Andi i musu du fii sa abi wan bunu tööu libi?

1. Andi wan womi ku wan mujëë di tööu musu hoi a pakisei taa o miti de, hii fa sëmbë ta piizii te de ta tööu? (Luku di peentje a bigi u di woto.)

TE DI womi di o tööu si di mujëë di hën ku ën o tööu a di tööu daka u de, nöö de ta wai te na soni. Di ten di de bi mbei buka u tööu, hën de ko lobi deseei gaanfa seei, nöö fëën mbei de paamusi deseei taa de o libi makandi u nöömö. Baka te de tööu go ta libi makandi, nöö a o dë fanöudu u de tooka soni a de libi, u de sa libi makandi go dou. Jehovah di sëmbë di seti di tööu libi, kë taa hiniwan womi ku mujëë di tööu musu abi wan piizii tööu libi. Fëën mbei a da de köni lai a di Wöutu fëën, di Bëibel (Nöngö 18:22). Ma di Bëibel ta piki u taa zöndu libisëmbë di tööu o abi bookohedi nasö „fuka” a di tööu libi (1 Kolenti 7:28). Andi wan womi ku wan mujëë di tööu musu du u de an abi tumisi bookohedi a di tööu libi? Nöö andi Keesitu sëmbë musu du u de sa abi wan bunu tööu libi?

2. Na un fasi womi ku mujëë di tööu musu lei taa de lobi deseei?

² Di Bëibel ta lei u taa lobi da wan fanöudu fasi di u musu abi. Ma peipei fasi dë fa womi ku mujëë di tööu musu lei taa de lobi deseei. De musu lei taa de lobi deseei kumafa mati ku mati ta lobi deseei, söseei de musu ta kai lobi ku deseei tu. Ma ee de abi miii, nöö di lobi di de musu lobi deseei kuma sëmbë u wan wosudendu musu dë di möön fanöudu soni da de. Ma di lobi di u musu lobi useei kuma Keesitu sëmbë, hën o mbei soni waka bunu a wan tööu libi. Apösutu Paulosu bi taki soni u di lö lobi aki, di a bi taki taa: „Hiniwan womi musu lobi ën mujëë kuma hënseei sinkii. Nöö söseei tu hiniwan mujëë musu lesipeki ën manu.”​—Efeise 5:33.

DEE FAANTIWÖUTU U WAN WOMI KU WAN MUJËË DI TÖÖU

3. Unfa lobi musu dë a wan tööu libi tjika?

³ Paulosu bi taki taa: „Nöö un dee womi, un musu lobi dee mujëë fuunu leti kumafa Keesitu lobi u dee sëmbë fëën teefa a dëdë da u” (Efeise 5:25). Dee Keesitu sëmbë u di ten aki ta djeesi Jesosi u di de lobi de na de, kumafa a bi lobi dee bakama fëën. (Lesi Johanisi 13:34, 35; 15:12, 13.) Keesitu sëmbë di tööu musu lobi deseei sö tee taa de dë kabakaba u dëdë da deseei. Ma ee wan gaan bookohedi dë a di tööu libi, nöö so womi ku mujëë an ta fii taa de lobi deseei sö möön. Andi sa heepi de? Ee wan Keesitu sëmbë lobi di wotowan fëën, nöö a o ’ta tjubi ën fu an kisi sen a lanti. A o ta suku di bunu pisi fëën nöömö. A o a’ di mëni taa na sö nöö a o dë, te wan ten seei a o ko bunu nöömö. An o lasi hati nëën möönsö’. Di lö fasi u lobi aki „an o kaba a mundu möönsö” (1 Kolenti 13:7, 8). Wan womi ku wan mujëë di tööu musu hoi a pakisei taa de mbei wan buka ku deseei. De paamusi deseei taa de o lobi deseei, nöö de o dë makandi u nöömö. Te de ta hoi di soni aki a pakisei, nöö a o mbei de suku heepi a Jehovah, u de sa du soni makandi u feni wan lusu da hiniwan bookohedi di de abi.

4, 5. (a) Andi da di faantiwöutu u wan womi di dë hedima u wan wosudendu? (b) Unfa wan mujëë musu ta si di faantiwöutu di hën manu abi kuma hedima u di wosudendu? (c) Andi wan womi ku wan mujëë di tööu bi musu tooka a de libi?

⁴ Paulosu bi taki soni u di faantiwöutu di wan womi ku wan mujëë di tööu abi, di a bi taki taa: „Dee mujëë, un musu ta saka da unu manu fu di un ta nama ku Masa Jesosi. Biga di womi hën da hedima fëën mujëë, leti kumafa Keesitu dë hedima fuu dee sëmbë fëën [di kemeente, NW]” (Efeise 5:22, 23). Di soni aki an kë taki taa wan womi bunu möön di mujëë fëën. Jehovah bi taki soni u di apaiti wooko di wan mujëë abi, di a bi taki taa: „An bunu taa wan womi dë hën wanwan. Mi o mbei wan heepima dëën di fiti ën, söseei di sa heepi ën” (Kenesesi 2:18). Wan mujëë musu heepi ën manu faa sa dë wan bunu hedima a di wosudendu. Nöö wan womi musu djeesi Jesosi di „dë hedima fuu dee sëmbë fëën [di kemeente]”, a di fasi fa Jesosi bi ta du soni a wan lobihati fasi. Te wan womi ta du di soni aki, nöö di mujëë fëën o ta fii bunu, nöö an o taanga dëën faa lesipeki hën manu, nasö faa ta heepi ën te a kë du wan soni.

⁵ Cathy di tööu ku Fred taki taa: „Di ma bi tööu jeti, nöö mi bi ta taki da miseei, nöö mi bi ta sölugu miseei tu. Di tööu libi bi mbei mi bi tooka soni a mi libi, biga mi bi musu lei u abi futoou a mi manu. Na hii juu a bi ta dë wan kösökösö soni, ma mi ku mi manu bi ko dë möön gaan mati, u di u bi ta du soni kumafa Jehovah kë.”^[1] (Luku di pisi a kaba u di woto.) Fred taki taa: „Hii juu a bi ta taanga da mi te mi bi musu taki andi mi o du. A ta möön taanga te wan womi musu taki andi hën ku hën mujëë musu du. Ma u di mi bi ta begi Jehovah faa heepi mi, söseei u di mi ta haika di mujëë u mi, mbei an bi ta taanga da mi sö möön. Mi ta fii seei taa u ta wooko makandi!”

6. Unfa lobi ta mbei womi ku mujëë di tööu ta „libi makandi ku wan hati kumafa Gadu kë”, te de abi bookohedi a di tööu libi?

⁶ Soni sa waka möön bunu a di tööu libi te womi ku mujëë ta ’hoi pasensi da deseei ta da deseei paadon ku hii de hati’. U di de da zöndu libisëmbë, mbei hii de tuu o ta mbei föutu. Te dee soni aki pasa, nöö de musu lei wan soni a dee föutu u de, de musu lei u da deseei paadon, söseei de musu lei taa de lobi deseei kumafa dee mama wëti u Bëibel ta taki. Te de lobi deseei a sö wan fasi, nöö de o „libi makandi ku wan hati kumafa Gadu kë” (Kolosën 3:13, 14). Womi ku mujëë di tööu sa lei taa de lobi deseei a sö wan fasi, te de ta abi pasensi ku deseei, söseei te de an o ta hoi deseei a bëë (1 Kolenti 13:4, 5). Ee wan womi ku wan mujëë di tööu kisi toobi, nöö de musu pooba u seeka di taki hesihesi ufö ndeti tapa (Efeise 4:26, 27). I musu abi sakafasi ku degihati u piki di sëmbë di i ku ën tööu taa „piimisi taa mi mbei i fii wan fasi e”. Te womi ku mujëë ta du di soni aki, nöö a o heepi de ku dee bookohedi u de, söseei a o heepi de u ko dë gaan mati.

A DË FANÖUDU U ABI SAAPI FASI A DI TÖÖU LIBI

7, 8. (a) Un lai Bëibel ta da sëmbë di tööu te a nama ku di duumi di de musu duumi ku deseei? (b) Faandi mbei womi ku mujëë di tööu musu ta libi a wan saapi fasi ku deseei?

⁷ Di Bëibel ta da womi ku mujëë di tööu köni lai di sa heepi de u sabi unfa de musu ta si di duumi di womi ku mujëë ta duumi ku deseei. (Lesi 1 Kolenti 7:3-5.) A dë fanöudu taa wan womi nasö wan mujëë ta buta pakisei a di fasi di wotowan fëën ta fii, söseei de musu ta buta pakisei a dee soni di di wotowan u de ta abi fanöudu. Ee wan womi an ta libi a wan saapi fasi ku hën mujëë, nöö a sa taanga da di mujëë faa ta duumi ku ën. Dee womi musu ta libi ku dee mujëë u de a wan fasi di ta lei taa de „ta fii da dee mujëë” u de (1 Petuisi 3:7). An musu dë sö taa wan womi nasö wan mujëë ta duwengi di wotowan fëën ufö de sa duumi ku deseei, ma hii de tuu musu ta fii u duumi ku deseei. So juu wan womi ta kisi di fii möön hesi möön di mujëë. Ma te de kë duumi ku deseei, nöö a musu dë wan ten ka hii de tuu ta fii u duumi ku deseei.

⁸ Di Bëibel an ta taki gbelingbelin unfa wan womi ku wan mujëë di tööu musu ta kai lobi ku deseei, an ta taki andi de an musu du te de ta kai lobi tu. Ma a ta lei taa de musu ta kai lobi (Kanda u Salumon 1:2; 2:6). Womi ku mujëë di tööu musu ta libi ku deseei a wan saapi fasi.

9. Faandi mbei an bi o fiti u wan sëmbë kë duumi ku wan sëmbë di hën ku ën an tööu?

⁹ Te u lobi Gadu ku woto sëmbë gaanfa, nöö wa o mbei na wan soni poi di tööu libi fuu. So womi ku mujëë di tööu, poi di tööu libi u de, u di de bi luku fanafiti soni a di së u womi ku mujëë. Wa musu luku na wan fanafiti soni a di së u womi ku mujëë, söseei wa musu mbei na wan fanafiti soni a di së u womi ku mujëë ko a u pakisei. Boiti di dë, wa musu du na wan soni di ta djei kuma u ta tuwë sinkii da wan sëmbë di an dë di sëmbë u ku ën tööu. Ee u ta du di soni aki, nöö wa ta lei taa u lobi di wotowan fuu. U musu hoi a pakisei taa Gadu sabi hii dee soni dee u ta pakisei ku hii dee soni dee u ta du. Di soni aki o heepi u fuu ta du soni di ta kai ku ën, söseei a o heepi u fuu hoi useei a di sëmbë di u ku ën tööu.​—Lesi Mateosi 5:27, 28; Hebelejën 4:13.

TE BOOKOHEDI DË A DI TÖÖU LIBI

10, 11. (a) Unfa sëmbë ta booko tööu a di ten aki tjika? (b) Andi di Bëibel ta taki u di paati di womi ku mujëë ta paati ku deseei? (c) Andi o heepi wan womi ku wan mujëë di tööu u de an paati ku deseei u hiniwan pikipiki soni hedi?

¹⁰ So womi ku mujëë ta paati nasö de ta booko tööu te de an saanfa de musu du ku dee gaan bookohedi di de ta miti a di tööu libi. A so köndë möön leki hafu u dee sëmbë dee tööu ta booko tööu. Ma di soni aki an ta pasa sö gaanfa a di kemeente u Keesitu sëmbë. Ma tökuseei sömëni Keesitu sëmbë di tööu ta abi gaan bookohedi a di tööu libi u de.

¹¹ Di Bëibel ta da u dee lai aki: „Dee mujëë an musu paati ku dee manu u de möönsö. Ma ee de paati, nöö de musu fika a ganda nöömö. De an musu go tei oto womi möön. Ma ee de kë tei manu nöö de musu go mindi ku di awoo manu u de. Söseei a dë da dee womi tu. De an musu tuwë dee mujëë u de möönsö” (1 Kolenti 7:10, 11). So womi ku mujëë di tööu ta si kuma dee bookohedi u de bigi sö tee taa de musu u paati ku deseei. Ma Jesosi bi taki unfa di paati di womi ku mujëë ta paati hogi tjika, di a bi toona taki di soni di Gadu bi taki u di tööu libi. Jesosi bi taki taa: „Fa Masa Gaangadu buta de ko di wan dë, nöö libisëmbë aan leti u paati de möönsö e” (Mateosi 19:3-6; Kenesesi 2:24). Fëën mbei Jehovah kë taa womi ku mujëë musu libi makandi ku deseei u nöömö (1 Kolenti 7:39). Hii u tuu musu hoi a pakisei taa Jehovah o luku dee soni dee u bi du te a o kuutu u. Di soni aki o heepi u fuu fan fusutan useei te u abi bookohedi a di tööu libi, ufö de ko möön bigi.

12. Andi sa mbei wan womi ku wan mujëë di tööu, bigi pakisei u paati ku deseei?

¹² Faandi mbei so womi ku mujëë di tööu ta miti gaan bookohedi a di tööu libi? So u dee womi ku dee mujëë aki an bi pakisei taa sö di tööu libi u de bi o dë. Fëën mbei de ta fii bookosaka, nasö hati u de ta boonu. So juu sëmbë di tööu ta kisi toobi a di tööu libi, u di de an kiija a di wan fasi nasö u di de an ta du soni a di wan fasi, te wan soni pasa. Te i ku dee manu bëë fii, nasö dee mujëë bëë fii an ta fusutan unuseei, nasö te wan ta kai a wan te a nama ku di fasi fa un musu wooko ku di möni fuunu, söseei te un musu kiija mii, nöö dee soni aki sa tja bookohedi ko a di tööu libi. Ma u ta si taa gaansë u dee Keesitu sëmbë dee tööu ta sabi unfa de musu libi ku dee bookohedi u de, u di de ta mbei Gadu tii de.

13. Andi da wantu soni di ta da womi ku mujëë di tööu, pasi u de paati ku deseei?

¹³ Soni dë di sa da womi ku mujëë di tööu pasi u de paati ku deseei. Dee soni aki da te wan womi an kë sölugu dee sëmbë fëën wosudendu, te wan u de ta fon di sëmbë di hën ku ën tööu, nasö te wan u de ta tapa di wotowan fu an go dini Gadu. Te womi ku mujëë abi gaan bookohedi a di tööu libi, nöö de musu hakisi dee gaanwomi u de heepi de. Dee womi aki abi öndöfeni, nöö de sa heepi womi ku mujëë di tööu u libi kumafa dee wëti u Gadu ta taki. Nöö te womi ku mujëë di tööu ta hakisi Jehovah faa heepi de ku di santa jeje fëën, nöö di soni dë o heepi de u hoi dee mama wëti u Bëibel, söseei a o heepi de u abi dee fasi dee Keesitu sëmbë musu abi. (Galasia 5:22, 23)^[2]​—(Luku di pisi a kaba u di woto.)

14. Andi di Bëibel ta piki Keesitu sëmbë di tööu ku sëmbë di an ta dini Jehovah?

¹⁴ Di Bëibel ta lei taa a dë wan bunu soni te womi ku mujëë ta libi makandi go dou, hii fa wan u de an ta dini Jehovah. (Lesi 1 Kolenti 7:12-14.) Jehovah ta si di womi nasö di mujëë di tööu ku wan dinima fëën „a wan apaiti fasi”. Dee mii di de pai seei Jehovah ta si a wan „apaiti” fasi tu, nöö fëën Gadu ta tjubi dee njönku miii u de. Paulosu bi da Keesitu sëmbë di tööu wan lai, di a bi taki taa: „Unfa wan mujëë sa sabi ee a sa mbei di manu fëën ko a biibi, ee an o ko? Söseei unfa wan womi sa sabi ee a sa mbei di mujëë fëën ko a biibi, ee an o ko?” (1 Kolenti 7:16) Sömëni Keesitu sëmbë di tööu, bi heepi de manu nasö de mujëë u ko ta dini Jehovah.

15, 16. (a) Un lai di Bëibel ta da mujëë di manu u de an ta dini Gadu? (b) Andi wan Keesitu sëmbë musu du „ee di sëmbë di na ta biibi kë paati” ku ën?

¹⁵ Apösutu Petuisi bi piki dee mujëë di tööu taa de musu ta saka deseei a de manu basu, sö taa „ee wan fuunu sai dë hën manu an piki di buka u Gadu eti, nöö a o bia piki ën söndö i fan ku ën. Biga a o si taa i ta libi wan gbelingbelin libi ku lesipeki u Gadu”. Ka u di mujëë ta konda soni u di biibi fëën hii juu da di womi, nöö kandë a bi o möön bunu u di mujëë heepi di manu fëën faa tei di tuutuu lei te a „ta libi a wan saapi fasi, pii fasi sö, hën da di soni Gadu ta kai gaan waiti soni”.​—1 Petuisi 3:1-4.

¹⁶ Ma unfa a dë ee wan baaa nasö wan sisa tööu ku wan sëmbë di an dë a di biibi, nöö di sëmbë dë kë u de paati? Wë di Bëibel ta taki taa: „Ee di sëmbë di na ta biibi kë paati ku di biibima faa go fëën, nöö be a go e. Nöö ee sö a waka, nöö antoobi. Di womi ee nasö di mujëë di ta biibi an musu fika kuma a dë taitai a duwengi. Biga wë Gadu bi kai u fuu musu dë fiifii ku hii sëmbë” (1 Kolenti 7:15). Hii fa de o dë fiifii te de paati, tökuseei di Bëibel an ta da di biibima pasi faa tööu ku wan woto sëmbë. Ma di biibima an musu duwengi di wotowan fëën fu an go. Kandë baka wan pisiten di sëmbë di an dë a biibi o kë ko libi ku di biibima go dou. Söseei a sa pasa taa di sëmbë di an dë a di biibi, sa ko toon wan dinima u Jehovah tu.

ANDI MUSU DË DI MÖÖN FANÖUDU SONI A DI TÖÖU LIBI FUU?

17. Andi Keesitu sëmbë di tööu musu buta a di fosu kamian a de libi?

¹⁷ U di u ta libi a „dee lasiti daka u di goonliba aki”, mbei u ta miti „hogi ten” di taanga u pasa (2 Timoteo 3:1-5). Fëën mbei u musu ta mbei möiti fuu ku Jehovah dë gaan mati u nöömö, faa sa tjubi u. Paulosu bi taki taa: „Di ten u dë aki a ko zuntu poi u di goonliba kaba . . . ee wan womi abi mujëë, nöö na di mujëë dë wanwan nöö a musu ta mëni. . . . Ee wan sëmbë i ta wooko ku dee soni u di goonliba aki, nöö ja musu da de pasi u de tai i” (1 Kolenti 7:29-31). Paulosu an bi kë taki taa womi ku mujëë di tööu musu ta niinga deseei. Ma u di u ta libi a dee lasiti daka, mbei u musu ta buta di dini di u ta dini Jehovah a di fosu kamian a u libi.​—Mateosi 6:33.

18. Andi sa mbei Keesitu sëmbë abi wan piizii tööu libi?

¹⁸ U ta si taa soni an ta waka bunu a sömëni tööu libi a dee taanga ten aki. U sa abi wan piizii tööu libi ka soni ta waka bunu ö? Wë ee u ta hoi useei a Jehovah ku dee sëmbë fëën, ee u ta hoi dee mama wëti u Bëibel, ku te u ta mbei Jehovah tii u ku di santa jeje fëën, nöö soni o waka bunu a di tööu libi fuu. Te u ta du di soni aki, nöö u ta tei ën u bigi taa ’Gadu tja tu sëmbë ko makandi’.​—Maikusi 10:9.