Un dee gaanwomi, unfa un ta si di lei di un musu lei woto baaa soni?
„Wan ten dë da hii soni.”—PELEIKIMA 3:1.
1, 2. Andi dee keling-gaanwomi ko si a sömëni kemeente?
DI KELING-GAANWOMI ta kaba wan komakandi di a bi hoi ku dee gaanwomi. A ta luku de, nöö a lobi de seei u di de ta wooko taanga. So u de gaandi möön ën, nöö de bi sa pai ën seei. Ma a ta booko hën hedi ku wan soni di dë fanöudu. Hën a hakisi de: „Dee baaa o, andi un du u heepi dee woto baaa u de sa tja möön faantiwöutu a di kemeente?” Wë dee baaa sabi taa di lasiti pasi di di keling-gaanwomi bi ko luku di kemeente, a bi da de taanga u tei möön ten u lei woto baaa soni. Te u kaba fëën, hën wan u dee gaanwomi piki taa: „Wa du hia soni.” Hën hii dee woto gaanwomi piki taa sö a dë tuu.
2 Ee i dë wan gaanwomi u kemeente, nöö kandë iseei bi o piki di wan seei soni. Dee keling-gaanwomi ko si taa a dë fanöudu taa dee gaanwomi ta tei möön ten u lei dee njönku baaa ku dee möön gaandi baaa u de ko sabi unfa de sa heepi di kemeente. Ma a sa dë wan taanga soni u du. Wë faandi mbei?
3. (a) Unfa di Bëibel ta lei taa a dë fanöudu u lei woto baaa soni, nöö faandi mbei hii u tuu musu kë sabi faandi mbei a dë fanöudu u du ën? (Luku di pisi a basu.) (b) Faandi mbei a sa taanga da so gaanwomi u lei woto baaa soni?
3 I kuma gaanwomi, sabi taa a dë fanöudu u tei möön ten u lei woto baaa soni.a (Luku di pisi a basu.) I sabi taa u abi möön hia baaa fanöudu u heepi dee kemeente u de sa dë taangataanga a di biibi nöunöu kaa, söseei u heepi dee njunjun kemeente di o hopo (Lesi Jesaaja 60:22). Di Bëibel ta taki taa i musu „lei oto sëmbë tu” (Lesi 2 Timoteo 2:2). Ma tökuseei a sa dë wan taanga soni u tei ten u lei wotowan soni. Kandë i musu ta booko i hedi ku dee sëmbë fii wosudendu, nöö i musu wooko sölugu de tu. Boiti di dë, i musu booko i hedi ku di kemeente, söseei ku dee woto fanöudu soni. U abi sömëni soni u du seei. Boo luku faandi mbei a dë taanga fanöudu taa i ta tei ten u lei woto baaa soni.
A DË TAANGA FANÖUDU U LEI WOTO BAAA SONI
4. Andi sa mbei taa dee gaanwomi an ta tei ten u lei woto baaa soni wantewante?
4 Faandi mbei a sa taanga u tei ten u lei dee baaa soni a di kemeente? So sëmbë sa taki taa: ’Woto soni dë di dë möön fanöudu u du a di kemeente, nöö mi musu du de wantewante. Ee ma lei woto baaa soni nöunöu aki, di kemeente an o fii ën.’ Ma sö a dë tuu ö? Kandë woto soni dë di i musu buta pakisei a de wantewante. Wë ee ja lei woto baaa soni nöunöu, nöö a sa dë sö taa i ta du wan soni di na bunu da di kemeente.
5, 6. Andi u sa lei u wan sëmbë di abi wan wagi, söseei u di fasi a ta seeka di wagi fu an booko? Unfa di fasi fa di sëmbë ta libi ku di wagi fëën dë kuma di lei di dee gaanwomi musu ta lei woto baaa soni a di kemeente?
5 Pakisei di woto aki. Wan sëmbë di abi wan wagi sabi taa a musu ta tooka di oli u di wagi ee a kë u di wagi ta lëi bunu. Ma a sa pakisei taa a dë möön fanöudu u lai kasolin a di wagi ee nasö an o sa lëi ën. A sa pakisei tu taa a abi hia soni u du, nöö a o tooka di oli bakaten. Wë ee an tookëën seei, tökuseei di wagi o lëi wan pisiten jeti. Ma di soni dë sa mbei di wagi booko. Ee di sëmbë an tooka di oli te a musu du ën, nöö te wan pisi di wagi o booko. Te u kaba fëën, a o abi u puu hia möni ku sömëni ten u seeka di wagi faa sa lëi baka. Wë andi u ta lei u di woto aki?
6 Dee gaanwomi u kemeente an musu biabia u du wan soni di de musu du. Ee de ta biabia, nöö soni an o go bunu a di kemeente. Leti kumafa di sëmbë musu ta lai kasolin a di wagi fëën, sö nöö dee gaanwomi musu ’sabi unfa u wegi soni luku ee undi da di möön bunu wan [fanöudu wan, NW]’ (Filipi 1:10). Ma so gaanwomi sa ko abi sö hia soni u du te nöö de an abi ten möön u lei woto baaa soni. A dë kuma te wan sëmbë an ta tooka di oli u di wagi fëën. Ee dee gaanwomi ta biabia u lei woto baaa soni, nöö baka wan pisiten baaa an o hia tjika u tja faantiwöutu a di kemeente möön.
7. Unfa u musu si dee gaanwomi dee ta tei ten u lei woto baaa soni?
7 Ja musu pakisei taa an dë wan fanöudu soni u lei woto baaa soni nöunöu aki. Dee gaanwomi u kemeente dee ta booko de hedi ku di fasi fa soni o dë a di kemeente a di ten di ta ko, nöö di ta tei ten u lei woto baaa soni, da dinima u Gadu di köni. Söseei dee gaanwomi aki, dë sëmbë di ta heepi dee baaa ku sisa u de gaanfa seei (Lesi 1 Petuisi 4:10). Un wini di kemeente ta feni?
UN WOOKO KU DI TEN FUUNU A WAN KÖNI FASI
8. (a) Andi da dee soni mbei dee gaanwomi musu lei woto baaa soni? (b) Un faantiwöutu dee gaanwomi dee ta dini a kamian ka heepi dë fanöudu abi? (Luku di pisi „Wan gaan wooko di musu du nöunöu”.)
8 Dee gaanwomi dee sabi di wooko u de bumbuu seei, musu abi sakafasi. De musu ko fusutan taa de ta ko gaandi, nöö wan ten o dou ka de an o sa du hia soni sö möön (Mika 6:8). Söseei dee gaanwomi musu sabi taa „hogi ten ku soni di de an bi mëni sa miti de”, nöö fëën mbei a sa taanga da de u tja dee faantiwöutu u de (Peleikima 9:11, 12; Jakobosi 4:13, 14). Wë u di dee gaanwomi lobi dee sëmbë u Jehovah, söseei u di de ta booko de hedi ku de, mbei de ta mbei taanga möiti u lei dee njönku baaa dee soni di deseei bi lei a di ten di pasa.—Lesi Psalöm 71:17, 18.
9. Andi o pasa a di ten di ta ko di mbei taa a dë fanöudu u lei woto baaa soni?
9 Dee gaanwomi u kemeente dee ta lei woto baaa soni, ta du wan gaan wooko u di dee möiti di de ta mbei o heepi dee sëmbë u di kemeente u de ko möön taanga a di biibi. Di lei di dee gaanwomi ta lei woto baaa soni, o heepi de u de dë kabakaba u heepi dee sëmbë u di kemeente u de sa dë wan a di biibi, söseei u de sa hoi deseei a Gadu. Di soni aki dë wan fanöudu soni nöunöu seei, u di u ta libi a dee lasiti daka u di goonliba aki, nöö a o dë möön fanöudu seei a di pisiten u di gaan fuka di ta ko (Ezekiëli 38:10-12; Mika 5:5, 6). Fëën mbei un dee lobi gaanwomi fuu, tide wante un musu bigi tei ten u lei woto baaa soni.
10. Andi wan gaanwomi musu du ee a kë feni ten u lei woto baaa soni?
10 U sabi taa un abi hia soni ta du kaa, u di un ta du soni di dë fanöudu u du a di kemeente. Fëën mbei a sa dë fanöudu u tei wan pisi u di ten di un musu du woto soni, u lei dee woto baaa soni (Peleikima 3:1). Te un du ën, nöö un ta lei taa un ta wooko ku di ten fuunu a wan köni fasi, nöö di kemeente o feni wini fëën a di ten di ta ko.
SONI DI SA HEEPI UNU FUUN SA LEI WOTO BAAA SONI
11. (a) Andi u sa taki u dee lai di dee gaanwomi u peipei köndë bi da dee baaa di de ta lei soni? (b) Te u luku Nöngö 15:22, nöö faandi mbei a dë fanöudu u luku dee soni di woto gaanwomi bi taki u di fasi fa de bi lei woto baaa soni?
11 Wan tu baaa bi lei woto baaa soni a wan fasi di bi heepi de u du möön soni a di kemeente. U bi hakisi dee baaa dë unfa de bi lei de soni.b (Luku di pisi a basu.) Boo taa hii dee gaanwomi bi da dee baaa di wan seei lai, hii fa libi u de bi tooka. Andi di soni aki ta lei u? Di lei di dee gaanwomi ta lei woto baaa soni ku di Bëibel, ta heepi dee baaa dë seei „a oto kamian [a hii kamian, NW] a dee keikikeiki [kemeente, NW]” (1 Kolenti 4:17). Fëën mbei a di woto aki ku di woto baka disi, woo taki u so u dee soni di dee gaanwomi bi taki.—Nöngö 15:22.
12. Andi wan gaanwomi di kë lei woto baaa soni musu seeka fosu, nöö faandi mbei a musu du ën?
12 Wan gaanwomi musu seeka wan tu soni fosu ee a kë lei wan woto baaa soni. Faandi mbei a dë fanöudu u du ën? Wan sëmbë di ta wooko goon musu seeka di goondoti ufö a paandi soni nëën. Sö nöö wan gaanwomi di kë lei woto baaa soni musu seeka di hati u di baaa dë ee a kë lei ën u du njunjun soni. Wë nöö andi sö wan gaanwomi musu seeka ufö a bigi lei di baaa soni? A sa djeesi di tjabukama u Gadu de kai Samuëli a di fasi fa a bi ta lei wotowan soni a wan köni fasi.
13-15. (a) Andi Jehovah bi piki Samuëli faa du? (b) Unfa Samuëli bi seeka Saulosu faa sa du di wooko di Gadu dëën? (Luku di peentje a bigi u di woto.) (c) Faandi mbei di Bëibel woto u Samuëli bunu da dee gaanwomi u di ten aki?
13 Söwan 3000 jaa pasa, Jehovah bi piki di tjabukama Samuëli wan soni. A bi piki ën taa: „Amanjan a di wan seei juu aki, mi o manda wan womi u di köndë u Benjamin ko a i. I musu salufu ën faa dë di tiima u dee Isaëli sëmbë u mi” (1 Samuëli 9:15, 16). Samuëli bi ko fusutan taa an bi o tii dee Isaëli sëmbë möön, söseei a bi ko fusutan taa Jehovah bi kë faa salufu wan njunjun tiima. U di Samuëli bi kë seeka di womi dë u du di wooko di Gadu bi o dëën, mbei Samuëli bi pakisei a fesi unfa a bi o du ën.
14 Di debooko fëën, Samuëli miti Saulosu, hën Jehovah piki Samuëli taa: „Luku di womi aki.” Wantewante dë Samuëli du di soni di a bi abi a pakisei u du. A bi seeka soni a sö wan fasi taa a bi sa fan ku Saulosu. Samuëli kai Saulosu ku di futuboi fëën u de ko njan ku ën. A mbei de sindo a dee möön bunu kamian, hën a da de dee möön bunu pisi gbamba. Hën Samuëli taa: „Tei nöö i njan, biga u bi hoi ën aki da i u te di daka aki dou.” Di de kaba njan, hën Samuëli kai Saulosu tja go nëën pisi. Di de dë a pasi nango, de bi ta da woto seei. Di de dou a Samuëli pisi, hën de go a liba u di wosu u Samuëli. Hën Samuëli ta fan ku Saulosu ka de dë a di wosu liba” naandë u tefa di juu kisi u de go duumi. Di debooko fëën, hën Samuëli salufu Saulosu, hën a bosi ën, hën a piki ën andi a musu du möön. Baka di dë, hën Saulosu go. A bi dë kabakaba u du di wooko fëën.—1 Samuëli 9:17-27; 10:1.
15 Samuëli bi salufu Saulosu faa dë di tiima u Isaëli. A dë sö tuu taa di soni di Samuëli bi du tooka seei u di fasi fa wan gaanwomi musu lei wan woto baaa soni, faa sa dë wan gaanwomi nasö wan dinai a di kemeente. Ma tökuseei dee gaanwomi sa lei sömëni soni seei u di fasi fa Samuëli bi seeka Saulosu hati. Boo taki u tu soni di u sa lei.
GAANWOMI DI KË LEI WOTO BAAA SONI MUSU DË MATI KU DE
16. (a) Unfa Samuëli bi fii di dee Isaëli sëmbë bi hakisi ën faa buta wan könu da de? (b) Andi Samuëli bi du di Jehovah piki ën faa salufu Saulosu?
16 I musu kë lei woto baaa soni, na hoi baka. Di Samuëli jei taa dee Isaëli sëmbë bi kë wan sëmbë u toon könu u de, nöö a bi hati ën seei. A bi fii taa hën de an bi kë möön (1 Samuëli 8:4-8). Dii pasi Jehovah bi musu piki ën taa a musu haika dee sëmbë, u di Samuëli an bi kë tei wan sëmbë buta könu u de (1 Samuëli 8:7, 9, 22). Hii fa Samuëli bi ta fii sö, tökuseei an bi haun ku di womi di bi o tei hën kamian kuma tiima, nöö hati fëën an bi boonu ku ën tu. Di Jehovah piki Samuëli faa salufu Saulosu, nöö an biabia. A du ën wantewante. An du ën u di a bi musu u du ën, ma a du u di a lobi Jehovah.
Un dee gaanwomi dee ta lei woto baaa soni, un tei ten u du soni makandi ku de, hii fa un abi hia soni ta du
17. Unfa dee gaanwomi u kemeente ta djeesi Samuëli a di ten aki, nöö unfa di soni aki ta tja piizii ko da de?
17 Sömëni gaanwomi dë a di ten aki di sabi di wooko u de bumbuu, di lei woto baaa soni a di wan seei fasi kuma Samuëli. De du ën a wan lobi fasi (1 Petuisi 5:2). Dee lobihati gaanwomi aki dë kabakaba u lei woto baaa soni, nöö de an ta fëëë u mbei dee baaa di de ta lei soni du so u dee wooko u de a di kemeente. De ta si taa dee baaa dë kuma sëmbë di ta „heepi” de u du dee soni di de musu du a di kemeente (2 Kolenti 1:24; Hebelejën 13:16). Dee gaanwomi aki dee an ta pakisei deseei nöö, ta wai seei te de ta si dee baaa di de lei soni ta wooko ku di köni u de u heepi dee sëmbë u Jehovah.—Tjabukama 20:35.
18, 19. Unfa wan gaanwomi sa seeka di hati u di sëmbë di a ta lei soni, nöö faandi mbei a dë fanöudu u du ën?
18 Na dë wan gaanwomi di ta lei wan baaa soni nöö, ma dë wan mati tu. Di Samuëli bi miti Saulosu, nöö a bi sa tutu fatu a Saulosu hedi salufu ën buta könu wantewante. Ma ee a bi du ën sö, a bi o salufu wan njunjun könu tuu, ma an bi o dë seekaseeka faa bi sa tii dee sëmbë u Gadu. Samuëli bi tei ten u seeka Saulosu hati faa bi sa du di njunjun wooko di Gadu bi dëën. Ufö Samuëli bi salufu Saulosu, de bi sindo njan makandi, de bi waka makandi, de bi fan wan hii pisiten, nöö de bi go kandi böö tu. Samuëli bi wakiti u te di möön bunu ten dou faa bi sa salufu di njunjun könu.
Ee dee gaanwomi kë lei woto baaa soni, nöö de musu dë mati u de fosu (Luku palaklafu 18, 19)
19 Sö a dë a di ten aki tu. Ufö wan gaanwomi bigi lei wan woto baaa soni, nöö a musu mbei möiti u ko dë mati ku ën. Di soni di wan gaanwomi ta du u mbei wan baaa di a ta lei soni fii bunu, o tooka u di wa ta libi a di wan seei köndë, söseei u di u kiija a peipei fasi. Aan toobi te ka i ta libi, ma ee i tei ten u du soni makandi ku di baaa, hii fa i abi hia soni ta du, nöö a o si taa i ta booko i hedi ku ën (Lesi Loomë 12:10). U dë seiki taa dee baaa di i ta lei soni o dë ku tangi a hati seei, u di i ta buta mëni a de a wan lobi fasi.
20, 21. (a) Andi i bi o taki u wan gaanwomi di sa’ u lei woto baaa soni a wan bunu fasi? (b) Andi woo taki a di woto di ta ko?
20 A dë sö tuu taa wan gaanwomi di sa’ u lei woto baaa soni a wan bunu fasi, lo’ u lei sëmbë soni. Ma sö wan gaanwomi musu lobi di sëmbë di a ta lei soni (Luku Johanisi 5:20.) Faandi mbei a musu lobi ën? Wë te wan sëmbë di de ta lei soni ta si taa i ta booko i hedi ku ën tuutuu, nöö a o kë fii lei ën soni. Fëën mbei un dee gaanwomi, na soni nöö un musu ta lei dee baaa, ma un musu mbei möiti u dë mati de tu.—Nöngö 17:17; Johanisi 15:15.
21 Te wan gaanwomi kaba seeka di hati u wan baaa di a kë lei soni, nöö a sa bigi lei ën soni awaa. Na un fasi wan gaanwomi sa lei woto baaa soni? Wë woo taki u di soni dë a di woto di ta ko.
a De sikifi di woto aki ku di woto baka disi, da dee gaanwomi u kemeente. Ma hiniwan sëmbë musu kë sabi dee soni aki tu. Faandi mbei? A o heepi hii dee baaa u de fusutan taa de musu lei de soni sö taa de sa du möön hia soni a di kemeente. Hii sëmbë o feni wini a di kemeente, te möön hia baaa dë di dee gaanwomi lei u du soni.
b Dee gaanwomi aki ta libi a Ösutualia, Bangladesh, Belgium, Balaziliköndë, Gaan Faansiköndë, Faansiköndë, Japan, Kolea, Mëkisikou, Namibia, Nigelia, Réunion, Losiaköndë, Zuid-Afiikan, ku Amëëkanköndë.