Saulosu da di fosu könu u Isaëli

LUKU fa Samuëli ta tutu fatu a di womi hedi. Sö de bi naa du ku wan sëmbë u lei wotowan taa hën de tei buta könu. Jehovah piki Samuëli u tutu fatu a Saulosu hedi. Wan apaiti sumëësuti fatu wë di dë e.

Saulosu bi pakisei taa an bumbuu tjika u toon könu. A piki Samuëli taa: ’Mi dë u di lö u Benjamin, di möön pikiwan a Isaëli. Faandi mbei i taa mi o dë könu?’ Jehovah lobi Saulosu u di an feni taa a bigi nasö hei möön wotowan. Hën mbei a tei ën buta könu.

Ma Saulosu an bi dë wan pootima, nöö an sati tu. Di famii fëën gudu, nöö a dë wan gaan hanse langa womi. Sëmbë an bi langa kuma ën a Isaëli! Saulosu dë wan gaan kulema tu, nöö a taanga seei. Dee sëmbë wai taa Jehovah tei Saulosu buta könu. Hii de tuu bigi bai taa: ’Be di könu libi langa ooo!’

Dee felantima u Isaëli ko möön taanga möön fosu. De ta fuka dee Isaëli sëmbë gaanfa jeti. Sati baka di Saulosu toon könu, hën dee Amon sëmbë ko u ko feti ku de. Ma Saulosu bi tja wanlö hia sodati ko a wan, hën de wini dee Amon sëmbë. Di soni dë mbei dee sëmbë wai taa Saulosu dë könu.

Dee jaa ta pasa, dee Isaëli sëmbë ta wini sömëni feti fa Saulosu dë fesima u de. Söseei Saulosu a’ wan womi mii de kai Jonatan di a’ degihati. Nöö Jonatan heepi dee Isaëli sëmbë u wini sömëni feti. Dee Filisiti sëmbë dë gaan felantima u dee Isaëli sëmbë jeti. Hën wan daka dusudusu Filisiti sëmbë ko u ko feti ku dee Isaëli sëmbë.

Samuëli piki Saulosu faa wakiti ën te a ko u tjuma wan mbeti u paka Jehovah. Ma Samuëli an bi ta dou jeti. Hën Saulosu fëëë taa dee Filisiti sëmbë o bigi feti ku de, hën a go fëën go tjuma di mbeti ën seei. Di Samuëli ko dou hën a piki Saulosu taa a mbei taangajesi da Gadu. ’Jehovah o tei wan woto sëmbë u dë könu u Isaëli,’ sö Samuëli piki ën.

Bakaten Saulosu mbei taangajesi baka. Hën wë Samuëli piki ën taa: ’A möön bunu u haika Jehovah ka fii dëën di möön bunu sikapu fii. U di ja piki Jehovah buka, mbei Jehovah an o disa i u dë könu u Isaëli.’

U sa lei wan bunu soni u di woto aki. A ta lei u taa a dë fanöudu u piki Jehovah buka hii juu. Söseei a ta lei u taa wan bumbuu sëmbë, kumafa Saulosu bi dë, sa tooka ko dë wan hogi sëmbë. Wa bi o kë ko hogi wan daka, na sö nö?