi bi taki aki a pakisei, aluwasi ee de o libi a liba ala nasö a goonliba aki. De musu dë setiseti ta wakiti, söseei de musu hoi deseei a Jehovah go dou.

17. Faandi mbei an musu toobi u te u ta si taa Jehovah ta salufu sëmbë a di ten fuu aki?

¹⁷ U sabi taa hii soni di Jehovah ta du, a ta du ën a wan leti fasi. Wa ta booko u hedi ee Jehovah ta salufu sëmbë di ta hoi deseei nëën a di ten fuu aki.c U ta mëni di soni di Jesosi bi taki u dee wookoma, dee bi bigi wooko a 5 juu sapate a di doloifi goon (Mat. 20:1-16). Dee wookoma di de bi kai u go wooko a di goon a kaba u di daka bi kisi di seei möni di dee wookoma dee bi bigi wooko sensi di mamate bi kisi. Sö nöö a dë ku dee salufuwan tu. Aluwasi na u ten Jehovah salufu de, tökuseei de o feni di seei paka ee de hoi deseei nëën go dou.

BUTA PAKISEI A DEE SONI DEE JESOSI BI TAKI

18-19. Andi u lei a dee woto dee u taki u de aki?

¹⁸ Andi u luku a di woto aki? Di woto u dee sikapu ku dee kaabita ta heepi dee sëmbë dee o libi u teego a goonliba aki, u de fusutan unfa a dë fanöudu tjika u de hoi deseei a Jehovah go dou nöunöu aki, söseei a di pisiten u di gaan fuka. A di ten di ta ko, Jesosi o si dee sëmbë dee ta hoi deseei a Jehovah kuma sëmbë di fiti u feni „di libi u teego”.​—Mat. 25:46.

¹⁹ U bi taki u tu oto woto di dee salufuwan sa lei soni a de. A di woto u dee köni ku dee don wëndjë mujëë mii, feifi u de bi lei taa de köni. De bi dë seekaseeka u wakiti di tööu womi aluwasi un longi a bi o tei. Ma dee don wan an bi waka seekaseeka. Fëën mbei di tööu womi an bi kë u de go a di tööu wosu. Wë sö nöö useei musu dë kabakaba u wakiti u te Jesosi ko poi di hogi goonliba aki, aluwasi u longi a o tei. Boiti di dë, a di woto u dee talënti u bi taki u dee tu futuboi dee bi ta wooko taanga. De bi wooko taanga di di masa u de an bi sai dë, nöö a bi wai ku de seei. Ma a bi jaka di futuboi di bi malëngë. Andi u ta lei? U musu wooko taanga da Jehovah u te di kaba dou. Te u kaba fëën, u bi taki unfa dee salufuwan musu ta dë setiseti ta wakiti, sö taa Jesosi sa „tei de tja go” a di Könuköndë a liba ala. De dë ta wakiti di ten di de o „hai de tja ko” a Jesosi a liba ala. Baka di feti u Amagedon, nöö de o ko dë di tööu mujëë u Jesosi, di Sikapu Mii.​—2 Tes. 2:1; Ako. 19:9.

20. Andi Jehovah o du da dee sëmbë dee ta buta pakisei a dee soni dee Jesosi bi taki?

²⁰ Di ten di Jesosi o kuutu sëmbë o dou abiti möön, ma wa musu fëëë. Ee u hoi useei go dou, nöö di Tata fuu a liba ala, di lobi u seei, o da u „di gaan kaakiti” fëën sö taa u ’sa pasa . . . go taanpu a [Jesosi] fesi söndö fëëë’ (2 Kol. 4:7; Luk. 21:36). Aluwasi ee woo libi a liba ala nasö a goonliba aki, tökuseei u sa mbei di Tata fuu wai ku u, te u ta buta pakisei a dee soni dee Jesosi bi taki. U di Jehovah abi bunuhati, mbei dee në fuu „o sikifi a di buku” fuu feni di libi u teego.​—Dan. 12:1; Ako. 3:5.