WOTO 47
I dë kabakaba u dopu ö?
I ko sabi sömëni soni u Jehovah di i lei soni a di Bëibel. A musu u dë sö taa i tooka so soni a i libi fii sa du dee soni dee i lei. Ma kandë tökuseei wan soni dë di ta tapa i fii buta i libi a Jehovah maun, nöö i dopu. A di woto aki, woo taki u wantu soni di sa mbei a taanga da wan sëmbë faa dopu, söseei andi i sa du u dee soni dë an tapa i.
1. Un hia soni i musu sabi ufö i sa dopu?
Ee i kë dopu, nöö i musu „sabi di tuutuu lei” (1 Timoteo 2:4). Di soni aki an kë taki taa i musu sabi hii soni u Bëibel di sëmbë ta hakisi i, ufö i sa dopu. Sëmbë di ta dini Jehovah, dee dopu sömëni jaa seei ta lei soni u Bëibel go dou jeti (Kolosën 1:9, 10). Ma i musu sabi dee möön fanöudu lei u di Bëibel. Dee gaanwomi u di kemeente o heepi i fii si un hia soni i sabi.
2. Andi da wantu soni di i musu du ufö i sa dopu?
Ufö i dopu, nöö i musu „tjali u dee zöndu fii . . . nöö i bia libi.” (Lesi Tjabukama 3:19.) Di soni aki kë taki taa i ta tjali gaanfa u dee zöndu dee i bi du, nöö i ta hakisi Jehovah faa da i paadon. Boiti di dë, i musu ta mbei möiti u na du soni di an bunu, söseei i musu dë kabakaba u libi a wan fasi di ta kai ku Gadu. Nöö wan woto soni di i musu du tu, hën da i musu bigi nango a dee komakandi, söseei i musu bigi nango a di peleikiwooko kuma wan peleikima di an dopu jeti.
3. Faandi mbei ja musu fëëë u dopu?
So sëmbë ta fëëë taa de an o sa du di soni di de paamusi Jehovah. A dë so tuu taa so juu joo mbei föutu, leti kuma dee womi ku dee mujëë dee bi ta dini Jehovah, di di Bëibel ta taki soni u de. Ma Jehovah sabi taa u da zöndu libisëmbë, nöö woo ta mbei föutu. (Lesi Psalöm 103:13, 14.) Jehovah ta wai ku i te i ta mbei hii möiti u piki hën buka! A o heepi i, nöö a ta piki u taa „na wan soni sa paati u ku di lobi di [a] lobi u”.—Lesi Loomë 8:38, 39.
WOTO SONI DI I SA LEI
Woo luku unfa di sabi di joo ko sabi soni u Jehovah möön bunu, ku di da di joo ta dëën pasi faa heepi i, o heepi i u na wan soni tapa i fii dopu.
4. Ko sabi Jehovah möön bunu
I musu sabi hia soni u Jehovah ufö i sa dopu ö? A dë fanöudu fii ko sabi ën bumbuu fii sa lobi ën, söseei fii sa du soni di ta kai ku ën. Pëë di FËLÖN fii si andi bi heepi sömëni sëmbë a hii së u goonliba dee bi ta lei soni u Bëibel, u de bi sa dopu. Baka di dë, nöö piki di hakisi aki.
Andi bi heepi dee sëmbë a di fëlön u de bi sa dopu?
Lesi Loomë 12:2, nöö piki dee hakisi aki:
I ta biibi hii dee soni di di Bëibel ta lei i ö? I ta biibi taa dee Jehovah Kotoigi ta lei sëmbë tuutuu soni ö?
Ee i ta biibi taa sö a dë, nöö andi i sa du?
5. Na mbei na wan soni tapa i fii dopu
Te u buta taa woo buta u libi a Jehovah maun, nöö u dopu, nöö u ta miti sömëni bookohedi. Ee i kë si wan woto di nama ku di soni aki, nöö pëë di FËLÖN, nöö piki dee hakisi aki.
Un bookohedi bi ta miti Narangerel a di fëlön, nöö andi a bi du faa bi sa dini Jehovah go dou?
Unfa di lobi di a bi lobi Jehovah bi heepi ën faa pasa dee bookohedi aki?
Lesi Nöngö 29:25 ku 2 Timoteo 1:7, nöö piki di hakisi aki:
Andi sa heepi u fuu finga futu da dee bookohedi fuu?
6. Biibi taa Jehovah o heepi i
Jehovah o heepi i fii du soni di ta kai ku ën. Pëë di FËLÖN, nöö piki dee hakisi aki.
Faandi mbei di womi di bi ta lei soni u Bëibel bi ta fëëë u dopu?
Andi a bi lei di bi heepi ën faa bi ko ta möön futoou Jehovah?
Lesi Jesaaja 41:10, 13, nöö piki di hakisi aki:
Faandi mbei i sa dë seiki taa joo sa du di soni di i bi paamusi Jehovah di i buta i libi nëën maun?
7. Lei taa di lobi di Jehovah lobi i dë gaan soni da i
Möön i ta pakisei unfa Jehovah lobi i tjika, möön joo ta tei ën u bigi, söseei möön joo kë dini ën u nöömö. Lesi Psalöm 40:5, nöö piki di hakisi aki:
Undi u dee soni di Jehovah du da i i ta möön tei u bigi?
Di tjabukama Jelemia bi lobi Jehovah ku di wöutu fëën, nöö a bi ta tei ën u bigi seei taa a bi ta tja di në u Jehovah. A bi taki taa: „Di mi feni dee wöutu fii, hën mi njan de, hën mi bigi ta piizii. Awa, na piki wai mi ta wai, u di mi ta tja di në fii, Jehovah” (Jelemia 15:16). Piki dee hakisi aki:
Faandi mbei a dë wan apaiti soni u dë wan Jehovah Kotoigi?
I kë dopu fii ko dë wan Jehovah Kotoigi ö?
Wan soni ta tapa i fii dopu ö?
Andi i pakisei taa i musu du fii sa dopu?
SO SËMBË TA TAKI TAA: „Mi ta fëëë taa ma o sa du dee soni dee mi o paamusi Jehovah te mi dopu.”
Sö ii ta pakisei tu ö?
ANDI I LEI?
Jehovah sa heepi i fii pasa hiniwan bookohedi di sa tapa i fii dopu.
Andi i bi o piki?
Un hia soni u Bëibel i musu sabi fii sa dopu?
Andi ku andi i musu du fii sa dopu?
Faandi mbei ja musu fëëë u dopu?
WOTO SONI DI I SA LUKU
Lesi di woto aki fii si faandi mbei i musu kë dopu.
„I kaba fii tei dopu ö?” (Di Hei Wakitimawosu u gaanliba 2020)
Lesi di woto aki fii si andi i sa du ee so soni ta tapa i fii dopu.
„Andi ta tapa mi u mi tei dopu?” (Di Hei Wakitimawosu u gaanliba 2019)
Luku di fëlön aki fii si andi bi heepi wan womi faa finga futu da dee soni dee bi ta mbei a taanga dëën faa dopu.
Bigibigi wan womi de kai Ataa bi ta biabia u dopu. Luku di fëlön aki fii si andi bi heepi ën faa dopu.