Dee mati u Gadu o libi a di Paladëisi

Di Paladëisi an o dë kuma di goonliba teka u ta libi aki. Gadu an bi kë taa buuja ku kusumi, pen ku pena, dë a goonliba sö. A di ten di ta ko, Gadu o mbei taa di goonliba toon wan paladëisi. Unfa di Paladëisi o dë? Boo luku andi di Bëibel ta taki:

Bunuhati sëmbë. Di Paladëisi o dë di tan-kamian u dee mati u Gadu. De o ta du bunu soni da wotowan. De o ta libi leti, kumafa Gadu kë.​—Nöngö 2:21.

Njanjan o dë te a hia. A di Paladëisi, gaan hangi an o dë möön. Di Bëibel taki taa: „Te a hia njanjan o fuu goonliba.”​—Psalöm 72:16.

Bumbuu wosu ku wooko di ta da piizii. A di Paladëisi a goonliba, hii famii o abi u de seei wosu. Hiniwan sëmbë o ta du wooko di ta mbei hën hati fii piizii.​—Jesaaja 65:21-23.

Na wan feti o dë a goonliba möön. Sëmbë an o ta feti möön, söseei de an o ta dëdë a gaan feti möön. Gadu Wöutu taki taa: ’Gadu o mbei taa feti kaba.’​—Psalöm 46:8, 9.

Bumbuu gösöntu. Di Bëibel paamusi taa: ‘Na wan kodo sëmbë [u di Paladëisi] o taki taa: ’Mi suwaki’ (Jesaaja 33:24). Söseei, na wan sëmbë o lan, na wan bookowojoma o sai dë. Bookojesima ku tapabukama an o dë möön tu.​—Jesaaja 35:5, 6.

Pen, kusumi ku dëdë an o dë möön. Gadu Wöutu taa: ’Dëdë an o dë möön. Na wan sëmbë o tjali nasö bai kai wolo, söseei pen an o de möön. Dee awoo soni dee bi dë tuu pasa go kaa.’​—Akoalimbo 21:4.

Takuhati sëmbë an o dë möön. Jehovah ta paamusi taa: „De o koti dee hogidu sëmbë puu a goonliba, söseei de o hön dee sei-sëmbëma puu a goonliba tu.”​—Nöngö 2:22.

Sëmbë o lobi wotowan, söseei de o lobi de na de. Na wan hogi libi o dë möön, sëmbë an o ta fuka wotowan möön. Langawojo ku buuse u wotowan an o dë möön. Hii sëmbë o ta kai a wan, nöö de o ta libi leti, kumafa Gadu kë taa de musu libi.​—Jesaaja 26:9.