Boo ta da useei taanga a dee komakandi

1. Faandi mbei u ta da piki a dee komakandi?

FAANDI mbei u nango a dee komakandi? Di fosu soni di mbei u nango a dee komakandi, hën da fuu sa gafa Jehovah (Ps. 26:12; 111:1). Boiti di dë, u nango a dee komakandi sö taa u sa da u na u taanga a dee taanga ten aki (1 Tes. 5:11). U ta du dee tu soni aki te u da wan piki.

2. Na un ten u sa da piki a dee komakandi?

² Hiniwan wiki u ta abi di okasi u da piki a dee komakandi. A dee komakandi dee u ta hoi sata nasö sonde, u ta abi di okasi u da piki a Di Hei Wakitimawosu-lei. Söseei u ta abi di okasi u da piki a dee komakandi dee u ta hoi a mindiwiki, te u ta hoi di pisi de kai diki go möön fundu, te u ta hoi di kemeente Bëibel-lei, söseei te u ta hoi dee woto pisi ka sëmbë sa da piki.

3. Andi sa mbei a ta taanga da u fuu da piki, nöö unfa Hebelejën 10:24, 25 sa heepi u?

³ Hii u tuu kë gafa Jehovah, söseei hii u tuu kë da dee baaa ku dee sisa fuu taanga. Ma soni sa mbei a ta taanga da u fuu ta da piki. Kandë senuwe ta naki u te u kë da wan piki. Nasö a kan taa u ta kë da möön hia piki, ma na hii juu dee baaa ta da u okasi fuu da piki te u hopo u maun. Andi sa heepi u te wan u dee soni aki ta miti u? Di soni di Paulosu bi sikifi da dee Hebelejën sëmbë sa heepi u fuu feni di piki u di hakisi aki. Di a bi ta taki faandi mbei a dë fanöudu fuu ta ko makandi, hën a bi taki taa u musu ta buta pakisei a di da di u musu „ta da u seei taanga nöömö”. (Lesi Hebelejën 10:24, 25.) Te u hoi a pakisei taa hiniwan piki soni di u taki sa da dee baaa ku dee sisa fuu taanga, nöö woo ta möön dë kabakaba u da piki, hii fa senuwe ta naki u. Boiti di dë, ee dee baaa an ta da u okasi fuu da piki kumafa u bi o kë, tökuseei woo wai taa woto sëmbë ta feni okasi u de da piki.​—1 Pet. 3:8.

4. Andi da dee dii soni dee woo taki u de a di woto aki?

⁴ A di woto aki woo taki, unfa u sa da useei taanga te u dë a wan piki kemeente ka sëmbë an dë sö hia u da piki. Baka di dë, nöö woo taki unfa u sa da useei taanga te u dë a wan gaan kemeente, ka sömëni sëmbë ta hopo maun u de sa da piki. Te u kaba fëën, nöö woo taki unfa u sa ta da piki di ta da wotowan taanga.

U SA DA USEEI TAANGA TE U DË A WAN PIKI KEMEENTE

5. Unfa u sa da useei taanga te sëmbë an dë hia a di komakandi?

⁵ Te u dë a wan kulupu nasö a wan piki kemeente, nöö sëmbë an ta dë hia sö u da piki. So juu di baaa di ta tei fesi a di komakandi ta abi u wakiti wan pisiten ufö wan sëmbë hopo maun u da piki. Di soni dë sa mbei i ta fuufei te i dë a di komakandi, nöö di soni dë an ta da i taanga. Wë nöö andi i sa du? Mbei möiti fii ta hopo maun sömëni pasi. Te i ta du di soni dë, nöö i sa da wotowan taanga u de ta da möön hia piki.

6-7. Andi u sa du u senuwe an ta naki u sö möön te woo da piki?

⁶ Ma unfa a dë ee senuwe ta naki i gaanfa seei te i kë da wan piki? Sö a ta dë da sömëni sëmbë. Ma ee i kë ta da dee baaa ku dee sisa fii taanga, nöö i sa mbei möiti fii ko sabi andi i sa du u senuwe an ta naki i sö möön te joo da piki. Unfa i sa du di soni dë?

⁷ I sa lesi dee Hei Wakitimawosub dee u bi luku pasa kaa, fii ko sabi andi i sa du. Ma wan soni di i sa du tu, hën da i sa seeka iseei bunu (Nöng. 21:5). Te i sabi di woto di woo luku a komakandi, nöö an o taanga da i sö fii da piki. Da wan sati piki (Nöng. 15:23; 17:27). Te i sabi taa joo da wan sati piki, nöö senuwe an o naki i sö. Boiti di dë, te i da wan sati piki ka i ta taki u wantu soni nöö, nöö a sa möön kösökösö da dee baaa ku dee sisa fii u de fusutan. Te i da wan sati piki kumafa i fusutan di woto, nöö joo lei taa i seeka iseei bunu, söseei taa i fusutan di woto bumbuu.

8. Unfa Jehovah ta si di möiti di u ta mbei?

⁸ Ma unfa a dë ee i mbei möiti du hii dee soni aki, ma tökuseei senuwe ta naki i tee ta ja sa da piki möön leki wan nasö tu pasi? Wë i sa dë seiki taa Jehovah o tei ën u bigi taa i ta mbei möiti (Luk. 21:1-4). An ta hakisi u fuu du soni di a sabi taa wa o sa du (Fil. 4:5). Luku andi i sa du, söseei du soni di o sa heepi i fii du ën, nöö i begi Jehovah u senuwe an naki i poi. Bigibigi, kandë i sa buta taa joo ta mbei möiti fii ta da wan sati piki.

U SA DA USEEI TAANGA TE U DË A WAN GAAN KEMEENTE

9. Faandi mbei a sa taanga so juu fuu da piki a wan gaan kemeente?

⁹ Ee i dë a wan kemeente ka möön hia peleikima dë, nöö i sa abi wan woto bookohedi. Kandë sömëni baaa ku sisa ta hopo maun, nöö a ta pasa taa ja ta feni okasi u da piki. Wan sisa de kai Danielle bi lo’u da piki hiniwan juu a dee komakandi.c A ta si di soni aki kuma wan fasi fa a ta dini Jehovah, kuma wan fasi fa a sa da wotowan taanga, söseei kuma wan fasi fa a sa ko ta möön biibi dee soni dee a ta lei a Bëibel. Ma di a bi foloisi go a wan möön gaan kemeente, an bi ta feni okasi u da piki sö hia möön. So juu an bi ta feni na wan seei. A bi taki taa: „Di soni aki bi ta mbei hati u mi boonu. Mi bi ta si kuma mi lasi wan gaan bunu seei. Te di soni aki ta pasa sömëni pasi, nöö i ta bigi hakisi iseei ee na ku deseei kë, dee baaa an ta da i okasi fii da piki.”

10. Andi u sa du fuu sa feni pasi u da wan piki?

¹⁰ Soni dë da i kumafa a bi dë da Danielle ö? Ee sö soni dë da i, nöö kandë joo kë mati disa, nöö i bia ta haika andi de ta taki a dee komakandi nöö. Ma ja musu disa. Andi i sa du? Kandë i sa ta seeka sömëni piki da hiniwan komakandi. Nöö ee a ko dë sö taa ja feni okasi fii da piki a bigi u di komakandi, nöö joo sa feni okasi fii da piki jeti. Te i ta seeka iseei da Di Hei Wakitimawosu-lei, nöö pakisei luku unfa hiniwan palaklafu nama ku di në u di woto. Ee i ta du di soni dë, nöö joo sa feni soni di i bi o kë taki te un ta luku di woto. Boiti di dë, i sa seeka iseei fii da piki a dee palaklafu dee ta taki u soni di dë pikisö möön taanga u fusutan (1 Kol. 2:10). Faandi mbei? Wë u di a sa kan taa sëmbë an o hia sö, di o kë da piki te u ta luku dee palaklafu dë. Ma nöö unfa a dë ee i du dee soni aki, ma tökuseei ja ta feni piki a dee komakandi möönsö? I sa go fan ku di baaa di ta hoi Di Hei Wakitimawosu-lei, nöö piki ën na un palaklafu i bi o kë da wan piki.

11. Andi Filipi 2:4 ta da u taanga fuu du?

¹¹ Lesi Filipi 2:4. Gadu bi mbei apösutu Paulosu piki dee Keesitu sëmbë taa de musu ta buta mëni a soni u wotowan tu. Unfa u sa du di soni dë te u dë a dee komakandi? Wë u sa du di soni dë, te u ta hoi a pakisei taa wotowan ta kë da piki tu, leti kuma u nöö.

12. Andi da wan bunu fasi fa u sa da wotowan taanga te u dë a dee komakandi? (Luku di peentje tu.)

¹² Pakisei di soni aki. Te i ku dee mati fii ta da woto, i bi o kë ta fan sö tee taa bëina de an ta feni pasi u de fan u? Na seei! I bi o kë u deseei fan tu. Wë sö nöö a dë taa te u dë a dee komakandi, nöö u ta kë da sëmbë okasi, u de sa da piki tu. Fuu taki ën, wan fasi fa u sa da dee baaa ku dee sisa fuu taanga, hën da te u ta da de pasi u de sa taki soni u di biibi u de (1 Kol. 10:24). Boo luku unfa u sa du di soni dë.

13. Unfa u sa da möön hia sëmbë okasi u de sa da piki?

¹³ Wan soni di u sa du, hën da u sa ta da sati piki. A sö wan fasi u ta da möön hia sëmbë okasi u de sa da piki. Dee gaanwomi ku dee woto peleikima dee abi öndöfeni, sa du soni a di lö fasi dë, u wotowan sa djeesi de. Aluwasi di piki fii sati seei, tökuseei a bunu fii ta köni fu ja taki u hia soni poi. Ee i taki u hii dee soni dee dë a di palaklafu, nöö soni an o fika wan bëtë möön u wotowan sa taki. Te i luku ën, nöö u sa taki taa u taki u tu soni a di palaklafu aki. Dee soni dë da: U musu ta da sati piki, söseei u musu ta köni fu wa taki u hia soni poi. Ee ju fosu feni pasi u da piki a di palaklafu aki, nöö kandë i sa taki u wan u dee soni dë nöö.

14. Andi sa heepi u fuu sabi un mëni pasi u musu hopo maun u da piki? (Luku di peentje tu.)

¹⁴ Köni ku di mëni pasi di i ta hopo maun. Ee u ta hopo maun hia poi, nöö di baaa di ta da sëmbë okasi u de sa da piki sa fii kuma a musu u da u okasi fuu da piki, hii fa woto sëmbë an feni pasi u da wan piki jeti. Di soni aki sa mbei wotowan lasi hati, nöö de an hopo maun möön.​—Peleik. 3:7.

15. (a) Andi u musu du ee a ko pasa taa de an da u pasi fuu da piki? (b) Unfa dee baaa dee ta hoi wan pisi ka de sa da sëmbë pasi u de da piki, sa mbei möiti u hoi hii sëmbë a pakisei? (Luku di pisi „Ee i ta hoi wan pisi a di komakandi ka sëmbë sa da piki”.)

¹⁵ Te hia peleikima ta hopo maun u da piki, nöö a sa kan taa wa feni pasi u da piki kumafa u bi o kë. So juu a sa pasa taa di baaa an da u okasi fuu sa da wan piki. Di soni dë sa mbei u fii bookosaka. Ma wa musu si kuma kë di baaa an ta kë da u okasi fuu da piki.​—Peleik. 7:9.

16. Unfa u sa da dee baaa ku dee sisa taanga te de da piki a komakandi?

¹⁶ Ee a ko pasa taa ja ta feni pasi u da piki kumafa i bi o kë, nöö kandë i sa haika bunu te woto sëmbë ta da piki, nöö baka di komakandi, nöö i gafa de da dee piki di de da. Dee baaa ku dee sisa fii sa feni taanga a di gafa di joo gafa de, leti kumafa de bi o feni taanga a dee piki dee i bi o da (Nöng. 10:21). Awa, wan woto fasi fa u sa da useei taanga da te u ta gafa wotowan.

WOTO SONI DI U SA DU U DA USEEI TAANGA

17. (a) Unfa mama ku tata sa heepi dee mii u de, u de da piki di fiti? (b) Andi da dee fö soni dee u musu du te u ta seeka wan piki, kumafa di fëlön ta lei u? (Luku di pisi a basu.)

¹⁷ Andi u sa du jeti u da useei taanga te u dë a dee komakandi? Ee i abi miii, nöö i sa heepi de u de da piki di fiti (Mat. 21:16). So juu u ta taki u soni di nama ku fuka di ta dë a di tööu libi, nasö u soni di nama ku fanafiti libi. Ma tökuseei wan nasö tu palaklafu o dë a di woto, ka miii o sa da piki. Heepi dee mii fii u de fusutan faandi mbei dee baaa an o ta da de okasi u de da piki hiniwan juu te de hopo maun. Te i heepi de u de fusutan di soni dë, nöö a sa heepi de u de an lasi hati, te de an feni okasi u da piki.​—1 Tim. 6:18.d

18. Unfa u sa köni fu wa ta buta pakisei a useei poi te u ta da piki? (Nöngö 27:2)

¹⁸ Hii u tuu sa seeka piki di sa da wotowan taanga, söseei di ta tja gafa ko da Jehovah (Nöng. 25:11). Hii fa u sa konda wan woto fu useei te woo da piki, tökuseei u musu köni fu wa ta du ën hia poi. (Lesi Nöngö 27:2; 2 Kol. 10:18) U musu ta mbei möiti u buta pakisei a Jehovah, a di Wöutu fëën ku dee sëmbë fëën (Ako. 4:11). An dë u taki taa ee di hakisi u wan palaklafu ta da u taanga fuu konda soni fu useei, nöö a bunu fuu du ën. Woo si unfa u sa du di soni aki a di lasiti palaklafu u di woto aki.

19. (a) Un wini a ta tja ko te u ta hoi hii sëmbë a pakisei te u dë a komakandi? (Loomë 1:11, 12) (b) Andi ii lobi u di da di u ta da piki a komakandi?

¹⁹ Hii fa wëti an dë di ta piki u finifini unfa u musu ta da piki, tökuseei u sa da piki a wan fasi di sa da wotowan taanga. Kandë a o dë fuu ta da möön hia piki. Nasö kandë a o dë fuu ta dë tifeedi ku di mëni pasi di de ta da u pasi fuu da piki, nöö u wai ku dee wotowan dee ta feni pasi u da piki. Te u ta hoi wotowan a pakisei te u dë a dee komakandi, nöö hii u tuu o sa ta „da u seei taanga”.​—Lesi Loomë 1:11, 12.