Un dee njönku baaa, un djeesi Maikusi ku Timoteo

1-2. Andi bi sa tapa Maikusi ku Timoteo u de an du möön soni u heepi wotowan?

UN DEE njönku baaa, un kë du möön soni da Jehovah, söseei un kë du möön soni u heepi dee sëmbë u di kemeente ka un dë u? Wë a musu u dë sö ta di soni dë un kë du. U ta wai seei u si taa te a hia njönku baaa dë kabakaba u heepi wotowan! (Ps. 110:3) Ma di soni dë an o dë wan kösökösö soni u du. I ta fëëë fii du möön soni da Jehovah u di ja sabi unfa soni o waka u? I bi piki nönö kaa di de bi da i wan wooko, u di i bi ta si kuma ja bi o sa du ën u? Wë ee sö soni dë da i, nöö u kë fii sabi taa sö a bi dë da so sëmbë tu.

² Sö soni bi dë da Maikusi ku Timoteo tu. Ma de an bi mbei fëëë, ku di sabi di de an bi sabi unfa soni bi o waka, tapa de u de heepi wotowan. A kan taa Maikusi bi ta dë ku hën mama a wan bumbuu waiti wosu, di de bi hakisi ën faa go ku apösutu Paulosu ku Banabasi a di fosu peleikiwooko waka u de (Tjab. 12:12, 13, 25). Maikusi bi disa di wosu dë, faa bi sa go du möön soni da Jehovah. Di fosu soni di a du, hën da a bi go a Antiokia. Baka di dë, hën a bi go ku Paulosu ku Banabasi a wanlö woto longi kamian (Tjab. 13:1-5). A kan tu taa Timoteo seei bi ta dë ku dee gaansëmbë fëën, di Paulosu bi hakisi ën faa ko ta du di peleikiwooko makandi ku ën. U di Timoteo bi njönku, söseei u di an bi abi öndöfeni wan bëtë, mbei a bi sa si kuma an bi o sa du di wooko. (Luku 1 Kolenti 16:10, 11 ku 1 Timoteo 4:12.) Ma a bi tei di wooko, hën a go ku Paulosu, hën Jehovah bi mbei a feni sömëni gaan bunu.​—Tjab. 16:3-5.

3. (a) Unfa Paulosu bi lobi Maikusi ku Timoteo tjika? (2 Timoteo 4:6, 9, 11) (Luku dee peentje tu.) (b) Un hakisi woo piki a di woto aki?

³ Maikusi ku Timoteo bi o ko abi öndöfeni, söseei de bi lei unfa de bi sa du gaangaan wooko a di kemeente di de bi njönku. Paulosu bi lobi dee njönku kijoo aki sö tee taa bakaten a bi kë u de ko dë nëën bandja, di a bi ko fusutan taa de bi o kii ën. (Lesi 2 Timoteo 4:6, 9, 11.) Un fasi Maikusi ku Timoteo bi abi, di bi mbei taa Paulosu bi ta kai de gaan soni? Unfa dee njönku baaa sa djeesi de a di fasi fa de bi ta du soni? Söseei unfa dee njönku baaa sa feni wini u dee soni dee Paulosu bi taki?

DË KABAKABA U HEEPI WOTOWAN KUMA MAIKUSI

4-5. Unfa Maikusi bi lei taa a bi dë kabakaba u heepi wotowan?

⁴ U ta heepi wotowan te u ta mbei möiti u du soni da de, aluwasi ee a ta taanga u du di soni dë. Maikusi da wan sëmbë di u sa djeesi a di heepi di a bi ta heepi wotowan. Di Paulosu an bi kë faa ko ku ën a di u tu sëndëlengi waka fëën, nöö a musu u dë sö taa di soni dë bi hati Maikusi, söseei taa a bi fii tjali (Tjab. 15:37, 38). Ma di soni dë an bi tapëën fu an heepi dee baaa ku dee sisa fëën möön.

⁵ Maikusi bi go heepi sëmbë a wan woto kamian ku Banabasi, di bi dë wan famii fëën. Söwan 11 jaa baka di dë, Maikusi bi dë wan u dee sëmbë di bi ta heepi Paulosu di a bi dë a dunguwosu a Loomë (Filem. 23, 24). Fuu taki ën, nöö Paulosu bi wai gaanfa seei taa Maikusi bi ta heepi ën. Fëën mbei a bi taki taa Maikusi bi ’ta dëën degihati seei’.​—Kol. 4:10, 11.

6. Unfa Maikusi bi feni wini, u di a bi ta nama ku Keesitu sëmbë di bi dë gaangaan sëmbë a di biibi? (Luku di pisi di ta taki u woto fanöudu soni.)

⁶ Maikusi bi feni wini u di a bi ta nama ku Keesitu sëmbë di bi dë gaangaan sëmbë a di biibi. Baka di a bi dë wan pisiten ku Paulosu a Loomë, hën a bi go miti Petuisi a Babilon. Hën ku Petuisi bi ko dë gaan mati sö tee taa Petuisi bi kai ën ’miii fëën’ (1 Pet. 5:13). A kan taa di Petuisi ku di njönku mati fëën aki bi ta wooko makandi, hën Petuisi bi konda sömëni soni u di libi ku di diniwooko u Jesosi dëën, nöö dee soni dë Maikusi bi sikifi bakaten buta a di buku di ta tja di në fëën.a

7. Unfa wan njönku baaa de kai Seung-Woo bi djeesi Maikusi a di fasi fa a bi ta du soni? (Luku di peentje tu.)

⁷ Maikusi bi ta dini Jehovah go dou, söseei a bi ta nama go dou ku baaa di bi dë gaangaan sëmbë a di biibi. Unfa i sa djeesi Maikusi? Wë ee ja bi feni wan gaandi di i bi ta suku a di kemeente, nöö hoi pasensi, nöö suku fasi go dou fii sa dini Jehovah, söseei fii sa heepi dee baaa ku dee sisa fii. Luku fa soni bi waka da wan baaa de kai Seung-Woo, di dë wan gaanwomi u kemeente nöunöu. Di a bi möön njönku, nöö a bi ta tei hënseei maaka ku woto njönku baaa. So u de bi feni gaandi a di kemeente ufö ën. Seung-Woo bi fii kuma dee baaa an bi ta buta mëni nëën, hën te u kaba fëën, hën a bi fan ku baaa di bi dë gaangaan sëmbë a di biibi. Wan gaanwomi bi piki ën faa ta du andi a sa du u heepi wotowan, aluwasi ee so juu sëmbë an ta si dee bunu soni dee a ta du. Di soni dë bi da Seung-Woo taanga, faa ta mbei möiti ta heepi dee baaa ku dee sisa dee bi ko gaandi kaa, ku dee sëmbë dee bi abi wagi fanöudu u go a komakandi. A bi taki taa: „Mi bi ko fusutan möön bunu andi da heepi wotowan tuutuu. Mi bi ko si unfa i ta dë waiwai tjika te i ta heepi wotowan a soni.”

LEI TAA I TA BOOKO I HEDI KU WOTOWAN KUMA TIMOTEO

8. Faandi mbei Paulosu bi hakisi Timoteo faa ko ta wooko makandi ku ën? (Filipi 2:19-22)

⁸ Paulosu bi abi baaa fanöudu di bi abi degihati, fëën ku de bi sa toona go a dee foto ka sëmbë bi du ku ën. Di fosu sëmbë di a bi hakisi u go ku ën da wan baaa di bi abi öndöfeni, de kai Silasi (Tjab. 15:22, 40). Bakaten, hën Paulosu bi hakisi Timoteo faa go ku ën tu. Faandi mbei Paulosu bi kë u Timoteo go ku ën? Wan u dee soni, hën da Timoteo bi abi wan bunu në a sëmbë (Tjab. 16:1, 2). Söseei a bi ta booko hën hedi ku sëmbë tuutuu.​—Lesi Filipi 2:19-22.

9. Unfa Timoteo bi lei taa a bi ta booko hën hedi tuutuu ku dee baaa ku dee sisa fëën?

⁹ Sensi di Timoteo bigi wooko makandi ku Paulosu kaa, hën a ta lei taa a bi ta booko hën hedi ku wotowan, möön faa a bi ta booko hën hedi ku hënseei. Fëën mbei Paulosu bi futoou ën, hën a disëën a Belia, faa bi sa da dee njunjun bakama u Jesosi taanga (Tjab. 17:13, 14). Wë a musu u dë sö taa a di pisiten dë, Timoteo bi lei sömëni soni a Silasi, u di hënseei bi fika a Belia tu. Ma bakaten Paulosu bi manda Timoteo go a Tesalonika hën wanwan, faa bi sa go da dee Keesitu sëmbë u di foto dë taanga (1 Tes. 3:2). A dee 15 jaa dee bi pasa baka di dë, Timoteo bi lei u ’këë makandi’ ku dee sëmbë dee bi ta këë. A sö wan fasi a bi ta lei hiniwan sëmbë di bi ta tja sitaafu taa a ta fii da de (Lom. 12:15; 2 Tim. 1:4). Unfa dee njönku baaa sa djeesi Timoteo?

10. Unfa wan baaa de kai Woo Jae, bi lei unfa a bi sa ko ta möön booko hën hedi ku wotowan?

¹⁰ Wan baaa de kai Woo Jae, bi lei unfa a bi sa ko ta möön booko hën hedi ku wotowan. Di Woo Jae bi dë wan njönku kijoo, nöö a bi ta taanga dëën faa ta da woto ku dee baaa ku dee sisa dee bi ko gaandi kaa. Fëën mbei te a bi dë a di Könuköndë zali, nöö a bi ta da de odi nöö, nöö a waka go fëën. Wan gaanwomi bi da Woo Jae taanga. A bi piki ën taa ee a kë bigi fan ku wan sëmbë a di kemeente, nöö a sa bigi konda da di sëmbë andi fëën a lobi. Di gaanwomi bi da Woo Jae taanga tu, faa ta kai pakisei a fesi luku ee andi di sëmbë o sa lobi. Woo Jae bi mbei möiti u du soni kumafa de bi piki ën. Nöunöu Woo Jae dë wan gaanwomi, nöö bi taki taa: „Nöunöu an ta taanga da mi sö möön u mi da woto ku sëmbë, aluwasi ee de njönku nasö de ko gaandi kaa. Mi wai taa mi ko ta fusutan möön bunu unfa soni dë da wotowan. Di soni dë bi heepi mi tuutuu u mi bi sa heepi dee baaa ku dee sisa u mi.”

11. Unfa dee njönku baaa sa ko sabi fa de sa ta buta mëni a wotowan a di kemeente ka de dë? (Luku di peentje tu.)

¹¹ Un dee njönku baaa, un sa ko sabi unfa un sa ta buta mëni a wotowan tu. Te un dë a komakandi, nöö a bunu fuun ta buta mëni a sëmbë, aluwasi ee de njönku nasö de ko gaandi kaa, söseei aluwasi ee de abi woto guwenti. Un sa ta hakisi de unfa a nango ku de, nöö baka di dë, nöö un haika bunu te de o fan. Di soni aki sa heepi i fii ko sabi unfa i sa heepi de. Kandë joo ko si taa wan baaa di ko gaandi kaa, ku hën mujëë, abi heepi fanöudu u de sa wooko ku di JW Library^® app. Nasö kandë i sa ko sabi taa de an mbei buka u peleiki makandi ku sëmbë. I bi o sa heepi dee lö baaa ku sisa aki u de ko sa’ u wooko ku dee tëlëfön u de u? Nasö i bi o sa mbei buka u peleiki makandi ku de u? Te i ta suku fasi u heepi wotowan, nöö joo dë wan sëmbë di wotowan sa djeesi a di kemeente.

I SA FENI WINI U DEE SONI DEE PAULOSU BI PIKI TIMOTEO

12. Unfa dee njönku baaa sa feni wini u dee soni dee Paulosu bi piki Timoteo?

¹² Paulosu bi piki Timoteo soni di bi o heepi ën a di libi, söseei a di dini di a bi ta dini Jehovah (1 Tim. 1:18; 2 Tim. 4:5). Un dee njönku baaa sa feni wini u dee soni dee Paulosu bi piki Timoteo tu. Unfa un sa feni wini u de? A bunu fuun lesi dee tu biifi dee Paulosu bi sikifi manda da Timoteo kuma unu a bi manda de da, nöö un luku unfa un sa libi ku dee soni dee a bi taki. Boo buta pakisei a wantu u dee soni dee a bi taki.

13. Andi o heepi u fuu sa ko ta möön hoi useei a Jehovah?

¹³ „I musu ta biinga ku i seei fii libi kumafa Gadu kë a hii futu” (1 Tim. 4:7b). Na un ten u sa taki taa wan sëmbë ta libi kumafa Gadu kë a hii futu? Wan sëmbë ta du sö te a ta hoi hënseei a Jehovah, ta du soni di ta kai ku ën. Ma u di wa ta sa’ u du soni a di lö fasi aki te de pai u, mbei u musu mbei möiti fuu sa ko ta du soni sö. Unfa u sa du ën? Di Giiki wöutu di de puu ko „i musu ta biinga ku i seei”, da wan wöutu di de bi lo’ u tei u taki unfa sëmbë bi ta mbei taanga möiti ta seeka deseei, te de bi o go fia pëë u de wini. Dee sëmbë aki bi musu sa’ u duwengi deseei a soni. Useei musu sa’ u duwengi useei a soni tu, fuu sa ko abi fasi di o heepi u fuu ko möön zuntu ku Jehovah.

14. Andi musu dë di soni di ta mbei u ta lesi di Bëibel? Konda wan woto.

¹⁴ A bunu fii ko abi di guwenti u ta lesi di Bëibel hiniwan daka. Söseei a bunu fii ta hoi a pakisei taa i ta lesi ën u di i kë ko möön zuntu ku Jehovah. Andi i sa lei a di miti di Jesosi bi miti wan kijoo di bi gudu? (Maik. 10:17-22) Di womi aki bi ta biibi taa Jesosi da di Mësiasi, ma an bi abi biibi nëën tjika faa toon bakama fëën. Hii fa soni bi dë sö, tökuseei Jesosi bi „lobi ën seei”. An ta bigi da i u si fa Jesosi bi fan ku di womi aki ö? Wë a dë gbelingbelin u si taa Jesosi bi kë u di womi aki du soni a wan köni fasi. Di lobi di Jesosi bi lobi di womi aki bi ta lei fa Jehovah bi lobi ën (Joh. 14:9). Te i ta kai pakisei a di woto aki, söseei a di fasi fa soni dë da i, nöö hakisi iseei taa: ’Andi mi musu du u mi sa ko möön zuntu ku Jehovah, söseei u mi sa heepi wotowan möön gaanfa?’

15. Faandi mbei wan njönku baaa musu ta buta mëni a di fasi fa a ta du soni? Konda wan woto. (1 Timoteo 4:12, 13)

¹⁵ „Libi a di fa u dee oto biibima tuu musu sa djeesi i.” (Lesi 1 Timoteo 4:12, 13.) Paulosu an bi da Timoteo taanga faa mbei möiti faa ko sa’ u lesi, söseei faa ko sa’ u lei sëmbë soni u Bëibel nöö a kaba. Ma a bi dëën taanga tu faa mbei möiti faa ko abi lobi, biibi, ku woto fasi jeti, söseei faa ta hoi hënseei limbolimbo da Gadu. Ma faandi mbei a bi piki ën dee soni aki? Biga di fasi fa wan sëmbë ta libi dë fanöudu möön dee soni dee a ta taki. Boo taa de hakisi i fii hoi wan taki di ta lei unfa a dë fanöudu tjika fuu ta peleiki fajafaja. Wë joo möön fii bunu u hoi di taki aki ee i dë wan fajafaja peleikima. Di fasi fa i ta du soni o mbei di fan fii dou sëmbë hati möön gaanfa.​—1 Tim. 3:13.

16. (a) Andi da feifi soni di dee njönku baaa sa du u de sa ko dë sëmbë di wotowan sa djeesi? (b) Unfa wan njönku baaa sa ko dë wan sëmbë di wotowan sa djeesi a ’di fasi fa a ta fan’?

¹⁶ A 1 Timoteo 4:12 Paulosu ta taki u feifi soni di wan njönku baaa sa du faa sa dë wan sëmbë di wotowan sa djeesi. Te joo lei soni u Bëibel, nöö a bi o bunu fii buta pakisei a dee feifi soni aki. Boo taa i kë du soni fii sa dë wan sëmbë di wotowan sa djeesi a „di fasi fa i ta fan”. Wë a bi o bunu fii pakisei luku unfa i sa fan, u dee fan fii sa ta da wotowan taanga. Ee i ku dee gaansëmbë fii ta dë a di wan wosu jeti, nöö kandë i sa ta da de tangi hiniwan ten u lei de unfa i ta tei dee soni dee de ta du da i u bigi tjika. Te i go a komakandi, nöö ee wan sëmbë bi abi wan pisi u hoi a di komakandi, nöö te di komakandi kaba, nöö i sa piki di sëmbë andi i bi lobi a di pisi di a bi hoi. Te joo da piki, nöö i sa mbei möiti tu fii ta taki dee soni kumafa i fusutan de. Dee möiti dee joo mbei fii sa ko dë wan sëmbë di wotowan sa djeesi a di fasi fa i ta fan, o lei taa i nango a fesi a di biibi.​—1 Tim. 4:15.

17. Andi o heepi wan njönku baaa faa sa du dee soni dee a buta taa a kë du a di biibi? (2 Timoteo 2:22)

¹⁷ ’Kule da dee hangi dee ta ko a un dee njönku sëmbë hati, nöö i mbei möiti fii dë wan sëmbë di ta libi a wan leti fasi.’ (Lesi 2 Timoteo 2:22.) Paulosu bi da Timoteo taanga faa mbei möiti be soni an puu hën pakisei a dee soni dee a bi kë du da Jehovah, u di dee soni dë bi sa mbei hën ku Jehovah an dë mati möön. I sa ko si tu taa hii fa so soni an hogi, tökuseei de sa mbei taa ja ta feni ten wan bëtë möön fii dini Jehovah. Luku un mëni ten i ta tei u du sport, u luku soni a Internet, nasö u pëë game. I bi o sa tei so u di ten dë u du soni a di biibi ö? Kandë i sa go heepi seeka di Könuköndë zali, nasö i sa go peleiki ku di bukuwagi. Ee i ta du dee lö soni aki, nöö a kan taa joo ko abi njunjun mati di o heepi i fii sa buta soni di i kë du a di biibi, söseei fii sa du de.

I TA FENI GAAN BUNU TE I TA HEEPI WOTOWAN

18. Faandi mbei u sa taki taa Maikusi ku Timoteo bi feni sömëni gaan bunu?

¹⁸ Maikusi ku Timoteo bi disa sömëni soni u de bi sa heepi wotowan möön gaanfa, nöö de bi feni sömëni gaan bunu (Tjab. 20:35). Maikusi bi go a tookatooka köndë faa bi sa go heepi dee baaa ku dee sisa fëën. A bi sikifi wan apaiti buku tu di ta taki soni u di libi ku di diniwooko u Jesosi. Timoteo bi heepi Paulosu u hopo njunjun kemeente, söseei a bi heepi ën u da dee baaa ku dee sisa taanga. An dë u taki taa Jehovah bi wai seei ku Maikusi ku Timoteo, u di de bi disa sömëni soni u de bi sa wooko dëën.

19. Faandi mbei dee njönku baaa musu buta pakisei a dee soni dee Paulosu bi piki Timoteo, nöö unfa soni o waka da de?

¹⁹ U sa si gbelingbelin a dee biifi dee Paulosu bi sikifi da di njönku mati fëën de kai Timoteo, taa a bi lobi ën tuutuu. Dee biifi dee Jehovah bi mbei Paulosu sikifi aki ta lei tu taa Jehovah lobi un dee njönku baaa gaanfa seei. A kë u soni waka bunu da unu. Fëën mbei a bunu fuun tei dee soni dee Paulosu bi taki, nöö mbei möiti fuun sa heepi wotowan möön gaanfa. Ee un du sö, nöö woon abi wan bunu libi nöunöu kaa, söseei woon feni ’di tuutuu libi di Gadu abi u da u a bakaten’.​—1 Tim. 6:18, 19.