Na tei sëmbë së a di goonliba aki di ta paati sëmbë ku sëmbë

1. Unfa u sa piki Gadu buka ku dee tiima buka tuu?

DI BËIBEL ta lei u taa u musu ta piki dee tiima u di goonliba aki buka, ma a ta piki u tu taa hii juu u musu ta piki Gadu buka (Tjabukama 5:29; Titusi 3:1). Unfa woo sa du di soni aki? Jesosi bi lei u wan mama wëti di sa heepi u fuu sabi ambë buka u musu ta piki. A taa: „Di soni di dë u könu nöö un da könu ën e, nöö di soni di dë u Masa Gaangadu nöö un da Masa Gaangadu ën” (Mateosi 22:21). U ta da „Gaan Könu” di soni di dë u „Gaan Könu”, te u ta hoi dee wëti u di köndë ka u ta libi, te u ta lesipeki dee tiima u di köndë, ku te u ta paka lanti möni (Loomë 13:7). Ma ee dee tiima u di köndë ta hakisi u fuu du wan soni di Gadu an kë fuu du, nöö wa o du di soni dë, ma woo fan ku de a wan lesipeki fasi.

2. Unfa u ta lei taa wa ta tei na wan sëmbë së te a nama ku dee politiki soni u di goonliba aki?

² Wan fasi fa u sa „da Masa Gaangadu” di soni di dë u „Masa Gaangadu”, hën da te wa o ta tei na wan sëmbë së, te a nama ku politiki soni u di goonliba aki (Jesaaja 2:4). U di Jehovah da libisëmbë pasi u tii, mbei wa ta hopo fia ku dee tiima, söseei wa ta du na wan soni di ta lei taa u lobi di köndë fuu pasa maaka (Loomë 13:1, 2). Wa ta pooba u puu dee tiima u di goonliba aki buta wotowan a de kamian, söseei wa ta pooba u tooka di fasi fa dee politikima ta pakisei. Wa ta sitëm, nöö wa ta toon politikima tu.

3. Faandi mbei wa musu ta tei sëmbë së, te a nama ku politiki soni u di goonliba aki?

³ Sömëni soni dë di mbei taa Gadu ta piki u fu wa tei sëmbë së, te a nama ku politiki soni u di goonliba aki. Wan u dee soni, hën da u ta djeesi Jesosi, di „an dë sëmbë u di goonliba aki”. Nöiti a bi go mökisi ku politiki soni, nasö ku di feti di köndë ku köndë ta feti (Johanisi 6:15; 17:16). Wan woto soni, hën da u dë ku di Könuköndë u Gadu a wan së. U di wa ta tei dee tiima u di goonliba aki së, mbei u ta dë ku wan limbo háti te u ta peleiki da sëmbë taa di Könuköndë u Gadu wanwan o sa puu hii dee fuka u libisëmbë. Dee poipoi keiki ta tei sëmbë së, te a nama ku politiki soni u di goonliba aki, nöö di soni dë hën ta paati sëmbë ku sëmbë. U di wa ta tei sëmbë së, mbei u ta libi kuma wan famii ku dee baaa ku dee sisa fuu a hii së u goonliba.​—1 Petuisi 2:17.

4. (a) Unfa u du sabi taa möönmöön a o ko taanga da u fu wa tei sëmbë së te a nama ku politiki soni? (b) Faandi mbei u musu seeka useei nöunöu kaa fu wa tei sëmbë së?

⁴ Kandë u ta libi a wan köndë ka dee sëmbë an ta suku u mbei u tei de së, te a nama ku politiki soni. Ma möön u ta ko zuntu ku di kaba u di goonliba u Saatan, möönmöön a o ko taanga da u fu wa tei sëmbë së te a nama ku politiki soni. A di ten aki sëmbë „an ta hoi deseei te de mbei wan buka ku wan sëmbë”, söseei „de o ta du andi deseei kë”, nöö möönmöön de an o ta kai a wan (2 Timoteo 3:3, 4, NW). U di politiki soni bi ko tooka a so köndë ka dee baaa ku dee sisa fuu ta libi, mbei a bi ko taanga da de tu. Fëën mbei u musu seeka useei nöunöu kaa fu wa tei sëmbë së aluwasi a ta taanga da u. Boo go luku fö soni di sa heepi u fuu seeka useei.

U MUSU TA SI DEE TIIMA U DI GOONLIBA AKI KUMAFA JEHOVAH TA SI DE

5. Unfa Jehovah ta si dee tiima u di goonliba aki?

⁵ Wan fasi fa u sa seeka useei nöunöu kaa u na tei sëmbë së te a nama ku politiki soni u di goonliba aki, hën da u musu ta si dee tiima kumafa Jehovah ta si de. Jehovah an bi da libisëmbë di leti u tii woto libisëmbë (Jelemia 10:23). A ta si hii libisëmbë kuma sëmbë u wan kodo famii. Ma dee tiima u di goonliba aki ta paati sëmbë ku sëmbë, u di de ta taki taa di köndë u de da di möön bunuwan. Hii fa a sa djei kuma dee tiima aki ta du bunu soni, tökuseei de an sa puu hii dee fuka u di goonliba aki. Boiti di dë, de ko toon felantima u di Könuköndë u Gadu, di bi bigi tii a di jaa 1914. Abiti möön di Könuköndë aki o puu hii dee tiima u di goonliba aki.​—Lesi Psalöm 2:2, 7-9.

6. Unfa u musu libi ku dee tiima u di goonliba aki?

⁶ Gadu da dee tiima pasi u de tii, u di de sa mbei soni waka bunu a di köndë, söseei de sa mbei sëmbë an ta du soni fanjanfanjan a di köndë. Di soni aki ta heepi u fuu sa paaja di bunu buka u di Könuköndë u Gadu (Loomë 13:3, 4). Gadu seei ta piki u taa u musu ta begi da dee tiima, sö taa u sa ta dini ën bööböö (1 Timoteo 2:1, 2). Te sëmbë an ta libi bunu ku u, nöö u sa hakisi dee tiima u de heepi u. Di soni aki Paulosu bi ta du tu (Tjabukama 25:11). Di Bëibel ta piki u taa Saatan ta tii dee tiima u di goonliba aki, ma an ta piki u taa hën ta tii hiniwan sëmbë di abi taki a di tii u di goonliba aki (Lukasi 4:5, 6). Fëën mbei nöiti wa musu taki taa Didibi hën ta tii wan u dee tiima u wan köndë. Di Bëibel taki taa wa musu kosi sëmbë.​​—Titusi 3:1, 2.

7. Ku andi u musu ta köni?

⁷ U ta piki Gadu buka te wa ta tei na wan politikima së nasö na wan politiki paatëi së, aluwasi u sa feni wini u dee soni di de taki taa de o du. So juu a sa taanga da u u na tei na wan sëmbë së. Pakisei taa dee sëmbë u wan köndë ta fia ku dee lanti u di köndë, u di de ta mbei sëmbë ta tja pena. Kandë u kuma Jehovah Kotoigi seei ta tja pena u di soni dë hedi tu. U dë seiki taa ja o tei dee sëmbë dë së u go fia ku lanti. Ma i bi o feni taa dee sëmbë dë abi leti u fia ku lanti ö? I bi o kë taa de wini di fia di de ta fia ku lanti ö? (Efeise 2:2) Ee u kë lei taa wa ta tei na wan sëmbë së, nöö u musu köni be wa ko ta pakisei taa wan u dee kulupu dë bunu möön di wotowan. Di soni aki o dë u si a dee soni dee u ta taki ku dee soni dee u ta du.

U MUSU „DË WEKIWEKI TA WOOKO KU FUSUTAN”, MA U MUSU „DË KU SAAPI FASI” TU

8. Unfa u sa „dë wekiweki ta wooko ku fusutan”, söseei unfa u sa „dë ku saapi fasi” te a ta taanga da u fu wa tei sëmbë së a politiki soni?

⁸ Di u tu fasi fa u sa lei taa wa ta tei sëmbë së ta a nama ku politiki soni u di goonliba aki, hën da u musu „dë wekiweki ta wooko ku fusutan”, ma u musu „dë ku saapi fasi seei tu kuma pomba”. (Lesi Mateosi 10:16, 17.) U ta „dë wekiweki ta wooko ku fusutan”, te u ta pakisei dee fuka dee sa miti u. Nöö u ta lei taa u „dë ku saapi fasi” te wa ta tei sëmbë së, aluwasi a ta taanga da u. Boo taki u wantu soni di sa miti u, söseei u soni di u sa du fu wa tei sëmbë së a politiki soni.

9. Ku andi u musu ta luku bunu te u ta fan ku wotowan?

⁹ Te u ta fan ku wotowan. U musu ta köni te sëmbë bigi ta taki soni di nama ku politiki soni u di goonliba aki. Boo taa u ta konda soni di nama ku di Könuköndë u Gadu da wan sëmbë. Wa bi o taki taa dee soni di wan politikima taki, nasö di wan politiki paatëi taki, ta kai ku u nasö taa an ta kai u. Ka fuu ta taki u dee soni di libisëmbë kë du u puu dee fuka u di goonliba aki, nöö u sa lei de a di Bëibel unfa di Könuköndë u Gadu o puu dee fuka dë. Ee wan sëmbë kë fia ku i, u soni di nama ku di tööu di womi ku womi nasö mujëë ku mujëë ta tööu, nasö u di puu di sëmbë ta puu bëë, nöö i sa piki de andi di Wöutu u Gadu ta taki, söseei i sa piki de unfa i ta pooba u du dee soni dee i ta lei a di Bëibel. Ee wan sëmbë taki taa de musu tooka so u dee wëti, nasö de musu puu dee wëti dë, nöö wa musu tei di sëmbë dë së. Söseei wa musu duwengi di sëmbë dë faa tooka di fasi fa a ta pakisei.

10. Andi u musu du fuu dë seiki taa wa ta tei sëmbë së a politiki soni, te dee njunsuma ta taki soni a ladio, a teefei, nasö a kolanti?

¹⁰ Njunsu di u ta jei a ladio, a teefei, nasö di u ta lesi a kolanti. So juu de ta taki soni a njunsu ka i ta jei gbelingbelin taa de ta tei wan politiki paatëi së. Di soni aki ta pasa möönmöön a dee köndë ka dee tiima hën ta piki dee njunsuma andi de musu taki. Ee dee njunsuma ta tei sëmbë së, nöö u musu luku bunu be wa bigi ta pakisei kuma de. Hakisi iseei di soni aki: ’Mi lo’ u haika wan njunsuma u di dee soni di a ta taki u dee politikima ta kai ku mi ö?’ Ee ja kë tei wan sëmbë së, nöö ja musu ta luku soni u dee njunsuma nasö ta lesi soni u de ka de ta tei wan sëmbë së te a nama ku politiki soni. Ma a bi o möön bunu fii pooba u feni njunsu ka de an ta tei na wan sëmbë së a politiki soni. Nöö hii juu i musu ta wegi dee soni dee i ta jei luku, ee de ta kai ku dee „gbelingbelin soni” dee sikifi a di Bëibel.​—2 Timoteo 1:13.

11. Unfa a sa taanga da u fu wa tei sëmbë së, te u ta si dee soni dee u abi kuma gaan fanöudu soni?

¹¹ Di lobi di sëmbë lobi gudu. Te u ta si möni ku dee soni dee u abi kuma gaan fanöudu soni, nöö a sa taanga da u fu wa tei sëmbë së a politiki soni. Baka di jaa 1970, sömëni u dee Kotoigi u Malaawi bi musu go disa hii dee soni de bi abi, u di de an bi kë go nama ku wan politiki paatëi. Ma a bi tjali taa so u de an bi kë go disa di bunu libi di de bi abi. Wan sisa de kai Ruth bi taki taa: „So u dee baaa ku dee sisa fuu bi go ku u di u bi musu fusi kumutu a di köndë, ma bakaten so u de bi go nama ku wan politiki paatëi, hën de toona go a dee wosu u de baka, u di de an bi kë libi penapena a di lowema kampu.” Ma gaansë u dee sëmbë u Gadu an ta du sö. De an ta tei sëmbë së, aluwasi ee a ko dë taa de an o abi hia möni möön, nasö ee de musu lasi hii dee gudu di de abi.​—Hebelejën 10:34.

12, 13.(a) Unfa Jehovah ta si libisëmbë? (b) Unfa u sa du sabi ee u ta bigi lobi di köndë fuu pasa maaka?

¹² Te wan sëmbë lobi di köndë fëën nasö di lö fëën pasa maaka. Sëmbë lo’ u gafa di lö u de, di föluku u de, di fasi fa de kiija, nasö di köndë u de. Ma Jehovah an ta si wan sëmbë nasö wan kulupu sëmbë bunu möön di wotowan. A ta si hii sëmbë kuma di wan nöö. A dë sö tuu taa Jehovah an mbei hii u tuu di wan fasi, nöö fëën mbei u ta wai te u ta si fa a mbei u tookatooka. An kë fuu disa di fasi fa de kiija u. Nöö an kë fuu ta pakisei taa u bunu möön wotowan tu.​—Loomë 10:12.

¹³ Wa musu lobi di köndë fuu sö tee taa u ta si kuma u bunu möön wotowan. Ma ee u ta fii taa u bunu möön wotowan, nöö a sa ko taanga da u fu wa ta tei sëmbë së. Di soni aki bi pasa a di ten u dee fesiten Keesitu sëmbë. So u dee Hebelejën baaa an bi ta libi bunu ku dee Giiki mujëë di manu u de bi dëdë kaa (Tjabukama 6:1). Unfa u sa du sabi ee u ta bigi lobi di köndë fuu nasö di lö fuu, pasa maaka? Boo taa wan baaa nasö wan sisa u wan woto köndë da i wan lai. Andi i bi o du? Ja bi o tei di lai, u di i feni taa un ta du soni möön bunu a di köndë fii ö? Wë ee sö, nöö hoi di soni aki a pakisei: „[Ja] musu mbei taa i hei möön otowan tu, ma be i saka i seei da dee otowan fii ta luku de kuma de hei möön i.”​—Filipi 2:3.

JEHOVAH O HEEPI I

14. Unfa begi sa heepi u, nöö un woto dë a Bëibel di ta lei u taa begi sa heepi u tuutuu?

¹⁴ Di u dii fasi fa u sa lei taa wa ta tei sëmbë së te a nama ku politiki soni u di goonliba aki, hën da te u abi futoou a Jehovah. Begi ën faa da i di santa jeje fëën, di o mbei i ko abi pasensi, söseei fii ta duwengi iseei. Dee fasi aki o heepi i ee dee tiima du wan soni di an fiti. Hakisi Jehovah be a da i köni fii sa sabi andi sa mbei a taanga da i u na tei sëmbë së. Nöö hakisi ën be a heepi i fii du di möön bunu soni te a ta taanga da i (Jakobosi 1:5). Kandë de sa buta i a dunguwosu, nasö de sa sitaafu i a wan woto fasi, u di i ta hoi iseei a Jehovah. Ee a ko pasa sö, nöö begi Jehovah faa da i degihati fii sa konda gbelingbelin da wotowan faandi mbei ja ta tei sëmbë së. I sa dë seiki taa Jehovah o heepi i fii hoi dou.​—Lesi Tjabukama 4:27-31.

15. Unfa di Bëibel sa heepi u u na tei sëmbë së? (Söseei luku di pisi „Di Wöutu u Gadu bi heepi de u na tei sëmbë së”.)

¹⁵ Jehovah mbei sëmbë sikifi di Bëibel u da u taanga. I musu ta pakisei fundu u dee Bëibel tëkisi di sa heepi i u na tei sëmbë së. Pooba u lei dee tëkisi aki, fii sa hoi de a hedi. Biga de o heepi i ee a ko pasa taa wan daka i ko dë a wan kamian ka ja abi wan Bëibel. Boiti di dë, di Bëibel sa heepi i fii ko abi wan taanga biibi a dee soni di Gadu taki taa a o du a di ten di ta ko. Di biibi aki hën o heepi u fuu hoi dou te tesi ta miti u (Loomë 8:25). Suku Bëibel tëkisi di ta taki u soni di i bi o kë du a di njunjun goonliba, nöö pooba u si fa i dë ala kaa.

LEI WAN SONI A DEE DINIMA U JEHOVAH DEE BI HOI DESEEI NËËN

16, 17. Andi u sa lei u dee dinima u Jehovah dee an bi tei sëmbë së a dee politiki soni u di goonliba aki? (Luku di peentje a bigi u di woto.)

¹⁶ Di u fö soni di sa heepi u u na tei sëmbë së te a nama ku politiki soni u di goonliba aki, hën da te u ta pakisei dee woto u dee dinima u Jehovah dee bi hoi deseei nëën. Di Bëibel ta taki u sömëni sëmbë di bi abi degihati, nöö de bi du soni ku köni di bi heepi de u de an tei sëmbë së. Pakisei di woto u Sadaki, Mësaki ku Abetineko, di an bi kë dini di pindi gadu di bi ta djei di tiima u Babilon. (Lesi Daniëli 3:16-18.) Di Bëibel woto aki heepi sömëni Kotoigi a di ten aki u de abi degihati, söseei u de an dini di faaka u di köndë ka de ta libi. Jesosi an bi go nama ku dee politiki soni dee ta paati sëmbë ku sëmbë. A bi sabi taa di soni di a du aki bi o heepi dee bakama fëën. A bi taki taa: „Wan lasi hati e, biga mi wini hii soni a di goonliba aki kaa.”​—Johanisi 16:33.

¹⁷ Sömëni Kotoigi a di ten fuu aki an bi tei sëmbë së a politiki soni. De bi du hogihati soni ku so u de, de bi söötö so u de a dunguwosu, söseei de bi kii wotowan u di de bi hoi deseei a Jehovah. Dee woto u de ta heepi u fuu abi degihati. Wan baaa di ta libi a Tolukuköndë bi taki taa: „Franz Reiter bi dë wan njönku baaa di de kii u di an bi kë go feti da dee sodati u Hitler. A di biifi di a bi sikifi disa da hën mama di ndeti ufö de kii ën, a bi lei taa a bi abi wan taanga biibi, söseei a bi lei taa a bi abi futoou a Jehovah. Mi kë djeesi ën te sö wan tesi miti mi tu.”^[1]​—Luku di pisi a kaba u di woto.

18, 19. (a) Unfa dee baaa ku dee sisa u di kemeente fii sa heepi i u na tei sëmbë së a politiki soni? (b) Andi i dë kabakaba u du nöunöu?

¹⁸ Dee baaa ku dee sisa u di kemeente fii sa heepi i u na tei sëmbë së a politiki soni u di goonliba aki. Piki dee gaanwomi be de heepi i ee a ta taanga da i u na tei sëmbë së a politiki soni. De sa da i bunu lai ku di Bëibel. Boiti di dë, ee dee baaa ku dee sisa u di kemeente sabi taa a ta taanga da i, nöö de sa da i taanga. Hakisi de u de begi da i. Ma useei musu ta heepi dee baaa ku dee sisa fuu tu, nöö u musu ta begi da de tu (Mateosi 7:12). I sa feni dee në u dee baaa ku dee sisa dee dë a dunguwosu, te i go a di website fuu jw.org.^[2] Te i ta begi, nöö i sa kai dee në u dee baaa ku dee sisa aki. Hakisi Jehovah faa heepi de u abi degihati, söseei u hoi deseei nëën.​—Efeise 6:19, 20.

¹⁹ Wë fa u zuntu ku di kaba u di goonliba aki, nöö u musu dë ku di pakisei taa dee tiima o kë musu u fuu dë ku de a wan së. Fëën mbei a dë fanöudu fuu seeka useei nöunöu kaa u na tei sëmbë së a di goonliba aki di ta paati sëmbë ku sëmbë!