I bi sabi di soni aki ö?

Unfa u du sabi taa poku bi dë wan gaan fanöudu soni da dee Isaëli sëmbë?

POKU bi dë wan gaan fanöudu soni a di libi u dee Isaëli sëmbë. Sömëni pasi di Bëibel ta taki u sëmbë di ta pëë poku nasö di ta kanda. Wan gaan pisi u di Bëibel ta taki u soni di nama ku kanda. Dee buku Psalöm, Kanda u Salumon ku Këëkanda da kanda di sëmbë bi sikifi u de bi ta kanda. Wan buku di ta taki soni fu awooten, ta taki taa di Bëibel ta lei gbelingbelin taa poku bi dë wan fanöudu soni a sömëni u dee soni di dee Isaëli sëmbë bi ta du.

Sëmbë bi ta pëë poku hiniwan daka. Dee Isaëli sëmbë bi ta pëë poku u konda fa de bi ta fii (Jes. 30:29). Dee mujëë bi ta pëë wan poku soni de ta kai tamboerijn, de bi ta kanda ku piizii ta baja te de bi buta wan njunjun könu, te dee sodati bi wini wan feti, söseei te de bi ta abi piizii di nama ku di dini di de bi ta dini Gadu (Kuutm. 11:34; 1 Sam. 18:6, 7; 1 Kön. 1:39, 40). Dee Isaëli sëmbë bi ta kanda tu, u lei fa de bi ta fii te wan sëmbë bi lasi libi (2 Klon. 35:25). A dë gbelingbelin u si taa dee Isaëli sëmbë bi lobi poku gaanfa seei.

Dee könu u Isaëli bi lobi poku. Dee könu u Isaëli bi lo’ u haika poku. Könu Saulosu bi kai Dafiti ko a di könu wosu fëën, faa bi ko ta pëë poku dëën (1 Sam. 16:18, 23). Baka di Dafiti seei bi toon könu, hën wë hënseei mbei poku lai. A bi ta sikifi wanlö suti kanda, söseei a bi seeka soni u sëmbë bi sa ta pëë poku ta kanda a di Wosu u Jehovah (2 Klon. 7:6; Amös. 6:5). Könu Salumon bi abi womi ku mujëë sëmbë di bi ta kanda dëën a di könu wosu fëën.​—Peleik. 2:8.

Dee Isaëli sëmbë bi ta pëë poku u dini Jehovah. Söwan 4000 womi bi ta kanda a di Wosu u Gadu a Jelusalen (1 Klon. 23:5). De bi ta pëë peipei poku lai, kuma genge, benta, söseei de bi ta böö tutu (2 Klon. 5:12). Ma na de wanwan nöö bi ta pëë poku ta kanda da Jehovah te de bi ta dini ën. Sömëni Isaëli sëmbë bi ta kanda a pasi te de bi nango a dee gaan piizii a Jelusalen. De bi ta kai dee kanda aki dee kanda u dee sëmbë dee ta subi go a di foto (Ps. 120–134). Kumafa dee soni di dee Dju bi sikifi ta taki, nöö dee Isaëli sëmbë bi ta kanda so u dee Psalöma te de bi ta njan a di Pasika piizii.

A di ten aki seei poku dë wan gaan fanöudu soni da dee sëmbë u Jehovah tu (Jak. 5:13). U ta kanda da Jehovah u gafëën (Ef. 5:19). U ta fii taa u ku dee baaa ku dee sisa dë wan, te u ta kanda makandi ku de da Jehovah (Kol. 3:16). Dee kanda dee u ta kanda ta da u kötöhati te soni ta taanga da u (Tjab. 16:25). Poku dë wan soni di u sa tei u lei Jehovah fa u ta biibi ën tjika, söseei fa u lobi ën tjika.