U sa hoi useei limbolimbo a Gadu wojo

1. Andi da wan tu soni di dee sëmbë u di ten aki ta si kuma bumbuu soni?

U TA libi a wan goonliba ka sömëni sëmbë ta libi fanafiti a di së manu ku mujëë. Sömëni sëmbë feni taa an hogi ee womi ku womi nasö ee mujëë ku mujëë ta libi ku deseei, söseei de ta feni taa i sa duumi ku wan sëmbë söndö fii ku ën toou. Fanafiti soni a di së u manu ku mujëë dë u feni seei a fëlön, a buku, a poku ku dee piizii dee sëmbë ta piizii a di ten aki (Psalöm 12:8). Hii fa a dë sö, Jehovah sa heepi u fuu libi a wan fasi di ta kai ku ën. U sa libi a wan fasi di ta kai ku Gadu, hii fa dee sëmbë u di goonliba aki ta libi a wan fasi di na fiti.​—Lesi 1 Tesalonika 4:3-5.

2, 3. (a) Faandi mbei u musu ta puu dee taku hangi dee ta ko a u hati? (b) Andi woo luku a di woto aki?

² Ee u kë Jehovah feni u bunu, nöö u musu ta kule da hii dee soni dee a ta buuse. U di u da zöndu libisëmbë, mbei so juu hati fuu sa ta kë du soni di an fiti. Di fii dë, dë kuma di kë di fisi ta kë go njan beti di dë a huku-njanjan. Ee u bigi ta pakisei u fanafiti soni u manu ku mujëë, nöö u musu mbei möiti u puu ën wantewante. Ee wa du sö, nöö di fii dë sa ko taanga sö tee taa a tja u go du wan zöndu. Fëën mbei di Bëibel ta taki taa: „Di taku hangi dë, te a göö ko bigi kaa nöö a ko toon hogi du.”​—Lesi Jakobosi 1:14, 15.

³ Taku hangi sa göö a u hati. Fëën mbei u musu ta luku bunu ku dee soni dee u ta kë. Ee u ta puu dee taku hangi dee ta ko a u hati, nöö wa o go du fanafiti soni a di së u manu ku mujëë. Söseei wa o fii dee hogi dee bi sa miti u bakaten tu (Galasia 5:16). A di woto aki woo luku dii soni di o heepi u fuu feti ku dee taku hangi dee ta ko a u hati. Dee dii soni aki da di dë di u ku Jehovah dë mati, dee lai di di Wöutu u Gadu ta da u, ku di heepi di dee baaa ku sisa fuu dee taanga a di biibi ta heepi u.

„KO ZUNTU U GADU”

4. Faandi mbei u musu ko zuntu u Gadu?

⁴ Di Bëibel ta piki dee sëmbë dee kë „pusa go a Gadu” taa: „Un disa dee hogilibi fuunu e. Un puu taku pakisei a unu hati” (Jakobosi 4:8). Te u ku Jehovah dë gaan mati, nöö wa o ta kë du soni u piizii hën hati nöö, ma woo ta kë pakisei soni di ta kai ku ën tu. Te u ta pakisei soni di dë limbolimbo a Gadu wojo, nöö hati fuu o dë limbolimbo tu (Psalöm 24:3, 4; 51:6; Filipi 4:8). Jehovah sabi taa fanafiti soni sa ko a u pakisei u di u da zöndu libisëmbë. Ma u di wa kë u Jehovah fii tjali, mbei u ta mbei hii möiti u na ta pakisei fanafiti soni (Kenesesi 6:5, 6). U ta du hii soni di u sa du u pakisei fuu ta dë limbolimbo a Gadu wojo.

5, 6. Unfa begi sa heepi u fu wa ta pakisei fanafiti soni?

⁵ Ee u ta begi Jehovah nöömö, nöö a o heepi u fu wa ta pakisei fanafiti soni. A o da u di santa jeje fëën fuu sa hoi useei limbolimbo nëën wojo. Te u ta begi Jehovah, nöö u sa ta hakisi ën faa heepi u fuu ta pakisei soni di ta kai ku ën (Psalöm 19:14). U sa ta hakisi ën ku sakafasi faa luku ee taku hangi an dë a u hati di sa mbei u go du zöndu (Psalöm 139:23, 24). I musu ta hakisi Jehovah nöömö faa heepi i u na go du fanafiti soni, söseei faa heepi i fii libi a wan leti fasi, hii fa so juu a ta taanga.​—Mateosi 6:13.

⁶ Di wa bi ta dini Jehovah, nöö kandë so soni di u bi ta du an bi ta kai ku ën, nöö a kan taa u ta feti ku dee taku hangi dee u bi abi dë jeti. Ma Jehovah sa heepi u fuu ko ta libi a wan fasi di ta kai ku ën. Baka di Könu Dafiti bi duumi ku Batiseiba, a bi tjali u di soni di a bi du, nöö hën a begi Jehovah faa dëën „wan limbo hati” söseei faa heepi ën u du soni di ta kai ku ën (Psalöm 51:10, 12). Ee u bi abi taku hangi a di së u manu ku mujëë di u ta feti ku ën jeti, nöö hoi a pakisei taa Jehovah o sa heepi u. A sa mbei u ko abi di fii u ta du soni di ta kai ku ën, söseei fuu ta du soni a wan leti fasi. Jehovah sa heepi u fuu duwengi useei u na ta pakisei fanafiti soni.​—Psalöm 119:133.

„UN MUSU TA DU DEE SONI DEE DI WÖUTU TA MANDA U FUU DU”

7. Unfa di Wöutu u Gadu sa heepi u u na pakisei soni di na fiti?

⁷ Jehovah sa piki dee begi fuu ku dee soni dee dë a di Bëibel. Di köni u Gadu di dë u feni a di Wöutu fëën dë soifi (Jakobosi 3:17). Te u ta lesi di Bëibel hiniwan daka, nöö a ta heepi u u pakisei fuu ta dë limbolimbo (Psalöm 19:7, 11; 119:9, 11). Di Bëibel abi sömëni woto u sëmbë di sa heepi u u na pakisei soni di na fiti, söseei u puu dee taku hangi dee ta ko a u hati.

8, 9. (a) Andi da di soni di bi mbei wan njönku kijoo duumi ku wan mötjö mujëë? (b) Andi da dee soni di di woto di sikifi a Nöngö kapitel 7 sa heepi u fu wa go du?

⁸ Di Wöutu u Gadu ta taki a Nöngö 5:8 taa u musu kule da fanafiti libi. A Nöngö kapitel 7, u ta lesi di woto u wan njönku kijoo di bi go ta waka pasa a wan mötjö mujëë dööbuka a ndeti. Di mujëë bi dë a wan pasi buka, nöö a bi „bisi soni kuma wan mötjö mujëë”. A waka go miti di womi mii, hën a kisi ën panjan, hën a bosi ën. Nöö a bi piki ën soni di bi mbei a ko ta pakisei soni di na fiti. Ma di kijoo an bi mbei möiti u puu dee soni dë nëën pakisei wantewante, nöö fëën mbei a bi duumi ku dimujëë. Hii fa an bi ta pakisei u du zöndu, ma tökuseei a bi du zöndu. Nöö a bi musu tja di sitaafu u di soni di a bi du. Ee a bi fusutan taa sö wan gaan hogi bi sa miti ën, nöö an bi o pena go nama ku di mujëë dë seei!​—Nöngö 7:6-27.

⁹ Leti kuma di njönku kijoo aki, u sa go du wan don soni te wa fusutan taa hogi sa miti u. A di ten aki de lo’ u lei fanafiti soni a teefei a ndeti. Fëën mbei u sa go si soni di na fiti te u ta suku soni u luku a teefei. Kandë te u dë a Internet, nöö u nango a website ka u sa fan ku woto sëmbë nasö u nango suku soni a woto website di wa sabi. A so u dee website de ta lei fanafiti peentje nasö soni di sa mbei i go luku fanafiti soni a di së u manu ku mujëë. Dee soni dë sa tja hogi ko miti u. Ee wa hoi dee soni aki a pakisei, nöö dee soni dee woo go si sa mbei u kë go du soni di na ta kai ku Jehovah.

10. Faandi mbei a dë wan hogi soni te u ta pëë ku dee fii u wan sëmbë di u ku ën an toou, nasö ku wan sëmbë di u ku ën an mbei buka u toou? (Luku di peentje a bigi u di woto.)

¹⁰ Di Bëibel ta piki u unfa wan womi ku wan mujëë musu ta libi ku deseei (Lesi 1 Timoteo 5:2). Keesitu sëmbë ta kai lobi ku wan sëmbë di hën ku ën toou nöö, nasö ku wan sëmbë di hën ku ën mbei buka u toou. De an ta pëë ku deseei fii. So sëmbë sa pakisei taa an dë wan hogi soni te wan womi ku wan mujëë ta tuwë sinkii da deseei, nasö te de ta luku deseei lobi wojo, solanga de an ta panjan deseei nöö. Ma te tu sëmbë ta pëë ku deseei fii, de sa bigi pakisei fanafiti soni, nöö di soni aki sa mbei de go du fanafiti soni a di së u manu ku mujëë. Di soni aki bi pasa a fosuten kaa, nöö a sa pasa baka.

11. Andi u ta lei a di woto u Josëfu?

¹¹ U sa lei wan bunu soni a di woto u Josëfu. Di mujëë u Potifali bi ta suku fasi u mbei Josëfu kandi ku ën. Josëfu bi ta lei ën taa an kë, ma tökuseei di mujëë bi ta suku fasi nömönömö u mbei a duumi ku ën. Hiniwan daka di mujëë u Potifali bi ta hakisi Josëfu faa „fika ku ën hën wanwan” (Kenesesi 39:7, 8, 10). Wan sëmbë di sabi soni u Bëibel taki taa di mujëë u Potifali bi ta si kuma ee hën ku Josëfu bi fika de wanwan a wan kamian nöö Josëfu bi o kë duumi ku ën. Josëfu an bi kë pëë ku di mujëë fii seepiseepi, nöö an bi du ën tu. An bi mbei taku hangi ko nëën hati. Fëën mbei di di mujëë kisi di koosu u Josëfu hoi u duwengi ën faa duumi ku ën, hën wantewante dë Josëfu „disa di koosu fëën a di mujëë maun dendu, hën a kule go a döö”.​—Kenesesi 39:12.

12. Unfa u du sabi taa dee soni dee u ta luku sa mbei taku pakisei ko a u hati?

¹² Esosi bi taki taa dee soni dee u ta luku sa mbei taa taku pakisei ko a u hati di nama ku fanafiti soni a di së u manu ku mujëë. A bi taki taa: „Di sëmbë di ta luku wan mujëë kuma a kë tei ën, nöö nëën hati a tei ën kaa e” (Mateosi 5:28). Di soni aki hën bi pasa ku Könu Dafiti. A bi dë nëën pisi a di „wosu liba, hën a si wan mujëë ta wasi” ma an bi ta bia wojo puu a di mujëë, nöö a bi ta pakisei di mujëë nöömö (2 Samuëli 11:2). Hii fa wan woto womi hën bi abi di mujëë, tökuseei a bi ko kë di mujëë u di womi tefa a go duumi ku ën.

13. Faandi mbei u musu mbei wan buka ku useei u na luku wan mujëë a wan fasi di na fiti, nöö unfa u sa du ën?

¹³ Ee wa kë ta pakisei fanafiti soni, nöö u musu djeesi Jöpu. A bi taki taa: „Mi mbei wan buka ku mi wojo” (Jöpu 31:1, 7, 9). Leti kumafa Jöpu bi buta taa an o go pakisei soni u wan mujëë a wan fasi di na fiti, sö nöö useei sa buta taa wan o du ën tu. Nöö ee u si fanafiti soni u manu ku mujëë a computer, a peentje dee ta dë a dee böutu a bandja pasi, a wan buku, nasö a wan woto soni, nöö wantewante woo bia u fesi puu u na luku ën.

14. Andi u musu du fuu sa ta dë limbolimbo a Gadu wojo?

¹⁴ Te i luku dee soni dee u taki u de, nöö kandë joo ko si taa i musu mbei möön möiti u feti ku dee taku hangi dee ta ko a i pakisei. Ee i si taa i musu tooka so soni, nöö i musu tooka de wantewante! Te i ta piki Jehovah buka, nöö ja o go du fanafiti soni a di së u manu ku mujëë. Nöö a sö wan fasi joo sa ta dë limbolimbo a Gadu wojo.​—Lesi Jakobosi 1:21-25.

„KAI DEE GAANWOMI”

15. Faandi mbei u musu hakisi wotowan u heepi u, te a ta taanga da u u feti ku dee taku hangi dee ta ko a u pakisei?

¹⁵ Ee i feni taa a taanga da i u feti ku dee taku hangi de ta ko a i pakisei, nöö go fan ku wan baaa nasö wan sisa u di kemeente fii di ta dini Jehovah sömëni jaa kaa, di sa da i lai di dë a di Wöutu u Gadu. A sa taanga da i u go konda wan fuka fii da woto sëmbë, ma a dë wan bunu soni fii hakisi wotowan u de heepi i (Nöngö 18:1; Hebelejën 3:12, 13). Dee baaa ku sisa di taanga a di biibi sa heepi i fii ko si andi ku andi i musu du. Nöö du dee soni di de piki i sö taa i ku Jehovah sa dë mati go dou.

16, 17. (a) Unfa dee gaanwomi sa heepi dee sëmbë dee a taanga da u feti ku dee taku hangi dee ta ko a de pakisei? (b) Faandi wan sëmbë di ta luku fana fiti soni u womi ku mujëë musu go suku heepi wantewante?

¹⁶ Dee gaanwomi u di kemeente fii o sa heepi i (Lesi Jakobosi 5:13-15). Wan njönku baaa di ta libi a Balaziliköndë bi feni taa sömëni jaa longi a bi ta taanga dëën u feti ku dee taku hangi dee ta ko nëën pakisei. Di baaa aki bi taki taa: „Mi bi sabi taa dee soni dee mi bi ta pakisei an bi ta kai ku Jehovah, ma mi bi ta sen u go piki wotowan fa mi ta fii.” Wan gaanwomi bi ko si taa di njönku kijoo dë bi abi heepi fanöudu, nöö hën a piki ën faa mbei dee gaanwomi heepi ën. Di njönku kijoo taki taa: „M’ bi foondo seei u si fa dee gaanwomi bi lei fa de ta booko de hedi ku mi tjika. De bi a’ sutifasi, söseei de bi ta fusutan mi möön fa m’ bi mëni. De bi ta haika bunu te mi bi ta konda di fuka u mi da de. De bi tei di Bëibel u lei mi fa Jehovah lobi mi tjika, söseei de bi begi ku mi tu. Di soni dë bi heepi mi u tei dee lai u Bëibel dee de bi da mi.” Di a bi ko dë wan bunu mati u Jehovah baka, hën a taki taa: „Nöunöu mi ko si taa a dë fanöudu seei u hakisi wotowan u de heepi u, ka fuu ta suku u tja dee fuka fuu u wanwan.”

¹⁷ Ee i guwenti u luku fana fiti soni u womi ku mujëë, nöö i musu go suku heepi wantewante. Möön i wakiti u go suku heepi, möönmöön di fii u go du fanafiti soni a di së u manu ku mujëë sa ko möön taanga. Te u kaba fëën joo mbei wotowan fii tjali, söseei joo mbei sëmbë taki hogi u Jehovah. Sömëni baaa ku sisa bi go a dee gaanwomi go suku heepi, nöö de bi tei dee lai di de bi da de sö taa de bi sa du andi Jehovah kë, söseei u de bi sa dë sëmbë u di kemeente jeti.​—Psalöm 141:5; Hebelejën 12:5, 6; Jakobosi 1:15.

DË KABAKABA U HOI ISEEI LIMBOLIMBO A GADU WOJO!

18. Andi i dë kabakaba u du?

¹⁸ Daka fu daka sëmbë u di goonliba u Saatan aki ta libi fanafiti a di së u manu ku mujëë. Ma dee dinima u Jehovah ta mbei taanga möiti u hoi deseei limbolimbo a Gadu wojo, söseei u ta pakisei soni di ta kai ku ën. Jehovah ta wai ku dee Keesitu sëmbë aki gaanfa seei. Fëën mbei boo ta dë zuntu ku Jehovah, söseei boo ta fiti dee lai dee u ta feni a di Wöutu fëën, ku dee u ta feni a di kemeente. Te u ta du sö, nöö woo ta dë waiwai, söseei woo abi wan limbo háti (Psalöm 119:5, 6). Nöö a di ten di ta ko, te Saatan an o dë möön, nöö woo libi u teego a di njunjun goonliba u Gadu.