WOTO 38
Lei taa i ta si di libi u gaan soni
Somëni soni dë di u sa du u di libi suti da u. Hii fa u ta abi bookohedi, tökuseei so soni dë a di libi di sa mbei u ta dë waiwai. Unfa u sa lei Jehovah taa u ta si di libi di a da u u gaan soni? Nöö andi da di möön fanöudu soni di u sa du u lei taa u ta si di libi u gaan soni?
1. Faandi mbei u musu si di libi u gaan soni?
U musu lei taa u ta si di libi u gaan soni, u di a dë wan kado di di lobi hati Tata fuu Jehovah da u. Hën da „di sëmbë di ta da libi”. Hën mbei hii libilibi soni (Psalöm 36:9). „Hënseei ta da hii sëmbë libi, hën ta da i böö, a ta da i hii soni” (Tjabukama 17:25, 28). Jehovah da u dee soni dee u abi fanöudu fuu sa dë a libi. Ma boiti di dë, a seeka soni da u fuu sa ta piizii u di libi.—Lesi Tjabukama 14:17.
2. Unfa u sa lei Jehovah taa u ta si di libi di a da u u gaan soni?
Sensi di i dë a i mama bëë dendu, hën Jehovah ta booko hën hedi ku i. Di santa jeje u Gadu bi mbei wan dinima fëën de kai Dafiti taki taa: „I bi si mi di mi bi dë a mi mama bëë dendu” (Psalöm 139:16). Di libi fii dë wan gaan dii soni a Jehovah wojo. (Lesi Mateosi 10:29-31.) A ta hati Jehovah gaanfa seei te wan sëmbë kii wan woto sëmbë ku hënseei kë, nasö te a kii hënseeia (Ëkisodesi 20:13). Söseei a ta hati Jehovah te u ta du soni di sa mbei u lasi u libi, nasö di sa mbei woto sëmbë lasi de libi. Te u abi lesipeki da di libi fuu ku di libi u woto sëmbë, nöö u ta lei taa u ta si di libi di Gadu da u u gaan soni.
WOTO SONI DI I SA LEI
Woo luku wantu fasi fa u sa lei taa u ta si di libi di Gadu da u u gaan soni.
3. Sölugu iseei bunu
Dee Keesitu sëmbë dee buta de libi a Gadu maun, ta tei hii di libi u de u dini Jehovah. A dë kuma de da Gadu di sinkii u de kuma wan paima. Lesi Loomë 12:1, 2, nöö piki dee hakisi aki:
Faandi mbei i musu sölugu iseei bunu?
Andi da wantu fasi fa i sa du di soni aki?
4. Köni ku soni di sa mbei ju nasö woto sëmbë kisi makei nasö dëdë
Di Bëibel ta da u taanga fuu ta köni ku soni di sa mbei u kisi makei. Pëë di FËLÖN fii si wantu soni di i sa du u hogi an miti i.
Lesi Nöngö 22:3, nöö taki unfa ju ku woto sëmbë sa du soni fu wan kisi makei te . . .
un dë a wosu.
un dë wooko.
un ta du sport.
iseei ta lëi wan wagi, nasö te un sindo a wan wagi.
5. Lesipeki di libi u wan mii di dë nëën mama bëë dendu
A wan nöngö fasi, Dafiti bi taki unfa Jehovah ta buta pakisei a wan mii di dë nëën mama bëë dendu. Lesi Psalöm 139:13-17, nöö piki di hakisi aki:
Na un ten Jehovah ta bigi konda di libi u wan mii? Te di mama seti di bëë naa te a pai di mii?
Di wëti di Jehovah bi da dee Isaëli sëmbë fu awooten bi ta tjubi wan mama ku di mii di dë nëën bëë dendu. Lesi Ëkisodesi 21:22, 23, nöö piki dee hakisi aki:
Unfa Jehovah bi ta si ën te wan sëmbë bi mbei di bëë u wan mujëë pasa, ma na ku hënseei kë a bi du ën?
Unfa Jehovah bi o feni ën ee wan sëmbë bi du di soni aki ku hënseei kë?b
Unfa i feni di fasi fa Jehovah ta si di soni aki?
A sa pasa taa wan mujëë di ta si di libi kuma wan gaan dii soni, sa si kuma di möön bunu soni di a sa du, hën da u puu bëë ee woto fasi an dë. Lesi Jesaaja 41:10, nöö piki dee hakisi aki:
Ee de ta duwengi wan mujëë faa puu bëë, nöö na ambë a sa go suku heepi? Faandi mbei?
SO SËMBË TA TAKI TAA: „Wan mujëë abi di leti u taki da hënseei ee a o puu bëë nasö ee an o puu bëë, biga hën sinkii.”
Andi ta mbei i biibi taa Jehovah ta si di libi u wan mama ku di mii di dë nëën bëë dendu kuma wan gaan dii soni?
ANDI I LEI?
Di Bëibel ta lei u taa u musu si di libi di Jehovah da u u gaan soni, söseei u musu lei taa u abi lesipeki da di libi. Ma na da di libi fuu wanwan nöö, ma da di u woto sëmbë tu.
Andi i bi o piki?
Faandi mbei di libi u wan libisëmbë dë wan gaan dii soni a Jehovah wojo?
Unfa Jehovah ta feni ën te wan sëmbë kii wan woto sëmbë ku hënseei kë?
Faandi mbei i ta tei di libi di Gadu da u u bigi?
WOTO SONI DI I SA LUKU
Luku di fëlön aki fii si unfa u sa da Jehovah tangi u di libi di a da u.
Lesi di woto aki fii si ee Gadu sa da wan mujëë di bi puu bëë paadon.
Lesi di woto aki fii si unfa Gadu ta si ën te sëmbë ta mbei piizii di sa mbei de kisi makei.
’„Extreme sporten”—Dient u het risico te nemen?’ (Ontwaakt!, 8 u tinimu-liba 2000)
Unfa a dë ee wan sëmbë kë kii hënseei? Luku unfa di Bëibel sa heepi ën.
„Mi wani dede—Bijbel man yepi mi te mi abi a firi fu wani kiri misrefi?” (Woto a di website fuu)
a Jehovah ta booko hën hedi gaanfa seei ku dee sëmbë dee lasi hati (Psalöm 34:18). A ta fusutan te wan soni ta da u gaan bookohedi sö tee taa u kë kii useei, nöö a kë heepi u. Ee i kë si unfa a ta heepi u, nöö lesi di woto „Mi wani dede—Bijbel man yepi mi te mi abi a firi fu wani kiri misrefi?”, di dë a di pisi „Woto soni di i sa luku” a di woto aki.
b An dë u dee sëmbë dee bi puu bëë ta booko de hedi taa de bi du sö wan soni, u di Jehovah dë kabakaba u da de paadon. Ee i kë sabi möön soni, nöö luku di woto „San Bijbel e taki fu puru bere?” di dë a di pisi „Woto soni di i sa luku” a di woto aki.