Di bunuhati u Jehovah hën wë mbei u ko fii

1, 2. Unfa Loomë 5:12 sa heepi u?

​LOOMË 5:12 ta taki taa: „Adam hën tja hogi du ko da hii sëmbë a goonliba aki e, nöö di hogi du tja dëdë ko. Hën wë mbei dëdë ko ta kii hii sëmbë te kisi tide, biga hii sëmbë tuu ta du hogi.” Di tëkisi aki da wan u dee tëkisi di u sabi bumbuu, nöö u ta lesi ën da dee sëmbë dee u ta lei soni u Bëibel.

² U wooko ku di tëkisi aki sömëni pasi a di buku Andi di Bëibel ta lei u tuutuu? Te u ta lei dee mii fuu nasö woto sëmbë soni a kapitë 3, 5 ku 6 u dee buku aki, nöö u lo’ u lesi Loomë 5:12 da de. Kandë u ta wooko ku di tëkisi aki u heepi de u fusuta faandi mbei di goonliba an dë wan paladëisi möön, faandi mbei u abi di lusupaima fanöudu, söseei faandi mbei u ta dëdë. Ma di tëkisi aki sa heepi hii u tuu fuu tei ën u bigi seei taa u ku Jehovah dë mati. A sa heepi u fuu ta möön du soni di ta kai ku ën, söseei fuu ta wakiti dee soni dee a paamusi u.

3. Andi u musu hoi a pakisei?

³ A tjali taa hii u tuu da zöndu libisëmbë. Hiniwan daka u ta mbei föutu. Ma Jehovah abi tjalihati u sëmbë. A sabi taa u da zöndu libisëmbë, nöö a dë kabakaba u da u paadon (Psalöm 103:13, 14). Jesosi taki taa u musu ta hakisi Gadu faa da u paadon u dee zöndu fuu (Lukasi 11:2-4). Te Jehovah da u paadon u dee föutu dee u bi mbei, nöö an dë fuu ta pakisei de nöömö. Boo go luku unfa a du ko taa Jehovah sa ta da u paadon.

UNFA A DU KO TAA JEHOVAH SA TA DA U PAADON?

4, 5. (a) Andi ta heepi u fuu fusutan Loomë 5:12? (b) Andi di wöutu „bunuhati” kë taki?

⁴ Di buku Loomë, möönmöön kapitë 6 fëën, ta heepi u fuu fusutan unfa Jehovah ta da u paadon u dee zöndu fuu. A kapitë 3 u ta lei taa „hii libisëmbë tuu du hogi a Gadu wojo”. Baka di dë, hën Paulosu taki taa: „U tuu Gadu du wan gaan soni da, kuma wan kado di a da u waiwai ku ën bunuhati. Biga a mbei u tuu sa ko bunu nëën wojo fu di Jesosi Keesitu dëdë paka faa puu u a hogi basu” (Loomë 3:23, 24). Di Giiki wöutu di de puu ko „bunuhati” ta mbei u pakisei te wan sëmbë du wan bunu soni da wan wotowan, söndö faa suku wan paka fëën, nöö di sëmbë an bi fiti u feni di bunu dë.

⁵ Wan könima bi taki taa di Giiki wöutu aki ta taki u di soni di Gadu ku Keesitu bi du u puu libisëmbë a zöndu ku dëdë basu. Fëën mbei di Bijbel-Nyun-Grontapuvertaling a Ingisitöngö puu di Giiki wöutu ko „bunuhati”. Boo go luku andi Gadu du da u, söseei unfa di bunuhati fëën ta tja wini ko da u nöunöu kaa, ku unfa a ta heepi u fuu dë seiki taa soni o waka bunu a di ten di ta ko.

6. Ambë sa feni wini u di bunuhati u Gadu, nöö unfa de sa feni ën?

⁶ U di Adam du zöndu, mbei hii libisëmbë abi zöndu, söseei de ta dëdë tu. U di soni aki mbei di Bëibel taki taa „di pasa Adam pasa Gaangadu buka dë . . . , hën buta dëdë ko tiima”. Ma Jehovah lei u taa a abi gaan bunuhati da u. Fëën mbei a puu u a di soni aki basu ku „di soni di di wan kodo Sëmbë du di ko a baka aki, Jesosi Keesitu” (Loomë 5:12, 15, 17). „Söseei di wan kodo Sëmbë aki piki Gadu buka, te a mbei sömëni sëmbë ko bumbuu sëmbë a Gadu wojo.” Nöö woo sa ta dë ku di mëni taa woo „feni di libi u teego. . . . Fu di Jesosi Keesitu u Masa dëdë da u”.​—Loomë 5:19, 21.

7. Faandi mbei u sa taki taa di lusupaima da wan kado di Gadu da u, di ta lei u taa a abi bunuhati?

⁷ Pakisei di soni aki: Jehovah an bi musu u da di Womi Mii fëën kuma wan lusupaima. Ma a lei u di gaan bunuhati fëën, u di a bi du di soni dë u puu u a zöndu ku dëdë basu. Na wan fuu bi fiti di soni di Gadu ku Jesosi du da u. U ta tei ën u bigi seei, u di de seeka soni da u fuu sa kisi paadon u dee zöndu fuu, söseei fuu sa libi u teego! Be a dë u si a di fasi fa u ta libi taa u tei di soni di Gadu du da u u bigi.

U MUSU TEI DI BUNUHATI U GADU U BIGI

8. Ku un fasi u pakisei u musu ta köni?

⁸ U sabi taa Gadu dë kabakaba u da u paadon u dee zöndu fuu, aluwasi u du wan gaan zöndu seei. Ma na u di Gadu abi bunuhati fuu, mbei u musu ta du soni di na bunu, u di woo ta mëni taa, tökuseei Jehovah o da u paadon. A di ten u dee fesiten Keesitu sëmbë, di so u dee apösutu bi dë a libi jeti, i bi abi Keesitu sëmbë di bi ta pakisei sö. (Lesi Judasi 4.) A di ten aki u musu ta köni be woto sëmbë an mbei taa pikipiki useei bigi ta pakisei sö.

9, 10. Unfa Paulosu ku wotowan bi fii kumutu a zöndu ku dëdë basu?

⁹ Paulosu bi piki dee Keesitu sëmbë taa an bi o bunu u de ta pakisei taa u di Gadu o da de paadon, nöö de sa ta du zöndu nöömö. Paulosu bi taki taa de an bi musu ta pakisei sö, u di de ’ku hogilibi paati kaa’, biga ’a dë seei leti kuma de dëdë dëën’. (Lesi Loomë 6:1, 2.) Andi Paulosu bi kë taki ku di soni aki?

¹⁰ Ku di lusupaima Gadu bi da Paulosu ku woto Keesitu sëmbë u di ten dë paadon u dee zöndu u de. Jehovah bi salufu de ku di santa jeje fëën u de ko dë miii fëën. Ee de bi hoi deseei nëën, nöö de bi o go libi a liba ala, nöö de bi o tii makandi ku Keesitu. Hii fa de bi dë a goonliba aki jeti, nöö unfa de „ku hogilibi paati kaa” te ’a dë seei leti kuma de dëdë dëën’? Paulosu bi lei u unfa di libi u de bi ko tooka gaanfa seei. A bi taki taa baka di Jesosi dëdë, hën a bi weki kumutu a dëdë ko toon wan jeje di an sa dëdë. Fëën mbei dëdë an bi „abi kaakiti nëën liba möön seei”. A di wan seei fasi a bi dë tu da dee Keesitu sëmbë. Di libi u de bi tooka gaanfa seei, u di de an bi da di zöndu sinkii u de pasi faa tii de möön. Sensi di ten dë, de ta mbei möiti u libi a wan fasi di ta kai ku Gadu. De bi „dëdë” da hogilibi kaa, nöö de ’sabi taa Gadu tö nöö de ta libi da, biga de ku Masa Jesosi Keesitu nama kaa’.​—Loomë 6:9, 11.

11. Na un fasi Keesitu sëmbë u di ten aki paati ku hogilibi kaa, te nöö a ’dë seei leti kuma de dëdë dëën?’

¹¹ Unfa a dë ku u? Unfa u „ku hogilibi paati kaa”, te nöö a „dë seei leti kuma u dëdë dëën”? Kandë a di ten di pasa u bi du sömëni soni di an bunu, söndö fuu bi pakisei unfa Jehovah ta si dee soni dee u bi du. ’A fesi dee kamiankamian fuu sinkii bi ta du fanafiti soni. Hii fan sootu pei hogi u bi ta du ku de nango nöömö’, hën da ’u bi dë saafuma a hogidu basu’ (Loomë 6:19, 20). Ma di u ko lei a di Bëibel unfa Gadu kë fuu libi, hën u tooka soni a u libi, u buta u libi a Gadu maun, hën u tei dopu. U bi kë piki Jehovah buka seei, nöö u bi kë libi a wan fasi di bi o kai ku ën. U „ko fii kumutu a hogilibi basu”, hën u ’ko saafu seei da Gadu fuu ta libi wan leti libi nëën wojo’.​—Loomë 6:17, 18.

12. Andi hiniwan fuu sa taki taa woo du?

¹² Tökuseei u abi di okasi jeti u taki andi woo du. Paulosu bi taki taa: „Dee hogi soni dee i hati ta kë du, wan musu da de pasi u de tii unu sinkii möön e. Wan musu haika de seei” (Loomë 6:12). U sa luku ee woo du dee soni di di zöndu sinkii fuu ta manda u, nasö ee woo basi de. Hakisi iseei di soni aki: ’Mi ta mbei dee zöndu fii u mi ko taanga sö tee taa mi ta du soni di na bunu ö?’ Naa mi ta koti pasi da de wantewante?’ Ee u ta tei di bunuhati u Gadu u bigi tuutuu, nöö woo mbei hii möiti u ta du soni di ta kai ku ën.

I SA FETI KU ZÖNDU

13. Faandi mbei u sa dë seiki taa u sa du soni di ta kai ku Gadu?

¹³ A di ten u dee fesiten Keesitu sëmbë, so sëmbë u di foto Kolenti bi ta fufuu, womi ku womi bi ta libi ku deseei, de bi ta libi fanafiti a di së u manu ku mujëë soni, de bi ta dini poipoi gadu, söseei de bi ta bebe dööngö. Ma di de bi ko sabi Jehovah, söseei di de bi ko lobi ën, hën de tooka soni a de libi. Sen bi kisi de u dee soni di de bi ta du (Loomë 6:21; 1 Kolenti 6:9-11). Dee Keesitu sëmbë u Loomë seei bi musu tooka dee seei soni aki a de libi tu. Paulosu bi piki de taa: „Wan musu da hogilibi pasi faa sa wooko a na wan pisi fuunu sinkii u du fanafiti soni ku ën. Nönö. Ma un musu hopo unu seei ku telu tuwë da Gadu. Un musu buta dee kamiankamian fuunu sinkii tuu nëën maun kuma wooko felu, faa sa du dee leti wooko fëën ku de. Biga un dëdë da di awoo libi fuunu, fuun toona ko a wan hii njunjun libi dendu” (Loomë 6:13). Paulosu bi dë seiki taa de bi o sa du soni di ta kai ku Gadu, söseei taa de bi sa ta feni wini u di bunuhati u Gadu u nöömö.

14, 15. Andi u musu hakisi useei?

¹⁴ Sö nöö a dë a di ten fuu aki. Kandë a di ten aki so u dee baaa ku dee sisa fuu bi ta libi kuma dee sëmbë u Kolenti. Ma baka di de ko sabi Jehovah, hën de tooka di fasi fa de bi ta libi. A bi dë seei kuma ’Gadu wasi de ko limbo’. Hii u tuu bi tooka soni a u libi u mbei Jehovah wai ku u. Nöunöu kaa u kë lei taa u tei di bunuhati u Gadu u bigi. Fëën mbei u dë kabakaba u feti ku dee zöndu fii fuu, söseei u dini Jehovah hii u libi longi.

¹⁵ A dë sö tuu taa u musu koti pasi da dee gaan zöndu di so sëmbë u Kolenti bi ta du. Wa sa ta pakisei taa Gadu o lei u di bunuhati fëën, söseei taa a o ta da u paadon ee u ta du dee lö soni aki nöömö. Ma unfa a dë ku dee zöndu dee so sëmbë an ta si kuma gaan zöndu? U dë kabakaba u du hii soni di u sa du u piki Jehovah buka a hii soni ö?​—Loomë 6:14, 17.

16. Unfa u du sabi taa u musu koti pasi da woto zöndu tu, boiti dee zöndu dee sikifi a 1 Kolenti 6:9-11?

¹⁶ Pakisei apösutu Paulosu. A bi sikifi taa: „Ma ta dë a di leiki u di Akaa [jeje, NW] u Gadu. A dë kuma dee hogi fasi u libisëmbë dee dë a mi hati aki, de bai mi tei ko saafuma u de. . . .Wë biga ma ta fusutan seei andi mi ta du. Biga di soni di mi ta kë du, nöö nëën mi ta du e, ma di soni di mi buuse gaan buuse, nöö te u mi mëni nöö mi du ën kaa” (Loomë 7:14, 15). Hii fa Paulosu an bi ta du dee soni dee sikifi a 1 Kolenti 6:9-11, tökuseei a bi taki taa a bi ta du zöndu. A bi ta kë du soni di ta kai ku Jehovah. Fëën mbei a bi ta mbei möiti seei fu an du soni di an bunu. (Lesi Loomë 7:21-23.) Boo djeesi Paulosu, nöö boo du hii soni di u sa du u piki Jehovah buka.

17. Faandi mbei i kë libi ku wan limbo hati?

¹⁷ Wë u sabi taa ee u kë dini Jehovah, nöö u musu ta du soni ku wan limbo hati. (Lesi Nöngö 14:5; Efeise 4:25.) Wa kë dë kuma Saatan u di „nëën mindi soni ku lëgëdë kumutu”. Söseei u sabi taa Ananiasi ku hën mujëë dëdë u di de bi mindi soni (Johanisi 8:44; Tjabukama 5:1-11). Te u ta libi ku wan limbo hati, söseei te u ta tei di bunuhati u Gadu u bigi tuutuu, nöö na mindi nöö wa o ta mindi soni, ma hii juu woo ta taki tuutuu soni.

18, 19. Andi a kë taki te wan sëmbë ta taki tuutuu soni?

¹⁸ Wan sëmbë sa ganjan wan wotowan söndö faa mindi soni. Jehovah bi piki dee Isaëli sëmbë taa: „Wan musu fufuu, wan musu ganjan sëmbë, nöö wan musu du soni u ganjan wotowan.” Faandi mbei de bi musu piki Jehovah buka a di soni aki? Wë Jehovah bi taki taa: „Unu musu dë santa, biga mi Jehovah di Gadu fuunu, dë santa” (Leifitiki 19:2, 11). Hii fa wa o mindi soni, ma ee u mbei wotowan biibi wan soni di an dë sö tuutuu, nöö hën da u ta ganjan sëmbë.

¹⁹ Boo taa wan womi piki di basi fëën, nasö dee woto wookoma taa a musu kumutu fuuku a wooko, u di a musu go a data. Ma na u di soni aki nöö mbei a kë kumutu fuuku a wooko, ma u di a kë go möön hesi a fakansi. Na a data wë i si a bi musu go sö e, ma go a bi musu go tei wan deesi na aputeiki, nasö a bi musu go paka wan data pala sö. Tuutuu soni a bi taki ö, naa ganjan a bi ganjan dee sëmbë? Di womi mbei sëmbë biibi wan soni di na tuu. So juu sëmbë ta ganjan wotowan u de feni wan soni di de kë, nasö u sëmbë an sitaafu de. Ma uu ta piki Jehovah buka. A piki u taa: „Wan musu ganjan sëmbë.” U kë du di soni di a piki u taa bunu, söseei di ta kai ku ën.​—Loomë 6:19.

20, 21. Ku un woto soni u musu ta köni ee u ta tei di bunuhati u Gadu u bigi?

²⁰ Wë u ta koti pasi da fanafiti libi a di së u manu ku mujëë soni, da bebe dööngö, söseei da dee woto gaangaan zöndu. Ma boiti dee soni aki, wa kë du na wan soni di an ta kai ku Jehovah. Hën da na köni nöö woo ta köni u na libi fanafiti a di së u manu ku mujëë soni, ma woo ta köni u na luku nasö haika soni di nama ku dee soni dë tu. Na möiti nöö woo ta mbei u na bebe dööngö, ma wa o ta bebe u tee a fika piki sö möön nöö u dööngö. Kandë u musu mbei taanga möiti u feti ku dee lö pei soni aki, ma u sa wini de.

²¹ U musu buta kuma maaka u du di soni di Paulosu bi taki, di a taki taa: „Dee hogi soni dee i hati ta kë du, wan musu da de pasi u de tii unu sinkii möön e. Wan musu haika de seei” (Loomë 6:12; 7:18-20). A dë sö tuu ta wa sa koti pasi da hii zöndu. Ma te u ta feti ku hii pei zöndu, nöö a sö wan fasi u ta lei taa u ta tei di bunuhati di Gadu ku Keesitu lei u u bigi.

22. Ee u ta tei di bunuhati u Gadu u bigi tuutuu, nöö un paka woo feni?

²² Jehovah da u paadon u dee zöndu fuu, nöö a sa ta da u paadon hii juu tu. U ta tei di bunuhati fëën u bigi seei! Fëën mbei boo ta mbei taanga möiti u na ta du dee soni dee a taki taa an bunu, aluwasi ee woto sëmbë an ta si de kuma zöndu. Un paka woo feni te u du di soni aki? Paulosu bi taki taa: „Ma fa un ko fii kumutu a hogilibi basu naandë hën un ko dë saafu u Gadu aki, nöö awa ufö un abi wini. Biga un dë a pasi awaa fuun ko gbelingbelin da Gadu söndö föutu, nöö di kaba fëën hën da woon libi . . . fu teego.”​—Loomë 6:22.