Wan fufuuma dë a Isaëli

LUKU andi di womi dë ta bei a di wosu fëën! A ta bei wan hanse djakiti, wan pisi goutu ku wan tu pisi soofu. A tei de puu a di foto Jelikou. Ma andi dee Isaëli sëmbë bi musu du ku dee soni de tei a Jelikou? I saandi jeti ö?

De bi musu poi de, nöö di goutu ku di soofu bi musu go a di möni këdë u di tenti u Jehovah. Hën da dee sëmbë aki pasa Gadu buka. De fufuu soni u Gadu. Di womi në da Akan, nöö sëmbë fëën wosudendu da dee sëmbë aki. Boo go luku andi pasa.

Baka di Akan fufuu dee soni aki, hën Josua manda wan tu womi u go feti ku di foto Ai. Ma de lasi di feti. So u de dëdë, nöö dee wotowan kule go. Josua tjali seei. A tjökö kini bendi fesi a goon, hën a këë da Jehovah taa: ’Faandi mbei i disa di soni aki pasa ku u?’

Hën Jehovah piki ën taa: ’Hopo taanpu! Isaëli du wan hogi. De tei so u dee soni de bi musu poi nasö buta a di tenti u Jehovah. De fufuu wan hanse djakiti, hën de tjubi ën. Më o limbo unu pasi ee wan poi di djakiti ku di sëmbë di tei dee soni aki.’ Jehovah piki Josua taa a o lei ën ambë da di hogiduma dë.

Hën Josua tja hii dee sëmbë ko makandi, hën Jehovah lei ën taa Akan da di hogiduma. Hën Akan taa: ’Mi du hogi dee sëmbë. Di mi si wan hanse djakiti, wan pisi goutu ku wan tu pisi soofu, hën mi bi kë de sö tee taa mi tei de. Joo feni de beibei a mi wosu.’

Di dee sëmbë feni dee soni, de tja de go da Josua, hën a piki Akan taa: ’Faandi mbei i tja hogi ko miti u? Jehovah o tja hogi ko miti i tu!’ Hën hii dee sëmbë tei sitonu vinde naki Akan ku ën wosudendu u te de tuu dëdë piii. Di soni aki an ta lei u taa nöiti u musu tei soni di na dë fuu ö?

Baka di dë, dee Isaëli sëmbë go feti möön ku Ai. Di pasi dë Jehovah heepi dee sëmbë fëën, hën de wini di feti djeee.