Gadu kë fuu libi bööböö ku waiwai u teego a wan paladëisi a goonliba!

Ma sonte i ta hakisi iseei: ’Di soni dë sa pasa wan daka u?’ Di Bëibel taki taa di Könuköndë u Gadu o mbei taa di soni aki pasa. Nöö Gadu kë u hii sëmbë lei soni u di Könuköndë dë ku söseei andi a o du da u.​—Psalöm 37:11, 29; Jesaaja 9:7.

Gadu kë fuu feni wini.

Leti kumafa wan bumbuu tata kë taa soni waka bunu ku dee mii fëën, sö nöö u Tata a liba ala kë taa u dë waiwai u nöömö (Jesaaja 48:17, 18). A paamusi taa „di sëmbë di ta du di kë u Gadu o dë u teego”.​—1 Johanisi 2:17, NW.

Gadu kë fuu waka a dee pasi fëën.

Di Bëibel taa di Gadu di mbei u kë „lei u dee pasi fëën” sö taa u sa „waka a dee pasi fëën” (Jesaaja 2:2, 3). A tja ’sëmbë di musu tja di në fëën’ ko a wan, sö taa de sa mbei sëmbë a hii goonliba ko sabi andi a kë.​—Tjabukama 15:14, NW.

Gadu kë fuu dini ën kuma wan famii.

Di soifi fasi u dini Jehovah an ta paati sëmbë ku sëmbë, ma a ta mbei de ko dë wan kuma wan famii u di de abi tuutuu lobi (Johanisi 13:35). Un pei sëmbë a di ten aki ta lei womi ku mujëë a hii së u goonliba unfa de musu dini Gadu kuma wan famii? Wë ku di buku aki u kë heepi i fii ko sabi di piki u di hakisi aki.

Un mëni Jehovah Kotoigi i sabi? Kandë so fuu ta libi a di kamian ka i ta libi, nasö so fuu ta wooko ku i a di wan kamian nasö ta sindo a di wan seei kalasi ku i. Nasö sonte u bi taki soni u Bëibel ku i wan pasi kaa. Ambë seei da u, nöö faandi mbei u ta konda da wotowan andi u ta biibi?

U dë kuma woto sëmbë nöö. U da sëmbë u peipei lö ku peipei köndë, nöö so fuu go a siköö, wotowan an go a siköö, söseei u ta du peipei wooko tu. So fuu bi nango a woto keiki ufö u bia ko dë Jehovah Kotoigi, nöö wotowan an bi ta biibi a Gadu seei. Ma bifö u toon Jehovah Kotoigi, hiniwan fuu bi tei ën ten u öndösuku finifini dee soni di Bëibel ta lei (Tjabukama 17:11). Dee soni u lei bi kai ku u, hën u seei buta taa woo dini Jehovah Gadu.

Dee soni u lei a Bëibel tja wini ko da u. Leti kumafa woto sëmbë ta miti fuka, ta abi suwaki fasi, sö nöö a dë ku u tu. Ma u di u ta mbei möiti u libi ku dee wëti u Bëibel a hiniwan daka fuu libi, mbei u ko si taa di libi fuu ko möön bunu (Psalöm 128:1, 2). Di dë da wan u dee soni di mbei taa u ta konda dee bunu soni u lei a Bëibel da wotowan.

U ta libi ku dee wëti u Gadu. Di Bëibel ta lei taa te wan sëmbë ta libi ku dee wëti u Gadu, nöö soni nango bunu ku ën, a ta abi lesipeki da wotowan, an ta ganjan wotowan, söseei a ta abi bunu fasi tu. Boiti di dë, te sëmbë ta libi ku dee wëti u Gadu, nöö de ta dë gösöntu sëmbë di ta wooko taanga a di libi. Söseei dee wëti u Gadu ta da wosudendu taanga u ko dë wan, nöö a ta heepi de u na libi a wan fanafiti fasi. U di u sabi gbelingbelin taa „Gadu an ta luku fesi”, mbei u dë kuma baaa ku sisa di ta dini Gadu makandi a hii goonliba, nöö wa ta mbei lö nasö politiki soni paati u. Hii fa u dë kuma woto sëmbë nöö, tökuseei u dë wan apaiti kulupu sëmbë.​—Tjabukama 4:13; 10:34, 35.

• Na un fasi Jehovah Kotoigi dë kuma woto sëmbë nöö?

• Un pei fasi dee Kotoigi ko abi u di de lei soni u Bëibel?

Hia sëmbë ta mëni taa Jehovah Kotoigi da di në u wan njunjun keiki. Ma na sö a dë. A pasa söwan 2700 jaa kaa di Bëibel ta kai dee futuboi u di wan kodo tuutuu Gadu, hën „kotoigi” (Jesaaja 43:10-12). Te dou di jaa 1931, sëmbë bi sabi u kuma Bëibel Öndösukuma. Faandi mbei u tei di në Jehovah Kotoigi?

Di në ta mbei sëmbë ko sabi ambë da di Gadu fuu. Kumafa dee awoo lolulolu pampia ta lei, nöö di në u Gadu, Jehovah, pasa seibi dusu pasi di a dë u feni a di Bëibel. A sömëni Bëibel de puu di në, hën de buta Masa nasö Gadu a di kamian ka di në bi musu dë. Ma di tuutuu Gadu bi mbei Mosesi ko sabi ën di a bi piki ën taa hën në da Jehovah. A bi taa: „Mi në hën disi u nöömö” (Ëkisodesi 3:15). A sö wan fasi Gadu bi buta hënseei apaiti u dee fasifasi gadu. A dë wan piizii soni da u u tja di santa në u Gadu.

Di në ta konda un wooko u ta du. Na awooten sömëni limbohati womi ku mujëë bi dë. Abeli bi dë di fosuwan u dee limbohati kotoigima di bi konda soni u di biibi di de bi ta biibi a Jehovah. Nöö a dee höndöhöndö jaa di pasa, sëmbë kuma Noa, Abahamu, Sala, Mosesi, Dafiti ku wotowan bi ko dë a di kulupu u dee ’hia kotoigima’ dë (Hebelejën 11:4–12:1). Leti kumafa wan kotoigima ta hopo fan da wan sëmbë di de tja go a kuutu di an du na wan hogi, sö nöö u dë kabakaba u mbei sëmbë ko sabi dee tuutuu soni u di Gadu fuu.

U ta tja di në Jehovah Kotoigi kumafa Jesosi bi tjëën. Di Bëibel ta kai ën „di kotoigima di dë u futoou ku di ta konda tuutuu soni” (Akoalimbo 3:14, NW). Jesosi seei taa a bi ’konda di në u Gadu’ da sëmbë, nöö a bi ’ta lei sëmbë tuutuu soni’ di nama ku Gadu (Johanisi 17:26; 18:37). Fëën mbei dee tuutuu bakama u Keesitu ta tja di në u Jehovah, nöö de ta mbei woto sëmbë ko sabi di në dë tu. Di soni dë Jehovah Kotoigi ta mbei taanga möiti u du.

• Faandi mbei dee Bëibel Öndösukuma tei di në Jehovah Kotoigi?

• Un longi Jehovah abi kotoigima a goonliba aki kaa?

• Ambë da di möön gaan Kotoigima u Jehovah?