WOTO 35
Unfa u sa du soni a wan bunu fasi?
Hii u tuu abi soni di u musu du. Gaansë u dee soni dee u ta buta taa u kë du, sa tja bunu nasö hogi ko da u. Dee soni aki sa poi u ku Jehovah nasö de sa mbei u ku ën ko dë möön gaan mati. Kandë u musu taki naasë woo libi, un wooko woo du, nasö ee woo tööu. Te u ta du soni di ta kai ku Jehovah, nöö woo abi wan bunu libi.
1. Unfa di Bëibel sa heepi u te u musu du wan soni?
Ufö i du wan soni, nöö begi Jehovah be a heepi i, söseei öndösuku soni a di Bëibel fii ko sabi unfa Jehovah ta pakisei u di soni di i kë du. (Lesi Nöngö 2:3-6.) A so soni di u kë du, Jehovah da u wëti di ta lei u gbelingbelin andi u musu du. Di möön bunu soni di u sa du te a dë sö, hën da fuu du soni kumafa dee wëti fëën ta taki.
Ma, unfa a dë ee di Bëibel an abi wan wëti di ta piki i gbelingbelin andi i musu du? Tökuseei Jehovah o lei i „di pasi ka i musu waka” (Jesaaja 48:17). Unfa a o du ën? Wë di Bëibel abi mama wëti di sa tii i. Dee mama wëti aki da lei di ta heepi u fuu ko sabi unfa Gadu ta pakisei u wan soni, söseei unfa a ta fii. Möön gaanfa, u ta ko sabi unfa Gadu ta pakisei u wan soni te u ta lesi wan woto u Bëibel. Te u ko sabi unfa Gadu ta pakisei kaa, nöö nëën ufö u sa du soni di ta kai ku ën.
2. Andi da wantu soni di u musu hoi a pakisei ufö u du wan soni?
Di Bëibel ta taki taa: „Wan köni sëmbë ta luku bunu ka a ta buta futu” (Nöngö 14:15). Di soni aki kë taki taa ufö u du wan soni, nöö u musu kai pakisei bunu a di soni di u kë du. Te i ta kai pakisei a di soni di i kë du, nöö hakisi iseei: ’Un mama wëti u Bëibel ta kai ku di soni aki? Ee mi du di soni aki a o mbei mi háti ta fon mi ö? Di soni di mi o du aki o mbei woto sëmbë naki futu ö? Ma di möön fanöudu soni, mi o mbei Jehovah hati piizii ö?’—Detolonomi 32:29.
Jehovah abi di leti u piki u andi bunu ku andi an bunu. Te u ko sabi dee wëti ku dee mama wëti fëën, söseei te u ta du andi de ta taki, nöö sö u ta seeka di háti fuu faa ta wooko bunu. Nöö te u du wan soni di an bunu, nöö u háti ta fon u (Loomë 2:14, 15). Te di háti fuu ta wooko bunu, nöö a o heepi u fuu ta du bunu soni.
WOTO SONI DI I SA LEI
Woo luku unfa dee mama wëti u Bëibel ku di háti fuu ta heepi u fuu du bunu soni.
3. Be di Bëibel tii i
Unfa dee mama wëti u Bëibel sa tii u te u musu du wan soni? Pëë di FËLÖN, nöö piki dee hakisi aki.
Andi da wan fanöudu soni di Jehovah da u pasi fuu sa du?
Faandi mbei Jehovah da u pasi fuu sa taki da useei andi u kë du?
Andi a da u u heepi u fuu sa wooko ku di leti di u abi u taki da useei a wan bunu fasi?
Lesi Efeise 5:15, 16 u si wan mama wëti u Bëibel. Baka di dë, nöö taki unfa u sa „wooko ku di ten fuu a wan bunu fasi” u . . .
lesi di Bëibel hii juu.
ko dë wan möön bunu mujëë nasö wan möön bunu womi, nasö wan bunu mama nasö tata nasö mii.
nango a dee komakandi.
4. Seeka di háti fii faa ta wooko bunu
Te di Bëibel abi wan wëti di ta lei u gbelingbelin andi u musu du, nöö an ta dë wan taanga soni da u fuu sabi andi u musu du. Ma unfa a dë te di Bëibel an abi wan wëti di ta lei u andi u musu du? Pëë di FËLÖN, nöö piki dee hakisi aki.
Andi di sisa a di fëlön du u háti fëën bi sa ta wooko bunu, söseei u du soni di ta kai ku Jehovah?
Faandi mbei wa musu hakisi wotowan u de piki u andi u musu du, te a dë wan soni ka useei musu taki andi woo du? Lesi Hebelejën 5:14, nöö piki dee hakisi aki:
Ka fuu mbei woto sëmbë piki u andi u musu du te a nama ku wan soni ka useei musu taki andi woo du, nöö andi useei musu ko sabi?
Andi Gadu da u di sa heepi i u di háti fii ta wooko bunu, söseei fii du bunu soni?
Leti kumafa wan kaita ta lei i ka i musu go, sö nöö di háti fuu ta tii u a u libi
5. Lesipeki di fasi fa wotowan ta si soni
Sëmbë sa du soni a tookatooka fasi. Unfa u sa lei taa u ta lesipeki di fasi fa wotowan ta du soni? Boo luku tu woto:
Di fosu woto: Wan sisa di fula hia jesi baaku, nöö a ta bisi linga a de tuu, foloisi go a wan kemeente ka di soni dë ta toobi dee woto sisa.
Lesi Loomë 15:1 ku 1 Kolenti 10:23, 24, nöö piki dee hakisi aki:
Te i luku andi dee tëkisi ta taki, nöö andi di sisa di fula dee hia jesi baaku sa du? Andi i bi o du ee i dë makandi ku wan sëmbë di háti fëën ta toobi ën u du wan soni, ma di u fii háti an ta toobi i u du di soni dë?
Di u tu woto: Wan baaa sabi taa di Bëibel an ta kuutu di bebe di sëmbë ta bebe daan, ma tökuseei a buta taa an o bebe daan. De kai ën go a wan piizii, nöö a si woto baaa ta bebe daan.
Lesi Peleikima 7:16 ku Loomë 14:1, 10, nöö piki dee hakisi aki:
Te i luku andi dee tëkisi ta taki, nöö andi di baaa sa du? Andi i bi o du ee i dë makandi ku wan sëmbë di háti fëën an ta toobi ën u du wan soni, ma di u fii háti ta toobi i u du di soni dë?
Andi sa heepi i fii du bunu soni?
1. Hakisi Jehovah faa heepi i fii sabi andi i musu du.—Jakobosi 1:5.
2. Öndösuku soni a di Bëibel, söseei a dee buku fuu fii sa feni mama wëti di sa heepi i. Söseei i sa go fan ku baaa ku sisa di taanga a di biibi.
3. Pakisei ee di soni di joo du dë o mbei i háti fon i, nasö ee a o toobi di háti u wotowan.
SO SËMBË TA TAKI TAA: „I abi di leti u du andi i kë. Na booko i hedi ku andi woto sëmbë ta taki”
Faandi mbei u musu booko u hedi ku di fasi fa Gadu ku woto sëmbë ta pakisei?
ANDI I LEI?
Woo sa du bunu soni te u ko sabi unfa Jehovah ta pakisei u wan soni, söseei te u ta pakisei ee di soni di woo du dë o heepi wotowan nasö ee a o tja hogi ko da de.
Andi i bi o piki?
Andi o heepi i fii du soni di ta kai ku Jehovah?
Unfa i sa seeka di háti fii faa ta wooko bunu?
Unfa i sa lei taa i ta lesipeki di fasi fa wotowan ta si soni?
WOTO SONI DI I SA LUKU
Lesi di woto aki fii si unfa i sa du bunu soni fii ku Gadu ko dë möön gaan mati.
„Teki bosroiti di e gi Gado grani” (A Waktitoren, 15 u piki-deewei-liba 2011)
Luku di fëlön aki fii si unfa Jehovah ta lei u andi u sa du.
Luku di fëlön aki fii si andi bi heepi wan womi faa du wan soni di bi ta taanga dëën.
Lesi di woto aki fii si unfa u sa du soni di ta kai ku Jehovah, te wëti an dë a Bëibel di ta lei u gbelingbelin andi u musu du.
„Yu abi wan Bijbel wet fanowdu gi ala sani?” (A Waktitoren, 1 u tuwalufumu-liba 2003)