Tan mbei möiti u toon wan möön bunu peleikima
1. Un woto u di fosu jaahöndö ta lei u taa u kuma peleikima musu nango a fesi?
1 Keesitu sëmbë musu ta mbei möiti u toon möön bunu peleikima. Fëën mbei Jesosi bi lei dee bakama fëën fa de bi musu du di peleikiwooko möön bunu (Luk. 9:1-5; 10:1-11). Di soni dë mbei Akila ku Pesila bi tei Apolo ko ta wooko ku de makandi. De bi „tjëën go a wosu go fan ku ën butëën a pasi faa sa sabi soni u Gadu möön fini” (Tjab. 18:24-26). Di seei soni dë mbei Paulosu bi da Timoteo, wan bunu peleikima, di taanga u ta lei sëmbë soni nöömö, sö taa hii ’sëmbë bi o si taa a nango a fesi seei’ (1 Tim. 4:13-15). Aluwasi u ta peleiki di bunu buka kuma saafu u Masa sömëni jaa kaa, tökuseei u musu tan mbei möiti u ko toon möön bunu peleikima.
2. Unfa u sa tei lei a wotowan?
2 Tei lei a wotowan: Wan soni di u sa du fuu ko sa’ u peleiki möön bunu, hën da u musu ta tei lei a wotowan (Nöng. 27:17). Fëën mbei u musu ta luku bunu te wan woto peleikima ta peleiki. I sa suku lai a dee peleikima dee sa’ u peleiki bunu, nöö haika bunu andi de o piki i (Nöng. 1:5). Ja kaba sabi fa i musu seeka iseei u toona go a wan sëmbë di i bi peleiki da u, nasö u bigi wan Bëibel studie, nasö u du wan woto soni di nama ku di peleikiwooko u? Hakisi di baaa di ta tei fesi a di peleikiwooko kulupu fii, nasö wan woto peleikima di sa’ u peleiki bunu, faa heepi i. Na fëëkëtë taa di santa jeje u Jehovah sa heepi u fuu peleiki möön bunu. Fëën mbei i musu ta begi ën hii juu faa da i ën.—Luk. 11:13.
3. Andi u musu du te wan sëmbë da u wan lai, aluwasi an ta kai ku u?
3 Ee wan sëmbë da i wan lai, nöö hati fii an musu boonu, aluwasi a piki i ën a wan fasi di na kai ku i (Peleik. 7:9). Leti kuma Apolo, i musu abi sakafasi, söseei i musu tei ën u bigi te wan sëmbë da i wan lai. Te i ta du sö, nöö i ta lei taa i köni.—Nöng. 12:15.
4. Faandi mbei Jesosi bi taki taa u kuma peleikima musu nango a fesi nöömö?
4 Wan sëmbë ta gafa Gadu te a nango a fesi: Jesosi bi ta wooko ku nöngöwoto u heepi dee bakama fëën u du di peleikiwooko möön bunu. A bi tei hënseei djei ku wan doloifi pau, nöö dee bakama fëën bi dë dee maun u di doloifi pau dë. A bi taki taa hën Tata ta djafu hiniwan maun u di pau puu di an ta pai, sö taa a sa „toona pai möön hia njanjan” (Joh. 15:2). Leti kumafa wan sëmbë di ta paandi doloifi kë u dee doloifi maun pai njanjan, sö nöö Jehovah kë fuu nango a fesi, sö taa u sa ’ta gafëën nöömö’ (Heb. 13:15). Un wini a ta tja ko te u kuma peleikima nango a fesi? Jesosi bi taki taa: „Mi Tata o feni gaan nëbai e, dee sëmbë, ee di libi fuunu ta pai hia fuuta dëën.”—Joh. 15:8.