Unfa Gadu ta si buuu?

Buuu da wan gaan fanöudu soni. Na wan fuu bi o dë a libi ee wa bi abi buuu. U di Gadu hën mbei u, mbei a abi di leti u piki u unfa u musu wooko ku buuu. Andi a taki u buuu? U sa njan buuu ö? Nasö u sa mbei data da u buuu ö? Unfa i sa du soni di ta kai ku Gadu te a nama ku buuu?

1. Unfa Jehovah ta si buuu?

Jehovah bi piki dee dinima fëën na awooten taa: „Di libi u hii pei libilibi soni dë nëën buuu dendu” (Leifitiki 17:14). Jehovah ta si buuu kuma libi. Di libi da wan apaiti kado di Gadu da u, nöö a dë wan santa soni nëën wojo, fëën mbei buuu santa tu.

2. Un fasi u wooko ku buuu Gadu an lobi?

Jehovah bi piki dee fosu dinima fëën taa de an musu njan buuu. (Lesi Kenesesi 9:4 ku Leifitiki 17:10.) A bi toona taki di soni aki di a bi mbei dee baaa u di Tii Kulupu bi piki dee Keesitu sëmbë u fesiten taa „de an bi musu njan . . . buuu”.​—Lesi Tjabukama 15:28, 29.

Andi a kë taki u na njan buuu? Ee wan data piki i taa ja musu bebe daan, nöö ja bi o bebe ën, nasö u? Ma i bi o njan soni di abi daan a dendu ö? Nasö i bi o mbei de sipoiti ën go a i sinkii dendu ö? Kwetikweti. Leti sö nöö a dë ku di wëti u Gadu di ta taki taa wa musu njan buuu. Hën da wa musu bebe buuu, wa musu njan wan mbeti di di buuu fëën an kule kumutu nëën sinkii, söseei wa musu njan na wan soni di de mbei ku buuu.

Ma unfa a dë ee data kë wooko ku buuu u kula u? So u dee fasi fa data ta wooko ku buuu an ta kai ku dee wëti u Gadu. Wan u dee fasi aki, hën da te de kë da i buuu, nasö wan u dee woto pisi u buuu di de ta kai bë buuu cel, weti buuu cel, buuu plaat ku plasma. Ma i abi woto fasi fa data ta wooko ku buuu, nöö wëti an dë a di Bëibel di ta kuutu dee fasi dë. So juu dee data ta wooko ku woto pikipiki soni di de ta puu a dee fö fanöudu pisi u buuu u mbei deesi u kula sëmbë. So juu de ta kula wan sëmbë ku di buuu u di sëmbë seei. Te a dë sö, nöö hiniwan sëmbë musu taki da hënseei unfa a kë u data kula hën.a​—Galasia 6:5.

WOTO SONI DI I SA LEI

3. Tei data heepi di ta kai ku Jehovah

Andi sa heepi i fii sa tei data heepi di ta kai ku di fasi fa Gadu ta si buuu? Pëë di FËLÖN, nöö taki faandi mbei a dë fanöudu fuu du dee soni aki.

FËLÖN: Andi i sa buta taa joo du te a nama ku buuu? (5:47)

• Begi fii sa du soni ku köni.​—Jakobosi 1:5.

• Öndösuku mama wëti a Bëibel di sa heepi i, nöö luku unfa i sa fiti de a i libi.​—Nöngö 13:16.

• Mbei möiti u ko sabi andi da dee peipei fasi fa data ta kula sëmbë a di pisiwata ka i ta libi.

• Mbei möiti u ko sabi dee peipei fasi fa data ta kula sëmbë dee ja bi o kë.

• I musu dë seiki taa di soni di joo du an o mbei háti fon i bakaten.​—Tjabukama 24:16.b

• Hoi a pakisei taa na wan sëmbë, na i manu nasö i mujëë, na dee gaanwomi, nasö di sëmbë di ta lei i soni u Bëibel, musu piki i andi i musu du te a nama ku soni ka iseei musu taki andi joo du.​—Loomë 14:12.

• Sikifi dee soni dee i kë buta a pampia.

4. Dee Jehovah Kotoigi ta suku di möön bunu fasi u kula

U sa feni fasi u kula di bunu, di an ta pasa di wëti u Gadu di nama ku buuu. Pëë di FËLÖN.

FËLÖN: Takimakandi ku Professor Massimo P. Franchi, M.D. (1:36)

Lesi Titusi 3:2, nöö piki di hakisi aki:

• Faandi mbei u musu ta fan a wan saapi fasi ku lesipeki te u ta fan ku dee data?

Soni di Keesitu sëmbë an ta tei	Keesitu sëmbë seei musu taki ee de o tei de
A. Plasma	Pikipiki soni di sëmbë ta puu a plasma
B. Weti buuu cel	Pikipiki soni di sëmbë ta puu a weti buuu cel
C. Buuu-plaat	Pikipiki soni di sëmbë ta puu a buuu-plaat
D. Bë buuu cel	Pikipiki soni di sëmbë ta puu a bë buuu cel

5. Te a nama ku dee pikipiki soni di te ta puu a dee fö fanöudu pisi u buuu

Buuu paati a fö fanöudu pisi​—bë buuu cel, weti buuu cel, buuu-plaat ku plasma. Nöö a dee fö fanöudu pisi u buuu aki, de ta toona puu sömëni woto pikipiki soni. De ta kai dee pikipiki soni aki a baakatöngö bloedfracties.c De ta tei so u dee pikipiki soni aki u kula so siki, söseei u tapa di buuu u wan sëmbë di kisi makei fu an kule möön.

Te a nama ku dee pikipiki soni di de ta puu a dee fö fanöudu pisi u buuu, nöö hiniwan Keesitu sëmbë musu taki da hënseei ee a o tei de nasö ee an o tei de. So Keesitu sëmbë sa buta taa de an o tei na wan deesi nasö na wan fasi u kula di nama ku dee pikipiki soni aki. Ma woto Keesitu sëmbë ta taki taa de háti an ta toobi de u de tei deesi nasö wan fasi u kula ka de ta wooko ku dee pikipiki soni aki.

Pakisei di hakisi aki te joo du wan soni di nama ku data heepi:

• Unfa mi bi o konda da wan data faandi mbei ma kë tei so u dee pikipiki soni di de ta tei puu a dee fö fanöudu pisi u buuu?

ANDI I LEI?

Jehovah kë fuu si buuu kuma wan santa soni.

Andi i bi o piki?

• Faandi mbei Jehovah ta si buuu kuma wan santa soni?

• Unfa u du sabi taa di wëti u Gadu di ta taki taa wa musu njan buuu, kë taki tu taa wa musu tei buuu?

• Andi o heepi i fii sa du soni di ta kai ku Gadu te a nama ku fasi u kula di nama ku buuu?

WOTO SONI DI I SA LUKU

Lesi di woto aki fii sabi andi i musu du te data kë wooko ku di u fii seei buuu u kula i.

„Aksi fu leisiman” (A Waktitoren, 15 u tinimu-liba 2000)

Lesi di woto aki fii si andi i musu hoi a pakisei te i musu taki ee joo tei dee pikipiki soni di data ta puu a buuu.

„Aksi fu leisiman” (A Waktitoren, 15 u höndima-liba 2004)

Lesi di woto aki fii si andi bi heepi wan data faa ko si taa di fasi fa Jehovah ta si buuu da wan gaan fanöudu soni.

„Ik aanvaardde Gods kijk op bloed” (Ontwaakt!, 8 u tuwalufumu-liba 2003)

Luku di fëlön aki fii si unfa dee gaanwomi dee dë a di Hatiwosu Komite ta heepi dee baaa ku dee sisa u de.

Jehovah ta heepi dee sëmbë dee dë ku suwaki (10:23)