Heepi dee sëmbë dee i ta lei soni u Bëibel u de ko dini Jehovah

1-2. (a) Faandi mbei so sëmbë di ta lei soni u Bëibel ta fëëë u de ko dini Jehovah? (b) Andi woo luku a di woto aki?

SONI bi dë di bi ta mbei i ta fëëë u ko dë wan Jehovah Kotoigi ö? Kandë i bi ta fëëë taa dee sëmbë dee i ku de ta wooko, dee mati fii, nasö dee famii fii bi o ta du ku i. Nasö kandë i bi ta si kuma ja bi o sa ta piki Jehovah buka a hii soni. Ee sö a bi dë da i, nöö i sa fusutan unfa so sëmbë di ta lei soni u Bëibel ta fii, söseei i sa fusutan faandi mbei a sa taanga da de u de ko dë Jehovah Kotoigi.

² Jesosi bi sabi taa dee lö soni aki bi sa tapa sëmbë u de ko dini Jehovah (Mat. 13:20-22). Ma tökuseei a bi ta mbei möiti go dou, u heepi dee sëmbë dee an bi kë ko dë bakama fëën wantewante. A bi lei dee bakama fëën unfa de sa heepi dee lö sëmbë aki, u de du dee soni aki: (1) U de ko sabi andi ta tapa de u de go a fesi a di biibi, (2) u de ko möön lobi Jehovah, (3) u de ta biinga a di tii u Gadu baka fosu, söseei (4) u de ko sabi andi de musu du te soni ta taanga da de. Unfa u sa du dee soni dee Jesosi bi konda da dee bakama fëën, te u ta wooko ku di buku I sa dë waiwai u teego!, u heepi dee sëmbë dee u ta lei soni u Bëibel u de ko dini Jehovah?

HEEPI DI SËMBË DI I TA LEI SONI U BËIBEL FAA KO SABI ANDI TA TAPËËN FAA GO A FESI A DI BIIBI

3. Andi bi sa ta tapa Nikodemusi faa ko dë wan bakama u Jesosi?

³ Nikodemusi bi dë wan fesima u dee Dju, nöö wan soni bi ta mbei a taanga dëën faa ko dë bakama u Jesosi. Söwan sikisi liba baka di Jesosi bi bigi du di diniwooko fëën, hën Nikodemusi bi ko fusutan kaa taa Jesosi bi dë di Mësiasi (Joh. 3:1, 2). Ma tökuseei Nikodemusi bi go miti Jesosi tjubitjubi, u di a bi ta fëëë taa dee Dju bi o du ku ën (Joh. 7:13; 12:42). A kan taa a bi ta fëëë taa a bi o lasi di në di a bi abi, ku so u dee gudu fëën, ee a bi ko dë wan bakama u Jesosi.a

4. Unfa Jesosi bi heepi Nikodemusi faa fusutan andi Gadu bi kë faa du?

⁴ Nikodemusi bi sabi dee wëti u Gadu, ma a bi abi heepi fanöudu faa fusutan andi Jehovah bi kë faa du. Unfa Jesosi bi heepi ën? Jesosi bi dë kabakaba u tei ten fan ku ën, aluwasi a ndeti seei. Jesosi bi piki ën gbelingbelin andi a bi musu du faa bi sa ko dë wan bakama fëën: A bi musu lei taa a ta tjali u dee zöndu fëën, a bi musu dopu a wata, söseei a bi musu ko ta biibi a di Mii u Gadu.​—Joh. 3:5, 14-21.

5. Unfa u sa heepi wan sëmbë di u ta lei soni u Bëibel faa si andi ta tapëën faa go a fesi a di biibi?

⁵ Aluwasi ee wan sëmbë di ta lei soni u Bëibel ta fusutan di Bëibel bumbuu, tökuseei a sa abi heepi fanöudu faa si andi ta tapëën faa dini Jehovah. Kandë dee sëmbë fëën sa ta tapëën, nasö kandë di wooko fëën sa ta tei hia ten fëën poi. Fëën mbei a bunu fii tei ten heepi di sëmbë. Kandë i sa kai ën fuun go bebe wan soni makandi, nasö fuun go waka makandi. Te un ta du soni makandi, nöö kandë a sa konda da i andi ku andi ta miti ën a di libi. Da di sëmbë taanga faa mbei möiti u tooka soni nëën libi u lei taa a lobi Jehovah, ma na u di a kë fii wai ku ën.

6. Unfa i sa heepi wan sëmbë di ta lei soni u Bëibel faa ko abi degihati, sö taa a sa ko a di tuutuu lei? (1 Kolenti 16:13)

⁶ Te wan sëmbë di ta lei soni u Beibei ko dë seiki taa Jehovah o heepi ën faa sa ta du soni a wan bunu fasi, nöö di soni dë o dëën taanga faa sa ta du andi a lei. (Lesi 1 Kolenti 16:13.) U sa tei wan sëmbë di ta lei wotowan soni u Bëibel, maaka ku wan siköö mësitë. Pakisei luku un pei mësitë i bi möön lobi di i bi nango a siköö. A musu u dë sö taa a bi dë wan sëmbë di bi ta lei i ku pasensi sö taa i sa du dee soni dee a ta lei i. Wë sö nöö a dë ku wan sëmbë di sa’ u lei wotowan soni u Bëibel. An ta lei di sëmbë andi Gadu kë faa du nöö a kaba, ma a ta heepi ën faa ko abi di futoou taa Gadu o heepi ën faa du dee soni dee a ta lei. Unfa i sa du di soni dë?

HEEPI DI SËMBË DI I TA LEI SONI U BËIBEL FAA KO MÖÖN LOBI JEHOVAH

7. Unfa Jesosi bi heepi dee sëmbë dee bi ta haikëën, u de ko möön lobi Jehovah?

⁷ Jesosi bi sabi taa te wan sëmbë lobi Gadu, nöö a o kë du dee soni dee a ta lei a di Bëibel. A bi lo’ u lei dee bakama fëën soni di bi o heepi de, u de ko möön lobi di Tata u de di dë a liba ala. A bi taki taa Jehovah dë kuma wan tata di lo’ u da dee mii fëën bumbuu soni (Mat. 7:9-11). A kan taa so u dee sëmbë dee bi ta haika Jesosi an bi abi wan tata di bi ta lei de taa a lobi de. Wë nöö pakisei luku unfa de bi sa ta fii, di Jesosi bi konda di woto u di tata di bi wai gaanfa seei ku di womi mii fëën di bi toona ko baka, hii fa a bi du wanlö hogi soni. Jesosi bi heepi de u de si taa Jehovah lobi de gaanfa seei, söseei taa a kë heepi de.​—Luk. 15:20-24.

8. Unfa i sa heepi wan sëmbë di ta lei soni u Bëibel faa ko möön lobi Jehovah?

⁸ Iseei sa heepi wan sëmbë di ta lei soni u Bëibel faa ko möön lobi Jehovah, te i ta konda soni u dee waiti fasi u Jehovah dëën. Hiniwan juu te i ta lei ën soni u Bëibel, nöö i musu ta heepi ën faa ko fusutan unfa Jehovah ta lei taa a lobi u. Te i ta lei ën soni, nöö i musu ta heepi ën hii juu faa si unfa dee soni dë ta lei taa Jehovah lo’ sëmbë. Te un ta luku di pisi di ta taki soni u di lusupaima, nöö heepi ën faa ko fusutan taa Jehovah an du di soni aki u di a lobi hii sëmbë nöö a kaba, ma a du ën u di a lobi ën vö (Lom. 5:8; 1 Joh 4:10). Te wan sëmbë di ta lei soni u Bëibel ko ta fusutan unfa Jehovah lobi ën tjika, nöö di soni dë sa heepi ën faa ko ta möön lobi Jehovah.​—Gal. 2:20.

9. Andi bi heepi wan womi de kai Michael faa tooka soni nëën libi?

⁹ Buta pakisei a di woto u wan womi de kai Michael, di ta libi a di köndë de kai Indonesia. De bi kiijëën a di tuutuu lei, ma an bi dopu. Di a bi abi 18 jaa, hën a bi go wooko a wan woto köndë ka a bi ta lëi dee gaan wagi dee ta tja soni. Bakaten, a bi toona go a Indonesia, hën a tööu. Ma a bi disa di mujëë ku di mujëë mii fëën a Indonesia, faa bi sa du di wooko fëën a döösë köndë go dou. A di ten dë, hën mujëë ku di mujëë mii fëën bi bigi lei soni u Bëibel, nöö de bi nango a fesi a di biibi seei. Baka di Michael mama ko lasi libi, hën a toona go a wosu u go ta sölugu hën tata, söseei a bi bigi ta lei soni u Bëibel. Di de bi luku di pisi „Woto soni di i sa lei” di dë a woto 27 u di buku I sa dë waiwai u teego! nöö a bi dou hën hati seei. Di Michael bi pakisei fa Jehovah bi sa fii di a bi ta si fa Jesosi bi ta tja sitaafu, hën a bigi këë. A bi ko ta tei di lusupaima u bigi seei. Fëën mbei a bi tooka soni nëën libi, hën a dopu.

HEEPI DI SËMBË DI I TA LEI SONI U BËIBEL FAA TA BIINGA A DI TII U GADU BAKA FOSU

10. Unfa Jesosi bi heepi dee fosu bakama fëën u de ta möön buta pakisei a dee fanöudu soni? (Lukasi 5:5-11) (Luku di peentje tu.)

¹⁰ Dee fosu bakama u Jesosi bi fusutan wantewante taa Jesosi da di Mësiasi, ma de bi abi heepi fanöudu, sö taa de bi sa buta möön pakisei a di peleikiwooko. Petuisi ku Andiasi bi dë bakama u Jesosi u wan pisiten kaa, di Jesosi bi kai de u de ko du di hii-ten diniwooko makandi ku ën (Mat. 4:18, 19). De bi ta du fisi wooko makandi ku Jakobosi ku Johanisi, nöö i wooko u de bi nango bunu seei (Maik. 1:16-20). Di Petuisi ku Andiasi „disa dee nëti u de” nöö a kan taa de bi seeka soni sö taa de bi sa sölugu di wosudendu u de, te de bi o ta waka a Jesosi baka. Faandi mbei de bi dë kabakaba u disa di fisi wooko u de? Di buku Lukasi ta piki u taa Jesosi bi du wan foombo soni, di bi mbei de ko abi möön futoou taa Jehovah bi o sa da de dee soni dee de bi abi fanöudu.​—Lesi Lukasi 5:5-11.

11. Andi u sa piki wan sëmbë di u ta lei soni u Bëibel, u di biibi fëën sa ko möön taanga?

¹¹ Wa sa du foombo soni kuma Jesosi, ma u sa ta konda da dee sëmbë dee u ta lei soni u Bëibel, unfa Jehovah ta heepi dee sëmbë dee ta biinga a di tii fëën baka fosu. I ta mëni jeti unfa Jehovah bi heepi i di i bi bigi go a dee komakandi ö? Kandë i bi musu go piki di basi fii faandi mbei ja o sa wooko pasa juu ee di soni dë bi o mbei taa ja bi o sa go a dee komakandi. Konda da di sëmbë di i ta lei soni u Bëibel unfa di biibi fii bi ko möön taanga, di i bi si fa Jehovah bi heepi i, di i bi lei taa i ta biinga a di tii fëën baka fosu.

12. (a) Faandi mbei u musu ta kai woto peleikima u de ko ku u, te woo go lei sëmbë soni u Bëibel? (b) Unfa i sa wooko ku fëlön u heepi di sëmbë di i ta lei soni u Bëibel? Konda wan woto.

¹² A ta bunu tu te woto baaa ku sisa sa konda da di sëmbë di i ta lei soni u Bëibel unfa de bi tooka soni a de libi, sö taa de bi sa biinga a di tii u Gadu baka fosu. Fëën mbei a bunu fii ta kai tookatooka baaa ku sisa u ko ku i, te joo go lei di sëmbë soni u Bëibel. Hakisi de u de konda unfa de ko a di tuutuu lei, söseei andi de du u mbei di dini di de ta dini Jehovah ko dë di möön fanöudu soni a de libi. Boiti di dë, i ku di sëmbë sa tei ten luku dee fëlön dee dë a di pisi „Woto soni di i sa lei’’, nasö a di pisi „Woto soni di i sa luku’’. Dee tu pisi aki dë u feni a di buku I sa dë waiwai u teego! Wan fasi fa i sa du di soni aki, hën da te un ta luku woto 37, nöö un sa buta pakisei a dee mama wëti dee dë u feni a di fëlön Jehovah o da u dee soni dee u abi fanöudu.

HEEPI DI SËMBË DI I TA LEI SONI U BËIBËL FAA KO SABI ANDI A MUSU DU TE SONI TA TAANGA DËËN

13. Unfa Jesosi bi seeka dee bakama fëën u de bi sa hoi dou, te sëmbë bi o du ku de?

¹³ Sömëni pasi Jesosi bi konda da dee bakama fëën taa sëmbë bi o ta du ku de, te kisi dee famii u deseei (Mat. 5:11; 10:22, 36). Kölö sö ufö Jesosi dëdë, hën a bi piki dee bakama fëën taa a bi sa pasa taa sëmbë kii de u di de ta dini Jehovah (Mat. 24:9; Joh. 15:20; 16:2). A bi da de taanga u de ta köni te de ta du di peleikiwooko. A bi piki de u de an ta fia ku dee sëmbë dee ta du ku de, ma u de ta du soni ku köni, sö taa de sa du di peleikiwooko go dou.

14. Unfa u sa heepi wan sëmbë di ta lei soni u Bëibel faa sa hoi dou, te sëmbë o du ku ën? (2 Timoteo 3:12)

¹⁴ U sa heepi di sëmbë di u ta lei soni u Bëibel faa sa dë seekaseeka, te u piki ën andi a sa jei a dee sëmbë a wookope, a dee mati fëën, ku dee famii fëën. (Lesi 2 Timoteo 3:12.) So sëmbë a wookope sa mbei ën fa, u di a ta mbei möiti u libi kumafa di Bëibel ta taki. Kandë wotowan kuma dee sëmbë fëën wosudendu seei, sa lei taa de an lobi dee soni dee a ta lei a Bëibel. Möön hesi u lei de unfa de sa du soni te sëmbë o du ku de, möön hesi de o dë seekaseeka te a ko pasa.

15. Andi sa heepi wan sëmbë di ta lei soni u Bëibel te dee famii fëën ta du ku ën?

¹⁵ Ee a ko pasa taa dee famii u di sëmbë di i ta lei soni u Bëibel ta du ku ën, nöö heepi ën faa pakisei luku faandi mbei dee famii fëën hati ta boonu. Kandë de ta si kuma dee Kotoigi ta lei sëmbë poipoi soni, nasö taa dee Jehovah Kotoigi na bumbuu sëmbë. Dee famii u Jesosi seei an bi ta wai ku ën, u di de bi ta si kuma hedi fëën an bi ta wooko bunu (Maik. 3:21; Joh. 7:5). Lei di sëmbë di i ta lei soni u Bëibel u abi pasensi, söseei u fan suti ku wotowan, te kisi dee famii fëën tu.

16. Unfa u sa heepi wan sëmbë di ta lei soni u Bëibel faa konda soni u di biibi fëën a wan lesipeki fasi?

¹⁶ Te dee famii u wan sëmbë di ta lei soni u Bëibel kë ko sabi möön soni u Bëibel, nöö an bi o bunu faa konda hii soni da de wan pasi. Ee a du sö, nöö de sa ko wei dëën, nöö di soni dë sa mbei taa de an o kë faa konda soni u di biibi fëën da de möön. Da di sëmbë di i ta lei soni u Bëibel taanga faa konda soni u di biibi fëën a sö wan fasi taa de sa kë haikëën wan woto pasi baka (Kol. 4:6). A sa piki de tu u de go luku soni a jw.org. Di soni dë sa da de pasi u deseei go lei soni u dee Jehovah Kotoigi kumafa de kë.

17. Unfa i sa heepi wan sëmbë di ta lei soni u Bëibel u piki dee soni dee sëmbë ta kë sabi u dee Jehovah Kotoigi? (Luku di peentje tu.)

¹⁷ I sa tei di pisi de kai „Aksi di furu sma abi fu Yehovah Kotoigi” di dë a jw.org, u heepi di sëmbë di i ta lei soni u Bëibel faa sa piki dee soni dee dee famii fëën, nasö dee sëmbë a wookope sa hakisi ën (2 Tim. 2:24, 25). Un sa luku di pisi „So sëmbë ta taki taa” di dë a kaba pisi u hiniwan woto u di buku „I sa dë waiwai u teego!” Dëën taanga faa ta konda andi a ta biibi, a di fasi fa a guwenti u fan. Ee a dë fanöudu, nöö heepi ën faa konda soni a wan fasi di an o taanga u fusutan. Te a ta mbei di möiti dë, nöö di soni dë o heepi ën fu an fëëë u hopo fan da di biibi fëën.

18. Unfa i sa da wan sëmbë di ta lei soni u Bëibel taanga faa peleiki makandi ku di kemeente? (Mateosi 10:27)

¹⁸ Jesosi bi piki dee bakama fëën u konda di bunu buka da hii sëmbë. (Lesi Mateosi 10:27.) Möön hesi wan sëmbë di ta lei soni u Bëibel bigi ta konda soni u di biibi fëën, möön hesi a o lei u buta futoou a Jehovah. Unfa i sa heepi ën faa du di soni aki? Te di kemeente o abi wan peleiki waka, nöö i sa dëën taanga faa pakisei luku andi a sa du faa sa ko dë wan peleikima. Konda dëën faandi mbei sömëni sëmbë bi feni taa a bi möön bunu da de u bigi peleiki di di kemeente bi abi wan peleiki waka. A sa feni wini tu a dee demo dee ta hoi a dee mindiwiki komakandi. Te a ta mbei möiti u du dee soni aki, nöö a o ko sa’ u konda soni u di biibi fëën söndö u fëëë.

MBEI DI SËMBË DI I TA LEI SONI U BËIBEL SI TAA I TA BIIBI TAA A KË MBEI JEHOVAH WAI KU ËN

19. Unfa Jesosi bi lei taa a ta biibi taa dee bakama fëën bi kë du soni kumafa Jehovah kë, nöö unfa u sa waka a Jesosi baka?

¹⁹ Ufö Jesosi go a liba ala, hën a bi piki dee bakama fëën taa a o dë makandi ku de baka. De an bi fusutan taa Jesosi bi ta piki de taa de o go a liba ala. Hii fa de an bi ta fusutan hii dee soni dee Jesosi bi ta taki, tökuseei Jesosi bi dë seiki taa de bi kë waka nëën baka (Joh. 14:1-5, 8). A bi sabi taa de bi abi ten fanöudu u de ko fusutan taa de bi o go libi a liba ala (Joh. 16:12). Useei sa lei dee sëmbë dee u ta lei soni u Bëibel taa u sabi taa de kë du soni u mbei Jehovah wai ku de.

20. Unfa wan sisa di ta dë a Malaawi bi lei taa a bi ta biibi taa di sëmbë di a bi ta lei soni u Bëibel, bi kë du soni kumafa Jehovah kë?

²⁰ U ta dë ku di mëni taa dee sëmbë dee u ta lei soni u Bëibel kë du bunu soni. Boo luku wan woto u wan sisa di ta dë a Malaawi, de kai Chifundo. Di sisa aki bi bigi ta lei wan mujëë soni u Bëibel ku di buku „I sa dë waiwai u teego!” Di mujëë dë de ta kai Alinafe, nöö a bi nango a Lomusu Keiki. Di de bi kaba taki u woto 14, hën Sisa Chifundo bi hakisi di mujëë ee unfa a feni ën te sëmbë ta tei peentje u dini Gadu. Di mujëë hati bi boonu, hën a taki taa: „Mi sa tei peentje dini Gadu ee mi kë!” Chifundo bi mëni taa kandë di mujëë an bi o kë lei soni u Bëibel möön. Ma a bi ta lei ën soni u Bëibel go dou ku pasensi, u di a bi ta dë ku di mëni taa a bi o ko fusutan di soni u di peentje nömö. Wantu liba baka di dë, hën Chifundo bi luku di hakisi u woto 34 makandi ku di mujëë. Di hakisi bi dë sö taa: „Unfa di lei di i ta lei soni u Bëibel ku di lei di i ta lei soni u di tuutuu Gadu Jehovah, mbei i feni wini?” Chifundo bi taki fa Alinafe bi piki di hakisi aki. A bi taki taa: „A bi konda sömëni bunu soni di a lei. Wan u dee soni di a bi taki, hën da dee Kotoigi an ta du soni di Bëibel ta taki taa an bunu.” Wan pisiten baka di dë, hën Alinafe an bi ta wooko ku peentje möön u dini Gadu, te u kaba fëën, hën a dopu.

21. Unfa u sa heepi di sëmbë di u ta lei soni u Bëibel faa kë ko dini Jehovah?

²¹ Hii fa a dë sö taa Jehovah „hën ta mbei soni ta göö”, tökuseei u sa heepi di sëmbë di u ta lei soni u Bëibel faa go a fesi (1 Kol. 3:7). Na lei nöö u ta lei ën andi Gadu kë faa du, ma u ta heepi ën faa ko möön lobi Jehovah. U ta heepi ën faa lei taa a lobi Jehovah, te u ta dëën taanga faa ta biinga a di tii u Jehovah baka fosu. U ta lei ën tu unfa a sa buta futoou a Jehovah te soni ta taanga dëën. Te u ta piki ën taa u ta biibi taa a sa piki Jehovah buka, nöö a sö wan fasi u ta lei ën taa hënseei sa libi ku dee mama wëti u Bëibel, söseei taa hënseei sa taanpu gingin a di tuutuu lei tu.