Di booko di jesi u mi bi booko an tapa mi u mi lei wotowan soni

A DI jaa 1910, hën mi mama ku mi tata foloisi kumutu a di foto Tbilisi, di dë a di köndë Georgia, u de go libi a di köndë Kanada. De bi ta libi a wan piki wosu di bi dë zuntu ku wan kamian de ta kai Pelly, di dë a Saskatchewan. De pai mi a di jaa 1928, nöö mi da di möön njönkuwan u dee sikisi mii u mi mama ku mi tata. Mi tata dëdë sikisi liba ufö de pai mi, nöö mi mama dëdë di mi bi dë piki mii jeti. Kölö sö baka di dë, hën di gaan sisa u mi de kai Lucy dëdë di a bi abi 17 jaa. Fëën mbei di tio u mi de kai Nick, hën bi ta sölugu mi ku dee woto baaa ku sisa u mi.

Wan daka di mi bi dë piki mii jeti, hën dee sëmbë u mi si di mi bi ta hai wan u dee hasi fuu nëën labu. De bi ta fëëë taa di hasi bi o sikopu mi. Fëën mbei de bi ta bai ta piki mi be mi disa di hasi. Ma mi bi taanpu bia baka da de, nöö ma bi ta jei di de bi ta bai mi. Kölöku taa di hasi an bi sikopu mi. Ma a di daka dë dee sëmbë u mi bi ko sabi taa jesi u mi booko.

Wan sëmbë di bi sabi dee sëmbë u mi, bi taki taa a bi o möön bunu u mi go a wan bookojesima siköö. Fëën mbei mi tio bi manda mi go a di siköö aki di bi dë a di foto Saskatoon, di dë a Saskatchewan. Di siköö aki bi longi ku di kamian ka dee famii u mi bi ta libi, nöö u di mi bi abi feifi jaa nöö, mbei mi bi ta fëëë seei. Te u bi abi fakansi, söseei te wan piizii daka bi dë, nëën ufö mi bi sa nango ta luku de. Pikipiki mi bi ko ta fan tapabukamatöngö, nöö mi bi lo’ u pëë ku dee woto mii.

DI MI LEI DEE TUUTUU LEI U BËIBEL

A di jaa 1939, hën di möön gaan sisa u mi de kai Marion, tööu ku Bill Danylchuck, nöö de bi ta sölugu mi ku di sisa u mi de kai Frances. De da dee fosu sëmbë u di famii u mi di bi bigi ta lei soni a dee Jehovah Kotoigi. Te mi bi ko a de a fakansi, nöö de bi ta mbei hii möiti u lei mi dee soni di de bi ta lei a Bëibel. A bi ta taanga da mi u fan ku de, u di de an bi sa’ u fan tapabukamatöngö. Ma de bi sa si taa mi bi lobi dee soni dee mi bi ta lei u Jehovah. Mi bi ko fusutan taa dee soni di de bi ta lei bi nama ku di Bëibel. Fëën mbei mi bi nango ku de te de bi nango a di peleikiwooko. Kölö sö baka di dë, hën mi bi kë tei dopu. Nöö a 5 u wajamaka-liba u di jaa 1941, hën de tei wata a wan baaku lai a wan felu baki, hën Bill dopu mi nëën. Di wata bi kötö seei!

Di mi bi toona go a wosu a di fakansi a di jaa 1946, hën u go a wan könklësi di bi hoi a Cleveland, Ohio, na Amëëkanköndë. A di fosu daka u di könklësi dee sisa u mi bi sikifi dee soni de bi taki a di könklësi da mi. Ma a di u tu daka, mi bi wai seei di mi jei taa wantu tapabukama bi dë a di könklësi, nöö wan sëmbë bi ta puu dee taki da de a tapabukamatöngö. Te u kaba fëën, mi bi ko ta fusutan dee soni de bi ta taki a di könklësi, nöö mi bi ko ta fusutan dee lei u Bëibel möön bunu!

DI MI BI TA LEI SËMBË DI TUUTUU LEI

A di ten dë di Fosu Goonliba Feti bi kaba, nöö dee sëmbë bi kë lei taa de bi lobi di köndë u de. Ma di mi bi kumutu a di könklësi u mi go bigi siköö baka, nöö mi bi dë kabakaba u hoi miseei a Jehovah. Fëën mbei ma bi ta kanda da di faaka u di köndë möön, söseei ma bi ta hoi dee piizii daka u di köndë möön tu. Ma bi nango a keiki ku dee woto mii u di siköö möön. Dee sëmbë dee bi ta tei fesi a di siköö an bi lobi di soni aki seei. Fëën mbei de bi ta du ku mi, nöö de bi ta piki mi peipei soni u mi disa di tuutuu lei. Dee mii dee mi ku de bi ta sindo a di wan kalasi bi ta si andi bi ta pasa, nöö di soni aki bi da mi di okasi u mi sa peleiki da de. So u dee mii u di kalasi u mi, bi tei di tuutuu lei, nöö te kuma tide de ta dini Jehovah jeti. Dee mii aki da Larry Androsoff, Norman Dittrick, ku Emil Schneider.

Hii juu mi bi ta mbei möiti u peleiki da dee tapabukama te mi bi go a wan woto foto. Di mi bi go a Montreal, hën mi go a di kamian ka dee bookojesima bi ta ko makandi. Di mi go a di kamian dë, hën mi peleiki da wan njönku kijoo de kai Eddie Tager. Di njönku kijoo aki bi dë wan u dee hogiduma u di köndë. Bakaten a bi ta heepi a di tapabukama kemeente u Laval, di dë a di foto Quebec, nöö a di jaa di pasa dë a dëdë. Söseei mi bi miti wan njönku kijoo de kai Juan Ardanez. Leti kumafa dee sëmbë u Belia fu awooten bi ta öndösuku soni u ko sabi ee dee soni de ta lei ta kai ku Bëibel, sö nöö hënseei bi ta du ën tu (Tjabukama 17:10, 11). Hënseei bi ko a di tuutuu lei tu, nöö a bi dë wan gaanwomi a Ottawa, di dë a Ontario, u te a dëdë.

A di jaa 1950, hën mi foloisi go a di foto Vancouver. Hii fa mi bi lo’ u peleiki da dee bookojesima, tökuseei nöiti mi o fëëkëtë di soni di bi pasa di mi bi peleiki da wan mujëë di an bi dë bookojesima. Di mujëë aki de kai Chris Spicer. A bi paka u fuu ta tja buku ko dëën hiniwan juu, nöö a bi kë u mi go fan ku hën manu Gary. Di mi bi go a de pisi, hën u bi ta sikifi soni a pampia fuu bi sa fan ku useei. Sensi di daka dë wa bi miti möön. Ma baka wantu jaa hën de ko fan ku mi a wan könklësi di bi hoi a Toronto, Ontario. A di daka dë Gary bi tei dopu. Di soni aki bi lei mi taa a dë fanöudu fuu ta peleiki hii juu, biga wa sabi ee wan sëmbë di u bi peleiki da o ko a di tuutuu lei.

Bakaten hën mi toona foloisi go a Saskatoon. A di foto aki wan mujëë hakisi mi u mi lei dee tulengi fëën soni u Bëibel. Dee tulengi aki de bi ta kai Jean ku Joan Rothenberger, nöö jesi u de bi booko. Deseei bi go a di bookojesima siköö ka mi bi go. Dee tulengi aki seei bi ta konda dee soni de bi ta lei da dee woto mii u di kalasi u de. Te u kaba fëën, feifi mii u di kalasi u de ko toon Jehovah Kotoigi. Wan u de da Eunice Colin. Di lasiti jaa di mi bi dë a di siköö dë jeti, hën mi bi miti Eunice. A di ten dë a bi da mi wan pisi kuku, hën a hakisi mi ee mi kë toon hën mati. Bakaten, hën mi ku ën ko tööu!

Di Eunice mama jei taa a ta lei soni u Bëibel, hën a piki di fesima u di siköö, be a fan ku Eunice faa tapa ku di soni di a ta du dë. Hii fa a bi mbei möiti u tapëën, söseei hii fa a bi tei dee buku fëën puu nëën, tökuseei Eunice bi dë kabakaba u hoi hënseei a Jehovah. Di a bi kë tei dopu, hën di mama ku di tata fëën piki ën taa: „Te i kë nöö i toon wan Jehovah, nöö joo si ee ja o kumutu a di wosu aki!” Wë di Eunice tapa 17 jaa, hën a go libi ku wanlö Jehovah Kotoigi. A bi ta lei soni u Bëibel go dou, nöö te u kaba fëën a tei dopu. Di u tööu a di jaa 1960, nöö Eunice mama ku hën tata an bi ko a di tööu. Ma möön dee jaa bi ta pasa, möön de bi ko abi lesipeki da di biibi fuu, ku di fasi fa u bi kiija dee mii fuu.

JEHOVAH SÖLUGU MI

U di mi ku mi mujëë jesi booko, mbei a bi ta taanga da u fuu kiija dee seibi womi mii fuu di an bi dë bookojesima. Ma u bi lei de di tapabukamatöngö, nöö di soni dë hën bi mbei taa u ku de bi sa ta fan, söseei fuu bi sa lei de soni u di tuutuu lei. Dee baaa ku dee sisa u di kemeente fuu bi ta heepi u gaanfa seei. Wan daka, hën wan sëmbë u di kemeente sikifi wan soni u piki u taa dee womi mii fuu ta kosi a di Könuköndë zali. Wantewante u bi fan ku de. Fö u dee womi mii u mi dë gaanwomi, nöö de ku de mujëë ku dee mii u de ta dini Jehovah fajafaja. Dee womi mii aki da James, Jerry, Nicholas, ku Steven. Nöö Nicholas ku hën mujëë Deborah nango heepi u puu buku ko a tapabukamatöngö a di Bëtëli u Ingisiköndë. Nöö Steven ku hën mujëë Shannan ta puu buku a tapabukamatöngö a di Bëtëli fu Amëëkanköndë.

Ma a tjali taa wan liba ufö u tapa 40 jaa di u tööu, hën Eunice dëdë, u di a bi abi di siki de kai kankël. A di pisiten di a bi dë ku di siki, nöö di biibi di a bi ta biibi taa sëmbë o weki kumutu a dëdë, bi heepi ën faa hoi dou. Mi ta wakiti di daka di mi o si ën baka.

A bakajai-liba u di jaa 2012, hën mi kai booko djönku. Mi bi ko si taa mi bi abi heepi fanöudu. Fëën mbei mi foloisi go libi ku wan u dee womi mii u mi ku hën mujëë. Nöunöu u dë a di tapabukama kemeente u Calgary, nöö mi dë wan gaanwomi a di kemeente aki. Wë disi da di fosu pasi di mi dë a wan tapabukama kemeente! Ma nöö unfa mi ku Jehovah bi sa dë gaan mati hii dee jaa dee mi bi dë a wan kemeente ka de ta fan Ingisitöngö? Wë Jehovah hën bi ta heepi mi sö. Jehovah bi hoi hënseei a di soni di a paamusi taa a o sölugu dee mii dee an abi tata (Psalöm 10:14). Hii dee sëmbë dee bi mbei möiti u sikifi biifi, dee bi ta lei di tapabukamatöngö, ku dee bi ta puu dee soni de bi ta taki a tapabukamatöngö da mi, tuu mi ta da tangi.

So juu ma bi ta fusutan andi de bi ta taki, nasö mi bi ta fii kuma na wan sëmbë saanfa u heepi bookojesima. Te a bi dë sö, nöö mi bi ta kë disa hii soni. Ma nöö mi bi ta pakisei di soni di Petuisi bi piki Jesosi. A bi piki ën taa: „Masa o, na ambë seei u sa go möönsö? Biga i nöö abi dee wöutu dee ta da sëmbë libi u teego” (Johanisi 6:66-68). Leti kumafa dee woto baaa ku dee sisa dee jesi u de booko bi abi pasensi, sö nöö miseei lei u ko abi pasensi tu. Mi lei u buta futoou a Jehovah ku di ölganisaasi fëën, nöö mi feni sömëni wini seei. Nöunöu sömëni u dee buku fuu dë a di töngö u mi. Mi ta wai seei taa mi sa go a dee komakandi, ku dee könklësi ka de ta fan di tapabukamatöngö fu Amëëkanköndë. Wë mi ta wai seei, nöö mi feni wini u di dini di mi ta dini Jehovah di Gadu fuu.