WOTO 34
Unfa u sa lei taa u lobi Jehovah?
I si kuma i ku Gadu ko dë möön gaan mati sensi di i bigi lei soni u Bëibel ö? I bi o kë fii ku ën ko dë möön gaan mati ö? Ee sö a dë, nöö hoi a pakisei taa möön Jehovah ta si taa i lobi ën, möön hënseei o lobi i tu, söseei a o ta heepi i. Unfa i sa lei ën taa i lobi ën?
1. Unfa u ta lei Jehovah taa u lobi ën?
U ta lei Jehovah taa u lobi ën, te u ta piki hën buka. (Lesi 1 Johanisi 5:3.) An ta duwengi na wan sëmbë u piki hën buka. Ma a da hii u tuu di okasi fuu taki ee woo piki hën buka nasö ee wa o piki hën buka. Faandi mbei? U di Jehovah kë fuu piki hën buka ’ku hii u hati’ (Loomë 6:17). Di soni aki ta lei u taa an kë fuu piki hën buka u di u musu u du ën, ma a kë fuu du ën u di u lobi ën. De sikifi pisi 3 ku pisi 4 u di buku aki, u heepi i fii lei Jehovah taa i lobi ën, u di joo ta du soni di ta kai ku ën, söseei u di joo ta köni ku soni di an lobi.
2. Faandi mbei a sa dë wan taanga soni da u fuu lei taa u lobi Jehovah?
„Dee fuka u wan sëmbë di ta libi a wan leti fasi hia” (Psalöm 34:19). Hii u tuu ta feti ku taku pakisei di ta ko a u hati. Nöö boiti di dë, a sa pasa taa u abi möni fuka, nasö kandë sëmbë an ta libi bunu ku u, nasö kandë u abi woto bookohedi jeti. Te u dë ku bookohedi, nöö a sa taanga da u fuu du dee soni di Jehovah ta piki u fuu du. Dee bookohedi dee u abi sa mbei taa hesihesi seei u sa du wan soni di an bunu. Ma te i ta du andi Jehovah ta piki i fii du, nöö i ta lei taa i lobi ën möön hii woto soni. Söseei i ta lei taa i ta hoi iseei nëën. Te i du sö, nöö Jehovah seei o lei taa a ta hoi hënseei a i, nöö nöiti a o go disa i.—Lesi Psalöm 4:3.
WOTO SONI DI I SA LEI
Woo luku faandi mbei a dë fanöudu fii ta piki Jehovah buka, söseei woo luku andi sa heepi i fii ta hoi iseei nëën hii juu.
3. Wan soni di nama ku i tu
Kumafa di Bëibel buku Jöpu ta taki, nöö Saatan taki wan soni di an nama ku Jöpu wanwan nöö, ma a nama ku hii woto sëmbë tu di kë dini Jehovah. Lesi Jöpu 1:1, 6–2:10, nöö piki dee hakisi aki:
Te u luku di soni di Saatan bi taki, nöö faandi mbei Jöpu bi ta piki Jehovah buka?—Luku Jöpu 1:9-11.
Andi Saatan taki u hii libisëmbë te kisi iseei tu?—Luku Jöpu 2:4.
Lesi Jöpu 27:5b, nöö piki di hakisi aki:
Unfa Jöpu bi lei taa a lobi Jehovah tuutuu?
Jöpu bi lei taa a bi lobi Jehovah u di a bi hoi hënseei nëën
U ta lei taa u lobi Jehovah te u ta hoi useei nëën
4. Mbei Jehovah hati piizii
Lesi Nöngö 27:11, nöö piki dee hakisi aki:
Unfa Jehovah ta fii te i ta du soni ku köni, söseei te i ta piki hën buka? Nöö faandi mbei?
5. I sa hoi iseei a Jehovah
Di lobi di u lobi Jehovah ta mbei u ta kë konda soni fëën da wotowan. Nöö di hoi di u ta hoi useei nëën ta mbei u du di soni aki aluwasi soni ta taanga da u. Pëë di FËLÖN, nöö piki dee hakisi aki.
A ta taanga da i fii konda soni u Jehovah da woto sëmbë u?
Andi bi heepi Grayson a di fëlön fu an ta fëëë möön?
An ta taanga da u fuu hoi useei a Jehovah te u lobi dee soni dee a lobi, ku te u ta buuse dee soni dee a ta buuse. Lesi Psalöm 97:10, nöö piki dee hakisi aki:
Te i pakisei dee soni dee i lei, nöö andi da wantu soni di Jehovah lobi? Andi da wantu soni di a ta buuse?
Unfa i sa lei u lobi soni di bunu, söseei u buuse soni di an bunu?
6. A ta tja wini ko da u te u ta piki Jehovah buka
Hii juu a ta tja wini ko da u te u ta piki Jehovah buka. Lesi Jesaaja 48:17, 18, nöö piki dee hakisi aki:
I si kuma u sa biibi taa hii juu Jehovah sabi andi da di möön bunu soni da u ö? Faandi mbei i taki sö?
Unfa di lei di i ta lei soni u Bëibel ku di lei di i ta lei soni u di tuutuu Gadu Jehovah, mbei i feni wini?
SO SËMBË TA TAKI TAA: „Gadu aan toobi ku dee soni dee mi ta du.”
Un tëkisi i sa lesi da wan sëmbë u lei ën taa dee soni dee u ta du sa mbei Jehovah ta piizii nasö de sa mbei a ta tjali?
ANDI I LEI?
U ta lei taa u lobi Jehovah te u ta piki hën buka ku te u ta hoi useei nëën aluwasi soni ta taanga da u.
Andi i bi o piki?
Andi i lei a di woto u Jöpu?
Unfa i sa lei taa i lobi Jehovah?
Andi sa heepi i fii hoi iseei a Jehovah?
WOTO SONI DI I SA LUKU
Luku di fëlön aki fii si unfa i sa hoi iseei a Jehovah ku di kemeente.
„Te wan sëmbë ta hoi hënseei a i, nöö joo hoi iseei a di sëmbë dë tu” (16:49)
Lesi di woto aki fii ko sabi möön soni di Saatan taki u libisëmbë.
„Yob e tan du san reti” (San na a boskopu fu Bijbel? pisi 6)
Luku di fëlön aki fii si unfa njönkuwan sa lei taa de lobi Jehovah.
Luku di fëlön aki fii si unfa njönkuwan sa lei taa de ta hoi deseei a Gadu te woto njönkuwan ta du ku de.