Ninifei bi dë wan foto di bi abi sömëni gaangaan wosu ku woto soni
I Bi Sabi Di Soni Aki Ö?
Andi pasa ku di foto Ninifei baka di pisiten di Jona bi go ala?
A wan pisiten u di jaa 650 bifö Keesitu, hën Asilia bi ko dë di möön gaan tii makiti a goonliba. Wan website bi taki taa dee kamian ka Asilia bi ta tii, bi „bigi kumutu a di së u sonu go u di foto Sipuusi te go miti sonu kumutu u di foto Ilan. Sömëni jaa longi de bi ta tii Egepiti seei tu”. Di mama foto u Asilia, di de ta kai Ninifei, bi dë di möön gaan foto a goonliba. A bi abi sömëni waitiwaiti djai, sömëni gaangaan könuwosu, söseei a bi abi wanlö gaangaan kamba ku buku. Soni di bi sikifi a dee peni sinkii na awooten Ninifei, ta lei taa Könu Asuubanipali bi ta kai hënseei „könu u di goonliba.” Di seei soni dë dee woto könu u Asilia bi ta du tu. Di a bi ta tii, nöö a bi djei kuma na wan sëmbë bi o sa tei Asilia ku Ninifei puu nëën maun.
Asilia bi dë di möön makiti tii u goonliba a di ten dë, nöö a bi tii möön hia köndë möön dee woto könu
Ma a di pisiten di Asilia bi ko dë wan nëbai foto, söseei di a bi ko abi möön makiti seei, hën di tjabukama u Jehovah de kai Sefanja bi taki taa: „[Jehovah] o . . . poi Asilia kaba a sösö. A o mbei Ninifei toon wan bookobooko kamian, söseei a o mbei a toon wan kamian di an abi wata, leti kuma wan sabana.” Boiti di dë, di tjabukama u Jehovah de kai Nahum bi taki taa: „Un musu fufuu soofu, söseei un musu fufuu goutu. . . . Soni an dë a di foto möön. A ko toon wan bookobooko kamian. . . Hii sëmbë di o si i, o kule da i. De o taki taa: ’Ambë fufuu soni puu u Ninifei sö?’” (Sef. 2:13; Nah. 2:9, 10; 3:7) Te sëmbë jei dee tjabukama woto aki, nöö kandë de ta hakisi deseei taa: ’Di soni dë o pasa tuutuu ö? Sëmbë o sa feti wini Asilia tuutuu ö?’ Wë a bi ta djei wan soni di an bi o sa pasa nöiti.
Ninifei ko dë wan foto di an abi na wan soni nëën!
Hii fa a bi djei kuma sö a bi dë tuutuu, tökuseei sëmbë bi feti wini Asilia! Wan kölö pisiten bifö di jaa 600 bifö Keesitu, hën dee sodati u Babilon ku dee u Media bi feti wini Asilia. Sëmbë an bi ta libi a Ninifei möön, söseei te u kaba fëën de bi fëëkëtë soni u di foto aki fiaa! Wan buku taki taa: „Baka sömëni jaa di foto aki an bi dë u si möön seei. Sëmbë ko sabi soni u Ninifei u di de lesi soni fëën a di Bëibel. Wan ölganisaasi di ta öndösuku awooten soni u Bëibel buta a Internet, bi taki taa: „Na wan sëmbë sabi ee di taanga foto fu Asilia bi dë tuutuu.” Ma a di jaa 1845, hën wan sëmbë di ta öndösuku awooten soni de kai Austen Henry Layard bi bigi ta öndösuku dee pisipisi soni u di foto Ninifei di bi dë jeti a goonbasu. Dee soni dee a feni bi ta lei taa Ninifei bi dë wan gaan waiti foto.
Di fasi fa dee tjabukama woto u Ninifei pasa finifini kumafa Jehovah bi taki, ta mbei u ta möön futoou dee soni dee sikifi a di Bëibel. U dë seiki taa dee soni di di Bëibel taki u dee peipei tii u di goonliba aki, o pasa tuutuu.—Dan. 2:44; Ako. 19:15, 19-21.