Andi u ta lei a di lusupaima?

1. Faandi mbei a bunu fuu ta dë hiniwan jaa a di komakandi di u ta hoi u mëni di dëdë u Jesosi?

A MUSU u dë taa i ta si di lusupaima kuma wan dii kado di Jehovah da u! (2 Kol. 9:15) U di Jesosi ko dëdë paka paima da u, mbei i ku Jehovah Gadu sa dë mati. Boiti di dë, i sa feni di libi u teego. Wë a fiti seei fuu ta da Jehovah tangi u di a paka di lusupaima da u! U di a lobi u, mbei a pakëën da u! (Lom. 5:8) U di Jesosi bi kë fuu ta lei hii juu taa u ta tei di lusupaima u bigi, mbei a bi seti soni fuu sa ta mëni di dëdë fëën hiniwan jaa.​—Luk. 22:19, 20.

2. Andi woo luku a di woto aki?

² Di jaa aki, woo mëni di dëdë u Jesosi a sata 12 u piki-deewei-liba u 2025. A musu dë sö taa hiniwan fuu ta seeka soni fuu go mëni ën. A di pisiten di woo mëni di dëdë u Jesosi, woo feni wini seei ee u tei ten kai pakisei a di soni di Jehovah ku di Womi Mii fëën du da u. A di woto aki, woo luku andi di lusupaima ta lei u u Jehovah ku di Womi Mii fëën. A di woto di ta ko, woo luku unfa u sa feni wini u di lusupaima, söseei unfa u sa lei taa u ta tei ën u bigi.

ANDI DI LUSUPAIMA TA LEI U U JEHOVAH?

3. Unfa di dëdë u wan kodo womi bi sa mbei milionmilion sëmbë ko fii? (Luku di peentje tu.)

³ Di lusupaima ta lei u taa Jehovah ta du soni a wan leti fasi (Deto. 32:4). Unfa sö? Wë buta pakisei a di soni aki: U di Adam pasa Gadu buka, mbei u ko abi zöndu, nöö di zöndu ta mbei u ta dëdë (Lom. 5:12). U di Jehovah bi kë fuu kumutu a zöndu ku dëdë basu, mbei a seti soni u Jesosi bi sa paka di lusupaima da u. Ma unfa di dëdë u wan kodo womi di an bi abi zöndu, bi o sa mbei milionmilion sëmbë ko fii? Apösutu Paulosu ta kondëën da u. A taa: „Leti kumafa di wan kodo sëmbë dë [Adam] bi pasa Gadu buka te a mbei hii sëmbë ko takulibima a Gadu wojo, nöö söseei di wan kodo Sëmbë aki [Jesosi] piki Gadu buka, te a mbei sömëni sëmbë ko bumbuu sëmbë a Gadu wojo” (Lom. 5:19; 1 Tim. 2:6). Hën da ee fuu taki ën, nöö wan kodo womi di an bi abi zöndu, hën bi pasa Gadu buka, hën a mbei hii sëmbë ko dë a zöndu ku dëdë basu. Nöö fëën mbei wan kodo womi di an bi abi zöndu, di bi piki Gadu buka, bi tjika u mbei u ko fii.

4. Faandi mbei Jehovah an bi sa da dee bakamii u Adam dee bi abi bunuhati pasi, u de libi u teego nöö a kaba?

⁴ A dë sö taa Jesosi bi musu u dëdë sö taa u bi sa ko fii ö? Jehovah an bi sa da dee bakamii u Adam dee bi abi bunuhati pasi, u de libi u teego nöö a kaba nö? Wë u di u dë zöndu libisëmbë, mbei u sa si kuma di fasi dë bi o dë wan bunu fasi u seeka di soni. Ma Jehovah ta du soni a wan leti fasi. U di Jehovah ta du soni a wan leti fasi, mbei nöiti a bi o sa du kuma Adam an bi du wan gaan zöndu.

5. Faandi mbei u sa dë seiki taa hii juu Jehovah o ta du soni a wan leti fasi?

⁵ Ma ee Jehovah bi disa di leti libi fëën a wan së, nöö a disa dee bakamii u Adam dee bi abi bunuhati u de libi u teego wë? Wë di soni dë bi o sa mbei sëmbë ta hakisi deseei ee Gadu bi o du soni a di lö fasi dë a woto soni tu. Kandë sëmbë bi o sa ta hakisi deseei ee a bi o du dee soni dee a paamusi u tuutuu. Ma an dë fuu ta hakisi useei di soni dë. Jehovah du soni a wan leti fasi, hii fa a ko dë taa di lobi Womi Mii fëën seei bi musu dëdë. Fëën mbei u sa dë seiki taa hii juu a o ta du soni wan leti fasi.

6. Andi da wan fasi fa di lusupaima ta heepi u fuu ko fusutan taa Jehovah lo’ sëmbë? (1 Johanisi 4:9, 10)

⁶ A dë sö tuu taa di lusupaima ta heepi u fuu fusutan taa Jehovah ta du soni a wan leti fasi, ma a ta möön heepi u fuu ko fusutan unfa a lobi sëmbë tjika. (Joh. 3:16; lesi 1 Johanisi 4:9, 10.) Di lusupaima ta heepi u fuu ko fusutan taa Jehovah an kë fuu libi u teego nöö a kaba, ma a kë fuu ko dë sëmbë u di wosudendu fëën tu. Buta pakisei a di soni aki: Di Adam du zöndu, hën Jehovah puu ën fu an dë sëmbë u di wosudendu fëën möön. Di soni dë mbei taa useei an dë sëmbë u di wosudendu u Jehovah tu. Ma di lusupaima mbei taa Jehovah ta da u paadon u dee zöndu fuu, nöö te u kaba fëën, nöö Jehovah o mbei hii sëmbë di ta biibi nëën, söseei di ta piki hën buka, ko dë sëmbë u di wosudendu fëën baka. Ma nöunöu kaa u ku Jehovah ku dee woto dinima fëën sa dë mati. Jehovah lobi u tuutuu!​—Lom. 5:10, 11.

7. Unfa di sitaafu di Jesosi tja, ta heepi u fuu fusutan unfa Jehovah lobi u tjika?

⁷ U sa fusutan möön bunu unfa Jehovah lobi u tjika, te u buta pakisei a di gaan soni di a bi musu du u paka di lusupaima. Saatan ta taki taa na wan dinima u Gadu o hoi deseei nëën te soni ta taanga da de. U di Jehovah bi kë lei taa na sö soni dë, mbei a bi da pasi u Jesosi tja sitaafu ufö a dëdë (Jöpu 2:1-5; 1 Pet. 2:21). Jehovah bi si di dee felantima u Jesosi bi ta mbei ën fa, di dee Loomë sodati bi ta wipi ën a wan hogihati fasi, söseei di de bi ta peka Jesosi a wan posu. A bi si tu fa di Womi Mi fëën bi dë ta tja sitaafu fu te a dëdë (Mat. 27:28-31, 39). Jehovah bi abi di makiti u mbei Jesosi ko fii solanga a bi kë. A bi sa du sö di dee sëmbë dee bi ta du ku Jesosi bi taki taa: „Wë nöö be Gadu heepi ën ee a lobi ën” (Mat. 27:42, 43). Ma ee Gadu bi du sö, nöö di lusupaima an bi o sa paka, nöö wa bi o sa dë ku di mëni taa woo abi wan bunu libi a di ten di ta ko. Fëën mbei Jehovah bi da pasi u di Womi Mii fëën tja sitaafu u tefa böö fëën koti.

8. A bi hati Jehovah di a bi si fa de bi ta kii di Womi Mii fëën u? Booko ën a piki möni. (Luku di peentje tu.)

⁸ Wa musu ta si kuma u di Gadu abi hii makiti, nöö hën da aan fii! Jehovah mbei u kumafa a dë. Nöö u di a mbei u ku fii, mbei u sa dë ku di mëni taa hënseei abi fii tu. Di Bëibel ta taki taa sëmbë bi du soni di bi „hati ën”, söseei di bi mbei a „fii tjali” (Ps. 78:40, 41). Buta pakisei tu a di woto u Abahamu ku Isaki. Gadu bi piki Abahamu faa kii di wan kodo womi mii fëën, nöö a tjumëën paka paima dëën (Ken. 22:9-12; Heb. 11:17-19). Pakisei nöö u sa pakisei unfa a bi hebi da Abahamu tjika, di a bi musu tjökö Isaki zalau kii ku faka. Wë nöö wa sa pena taki seei unfa Jehovah bi fii, di a bi ta si fa sëmbë di an bi abi biibi, bi ta kii di Womi Mii fëën a wan hogihati fasi!​—Luku di fëlön Teki na eksempre fu sma di ben abi bribi​—Abraham, Pisi 2. A dë a jw.org.

9. Andi Loomë 8:32, 38, 39 ta heepi i fii ko fusutan, u di fasi fa Jehovah lobi i ku dee woto dinima fëën tjika?

⁹ Di lusupaima ta lei u taa sëmbë an dë di lobi u kuma Jehovah, na dee famii fuu ku dee mati fuu seei. (Lesi Loomë 8:32, 38, 39.) U sa dë seiki taa Jehovah lobi u möön fa u lobi useei. I kë libi u teego u? Ja sa këën tjika kumafa Jehovah këën da i. I kë u Jehovah da i paadon u dee zöndu fii ö? Ja sa këën tjika kumafa Jehovah kë da i paadon u de. Di wan kodo soni di a ta hakisi u, hën da fuu tei di waiti kado di a ta da u. Nöö u sa du sö te u ta biibi ën, söseei te u ta piki hën buka a soni. Di lusupaima da wan soni di ta lei u tuutuu unfa Gadu lobi u tjika. Nöö a di njunjun goonliba, woo ko sabi möön soni seei u di fa Jehovah lobi u tjika.​—Peleik. 3:11.

ANDI DI LUSUPAIMA TA LEI U U JESOSI?

10. (a) Ku andi Jesosi bi ta booko hën hedi gaanfa seei di de bi o kii ën? (b) Unfa Jesosi bi lei taa soni Saatan bi ta mindi da Jehovah? (Luku di pisi „Di hoi di Jesosi bi hoi hënseei a Jehovah bi lei taa soni Saatan bi ta mindi da Jehovah”.)

¹⁰ Jesosi ta booko hën hedi gaanfa ku di në fëën Tata (Joh. 14:31). De bi o kuutu Jesosi taa a ta sösö Gadu, söseei taa a ta da sëmbë taanga u de hopo fia ku lanti, nöö a bi ta booko hën hedi gaanfa seei ku di poi di di soni dë bi sa poi di në fëën Tata. Fëën mbei a bi begi Gadu taa: „Ke Taata o, gaantangi mi begi i, di soni di i lai da mi u mi bebe aki, ee i sa puu ën da mi u ma bebëën nöö be i puu ën o” (Mat. 26:39). U di Jesosi bi hoi hënseei a Jehovah u tefa a dëdë, mbei a bi lei taa soni Saatan bi ta mindi da Jehovah.

11. Unfa Jesosi bi lei taa a lo’ sëmbë gaanfa? (Johanisi 13:1)

¹¹ Di lusupaima ta lei u tu taa Jesosi ta booko hën hedi gaanfa seei ku sëmbë, möönmöön ku dee bakama fëën. (Nöng. 8:31; lesi Johanisi 13:1.) Jesosi bi sabi taa so pisi u di diniwooko fëën bi o taanga seei, möönmöön di dëdë di a bi musu dëdë a wan hogihati fasi. Ma tökuseei an bi ko du diniwooko fëën a goonliba aki u di a bi musu u du ën, ma a bi ko du ën u di a lobi sëmbë tuutuu. Jesosi bi ta peleiki da sëmbë, ta lei de soni u Gadu ku hii hën hati. Söseei a bi ta heepi de tu. A di daka di a bi o dëdë seei, a bi tei ten wasi dee apösutu fëën futu, hën a konda sömëni soni da de u da de taanga ufö a dëdë (Joh. 13:12-15). Bakaten di Jesosi bi dë pekapeka a di posu, hën a bi tei pikisö ten u peleiki da wan hogiduma di bi dë nëën bandja, söseei u seeka soni u sëmbë bi sa ta luku hën mama go dou (Luk. 23:42, 43; Joh. 19:26, 27). Hën da na di dëdë di Jesosi dëdë da u nöö ta lei taa a lobi u gaanfa, ma hii di fasi fa a bi du soni a goonliba aki kaa.

12. Na un futu Jesosi ta du soni da u go dou?

¹² Hii fa a dë taa Jesosi dëdë ’wan pasi nöö u puu zöndu u nöömö’, tökuseei a ta du soni da u jeti (Lom. 6:10). Unfa sö? Wë a ta tei ten ta mbei möiti go dou fuu sa feni wini u di lusupaima. Buta pakisei a dee soni dee a ta du nöunöu. A dë Könu ku Gaan Mindima fuu, söseei a dë hedima u di kemeente (1 Kol. 15:25; Ef. 5:23; Heb. 2:17). Hën de da di wooko faa tja dee salufuwan ku dee gaan hia sëmbë ko a wan, nöö di wooko dë o kaba ufö di gaan fuka kabaa (Mat. 25:32; Maik. 13:27). Boiti di dë, a ta seeka soni tu u dee bakama fëën sa ta feni dee soni dee de abi fanöudu, u de sa abi wan taanga biibi go dou (Mat. 24:45). Nöö a di pisiten u di Dusu Jaa Tii fëën, a o ta heepi u jeti. Jehovah da u di Womi Mii fëën ku hii hën hati tuutuu!

NA DISA U LEI SONI MÖÖNSÖ

13. Unfa di kai di woo ta kai pakisei a soni, sa heepi u fuu ko ta möön fusutan unfa Gadu ku Keesitu lobi u tjika?

¹³ Ee i ta kai pakisei go dou a dee soni dee Jehovah Gadu ku Jesosi Keesitu du da u, nöö möönmöön joo ko ta si unfa de lobi u tjika. A di pisiten di woo mëni di dë u Jesosi, kandë i sa tei ten lesi wan u dee buku dee ta taki soni u di libi u Jesosi, nasö wantu u de. Na suku u lesi hia wan pasi poi. Ma tei i ten, nöö i mbei möiti fii ko möön fusutan faandi mbei u musu lobi Jehovah ku Jesosi. Baka di dë, nöö i konda dee soni dee i lei da wotowan.

14. Unfa di öndösuku di u ta öndösuku soni sa heepi u fuu ta lei möön soni u di lusupaima, ku woto lei jeti, te u luku Psalöm 119:97? (Luku di peentje tu.)

¹⁴ Ee i dë a di tuutuu lei sömëni jaa longi kaa, nöö i sa ta hakisi iseei ee njunjun soni dë di i sa feni lei jeti a dee soni kuma di lusupaima, di lobi u Gadu, ku di leti libi fëën. Ma fuu taki ën kumafa a dë, nöö wa sa kaba sabi soni u dee soni aki. Wë nöö andi i sa du? Mbei hii möiti fii sa feni wini te dou, u dee soni dee sikifi a dee buku fuu. Te i lesi wan pisi di ja ta kaba fusutan, nöö i go öndösuku soni. Nöö a di daka dendu, nöö i kai pakisei a dee soni dee i ko sabi. Kai pakisei tu a dee soni di de ta lei i u Jehovah, u di Womi Mii fëën, söseei u di lobi di de abi da i.​—Lesi Psalöm 119:97.

15. Faandi mbei wa musu disa u suku gudu a di Bëibel?

¹⁵ Na lasi hati ee na hii juu i ta ko sabi wan njunjun soni te i ta lesi di Bëibel, nasö te i ta öndösuku soni. U sa taki taa i dë kuma wan sëmbë di ta suku goutu. Dee sëmbë dee ta suku goutu ta puu sömëni juu longi nasö sömëni daka longi ta suku, ufö kandë de feni wan piki töin pisi goutu. Ma de an ta disa u suku, biga hiniwan piki pisi goutu da gaan gudu da de. Wë dee lei u Bëibel dii möön goutu! (Ps. 119:127; Nöng. 8:10) Fëën mbei hoi pasensi, nöö i ta lesi di Bëibel hiniwan daka go dou kumafa i guwenti.​—Ps. 1:2.

16. Unfa u sa djeesi Jehovah ku Jesosi?

¹⁶ Te i ta lei soni u Bëibel, nöö luku unfa i sa libi ku dee soni dee i lei. I sa djeesi Jehovah a di du di a ta du soni a wan leti fasi. I sa du sö te i ta mbei möiti fii ta libi a wan leti fasi ku wotowan. I sa djeesi Jesosi a di fasi fa a lobi hën Tata ku woto sëmbë. I sa du sö te i ta dë kabakaba u du soni kumafa Jehovah kë, söseei te i ta heepi wotowan, aluwasi di soni dë sa mbei libi ko möön taanga da i. Boiti di dë, i sa djeesi Jesosi te i ta konda soni u Jehovah da wotowan, sö taa deseei sa feni di okasi u feni wini u di kado di Jehovah da u.

17. Andi woo luku a di woto di ta ko?

¹⁷ Te u ta lei soni u di lusupaima go dou, nöö woo ko ta möön lobi Jehovah ku Jesosi. Di soni dë o mbei taa deseei o ko möön lobi u tu (Joh. 14:21; Jak. 4:8). Fëën mbei boo ta wooko ku hii dee soni dee Jehovah ta da u, fuu sa ta lei soni u di lusupaima go dou. A di woto di ko, woo taki u wantu fasi fa u sa feni wini u di lusupaima, söseei fa u sa lei Jehovah taa u ta tei ën u bigi taa a lobi u.