Gadu kë fii dë wan mati fëën. I bi mëni wan daka taa i bi sa ko dë wan mati u di möön gaan Sëmbë di dë a mundu ö? Abahamu bi dë wan womi di bi libi gaanduwe kaa. De bi kai ën Gadu mati (Jakobosi 2:23). Bëibel ta konda soni u woto sëmbë di bi piizii u dë mati u Gadu. Di soni dë mbei taa de bi feni bunu. A di ten aki, sëmbë u hii së u goonliba ko toon Gadu mati. I seei sa dë wan mati u Gadu tu.

A möön bunu u dë wan mati u Gadu teka fii dë wan mati u libisëmbë. Na wan daka seei Gadu ta mbei taa dee mati fëën fii tjali (Psalöm 18:25). A möön bunu u dë wan mati u Gadu teka fii abi hia gudu. Te wan guduma dëdë, nöö di möni fëën ta fika da woto sëmbë. Ma dee sëmbë dee dë mati u Gadu abi wan gudu di woto sëmbë an sa tei puu a de maun dendu.​—Mateosi 6:19.

So sëmbë o biinga u tapa i fi ja lei soni u Gadu möön. So u dee mati fii ku famii fii seei o kë tapa i (Mateosi 10:36, 37). Ee woto sëmbë ta lafu i nasö de ta bë wojo da i, nöö hakisi i seei: ’Ambë hati mi kë piizii? Libisëmbë nasö Gadu?’ Pakisei di soni aki: Ee wan sëmbë taki da i taa ja musu njan möön, i bi o haikëën u? Kwetikweti! I musu njan fii sa tan a libi. Ma Gadu sa mbei taa i libi u teego! Wë nöö na mbei na wan sëmbë tapa i fii ko sabi unfa i sa dë wan mati u Gadu e.​—Johanisi 17:3.

Di möön bunu soni di bi sa miti i, hën da te i ko toon mati u Gadu. Gadu o lei i unfa i sa dë kölöku sö taa ja ta dë pantapanta. A o puu poipoi biibi ku taku guwenti a i liba. A o haika dee begi fii. A o heepi i sö taa i fii bunu te a i hati dendu. A o mbei i kisi futoou taa di libi fii o nango bunu (Psalöm 71:5; 73:28). Gadu o hoi baka da i te i abi booko hedi (Psalöm 18:18). Nöö di kado Gadu kë da i, hën da teego libi.​—Loomë 6:23.

Te i ko dë zuntu u Gadu, nöö joo ko dë zuntu u dee mati u Gadu. De seei o ko dë i mati tu. Hën da de o ko dë kuma baaa ku sisa fii. Waiwai seei de o lei i soni u Gadu, de o heepi i, söseei de o da i degihati.

U ku Gadu na pei. Wan soni dë taanga fanöudu di i musu fusutan te i kë toon mati u Gadu. Di matifasi di i abi ku Gadu na di matifasi di i abi ku dee pei fii. Gadu gaandi fuu, a köni möön u, söseei a abi kaakiti möön u tu. A abi di leti u dë di Tiima fuu. Fëën mbei ee u kë dë mati fëën, nöö u musu haikëën. Söseei u musu du dee soni a ta hakisi u fuu du. Di soni aki o tja bunu ko da u hii juu.​—Jesaaja 48:18.

Ee i kë dë wan mati u Gadu, nöö i musu ko sabi soni fëën. Dee mati fii sabi i në u? De ta kai a i në u? Aai. Gadu kë taa i ko sabi hën në, nöö a kë fii kai ën nëën në. Gadu në da Jehovah (Psalöm 83:18; Mateosi 6:9). I musu sabi andi a lobi ku andi a buuse, ambë da dee mati fëën ku ambë da dee felantima fëën. Na a wan kodo daka dendu i ta ko sabi wan sëmbë bumbuu. Di Bëibel taki taa a dë wan köni soni u buta ten a wan së fuu ko sabi Jehovah.​—Efeise 5:15, 16.

Dee mati u Gadu ta du soni di ta kai ku ën. Pakisei dee mati fii. Ee i ta libi hogi ku de, ee i ta du soni di de buuse, nöö de o hoi i kuma mati jeti ö? Kwetikweti! Söseei tu, ee i kë dë wan mati u Gadu, nöö i musu ta du soni di ta kai ku ën.​—Johanisi 4:24.

Na hii keiki ta heepi i fii ko dë mati ku Gadu. Jesosi bi dë di möön zuntu mati u Gadu. A bi taki soni u tu pasi. Wan u dee pasi baai, nöö te a hia sëmbë ta tei di pasi dë. Di pasi dë ta tja sëmbë go kaba a sösö. Di wotowan sumaa, nöö pikisö sëmbë tö ta waka nëën liba. Di pasi dë ta tja sëmbë go a di libi u teego. Hën da ee i kë dë wan mati u Gadu, nöö i musu ko sabi di finifini fasi fa i musu dini ën.​—Mateosi 7:13, 14.