Unfa u sa abi wan taanga lobi da u na u go dou?

1-2. (a) Faandi mbei apösutu Paulosu bi taki taa lobi „da mama” u dee woto fasi tuu? (b) Na un soni woo buta pakisei a di woto aki?

DI APÖSUTU PAULOSU bi ta taki soni u biibi, ku lobi, söseei ku di wakiti di u ta wakiti u Gadu du dee soni dee a paamusi u, hën a bi taki taa „lobi, hën da mama u de tuu” (1 Kol. 13:13). Faandi mbei a bi taki di soni dë? Wë a di ten di ta ko, wa o abi u ta dë ku di mëni taa di njunjun goonliba dë a pasi ta ko möön, söseei wa o abi u ta biibi dee soni dee Gadu bi paamusi u möön. Biga dee soni dee u bi ta biibi o ko dë soni di pasa tuutuu kaa. Ma hii juu woo abi u ta lei taa u lobi Jehovah ku dee wotowan fuu. Fuu taki ën, nöö u teego woo ta möön lobi de daka fu daka.

² U di u musu ta lobi u na u u teego, mbei woo buta pakisei a dii soni a di woto aki. Di fosuwan, da faandi mbei u musu lobi u na u? Di u tu, da unfa u ta lei taa u lobi u na u? Nöö di u dii, da unfa u sa abi wan taanga lobi da u na u go dou?

FAANDI MBEI U MUSU TA LOBI U NA U?

3. Faandi mbei u musu ta lobi u na u?

³ Faandi mbei a dë wan fanöudu soni da u fuu ta lobi u na u? Te u ta lei taa u lobi dee baaa ku dee sisa fuu, nöö u ta lei gbelingbelin taa u da dee tuutuu bakama u Keesitu. Jesosi bi piki dee apösutu fëën taa: „Biga te un ta lobi sö kaa, nöö hii sëmbë o si taa bakama u mi gbelin un dë e” (Joh. 13:35). Boiti di dë, di lobi di u ta lobi u na u ta mbei taa u ta du soni makandi a di seei fasi. Paulosu bi taki taa lobi ta mbei taa sëmbë sa „libi makandi ku wan hati kumafa Gadu kë” (Kol. 3:14). Ma boiti dee soni dee u taki aki, wan woto soni dë di mbei a dë fanöudu fuu ta lobi u na u. Apösutu Johanisi bi piki dee baaa ku dee sisa u di ten fëën taa: „Ee i lobi Masa Gadu, nöö söseei i musu u lobi di otowan fii tu” (1 Joh. 4:21). Te u ta lei taa u lobi dee wotowan fuu, nöö hën da u ta lei taa u lobi Gadu.

4-5. Konda wan woto di ta lei fa di lobi di u lobi Gadu nama ku di lobi di u musu lobi u na u.

⁴ Na un futu di lobi di u lobi Gadu nama ku di lobi di u musu lobi dee baaa ku dee sisa fuu? Fii sa ko fusutan di soni aki, nöö a bi o bunu fii buta pakisei a di fasi fa di hati fuu ku dee woto kamian fuu sinkii nama ku deseei tjika. Te wan data ta panjan u a maun u luku ee hati fuu ta naki bumbuu, nöö a sa ko sabi ee hati fuu ta wooko bunu tjika. Andi di soni aki ta lei u?

⁵ Leti kumafa wan data sa ko sabi ee hati fuu dë gösöntu te a panjan u a maun, sö nöö u sa ko sabi unfa di lobi di u abi da Gadu taanga tjika te u ta buta pakisei a di fasi fa u lobi wotowan. Ee u ko si taa wa ta lei taa u lobi dee baaa ku dee sisa fuu kuma fosu möön, nöö hën da di lobi di u abi da Gadu seei ko kötö tu. Ma ee u abi di guwenti u lei taa u lobi dee baaa ku dee sisa fuu, nöö hën da di lobi di u abi da Gadu taanga.

6. Faandi mbei an dë wan bunu soni seei ee di lobi di u abi da dee baaa ku dee sisa fuu ta ko kötö? (1 Johanisi 4:7-9, 11)

⁶ Ee di lobi di u abi da dee baaa ku dee sisa fuu ta ko kötö, nöö hën da di soni aki da wan gaan soni seei. Faandi mbei u taki sö? Biga di soni dë kë taki taa u ku Jehovah an kaba dë mati sö möön. Apösutu Johanisi bi taki u di soni aki seei gbelingbelin. A bi taki taa: „Di sëmbë i ta si ku i wojo mii dë hën ja lobi, nöö unfa i sa lobi Gadu di ja si ku wojo wan daka” (1 Joh. 4:20). Andi u ta lei a di woto aki? U ta lei taa di wan kodo soni di sa mbei taa Jehovah wai ku u, da te u ta „lobi u seei”.​—Lesi 1 Johanisi 4:7-9, 11.

UNFA U TA LEI TAA U LOBI U NA U?

7-8. Andi da so u dee tookatooka fasi fa u sa lei dee baaa ku dee sisa fuu taa u lobi de?

⁷ Di Wöutu u Gadu ta piki u sömëni pasi taa u musu ta ’lobi u na u’ (Joh. 15:12, 17; Lom. 13:8; 1 Tes. 4:9; 1 Pet. 1:22; 1 Joh. 4:11). Ma fuu taki ën, nöö lobi da wan fii di dë a u hati dendu di na wan sëmbë sa si. Wë nöö, unfa u sa mbei sëmbë si taa u lobi dee baaa ku dee sisa fuu? Wë dee soni dee u ta taki, ku dee soni dee u ta du, de o lei taa u lobi de.

⁸ Sömëni tookatooka fasi dë fa u sa lei dee baaa ku dee sisa fuu taa u lobi de. Luku wantu u de aki: „Te un ta fan ku unuseei, nöö un musu ta taki soni gbelingbelin kumafa a dë” (Sak. 8:16). „Un musu ta libi fiifii ku unu seei nango nöömö” (Maik. 9:50). Dë di fosu sëmbë di o hopo du wan soni u „hopo di otowan fii möön fa i ta hopo i seei” (Lom. 12:10). „Un tei unu na unu ku wai” (Lom. 15:7). „Un musu . . . ta da unuseei paadon” (Kol. 3:13). „Un musu ta heepi unu seei makandi ta tja dee fuka fuunu” (Gal. 6:2). „Un ta da unu na unu taanga” (1 Tes. 4:18). „Un ta . . . heepi unu na unu fuun nango fesi nöömö” (1 Tes. 5:11). „Un ta begi da unu seei”.​—Jak. 5:16.

9. Faandi mbei di da di u ta da wotowan taanga, da wan fanöudu soni di ta lei taa u lobi de? (Luku di peentje tu.)

⁹ Boo buta pakisei a wan u dee fasi fa u sa lei taa u lobi wotowan. Woo buta pakisei a di soni di Paulosu bi taki di a bi taki taa: „Un ta da unu na unu taanga”. Faandi mbei di da di u ta da wotowan taanga, da wan gaan soni di ta lei taa u lobi de? Wan buku di ta taki soni u Bëibel ta taki taa di wöutu „taanga” di Paulosu bi taki soni fëën a di tëkisi aki, kë taki taa „dë a wan sëmbë bandja u dëën taanga te fuka ta miti ën. Fëën mbei te u ta da wan baaa nasö wan sisa taanga faa hoi dou te fuka ta miti ën, nöö hën da u ta heepi ën faa hopo taanpu, söseei faa waka go dou a di pasi di ta tja sëmbë go a libi. Hiniwan juu te u ta da wan baaa nasö wan sisa taanga, nöö hën da u ta lei taa u lobi ën.​—2 Kol. 7:6, 7, 13.

10. Na un futu di da di sëmbë ta da wotowan taanga nama ku di fii di de ta fii da de?

¹⁰ Di fii di u ta fii da wotowan ku di da di u ta da de taanga, da tu soni di ta kai ku deseei. Unfa sö? Te wan sëmbë ta fii da wan sëmbë di dë ku fuka, nöö a ta kë da di sëmbë taanga, söseei a ta kë du wan soni u heepi ën. Fëën mbei di fii di u ta fii da wotowan ta mbei taa u ta da de taanga. Paulosu heepi u fuu ko fusutan taa di fii di Jehovah ta fii da sëmbë, hën ta mbei taa Jehovah ta hopo du soni u da de kötöhati. Paulosu bi taki taa Jehovah seei „da u Tata tu, nöö a abi tjalihati fuu. Nëën hii kötöhati ta kumutu” (2 Kol. 1:3). Paulosu bi wooko ku dee wöutu „a abi tjalihati fuu” u lei fa wan sëmbë sa fii da wotowan. „De ta kai Gadu di Tata di abi tjalihati fuu, nasö di Sëmbë ka tjalihati ta kumutu, u di a ta fii gaanfa seei da libisëmbë”. Di fii di a ta fii da u, hën ta mbei a ta hopo du soni u da u kötöhati te „dee hia sitaafu ta miti” u (2 Kol. 1:4). Leti kumafa limbolimbo wata di ta kule kumutu a wan wata baaku ta mbei dee sëmbë dee dëëwata bi ta kii fii bunu, sö nöö Jehovah ta da dee sëmbë dee fuka ta miti kötöhati u de sa fii bunu baka. Unfa u sa djeesi Jehovah, nöö u lei taa u ta fii da wotowan, söseei taa u ta da de kötöhati? Wan fasi fa u sa du di soni aki, hën da te u ta mbei möiti fuu ko abi fasi di o heepi u fuu sa ta fii da wotowan, söseei fuu ta da de kötöhati. Andi da wantu u dee fasi dë?

11. Un fasi u musu mbei möiti fuu ko abi fuu sa ta da u na u taanga u di u lobi useei, te u luku Kolosën 3:12 ku 1 Petuisi 3:8?

¹¹ Andi o heepi u fuu abi di lobi di u abi fanöudu fuu sa „ta da unu na unu taanga” hiniwan daka? U musu mbei möiti fuu ko abi fasi kuma di libi di u musu ta libi fiifii makandi ku useei, di lobi di u musu ta lobi useei kuma baaa ku baaa, ku di libi di u musu ta libi a wan suti fasi ku useei. (Lesi Kolosën 3:12; 1 Petuisi 3:8.) Unfa dee fasi aki o heepi u? Te u ta fii da dee baaa ku dee sisa fuu ku hii u hati, söseei te u ta booko u hedi ku de, nöö woo dë seei kabakaba u hopo du soni u da de taanga te fuka ta miti de. Jesosi bi taki taa „Di soni di fuu hati, hën buka ta taki. Ee wan sëmbë i dë nöö bumbuu soni dë a i hati, nöö bumbuu fan joo ta fan” (Mat. 12:34, 35). Di da di u ta da dee baaa ku dee sisa fuu taanga te fuka ta miti de, da wan u dee möön fanöudu fasi fa u sa lei de taa u lobi de.

UNFA U SA ABI WAN TAANGA LOBI DA U NA U GO DOU?

12. (a) Faandi mbei u musu ta köni? (b) Na un fanöudu soni woo buta pakisei?

¹² Hii u tuu kë fuu ta „lobi useei” go dou (1 Joh. 4:7). Ma tökuseei a bunu fuu hoi a pakisei taa Jesosi bi piki dee bakama fëën taa ’gaan së u sëmbë an o lobi de na de möön’ (Mat. 24:12). Jesosi an bi kë taki taa gaansë u dee bakama fëën an bi o ta lobi de na de möön. Ma tökuseei u musu ta köni taa wa ko dë kuma dee sëmbë u di goonliba aki di na ta lobi de na de. Fëën mbei a bunu fuu hakisi useei di fanöudu soni aki: „Wan fasi dë fa mi sa ko sabi ee di lobi di mi abi da dee baaa ku dee sisa u mi taanga tjika u?”

13. Unfa u sa ko sabi ee u lobi dee baaa ku dee sisa fuu tjika?

¹³ Wan fasi fa u sa ko sabi ee u lobi de baaa ku dee sisa fuu tjika, da te u ta buta pakisei a di fasi fa u ta du soni te so soni ta pasa (2 Kol. 8:8). Apösutu Petuisi bi taki soni u di soni aki di abi taki taa: „Ma di gaan soni, hën da un musu ta lobi unu na unu makandi gaanfa. Biga ee i lobi wan sëmbë, nöö ee a ta du sömëni soni seei dee an ta kai, ma nöö ja o si de biga i lobi ën” (1 Pet. 4:8). Fëën mbei te wan baaa nasö wan sisa mbei wan föutu, nasö te a du wan soni ku u di hati u, nöö di fasi fa woo du soni o lei ee u lobi ën tjika.

14. Unfa di lobi di u abi da dee baaa ku dee sisa fuu musu dë, te u luku 1 Petuisi 4:8? Konda wan woto.

¹⁴ Boo buta pakisei a dee soni dee Petuisi bi taki. Di fosu pisi u vers 8 ta taki unfa di lobi di u musu abi musu dë. A taa a musu taanga „gaanfa” seei. Di wöutu „gaanfa” di Petuisi wooko ku ën aki, kë taki taa „hai tëndë”. Di u tu pisi u di vers ta lei u andi woo du te u lobi wotowan gaanfa sö. Di lobi di u ta lobi wotowan gaanfa seei ta heepi u fuu tapa dee föutu u de. Boo taa wan tafa liba mandja gaanfa seei. U sa tei wan tafa koosu, nöö u jabi ën a di tafa liba. Wa o jabi ën a wan pisi u di tafa nöö, ma woo tapa hii ën tuu. Sö nöö a dë taa ee u lobi dee baaa ku dee sisa fuu gaanfa, nöö woo sa da de paadon, woo sa hai hii dee föutu u de tuu tapa. Wa o ta da de paadon u wan nasö u tu u dee föutu dee de ta mbei nöö, ma woo ta da de paadon u hii de tuu. Leti kumafa wan tafa koosu sa tapa wan tafa liba di dë mandjamandja, sö nöö lobi sa heepi u fuu tapa „gaan hia zondu”.

15. Ee di lobi di u abi da dee baaa ku dee sisa fuu taanga tjika, nöö andi woo ta dë kabakaba u du? (Kolosën 3:13)

¹⁵ Di lobi di u abi da wotowan musu taanga sö tee taa u ta dë kabakaba u da de paadon u dee föutu u de, aluwasi ee a ta taanga da u so juu. (Lesi Kolosën 3:13.) Te u ta da wotowan paadon, nöö hën da di lobi di u abi da de taanga, söseei u ta lei taa u kë u Jehovah wai ku u. Un woto soni sa heepi u fuu ta da wotowan paadon te de ta mbei föutu, söseei u hati fuu an ta boonu hesihesi ku de te u ta luku di fasi fa de ta du soni?

16-17. Andi sa heepi u fuu puu dee pikipiki föutu u dee baaa ku dee sisa fuu a u pakisei? Konda wan woto. (Luku di peentje tu.)

¹⁶ Buta pakisei a dee bunu fasi di dee baaa ku dee sisa fii abi, ka fii buta pakisei a dee soni di de an ta du bunu. Boo buta pakisei a wan woto. Boo taa i ku wanlö baaa ku sisa dë a wan piizii. Baka di piizii hën un puu wan footoo makandi. Ma i puu tu woto footoo ee a ko pasa taa di fosuwan di i bi puu an bunu. Ma te i ta luku dee dii foto nöö i ta si taa wan baaa poi fesi a wan u de. Andi joo du ku di footoo dë? Joo feki ën puu, u di i abi tu woto footoo ka hii sëmbë dë lafulafu.

¹⁷ U sa tei dee foto dee u hoi dë maaka ku dee soni dee u ta hoi a u pakisei. Möön gaanfa u ta hoi dee piizii ten dee u bi pasa ku dee baaa ku sisa fuu a pakisei. Ma boo taa wan baaa nasö wan sisa bi du nasö taki wan soni di ja bi lobi a wan u dee piizii dë. I bi o hoi di soni dë a pakisei fii ta mëni ën nöömö u? Wë a bi o bunu fii mbei möiti u na ta pakisei di soni dë möön, leti kumafa i bi o feki di möön taku footoo puu a di tëlëfön fii (Nöng. 19:11; Ef. 4:32). U sa feki dee pikipiki föutu u dee baaa ku dee sisa fuu puu a u pakisei, u di wa ta fëëkëtë hii dee bunu soni dee u ku de bi du makandi. Dee lö soni aki u ta kë hoi a pakisei.

FAANDI MBEI LOBI DË FANÖUDU SÖ A DI TEN AKI?

18. Fuun fanöudu soni di nama ku lobi u taki a di woto aki?

¹⁸ Faandi mbei u kë abi wan taanga lobi da useei go dou? Leti kumafa u si, nöö u ta lei taa u lobi Jehovah, te u ta lei dee baaa ku dee sisa fuu taa u lobi de. Unfa u sa lei dee baaa ku dee sisa fuu taa u lobi de? Wan u dee fasi fa u sa lei de taa u lobi de, da te u ta da de „taanga”. Woo sa „ta da u na u taanga” ee u ta fii da wotowan. Unfa u sa abi wan taanga lobi da u na u go dou? Wë u sa abi wan taanga lobi da u na u go dou, te u ta mbei hii möiti fuu da dee baaa ku dee sisa fuu paadon aluwasi ee a ta taanga da u.

19. Faandi mbei a dë fanöudu seei taa u musu lei taa u lobi u na u a di ten aki?

¹⁹ Faandi mbei a dë fanöudu seei fuu lei taa u lobi u na u a di ten aki? Wë Petuisi bi piki u faandi mbei a dë fanöudu. A bi taki taa: „Di ten ko zuntu u hii soni musu kaba. . . . Ma di gaan soni, hën da un musu ta lobi unu na unu makandi gaanfa” (1 Pet. 4:7, 8). Andi u musu ta hoi a pakisei te di kaba u di hogi goonliba aki ta ko möön zuntu? Di Jesosi bi ta fan ku dee bakama fëën, hën a bi taki taa: „Hii sëmbë o ta buuse unu fu di un nama ku mi hedi” (Mat. 24:9). Fuu sa hoi dou, nöö u musu ta libi fiifii makandi ku useei. Te u ta du sö, nöö Saatan an o sa du soni u paati u, u di lobi ta mbei taa u ta „libi makandi ku wan hati kumafa Gadu kë”.​—Kol. 3:14; Fil. 2:1, 2.