Futoou Jehovah kumafa Simison bi ta futoou ën

1-2. Faandi mbei u musu kë sabi soni u di woto u Simison?

ANDI ta ko a i pakisei tei i jei Simison në? A kan taa joo ta mëni taa a bi dë wan gaan taanga womi. Nöö sö a dë tuu. Ma Simison bi mbei wan föutu di bi tja hogi ko dëën. Hii fa soni bi pasa sö, tökuseei Jehovah bi buta pakisei a di hoi di Simison bi hoi hënseei nëën, nöö a bi mbei sëmbë sikifi di woto fëën buta a di Bëibel.

² Jehovah bi mbei Simison du apaiti soni u heepi dee Isaëli sëmbë. De bi dë sëmbë u Jehovah. Höndöhöndö jaa baka di Simison dëdë, hën Jehovah bi mbei apösutu Paulosu sikifi Simison në buta a di Bëibel ku wantu woto womi në, u lei taa de bi dë sëmbë di bi abi wan taanga biibi (Heb. 11:32-34). U sa feni taanga a di woto u Simison. A bi ta futoou Jehovah, aluwasi soni bi ta taanga dëën. Boo luku andi u sa lei a Simison, söseei boo luku unfa di woto fëën sa da u taanga.

SIMISON BI TA FUTOOU JEHOVAH

3. Un wooko Gadu bi da Simison faa du?

³ A di pisiten di de pai Simison, dee Isaëli sëmbë bi dë a dee Filisiti sëmbë basu, nöö dee Filisiti sëmbë bi ta pena de (Kuutm. 13:1). Dee Isaëli sëmbë bi ta tja sitaafu gaanfa seei. Jehovah bi tei Simison faa „puu dee Isaëli sëmbë a dee Filisiti sëmbë basu” (Kuutm. 13:5). Wan gaan wooko seei a bi dëën dë! A bi o dë fanöudu u Simison buta futoou a Jehovah, faa bi sa du di wooko dë.

4. Unfa Jehovah bi heepi Simison u dee Filisiti sëmbë an feni ën kisi? (Kuutuma 15:14-16)

⁴ Boo luku wan soni di ta lei fa Simison bi ta futoou Jehovah tjika. Wan daka, hën wanlö Filisiti sodati bi ko u ko kisi Simison a di kamian de kai Leiki, di bi dë a Juda. U di dee womi u Juda bi ta fëëë, mbei de bi buta taa de o go kisi Simison, nöö de o tjëën go da dee Filisiti sëmbë. Dee köndë sëmbë u Simison seei de bi go kisi ën. De bi tai ën gingin hoi ku tu njunjun tatai, hën de tjëën go da dee Filisiti sëmbë (Kuutm. 15:9-13). Ma ’di jeje u Jehovah bi ko a Simison liba’, hën a hai dee tatai koti. Baka di dë, hën a „feni wan agba bonu u wan womi buliki di an bi dëdë sö longi jeti”, hën a bendi tei ën, hën a kii 1000 Filisiti womi ku ën!​—Lesi Kuutuma 15:14-16.

5. Unfa Simison bi lei taa a bi ta futoou Jehovah?

⁵ Faandi mbei Simison bi tei wan agba bonu u wan buliki go feti, hii fa sëmbë an bi lo’ u feti ku di soni dë? Wë a musu u dë sö taa a bi sabi taa na di fetilai dë hën bi o heepi ën faa wini di feti, ma Jehovah hën bi o heepi ën. Awa, Simison bi dë wan womi di bi abi degihati, nöö a bi wooko da Jehovah ku di soni di a bi abi. A dë gbelingbelin u si taa Simison bi feti wini hii dee womi dë, u di a bi ta futoou Jehovah.

6. Andi u sa lei a Simison, te a nama ku dee wooko dee Jehovah ta da u?

⁶ Jehovah sa da u kaakiti tu fuu sa du dee wooko dee a da u, aluwasi ee a ta djei kuma wa o sa du de. A sa heepi u a wan fasi di useei an sa kaba fusutan. I sa dë seiki taa di seei Gadu di bi da Simison kaakiti, o heepi i fii sa du soni kumafa a kë, solanga i ta futoou ën.​—Nöng. 16:3.

7. Un woto ta lei taa a dë fanöudu fuu ta mbei Jehovah tii u?

⁷ Sömëni u dee baaa ku dee sisa dee ta mbei kamian ka u ta dini Gadu, bi lei taa de ta futoou Jehovah. Fosufosu, dee baaa bi ta teeken gaansë u dee Könuköndë zali fuu ku dee woto kamian fuu te de kaba, nöö baka di dë de bi ta mbei de. Ma u di möönmöön sëmbë ta ko a di ölganisaasi u Jehovah, mbei a bi dë fanöudu u de tooka so soni. Dee baaa dee ta tei fesi a di wooko bi begi Jehovah faa tii de, hën de pooba u du soni woto fasi. Wan soni di de bi du, hën da de bi bai wosu di bi dë mbeimbei kaa, hën de seeka de. Wan baaa de kai Robert, di bi heepi ku sömëni u dee wooko dë a dee jaa dee pasa aki, bi taki taa: „Bigibigi a bi taanga da so sëmbë u de du soni a di njunjun fasi aki.” A bi taki tu taa: „Di lö fasi u du soni aki bi tooka seei ku di fasi fa u bi guwenti u du soni. Ma dee baaa ku dee sisa bi dë kabakaba u bia du soni woto fasi. Nöö nöunöu a dë gbelingbelin u si taa Jehovah ta mbei u feni gaan bunu, u di u ta du di wooko a di njunjun fasi aki.” Di woto aki da wan u dee soni di ta lei fa Jehovah ta tii dee sëmbë fëën u de sa du soni kumafa a kë. Hiniwan fuu musu ta dë te wan pisi, nöö u hakisi useei taa: ’Mi ta mbei Jehovah tii mi ö? Söseei mi ta dë kabakaba u bia du soni woto fasi, u mi sa dini ën a di möön bunu fasi ö?’

SIMISON BI WOOKO KU DEE SONI DEE JEHOVAH BI SEEKA DËËN

8. Andi Simison bi du wan daka, di dëë wata bi ta kii ën?

⁸ A kan taa i bi lesi a di Bëibel fa Simison bi du woto gaan soni. A bi kii wan lëun hën wanwan, hën bakaten, hën a kii 30 Filisiti womi a di foto de kai Asikelon (Kuutm. 14:5, 6, 19). Simison bi sabi taa an bi o sa du dee soni dë ee Jehovah an bi heepi ën. Wan daka, a bi feti ku 1000 Filisiti womi u te a kii de. Baka di dë, hën dëë wata bi ta kii ën. Andi a bi du? Wë an bi suku u heepi hënseei, ma a bi suku heepi a Jehovah.​—Kuutm. 15:18.

9. Unfa Jehovah bi piki di begi u Simison? (Kuutuma 15:19)

⁹ Jehovah bi piki di begi u Simison. A bi latja wan sitonu u wata bi sa kumutu nëën, sö taa Simison bi sa feni wata u bebe. Di Simison bebe di wata, hën „a feni kaakiti baka”. (Lesi Kuutuma 15:19.) Baka sömëni jaa, hën Gadu bi mbei di tjabukama de kai Samuëli sikifi di buku Kuutuma. Nöö a di ten dë, a djei kuma wata bi ta kule kumutu a di kamian dë jeti. Te dee Isaëli sëmbë bi si di kamian dë, nöö a bi o sa ta heepi de u de an fëëkëtë taa ee de ta futoou Jehovah, söseei ee de ta hoi deseei nëën, nöö a o ta heepi de.

10. Andi u musu du fuu sa feni heepi a Jehovah? (Luku di peentje tu.)

¹⁰ U musu ta suku heepi a Jehovah aluwasi fa u köni tjika, aluwasi fa u sa’ u du soni tjika, söseei aluwasi un pei wooko u bi du dëën a fesi kaa. U musu abi sakafasi, nöö u musu tei taa te u ta buta futoou a Jehovah, nëën ufö soni sa waka bunu da u tuutuu. Leti kumafa Simison bi feni kaakiti di a bi bebe di wata di Jehovah bi dëën, sö nöö useei o feni kaakiti tu te u ta wooko ku hii dee soni dee Jehovah ta seeka da u.​—Mat. 11:28.

11. Unfa u sa buta futoou a Jehovah? Konda wan woto.

¹¹ Boo buta pakisei a wan u dee baaa fuu u Losiaköndë de kai Aleksey. Di baaa aki ta hoi dou hii fa de ta du ku ën gaanfa seei. Andi bi heepi ën faa hoi dou hii fa soni bi ta taanga dëën? Hii juu hën ku hën mujëë ta du dee soni di de musu ta du a di biibi. A bi taki taa: „Mi ta mbei möiti u mi ta lei soni u Bëibel go dou, söseei u mi ta lesi di Bëibel hii daka. Hiniwan mamate mi ku mi mujëë ta luku di daka wöutu makandi, nöö u ta begi Jehovah.” Andi u ta lei a di woto aki? U ta lei nëën taa wa musu ta buta futoou a useei, ma u musu ta buta futoou a Jehovah. Unfa u sa du di soni dë? Wë u sa du sö te u ta lei soni u Bëibel hii juu, söseei te u ta du dee woto soni dee u musu ta du fuu sa abi wan taanga biibi. Te u ta du sö, nöö Jehovah o heepi u fuu sa dini ën go dou. A bi da Simison kaakiti, nöö sö nöö a sa da u kaakiti tu.

SIMISON BI HOI DOU

12. Un föutu Simison bi mbei, nöö unfa di dë di a bi go dë ku Delaila bi tooka ku di dë di a bi go dë ku dee woto mujëë?

¹² Simison bi dë wan zöndu libisëmbë leti kuma u nöö. Fëën mbei so juu a bi ta mbei föutu. A bi mbei wan föutu di bi tja gaan hogi ko dëën. Di a bi dë kuutuma te dou wan pisiten, hën a bi „ko lobi wan mujëë de kai Delaila, di bi ta libi a di lagi kamian u Solëki” (Kuutm. 16:4). Ufö di dë, Simison bi mbei buka u tööu ku wan Filisiti mujëë. Ma „Jehovah hën bi kë u Simison du di soni dë”, u di a „bi ta suku wan okasi faa du wan soni ku dee Filisiti sëmbë”. Bakaten Simison bi fika a di wosu u wan jajo mujëë, a di foto u dee Filisiti sëmbë de kai Gasa. Jehovah bi da Simison kaakiti a di okasi dë faa bi hön dee döö u di peni u di foto puu, sö taa a bi sa möön kösökösö da sëmbë u go feti wini di foto (Kuutm. 14:1-4; 16:1-3). Ma u sa taki taa na u di Simison bi kë go feti ku dee Filisiti sëmbë hedi mbei a bi go dë ku Delaila. Biga Delaila hën a bi dë wan Isaëli sëmbë.

13. Andi Delaila bi du ku Simison?

¹³ Delaila bi sei Simison da dee Filisiti sëmbë, u di de bi dëën wan gaan möni. A sa kan taa u di Simison bi lobi Delaila gaanfa seei, mbei an bi sa fusutan taa hogi Delaila bi kë du ku ën. Delaila bi ta hakisi ën nöömö faa konda dëën unfa a du taanga sö. Hën te u kaba fëën, hën Simison konda dëën. Di föutu di Simison bi mbei dë, bi mbei taa a lasi di kaakiti fëën, söseei a bi mbei taa Jehovah an bi feni ën u bunu möön u wan pisiten.​—Kuutm. 16:16-20.

14. Un hogi bi miti Simison u di a bi futoou Delaila?

¹⁴ Gaan hogi bi miti Simison, u di a bi futoou Delaila ka faa futoou Jehovah. Dee Filisiti sëmbë bi kisi ën, hën de booko hën wojo. De bi butëën a dunguwosu a di foto Gasa, ka a bi booko dee döö u di foto, hën de butëën a ko dë wan sëmbë di ta mbii soni sii. Bakaten dee Filisiti sëmbë bi hoi wan piizii u de. De bi tjuma soni te a bigi da di poipoi gadu u de de kai Dagon, u di de bi ta si kuma hën bi heepi de u de kisi Simison. De bi puu Simison a dunguwosu, hën de tjëën ko a di piizii u de bi sa feni ën „lafu pikisö”.​—Kuutm. 16:21-25.

15. Unfa Simison bi lei taa a bi toona ta futoou Jehovah? (Kuutuma 16:28-30) (Luku di peentje u di kafiti.)

¹⁵ Simison bi mbei wan gaan föutu, ma tökuseei a bi hoi dou. A bi suku wan okasi faa bi sa feti wini dee Filisiti sëmbë, u di di wooko dë Jehovah bi dëën faa du. (Lesi Kuutuma 16:28-30.) Simison bi begi Jehovah, hën a piki ën taa: „Be mi du ku dee Filisiti sëmbë.” Di tuutuu Gadu bi piki di begi u Simison, hën a toona dëën di kaakiti fëën di a bi abi. A sö wan fasi Simison bi kii möön hia Filisiti sëmbë möön fa a bi kii a fesi.

16. Andi u sa lei u di föutu di Simison bi mbei?

¹⁶ Hii fa gaan hogi bi miti Simison u di a bi mbei föutu, tökuseei an bi disa u du soni kumafa Jehovah kë. Aluwasi ee u mbei wan föutu, hën de bë wojo da u nasö u lasi wan gaandi di u bi abi, tökuseei wa musu disa u du soni kumafa Jehovah kë. Hoi a pakisei taa Jehovah an ta disa u (Ps. 103:8-10). Hii fa u ta mbei föutu, tökuseei a sa tei u fuu wooko dëën jeti, leti kumafa a bi tei Simison faa wooko dëën.

17-18. Andi ta da i taanga a di woto u Baaa Michael? (Luku di peentje tu.)

¹⁷ Luku di woto u wan njönku baaa de ta kai Michael. A bi abi hia soni ta du a di dini di a ta dini Jehovah. A bi dë wan dinai, söseei a bi ta du di kowoonu pioniliwooko. Ma a bi ko mbei wan föutu, di bi mbei taa a lasi dee gaandi dee a bi abi a di kemeente. A bi taki taa: „Ufö di soni aki pasa, nöö mi bi ta abi sömëni wooko ta du da Jehovah. Hën te u mi mëni, hën a bi ko dë kuma ma bi sa du na wan soni da Jehovah möön. Di di soni aki pasa, nöö ma bi ta si kuma Jehovah bi go disa mi, ma mi bi ta hakisi miseei ee mi ku ën bi o sa ko dë kumafa u bi dë fosu, söseei ee mi bi o sa wooko dëën a di kemeente kuma fosu.”

¹⁸ Baaa Michael bi hoi dou, nöö a dë u gafa tuutuu. A bi taki taa: „Mi bi ta mbei hii möiti u mi ku Jehovah bi sa ko dë gaan mati baka. Mi bi ta begi ën hii juu, mi bi ta lei soni u Bëibel, söseei mi bi ta kai pakisei a dee soni dee mi bi ta lei.” Baka wan pisiten, Baaa Michael bi toona feni dee gaandi fëën baka. Nöunöu a dë wan gaanwomi, söseei a ta du di kowoonu pioniliwooko. A bi taki taa: „Di heepi di dee gaanwomi ku dee wotowan bi heepi mi, bi heepi mi u mi ko si taa Jehovah lobi mi jeti. Nöunöu mi sa dini Jehovah a di kemeente ku wan limbo hati baka. Di soni aki ta lei taa ee wan sëmbë ta tjali tuutuu u wan zöndu di a du, nöö Jehovah o dëën paadon.” U sa dë seiki taa Jehovah o tei u fuu wooko dëën, söseei a o mbei u feni gaan bunu, aluwasi u mbei wan föutu. A o du sö, solanga u ta futoou ën, söseei solanga u ta mbei hii möiti fuu ko ta du soni woto fasi.​—Ps. 86:5; Nöng. 28:13.

19. Un taanga i bi feni a di woto u Simison?

¹⁹ A di woto aki, u bi taki u wantu u dee gaan soni dee bi pasa a di libi u Simison. A bi ta mbei föutu. Ma hii juu a bi ta mbei möiti u dini Jehovah go dou. A bi du sö, hii fa a bi mbei wan föutu, u di a bi go dë ku Delaila. Nöö Jehovah an bi disëën. Jehovah bi tei Simison faa du wan gaan soni dëën jeti. Jehovah bi ta si ën jeti kuma wan womi di bi abi wan taanga biibi, fëën mbei a mbei de sikifi di në fëën buta a Hebelejën kapitë 11, ka de sikifi dee në u dee sëmbë dee bi abi wan taanga biibi. A ta da u taanga seei u di u sabi taa u ta dini wan Gadu di lobi u, söseei di ta dë kabakaba u da u taanga, möönmöön te u abi ën fanöudu! Fëën mbei be useei begi Jehovah kumafa Simison bi begi ën. A bi taki dëën taa: „Mi ta begi i, mëni mi nöö i da mi kaakiti.”​—Kuutm. 16:28.