Hulda dou di maaka di a bi kë dou

EE I bi go köi wantu jaa a fesi a di piki paati u Indonesia de kai Sangir Besar, nöö a kan taa i bi sa si dii u dee sisa fuu a wata bandja. Sëmbë sabi de bumbuu a di pisiwata dë, u di de lo’ u peleiki dë u heepi sëmbë u de ko sabi soni u Bëibel. Ma a kan taa i bi si de a wata bandja dë di de bi ta du wan hii woto wooko.

De ta waka go a wata dendu go suku wanlö gaan sitonu tja ko a tela. So u dee sitonu ta bigi kuma bali. Te de tja de ko a wata bandja, nöö de ta sindo a wanlö piki pau bangi u de, nöö de ta naki de gbougbou ku hama booko pisipisi. De ta booko de ko piki möön ganian obo. Baka di dë, nöö de ta pii dee pikipiki pisi sitonu dë buta a kalëti buketi, nöö de ta tja de subi wan sikada go a de pisi. Te u kaba fëën, de ta lai dee sitonu a wanlö gaan saku, di sëmbë sa tja a toloki baka, nöö de sa tei de mbei gaan pasi.

Wan u dee sisa di u ta taki soni u de aki da Hulda. Di fasi fa soni dë dëën, mbei taa a sa ta wooko longi möön dee wotowan. A bi abi di guwenti u bai dee soni di dee sëmbë fëën abi fanöudu ku di möni di a ta kisi. Ma a di okasi aki a ta mbei möiti u buta möni a wan së, sö taa a sa du wan woto soni. A bi kë bai wan tablet, sö taa a sa ta wooko ku di JW Library^® app. Sisa Hulda bi sabi taa a sa wooko ku dee fëlön ku dee woto soni dee dë a di app aki u heepi sëmbë möön bunu a di peleikiwooko, söseei a bi sabi tu taa de sa heepi ën faa ko ta fusutan dee lei u Bëibel möön bunu.

Hiniwan mamate Hulda bi ta wooko tu juu langa möön fa a bi guwenti. A bi wooko a di fasi aki wan liba ku hafu, nöö a bi booko sitonu tjika u fuu wan piki toloki baka. Te u kaba fëën a bi feni möni tjika u bai di tablet.

Hulda bi taki taa: „Hii fa mi bi ta wei seei, söseei hii fa kamian bi ta hati mi, u di mi bi ta booko sitonu hii daka, tökuseei hesihesi mi bi fëëkëtë hii dee soni dë di mi bi bigi wooko ku di njunjun tablet u mi. A bi ta möön kösökösö da mi u seeka dee komakandi, söseei u du di peleikiwooko fajafaja.” Sisa Hulda bi taki tu taa di tablet bi heepi ën a di pisiten di di kolona siki bi bigi paaja, u di u bi musu ta du hii soni u di gemeente a Internet. U ta wai ku Hulda seei taa a dou di maaka fëën.