Dee soni dee u sa lei a dee tu biifi u Petuisi

1. Andi Jehovah bi mbei Petuisi du di Petuisi bi ko sabi taa an o libi longi möön?

APÖSUTU PETUISI bi dini Jehovah ku hii hën hati sömëni jaa longi. A bi ta waka makandi ku Jesosi, a bi go peleiki a kamian ka sëmbë an bi jei di bunu buka jeti, söseei a bi dë wan u dee baaa u di Tii Kulupu u fesiten. Ma di a bi ko sabi taa an bi o libi longi möön, hën Jehovah dëën möön hia wooko faa du dëën. A di pisiten u di jaa 62 te go miti di jaa 64 baka Keesitu, hën Jehovah bi mbei a sikifi tu biifi. Dee tu biifi dë da dee buku u Bëibel di de ta kai 1 Petuisi ku 2 Petuisi. Petuisi bi kë u dee tu buku aki heepi dee Keesitu sëmbë baka te a ko lasi libi.​—2 Pet. 1:12-15.

2. Faandi mbei u sa taki taa dee biifi u Petuisi bi dë fanöudu a di ten di a sikifi de?

² Petuisi bi sikifi dee tu biifi fëën a di pisiten di dee baaa ku dee sisa u di ten fëën bi „ta tja sömëni pei sitaafu ku fuka” (1 Pet. 1:6). Wanlö hogihati womi bi ta pooba u tja fanafiti libi ku poipoi lei ko a di kemeente (2 Pet. 2:1, 2, 14). Dee Keesitu sëmbë dee bi ta libi a Jelusalen bi ta libi a di pisiten ka ’hii soni bi o kaba’. A di pisiten dë, dee Loomë sodati bi o booko di foto Jelusalen kaba a sösö, söseei di Dju biibi an bi o dë möön (1 Pet. 4:7). U dë seiki taa dee biifi u Petuisi bi heepi dee fesiten Keesitu sëmbë u de hoi dou, hii fa peipei fuka bi ta miti de, söseei u de bi sa dë seekaseeka ta wakiti dee taanga ten dee bi dë a de fesi ta ko.b

3. Faandi mbei woo buta pakisei a dee tu biifi u Petuisi?

³ Hii fa Petuisi bi sikifi dee tu biifi aki da dee fesiten Keesitu sëmbë, tökuseei Jehovah tei de ko wan pisi u di Wöutu fëën. A sö wan fasi useei sa feni wini u de tu (Lom. 15:4). Leti kuma dee Keesitu sëmbë dë, useei ta libi a wan goonliba ka sëmbë an ta tja deseei a wan bunu fasi, nöö fuka ta miti u tu di ta mbei a ta taanga da u fuu dini Jehovah. Abiti möön wan gaan fuka o ko di o bigi möön di bi ko a di ten u dee Dju. Sömëni fanöudu soni dë a dee biifi u Petuisi di sa heepi u. Dee soni aki o heepi u fuu sa dë kabakaba ta wakiti di daka u Jehovah, de o heepi u fu wa ta fëëë libisëmbë möön, söseei de o heepi u fuu ko ta lobi u na u möön gaanfa. Boiti di dë, de sa heepi dee gaanwomi tu u de heepi dee sëmbë u Jehovah möön bunu.

DË KABAKABA TA WAKITI DI DAKA U JEHOVAH

4. Andi sa mbei di biibi fuu ko suwaki, te u luku 2 Petuisi 3:3, 4?

⁴ U ta libi ku sëmbë di an ta biibi dee tjabukama woto u Bëibel. Dee felantima fuu sa ta mbei u fa, u di sömëni jaa kaa u ta taki taa di kaba u di goonliba aki ta ko. So sëmbë ta taki seei taa nöiti di kaba o ko. (Lesi 2 Petuisi 3:3, 4.) Ee dee famii fuu, dee sëmbë dee u ta peleiki da, nasö dee sëmbë dee u ku de ta wooko a di wan kamian ta taki taa nöiti di kaba o ko, nöö di soni dë sa mbei di biibi fuu ko suwaki. Wë Petuisi bi taki andi sa heepi u. 

5. Andi sa heepi u fuu ta si di ten di Jehovah o poi di hogi goonliba aki kumafa hën a ta si ën? (2 Petuisi 3:8, 9)

⁵ So sëmbë sa ko ta si kuma Jehovah ta tei ten poi u ko seeka di hogi goonliba aki. Dee soni dee Petuisi bi taki sa heepi u fuu hoi a pakisei taa di fasi fa Jehovah ta si di ten, tooka gaanfa seei ku di fasi fa libisëmbë ta si ën. (Lesi 2 Petuisi 3:8, 9.) Wan dusu jaa dë kuma wan daka da Jehovah. Jehovah abi pasensi, nöö an kë u na wan sëmbë lasi de libi. Te di daka fëën dou, nöö di hogi goonliba aki an o dë möön. Fëën mbei a dë wan gaan soni seei taa u ta tei di ten di fika fuu peleiki da sëmbë a hii së u goonliba.

6. Unfa u sa ta hoi di daka u Jehovah a pakisei? (2 Petuisi 3:11, 12)

⁶ Petuisi da u taanga fuu ta hoi di daka u Jehovah a pakisei. (Lesi 2 Petuisi 3:11, 12.) Unfa u sa ta hoi di daka dë a pakisei? U sa ta hoi di daka u Jehovah a pakisei te u ta mbei möiti hii daka fuu ta kai pakisei a dee gaan bunu dee woo feni a di njunjun goonliba. Pakisei luku fa joo ta hai böö fëëë sö te wan suti ventu ta böö. Pakisei luku fa joo ta fii te joo ta njan wan suti njanjan di bunu da di gösöntu fii, nasö te joo ta wai ku dee famii fii ku dee mati fii dee o weki ko a libi baka. Söseei pakisei luku fa a o dë te joo ta lei dee fesiten sëmbë fa dee tjabukama woto u Bëibel pasa tuutuu. Te i ta kai pakisei a dee lö soni aki, nöö de o heepi i fii dë kabakaba ta wakiti di daka u Jehovah, söseei de o heepi i fii dë seiki taa u ta libi a dee lasiti daka. U di u „sabi dee soni aki a fesi”, mbei wa kë u sëmbë ganjan u „kisi” ku dee poipoi lei u de.​—2 Pet. 3:17.

NA FËËË LIBISËMBË

7. Andi di fëëë di u ta fëëë libisëmbë sa tapa u fuu du?

⁷ Möön woo ta hoi di daka u Jehovah pakisei, möön woo ta kë konda di bunu buka da wotowan. Ma so juu a sa pasa taa u fëëë u peleiki da wan sëmbë. Faandi mbei? Kandë u di u ta fëëë unfa sëmbë o si u. Di soni dë hën bi miti Petuisi. Di ndeti ufö de kii Jesosi, hën Petuisi bi fëëë u piki sëmbë taa hën da wan u dee bakama u Jesosi, nöö a bi fia sömëni pasi taa an sabi ën seei! (Mat. 26:69-75) Ma bakaten Petuisi an bi ko ta fëëë sëmbë möön. Fëën mbei a bi taki taa: „Wan fëëë dee soni di dee woto sëmbë ta fëëë, nöö wan panta tu” (1 Pet. 3:14). Dee soni di Petuisi taki aki ta lei u taa u sa ko dë sëmbë di an ta fëëë libisëmbë möön.

8. Andi sa heepi u fu wa ta fëëë libisëmbë möön? (1 Petuisi 3:15)

⁸ Andi sa heepi u fu wa ta fëëë libisëmbë möön? Petuisi bi taki taa: „A unu hati dendu u musu sabi taa Keesitu da Masa.” (Lesi 1 Petuisi 3:15.) Di soni aki kë taki taa u musu kai pakisei a di fasi fa di Könu fuu Jesosi hei tjika, söseei ku di makiti di a abi. Ee i ta fëëë u konda di bunu buka da wan sëmbë te i feni di okasi, nasö ee senuwe ta naki i te i kë du ën, nöö mëni di Könu fuu Jesosi. Mbei möiti u pakisei luku fa Jesosi dë a liba ala ta tii, söseei fa milionmilion ëngëli dë lontu ën. Toona mëni taa a „kisi hii makiti a liba ala ku goon aki tuu”, söseei taa a o dë ku u „hiniwanten, u tee a kaba u di goonliba aki” (Mat. 28:18-20). Petuisi da u taanga fuu „ta dë kabakaba” hii juu u hopo taki da di biibi fuu. I bi o kë peleiki da wan sëmbë di i ku ën ta wooko a di wan kamian, wan sëmbë di i ku ën nango a di wan siköö, nasö wan sëmbë di i miti a wan woto kamian u? Pakisei luku na u pisiten joo sa fan ku di sëmbë, söseei seeka a fesi fii sa sabi andi joo piki ën. Begi Jehovah faa mbei i ko abi degihati, nöö i futoou ën taa a o heepi i fu ja ta fëëë libisëmbë möön.​—Tjab. 4:29.

„UN MUSU TA LOBI UNU NA UNU MAKANDI GAANFA”

9. Andi Petuisi bi du wan daka, di bi lei taa an lobi dee wotowan fëën? (Luku di peentje tu.)

⁹ Petuisi bi lei u unfa u sa lei taa u lobi wotowan. A bi dë ta jei di Jesosi bi taki taa: „Mi o manda unu a wan njunjun soni e. Wan si fa mi lobi unu nö? Wë nöö sö un musu lobi unu seei tu” (Joh. 13:34). Hii fa Petuisi bi jei di soni di Jesosi bi taki, tökuseei an bi kë njan makandi ku dee baaa ku dee sisa dee an bi dë Dju, u di a bi ta fëëë dee baaa ku dee sisa dee bi dë Dju. Apösutu Paulosu bi taki taa di soni di Petuisi bi du dë, bi ta lei taa a ta libi a wan „ganjan fasi”. Hën da a bi ta libi a wan bödjëë fasi (Gal. 2:11-14). Petuisi bi tei di leti di Paulosu bi leti ën buta a pasi. A dee tu biifi fëën tuu a piki u taa na fii nöö u musu ta fii taa u lobi dee baaa ku dee sisa fuu, ma u musu ta du soni u lei de taa u lobi de.

10. Andi ta heepi u fuu ’ta lobi u na u söndö ganjan’? (1 Petuisi 1:22)

¹⁰ Petuisi bi taki taa u musu ’ko ta lobi u na u söndö ganjan’. (Lesi 1 Petuisi 1:22.) Wë te wan sëmbë ta „piki” di „tuutuu lei u Gadu”, nöö di soni dë o heepi ën faa sa ta lobi wotowan söndö ganjan. Biga di Bëibel ta taki taa „Gadu an ta luku fesi”, ma „a ta si hii sëmbë di wan fasi” (Tjab. 10:34, 35). Ee u ta lobi so u dee baaa ku sisa u di kemeente nöö, nöö hën da wa ta lobi u na u kumafa Jesosi piki u. A sa pasa taa u möön dë mati ku so u dee baaa ku dee sisa, leti kumafa Jesosi bi möön dë mati ku so u dee bakama fëën (Joh. 13:23; 20:2). Ma Petuisi bi mëni u taa u musu ta mbei möiti u lobi hii dee baaa ku dee sisa fuu, biga de da famii fuu.​—1 Pet. 2:17.

11. Andi a kë taki fuu ’ta lobi useei möön taanga jeti, ku hii u hati’?

¹¹ Petuisi bi da u taanga fuu ’ta lobi useei möön taanga jeti, ku hii u hati’. A di pisi aki, dee wöutu „möön taanga” kë taki taa u musu lobi wan sëmbë, hii fa a ta taanga da u fuu du soni u lei taa u lobi ën. Ma unfa a dë ee wan baaa nasö wan sisa du wan soni ku u di hati u? U sa fii u du di seei soni ku ën baka, ka fuu lei taa u lobi ën. Ma Petuisi bi lei a Jesosi taa Gadu an lobi te sëmbë ta libi sö (Joh. 18:10, 11). Petuisi bi taki taa: „Ee wan sëmbë du hogi ku i, ja musu du hogi ku ën baka e. Ee wan sëmbë kosi i, disëën. Na toona kosi ën baka, ma begi Gadu dëën be a feni bunu” (1 Pet. 3:9). Te i abi di taanga lobi di u taki fëën aki, nöö joo ta libi suti ku wotowan, aluwasi ee de du wan soni ku i di hati i. 

12. (a) Te u lobi u na u gaanfa, nöö andi a o da u taanga fuu du? (b) Andi i kë mbei möiti u du, te i luku di fëlön Meki muiti so taki wi kan tan abi wánfasi?

¹² A di fosu biifi di Petuisi bi sikifi, a bi taki taa u musu ta „lobi unu na unu makandi gaanfa”. Di lö lobi aki an o heepi u fuu da wotowan paadon u wantu pikipiki soni nöö, ma a o heepi u fuu da de paadon ee de „ta du sömëni soni seei dee an ta kai” (1 Pet. 4:8). Kandë Petuisi bi toona pakisei di soni di Jesosi bi lei ën sömëni jaa pasa. A di ten dë Petuisi bi ta si kuma te a da wan sëmbë paadon te „dou sëbën pasi”, nöö hën da a du wan gaan bunu seei. Ma Jesosi bi piki ën taa: „Nönö, womi, an tjika e. I musu ta puu ën a bëë nöömö, ee sëbënteni toon sëbën pasi seei.” Di soni aki kë taki taa nöiti u musu wei u da wan sëmbë paadon (Mat. 18:21, 22). Ee a ta taanga da i fii du di soni di Jesosi bi taki aki, nöö ja musu lasi hati! Hii dee dinima u Jehovah dee dë zöndu libisëmbë, bi abi u mbei taanga möiti so juu u da wotowan paadon. Di möön fanöudu soni di i musu du nöunöu, hën da i musu mbei möiti u du hii soni di i sa, sö taa i sa da di baaa fii nasö di sisa fii paadon, söseei fuun ko ta libi fiifii ku unuseei baka.c

UN DEE GAANWOMI, UN SÖLUGU DEE SIKAPU U JEHOVAH BUMBUU

13. Faandi mbei a sa dë wan taanga soni da dee gaanwomi u sölugu dee sikapu u Jehovah?

¹³ A musu u dë sö taa Petuisi an bi fëëkëtë di soni di Jesosi bi piki ën baka di a bi weki ko a libi baka. A bi piki ën taa: „I musu sölugu dee sikapu u mi da mi e” (Joh. 21:16). Ee i da wan gaanwomi, nöö di soni aki dë da i tu. A sa dë wan taanga soni da wan gaanwomi faa feni ten tjika u tja di faantiwöutu fëën. Di möön fanöudu soni di dee gaanwomi musu ta du, hën da de musu ta mbei hii möiti u dee sëmbë u de wosudendu ta fii bunu, u de ta feni dee soni di de abi fanöudu, söseei u de ku Jehovah sa dë mati. Boiti di dë, de musu ta dë fajafaja a di peleikiwooko, de musu ta seeka bunu da dee komakandi, söseei de musu ta seeka bunu te de abi wan soni u du a dee gaan komakandi. So u de dë a di Hatiwosu Komite, nasö a di kulupu u dee baaa dee ta heepi mbei komakandi kamian a di pisiwata ka u ta libi. Dee gaanwomi ta abi sömëni soni u du!

14. Andi sa heepi dee gaanwomi u de luku dee sëmbë u Gadu? (1 Petuisi 5:1-4)

¹⁴ Petuisi bi piki dee gaanwomi taa: „Un musu ta luku dee sëmbë u Gadu bunu”. (Lesi 1 Petuisi 5:1-4.) Ee i da wan gaanwomi, nöö an dë u taki taa i lobi dee baaa ku dee sisa fii, söseei taa i kë heepi de. Ma so juu a sa pasa taa i ta fii kuma i wei poi, nasö taa i abi soni u du sö tee taa ja sa heepi dee baaa ku dee sisa fii. Wë andi sa heepi i? Konda hii dee bookohedi fii da Jehovah. Petuisi bi taki taa: „Ee wan sëmbë i ta heepi sëmbë a soni, nöö ja musu du ën ku i seei kaakiti. Ma i musu du ën ku di kaakiti u Gadu” (1 Pet. 4:11). Soni sa ta miti dee baaa ku dee sisa fii a di ten aki, di an o sa seeka te dou. Ma hoi a pakisei taa Jesosi Keesitu, di „Gaan Sikafuma” fuu sa heepi de möön fa i sa heepi de. A sa heepi de a di ten aki kaa, söseei a sa heepi de a di njunjun goonliba. Di soni di Jehovah kë u dee gaanwomi du, hën da a kë u de lobi dee baaa ku dee sisa, a kë u de ta luku de, söseei a kë u de dë sëmbë di „de sa djeesi”.

15. Unfa wan gaanwomi bi heepi dee baaa ku dee sisa u di kulupu fëën? (Luku di peentje tu.)

¹⁵ Wan baaa de kai William, di dë gaanwomi sömëni jaa kaa, fusutan unfa a dë fanöudu tjika u heepi dee baaa ku dee sisa. Di di kolona siki bi bigi paaja, hën di baaa aki ku dee woto gaanwomi u di kemeente ka a dë bi seeka soni u de ta bëli hiniwan u dee baaa ku dee sisa dee bi dë a di kulupu u de hiniwan wiki. A bi taki taa: „Sömëni u dee baaa ku dee sisa aki bi ta dë de wanwan a wosu, nöö a bi sa pasa taa de bigi pakisei soni di an bunu.” Te wan baaa nasö sisa bi abi wan bookohedi, nöö Baaa William bi ta haika bunu faa bi sa sabi unfa a bi sa heepi sö wan sëmbë. A bi ta mbei möiti u feni soni a dee buku fuu ku dee fëlön fuu, di a bi o sa tei u da di baaa nasö di sisa taanga. A bi taki tu taa: „Di heepi di u ta heepi dee baaa ku dee sisa dë wan gaan fanöudu soni seei a di ten aki. U ta mbei taanga möiti u heepi sëmbë u de ko sabi Jehovah, nöö sö nöö u musu ta mbei taanga möiti tu u heepi dee sikapu u Jehovah u de fika a di tuutuu lei.”

DA JEHOVAH DI OKASI FAA MBEI I KO TAANGA GINGIN A DI BIIBI

16. Na un fasi u sa du dee soni dee u lei a dee tu biifi u Petuisi?

¹⁶ U bi taki u wantu soni nöö, dee u sa lei a dee tu biifi u Petuisi. Ma kandë i si wan soni di i bi o kë ko ta du möön bunu. I bi o kë ko ta kai pakisei möön gaanfa a dee bunu dee woo feni a di njunjun goonliba u? Nasö i buta taa joo ta peleiki da sëmbë a wookope, a siköö, nasö a wan woto kamian ka i feni ö? I si wan soni di sa heepi i fii ko ta möön lei dee baaa ku dee sisa fii taa i lobi de u? Un dee gaanwomi, un dë kabakaba u heepi dee sikapu u Jehovah ku hii unu hati ö? Pakisei luku andi i sa ko ta du möön bunu, ma na ganjan iseei te i ta öndösuku iseei luku, söseei ja musu lasi hati tu. „Di Masa fuu abi bunuhati”, nöö a o heepi i fii ko ta du soni möön bunu (1 Pet. 2:3). Petuisi bi kë fuu dë seiki u di soni aki. A bi taki taa: „Gadu o da unu böö. A o mbei un ko taanga gingin a di biibi, kuma wan sitonu posu di an sa hön kai.”​—1 Pet. 5:10.

17. Un bunu woo feni te u ta hoi dou, söseei te u ta da Jehovah di okasi faa mbei u ko taanga gingin a di biibi?

¹⁷ Bigibigi Petuisi bi ta fii kuma an bunu tjika u dë makandi ku Jesosi (Luk. 5:8). Ma u di Jehovah ku Jesosi bi ta heepi ën, mbei Petuisi bi sa waka a Jesosi baka go dou. Te u kaba fëën de bi tei Petuisi ku „gaan wai seei a di köndë ka di Heepima fuu Masa Jesosi Keesitu dë könu ta tii fu nöömö” (2 Pet. 1:11). Wan gaan bunu seei a feni dë! Ee iseei hoi dou kumafa Petuisi bi hoi dou, söseei ee i ta da Jehovah pasi faa mbei i ko taanga gingin a di biibi, nöö iseei o feni di libi u teego tu. Joo feni ’di soni di i bi suku a Masa Jesosi di i ko biibi ën’. Joo ko fii!​—1 Pet. 1:9.