Libisëmbë abi wan „akaa” u?

SÖMËNI sëmbë ta biibi taa libisëmbë abi wan akaa. De ta pakisei taa te wan sëmbë dëdë, nöö di akaa ta disa di sëmbë sinkii, nöö an ta dëdë möönsö. U di di biibi dë paaja a hii di goonliba, mbei sömëni sëmbë ta foondo te de ko sabi taa di Bëibel an ta lei di soni dë. Wë nöö andi ta pasa ku u te u dëdë kumafa di Wöutu u Gadu ta taki?

ANDI DI BËIBEL TA LEI U?

U ta feni di wöutu akaa a di Saamakatöngö Bëibel. Di Hebelejën wöutu ruʹach ku di Giiki wöutu pneuʹma de puu ko akaa a di Saamakatöngö. Ma de an puu de a wan soifi fasi. Dee wöutu ruʹach ku pneuʹma da di kaakiti di ta hoi wan sëmbë a libi. De an kë taki akaa. Te u luku a Jakobosi 2:26, nöö di Saamakatöngö Bëibel taki taa: „Wan sinkii söndö akaa [pneuʹma] aan libi.” Te sëmbë lesi di tëkisi aki, nöö de ta mëni taa libisëmbë abi wan akaa. Ma te i bi o puu di tëkisi bumbuu ko a Saamakatöngö, nöö i bi o taki aki: „Wan sinkii di na abi di kaakiti u hoi ën a libi, dëdë.” Fëën mbei woto Bëibel puu dee wöutu ruʹach ku pneuʹma buta ko „libi böö” nasö „di kaakiti u hoi wan soni a libi”. Luku andi Kenesesi 6:17 ta taki u di ten di di Gaan Wata bi ko a goonliba: „Mi o tja wan Gaan Wata kumutu a hemel ko a goonliba, u feki hii libilibi soni di abi di libi böö puu” (Da Bijbel na ini Sranantongo). Hën da ruʹach ku pneuʹma da di böö nasö di kaakiti di ta hoi hii libilibi soni a libi.

Di sinkii abi kaakiti fanöudu u hoi ën a libi leti kumafa wan ladio abi sitolomu fanöudu faa wooko. Fuu sa fusutan di soni aki möön bunu, nöö un boo taki u wan ladio. Te i tuusi di tatai u di ladio go a di sitolomu baaku, nöö di sitolomu ta mbei taa di ladio ta sëndë, boo taa a ta ko a libi. Söseei a dë taa di sinkii abi wan kaakiti fanöudu u hoi ën a libi. Leti kuma di sitolomu, söseei di kaakiti di ta hoi u a libi an dë wan soni di abi fii, nöö an sa pakisei soni tu. Ma te di kaakiti di ta hoi u a libi an dë möön, nöö ’böö fuu ta koti, nöö u ta toona go a doti baka’, sö di psalöm sikifima bi taki.​—Psalöm 104:29.

A di Da Bijbel di dë a Saanatöngö, a sikifi a Pleikima 12:7 taa: „Nöö di doti [u di sinkii fëën] o toona go baka a di goon kumafa a bi dë fosu, nöö di akaa [ruʹach] ta toona go baka a Gadu di bi mbei ën.” Kumafa u bi si djunsu dë, di wöutu ruʹach an puu bunu ko a Saamakatöngö. Di Hebelejën wöutu ruʹach di sikifi aki, kë taki di böö nasö di kaakiti di ta hoi wan sëmbë a libi. Andi a kë taki taa di akaa nasö di libi böö ta toona go a Gadu? Di soni dë an kë taki taa di libi böö nango a hemel tuutuu. A kë taki taa te wan sëmbë dëdë, nöö di libi fëën dë a Jehovah Gadu maun. Hën da Gadu wanwan nöö abi di makiti u da sö wan sëmbë di libi baka.​—Psalöm 36:9.

A ta kötö u hati tuutuu u di u ko sabi taa di soni dë Gadu o du tuutuu da dee sëmbë dee dë „a geebi”! (Johanisi 5:28, 29) A di ten di Jehovah o toona weki sëmbë, a o mbei wan njunjun sinkii da wan sëmbë di bi dëdë, nöö a o buta di kaakiti dëën di o mbei taa a o sa libi baka. Di juu di sëmbë o toona weki baka o dë wan piizii ten seei!