Dee soni dee Maikusi sikifi
15 A di fuuku mamate, hën wantewante dee fesima u dee begima ku dee gaanwomi ku dee sabima u Wëti bi ko makandi. Hën da hii dee sëmbë u di Gaan kuutuwosu u dee Dju. Di de bui Jesosi te de kaba, hën de tjëën go leifi da di gaama de kai Pilati. 2 Hën Gaama Pilati hakisi ën taa: „Ju da di könu u dee Dju ö?” Hën Jesosi piki ën taa: „A dë leti kumafa i si gaama taki naandë.” 3 Ma dee fesima u dee begima bi ta pii sömëni soni ta kaagi Jesosi. 4 Hën Gaama Pilati hakisi ën taa: „Ja ta jei andi dee womi aki ta taki fii ö? Ja ta piki nö?” 5 Ma Jesosi an piki na wan soni möön. Nöö di soni dë bi bigi da Gaama Pilati.
6 A bi dë sö taa te di Pasika piizii dou, nöö di gaama bi guwenti u puu wan sëmbë a dunguwosu. A bi ta puu di sëmbë di lanti bi kë faa puu da de. 7 Nöö di ten dë, wan womi di de bi ta kai Balabasi ku wanlö woto womi bi dë a dunguwosu. Dee womi aki bi kii wanlö sëmbë a di ten di de bi hopo fia ku dee tiima u di köndë. 8 Dee sëmbë u di köndë ko a Gaama Pilati, hën de hakisi ën faa du di soni di a guwenti du da de hiniwan jaa. 9 Hën a hakisi de taa: „Un kë u mi lusu di Könu fuunu da unu ö?” 10 Gaama Pilati bi sabi taa dee fesima u dee begima bi leifi Jesosi dëën, u di de bi ta haun ku ën. 11 Ma dee fesima u dee begima piki dee sëmbë u de taki taa de kë faa lusu Balabasi da de. 12 Hën Gaama Pilati hakisi de taa: „Nöö andi un kë u mi du ku di sëmbë di un ta taki taa da di Könu u dee Dju?” 13 Hën hii de tuu bai taa: „Pekëën a wan posu kii!” 14 Hën Gaama Pilati hakisi de taa: „Wë faandi mbei? Un hogi a du?” Ma de bi ta bai möön taanga taa: „Pekëën a wan posu kii!” 15 Wë nöö u di di gaama kë u dee sëmbë hati musu kötö, hën a lusu Balabasi puu a di dunguwosu da de. Hën a piki dee sodati fëën be de wipi Jesosi, söseei u de tjëën go peka a wan posu kii.
16 Nöö hën dee sodati tei Jesosi, hën de tjëën go a wan apaiti kamian u di wosu u di gaama. Hën de kai hii dee sodati ko makandi. 17 De bisi wan pei baaubaau djapona dëën. Hën de tei wan tatai di dë ku maka, hën de lolu ën mbei wan könu kaapusa, hën de tuusi ën nëën hedi. 18 Hën de ta piki ën taa: „Odi oo, Könu u dee Dju!” 19 Nöö hën de tei wan pau, hën de ta naki ën a hedi ta tunta nëën fesi. De ta tjökö kini a goon nëën fesi ta du kuma de ta lesipeki ën. 20 Di de mbei ën fa te de kaba, hën de puu di baaubaau djapona nëën sinkii, hën de toona bisi dee koosu fëën dëën baka, hën de tjëën go ka de o pekëën a di posu awaa. 21 Di de dë a pasi nango, hën de si wan womi u di köndë Sileni de kai Simön. A bi dë di tata u Lufusi ku Alekesani. A bi kumutu a wan boiti kamian ta ko a ganda, hën de duwengi ën faa tja di posu* u Jesosi dëën.
22 Hën de tja Jesosi go a di kamian de kai Golugota, di kë taki „Hedibonu Kamian”. 23 Di de dou a di kamian, hën de dëën win mökisi ku wan pei deesi* faa bebe. Ma an bi kë bebe ën. 24 Hën de pekëën a di posu te de kaba, hën de tuwë lötu luku ambë o feni dee koosu fëën. 25 A bi dë wan pisiten u nëigi juu mamate di de peka Jesosi a di posu. 26 De peka wan soni a di posu hedi ka de bi sikifi faandi mbei a bi kisi di sitaafu dë. De bi sikifi taa: „Di Könu u dee Dju sëmbë.” 27 De bi peka tu hogiduma a Jesosi bandja. Wan u de bi dë a letisë maun fëën, nöö di wotowan bi dë a töötösë maun fëën. 28* —— 29 Dee sëmbë dee bi ta waka pasa dë bi ta kosi ën ta seki hedi ta mbei ën fa. De bi ta taki taa: „Na ju bi taki taa joo booko di Wosu u Gadu, nöö joo toona mbei ën a dii daka dendu ö? 30 Heepi iseei nö. Saka kumutu a di posu* boo si!” 31 Dee fesima u dee begima ku dee sabima u Wëti seei bi ta mbei ën fa. De bi ta taki taa: „Wë a bi ta heepi woto sëmbë, nöö faandi mbei an sa heepi hënseei? 32 Ee hën da di Keesitu, söseei ee hën da di Könu u Isaëli, nöö be a saka kumutu a di posu,* nöö te u si sö, nöö woo biibi ën.” Dee sëmbë dee de bi peka nëën bandja seei bi ta mbei ën fa.
33 Bigi a tuwalufu juu sonuhati te kisi dii juu sapate, hën hii di köndë ko dungu kankan. 34 A di pisiten u dii juu sapate, hën Jesosi bai taanga taa: „Eli, Eli, lama sabaktani?” Di soni aki kë taki „Gadu e, di Gadu u mi, faandi mbei i bia baka disa mi sö?” 35 Di wanlö sëmbë dee bi sai taanputaanpu naandë jei ën, hën de taki taa: „Un haika dë! A ta kai Elia.” 36 Hën wan sëmbë kule go tei wan sipönsu, hën a munjëën ku wan gandjigandji win, hën a butëën a wan pau buka tëndë da Jesosi faa bebe. Hën a taa: „Un disëën. Boo luku ee Elia o ko puu ën a di posu.” 37 Ma Jesosi bai taanga, hën böö fëën koti. 38 Hën di gaan degi koosu di bi dë a di Wosu u Gadu tënë zalalaa kumutu a liba te kisi goon. 39 Di di hedima u dee sodati di bi taanpu a Jesosi bandja si dee soni dee pasa di Jesosi dëdë, hën a taa: „Di womi aki bi musu u dë di Mii u Gadu tuutuu.”
40 Nöö wanlö mujëë bi dë taanputaanpu te a longi ta luku. Wantu u dee mujëë aki bi dë Malia Magidala, Malia di mama u Jakobosi di pikiwan* ku Josesi, ku Salome. 41 Dee mujëë aki ku sömëni woto mujëë bi ta dë makandi ku Jesosi ta heepi ën a soni di a bi dë a Galilea, nöö de bi go ku ën a Jelusalën.
42 U di a bi ko lati kaa, söseei u di di woto daka fëën bi dë Saba daka, mbei de bi ta seeka soni. 43 Hën wan guduma de kai Josëfu u di köndë Alimatea ko dou. Di womi aki bi dë wan sëmbë di de bi ta lesipeki a di Gaan kuutuwosu u dee Dju. Hënseei bi ta wakiti di Tii u Gadu tu. A tai hati, hën a go a Gaama Pilati go hakisi ën faa dëën di dëdë sinkii u Jesosi. 44 Ma Gaama Pilati bi kë sabi ee Jesosi bi dëdë kaa. Fëën mbei a manda kai di hedima u sodati, hën a hakisi ën ee Jesosi dëdë kaa. 45 Nöö di Gaama jei taa Jesosi bi dëdë tuutuu, hën a da Josëfu pasi faa tei di dëdë sinkii u Jesosi tja go bei. 46 Hën Josëfu bai gaan dii koosu, hën a puu Jesosi a di posu, hën a lolu ën a dee koosu, hën a butëën a wan sitonu baaku ka de ta bei sëmbë. Hën a logoda wan gaan gindi sitonu ko tapa di baaku buka. 47 Ma Malia Magidala ku Malia di mama u Josesi, bi fika naandë ta luku ka de bi butëën.