Seeka i hati ufö i bigi lei soni u Bëibel

Te u ta öndösuku soni u Bëibel, nöö u kë taa dee soni dee u ta lei dou u hati. U sa djeesi Ësala a di seeka di a bi „seeka hën hati faa suku lai a di Wëti u Jehovah” (Ësl. 7:10). Ma unfa u sa seeka u hati kuma Ësala?

Begi. Begi hiniwan juu te joo bigi lei soni u Bëibel. Hakisi Jehovah faa heepi i fii fusutan dee soni dee i ta lei, söseei faa heepi i fii du andi i lei.​—Ps. 119:18, 34.

Abi sakafasi. Gadu ta tjubi dee lei u Bëibel da dee sëmbë dee ta si kuma de köni, söseei dee ta si kuma de an abi Gadu fanöudu u fusutan dee lei u Bëibel (Luk. 10:21). Na öndösuku soni u Bëibel u di i kë lei wotowan unfa i sa’ soni u Bëibel tjika. Ee i si taa i abi wan fasi di Gadu an lobi, nöö i musu dë kabakaba u tookëën.

Haika wan u dee Könuköndë kanda fuu. Te u ta haika poku, nöö a sa seeka u hati da di dini di woo dini Gadu. Te i ta haika wan u dee Könuköndë kanda fuu ufö i bigi lei soni u Bëibel, nöö a sa heepi i fii buta pakisei a Jehovah. A sö wan fasi dee soni dee joo lei o sa dou i hati.