WOTO 57
Andi i musu du te i mbei wan gaan föutu?
Hii fa i lobi Jehovah ku hii i hati, söseei hii fa i ta pooba u na du wan soni di o hati ën, tökuseei a sa pasa taa i du wan soni di hati ën. Ma so u dee soni dee u ta du dee an bunu, ta hogi möön wotowan (1 Kolenti 6:9, 10). Ee i mbei wan gaan föutu, nöö hoi a pakisei taa Jehovah lobi i jeti. A dë kabakaba u da i paadon, söseei a dë kabakaba u heepi i.
1. Andi u musu du ee u kë u Jehovah da u paadon?
Dee sëmbë dee lobi Jehovah ta tjali gaanfa seei te de mbei wan gaan föutu. Ma di soni di Jehovah paamusi de aki ta da de kötöhati: „Aluwasi dee zöndu fuunu bë kuma buuu, tökuseei de o ko weti faaan kuma ëisi” (Jesaaja 1:18). Ee u ta tjali tuutuu u di hogi di u du, nöö Jehovah o da u paadon ku hii hën hati. Unfa u sa lei taa u ta tjali tuutuu? Wë, te u ta tjali tuutuu, hën da wa ta du di hogi di u bi du möön, söseei u ta begi Jehovah faa da u paadon. Boiti di dë, woo mbei taanga möiti u tooka di fasi fa u bi ta pakisei nasö dee soni dee u bi du di an bi bunu, dee bi mbei taa u du soni di an ta kai ku Jehovah. Nöö woo mbei möiti u ta libi kumafa dee wëti u Jehovah ta taki.—Lesi Jesaaja 55:6, 7.
2. Unfa Jehovah ta wooko ku dee gaanwomi u de heepi u te u mbei wan gaan föutu?
Ee u mbei wan gaan föutu, nöö Jehovah ta piki u taa u musu „kai dee gaanwomi u di kemeente”. (Lesi Jakobosi 5:14, 15.) Dee gaanwomi lobi Jehovah ku dee baaa ku dee sisa. De sabi unfa de musu heepi u fuu ku Jehovah sa ko dë mati baka.—Galasia 6:1.
Unfa dee gaanwomi ta heepi u te u mbei wan gaan föutu? Tu nasö dii gaanwomi o wooko ku di Bëibel u lei u faandi mbei di soni di u du an bunu. De o da u taanga, söseei de o piki u andi u sa du fu wa mbei di föutu dë möön. Ee wan sëmbë du wan gaan soni di an ta kai ku Jehovah, hën di sëmbë an tjali u di soni di a du, nöö dee gaanwomi ta puu ën a di kemeente, sö taa an poi dee woto sëmbë a di kemeente.
WOTO SONI DI I SA LEI
Lei taa i ta tei ën u bigi taa Jehovah ta heepi u te u mbei wan gaan föutu.
3. Te u konda finifini andi u du, nöö u ku Jehovah o ko dë mati baka
Hiniwan föutu di u ta mbei ta hati Jehovah, fëën mbei u ta konda finifini dëën andi u du. Lesi Psalöm 32:1-5, nöö piki di hakisi aki:
Faandi mbei a bunu fuu konda finifini da Jehovah andi u du ka fuu tjubi soni dëën?
Baka te i konda finifini da Jehovah andi i du, nöö i musu go a dee gaanwomi u de heepi i, nöö háti fii an o fon i möön. Pëë di FËLÖN, nöö piki di hakisi aki.
Unfa dee gaanwomi a di fëlön bi heepi Canon faa toona ko a Jehovah baka?
U musu piki dee gaanwomi hii soni finifini, u di Jehovah hën buta de u de heepi u. Lesi Jakobosi 5:16, nöö piki di hakisi aki:
Faandi mbei an o ta taanga da dee gaanwomi u de heepi u te u ta konda hii soni da de finifini?
Konda finifini da dee gaanwomi andi i du, nöö da Jehovah pasi faa heepi i u di a lobi i
4. Jehovah ta lei taa a a’ tjalihati u dee sëmbë dee ta tjali u wan föutu di de mbei?
Ee wan sëmbë mbei wan gaan föutu, hën an kë du soni kumafa dee wëti u Jehovah ta taki, nöö de ta puu sö wan sëmbë a di kemeente. Te de puu wan sëmbë a di kemeente, nöö wa ta hulu ën möön. Lesi 1 Kolenti 5:6, 11, nöö piki di hakisi aki:
Te wan sëmbë di an ta tjali u di hogi di a du ta nama ku di kemeente jeti, nöö a dë leti kuma te i buta sooda a boon. Andi sö wan sëmbë sa du ku di kemeente?
U di dee gaanwomi ta djeesi Jehovah a di tjalihati di a abi, mbei de ta du hii soni di de sa, u heepi dee baaa ku dee sisa di de bi puu a di kemeente. Sömëni u dee baaa ku dee sisa aki bi toona ko a di kemeente baka, u di de bi tei di sitaafu di de bi da de. Di sitaafu di de bi da de, bi heepi de u de fusutan taa di fasi fa de bi tja deseei an bi bunu.—Psalöm 141:5.
Te u luku di fasi fa Jehovah ta du soni te a nama ku wan sëmbë di mbei wan gaan föutu, nöö unfa di soni dë ta lei taa Jehovah ta du soni a wan leti fasi, taa a abi tjalihati, söseei taa a lobi sëmbë?
5. Jehovah ta da u paadon te u lei taa u ta tjali tuutuu
Jesosi bi konda wan woto u heepi u fuu ko fusutan unfa Jehovah ta fii, te wan sëmbë ta tjali tuutuu u di föutu di a mbei. Lesi Lukasi 15:1-7, nöö piki di hakisi aki:
Andi di soni aki ta lei i u Jehovah?
Lesi Ezekiëli 33:11, nöö piki di hakisi aki:
Andi da wan fanöudu soni di u musu du u lei taa u ta tjali tuutuu?
Leti kumafa wan sikapuma ta booko hën hedi gaanfa ku dee sikapu fëën, sö nöö Jehovah ta booko hën hedi gaanfa ku dee dinima fëën
SO SËMBË TA TAKI TAA: „Mi ta fëëë taa dee gaanwomi o puu mi a di kemeente ee mi piki de andi mi du.”
Andi i bi o piki wan sëmbë di ta pakisei sö?
ANDI I LEI?
Ee u mbei wan gaan föutu, nöö Jehovah sa da u paadon, ma u musu lei taa u ta tjali tuutuu u di föutu di u mbei, söseei u musu dë kabakaba u na du di soni dë möön.
Andi i bi o piki?
Faandi mbei a bunu fuu konda finifini da Jehovah andi u du?
Andi u musu du ee u kë u Jehovah da u paadon u dee föutu dee u mbei?
Faandi mbei u musu go a dee gaanwomi u de heepi u, ee u mbei wan gaan föutu?
WOTO SONI DI I SA LUKU
Luku di fëlön aki fii si unfa Jehovah bi lei taa a abi tjalihati da wan womi kumafa a sikifi a Jesaaja 1:18.
Lesi di woto aki fii si unfa dee gaanwomi ta pooba u heepi wan sëmbë di mbei wan gaan föutu?
Lesi di woto aki fii si unfa dee gaanwomi ta lei taa de lobi wan sëmbë, söseei taa de abi tjalihati fëën, hii fa an ta tjali u wan föutu di a mbei.
Lesi di woto „Mi ben musu drai go baka na Yehovah,” fii si unfa wan womi di bi go disa di tuutuu lei bi ko si taa Jehovah hai ën ko nëën baka.
„Bijbel e kenki sma libi” (A Waktitoren, 1 u piki-deewei-liba 2012)